NA RUKUDA DA PA-PAHURUNGU 24
24
I Paulu ba dakàla-ya paraï da tau Yahundi
1Palàngangu-ka lima mbua lodu, na Ratu Bokulu Anania dàngu da liku uru Yahundi lua-danyaka la Kaiharia, ba da-kariangu haàtu mamàhi pa-kareuku, na ma-tamungu Taratulu. Da-hurungu la hanggana na nggumbunuru Peliku hi da-patàka-nya na pakàla wàdanya i Paulu. 2Ba da-paau-nyaka i Taratulu la hangga, tungu-nanyaka panii ba nakàla-ya i Paulu,
“Umbu Nggumbunuru Ma-mangarangu! La kambu pareta-mu nyumu mànjaku ailulu-nanyaka na tanama. Dàngu paraï ruku pingumu dangu-maka mahàmu pa-paloku ndumana na banjaru-ma. 3Mbuu ndàbada nuda ma-kataku hàmu etiha dàngu ma-pawili diri matiki-manya duma jiapa nda la nggimbu. 4Tàka ka àmbu lalu danguna na rehi na pa-wàrungu la ngeramu nyumu umbu, ku-kamahi-nggau kau patingi àrunya na pa-pakàla wàma na manda pirana. 5Nyuma matoma-nya na tau yiana ba pa-hanggàmaru wànguya ba tau mambana pa-kuwaru-ya. La nggi - nggi na-patumbu pa-pariwatu wàngu la honga tau Yahundi, dàngu nyuna-maka na liku uruda la kukutungu-da da tau Naharitu. 6Màlai mbàda kamangu-manaka làti pa-pairaku-ya na Umana i Miri, tàka hi mayàpa-maaya. [Màta ka rapatu-ya tundunya na uku anggama-ma wàma duma làti. 7Tàka na kimunda Lihia nawàhi-maaya welingu lai nyuma, 8dàngu na-wuangu pareta mbuu ndàbada da makàla-ya ka da-hurungu lai nyumu umbu.] Jàka upareha-yaka na tau yiana, napa murongu wiki-mamu-nyaka dumu na pa-tubangu-na na pakàla wàmanya nyuna,” wàna. 9Da tau Yahundi da maninja lai nu dakàla-mbuya i Paulu dàngu hi da-padeni hàlanya na papanii-na i Taratulu.
I Paulu ba na-kahiri wikina la hanggana i Peliku
10Hàla na nggumbunuru hi na-pamaü-nya i Paulu ba peku-naka nyuna papanii. Ka panii-nanyaka i Paulu, “Kupi-manggau umbu ba nda pira mbua ndau bia-muka la pa-katangu hakimu la paraingu yiana. Nunaya duku na pakiri-na hi nahàmu na etinggu la pa-kahiri wikinggu la hanggamu nyumu umbu. 11Pekuna umbu kau ma-nginjiru wiki-munya, nàhu ndedi na-làpahu-mbu hakambulu dàmbu lodu ba kulua la Yeruhali pa-hamayangu. 12Dàngu ndedi handàkangu-mbu ba ningu tau Yahundi matoma-ngga ba ku-pahànggangu dàngu haàtu-mbu jàka ndia la pa-pauhingu tau la pa-pariwatungu ka la Umana i Mirikai ka la uma bungguru haukai jàka ndia la nggi - nggikai yiahu la paraingu. 13Nyudai duda nda peku wuangu-ada mbuti na pakàla wàdangga na pa-patàka-da lai nyumu umbu. 14Tubana nyuna nyungga ba kulumu-nya na Alada da boku la mangilu-ma tundunya na pa-ajaru-na i Yehu, nanjala ba wàda nyuda. Tàka nyungga duku kuwai-mahapa mbuu ndàbada da pa-tulihu daa la Mbukuna i Muha dàngu la Mbukuda da wunangu dangu. 15Hama tuna nyuda jia-mayai duku nyungga ba ninya na monungu-nggu lai Ala, napa tiangu taï mbuu ndàbana na tau naluri beliya ba nahàla pameti – ka tau hàmuya, ka tau akatu-yakai. 16Jia-duyaka hi ku-pamukaru paha - hàmungu, ka pekuna na eti dalunggu ka na-yahangu hanggangu lai Ala hamanai la angunggu patau.
17Ba pa-làngangu-ka pira mbua ndaungu ba nda ningga la Yeruhali, beli-nggunyaka lai nu la pangàndi àmahu pandula wànya na banjaru-nggu dàngu la pawotu-nya kameti maraku i Ala. 18Jiaya ba talànga paloku-nggunya nuna-duka ba datoma-ngga la Umana i Miri, ba kuhàla pa-panjàpu-ya na lii hawari wiki. Nda ningua tau dangu angunggu nyungga dàngu nda ningumbu ma-pariwatungu lai nu la rehi nuna. 19Da maninja lai nu jia-aha ba mapira-ha da tau Yahundi welingu la porupenihu Ahia. Nyuda bàdi làti ka ninja lai yiahu ka da-patàka-nya na pa-pakàla wàda lai nyumu, jàka ningudu hangia pakàla wàdangga. 20Jàka ndia màtawa da tau yiada ka da-pawuwa wiki-danya nggàra akatu-yaka nu na patoma-da lai nyungga ba jiaya na ngàndi-dangga la hangga Batangu Anggama. 21Na patoma-da hangia jua-ana na kareuku na pawunda-nggu la hanggada nyuda, nu na kareuku: Ba rapatu-ka nyungga la lodu nàhu jia-aya na kirina ba kuwaiya na tau meti napa naluri beli ba wànggu,” hi wàna.
22Hàla i Peliku ba mbàda dangu-manaka na papina rukuna na pa-ajaru-na i Yehu, panjàpu-nanya na-rapatu-ya nuna na palakara. “Napa kubota-yaka na palakara yiana jàka natàka-ka na kimunda Lihia,” wàna. 23Hàla pareta-nanjaka da parawira da mapawai ngaba la padaiya i Paulu, ka da-padaingu la papàtu-ya i Paulu, na nyuna ka dawàngu pa-kalongga-ya hawutu, dàngu ka da-pahia-nja da anguna pangàndi-nya ngga - nggàra ana pakalana-na.
I Paulu la hanggada i Peliku dàngu i Nduruhila
24Palàngangu pira mbua lodu mai-nanyaka i Peliku, da-kariangu dàngu na papaha-na, i Nduruhila, kawini Yahundi-ya. Hàla i Peliku na-paràhangu tau palua papiti-ya i Paulu, tunaka nu patingi-nanyaka i Paulu ba nawàlahu-ya na ruku pawai lai Yehu Karitu. 25Tàka ba na-pangala-nyaka na kareuku-na i Paulu ba napanii-ya na pa-tànjingu, na roputu wiki dàngu na hukungu la Lodu Hupu Njàpuna, ka mangàdatu-nanyaka i Peliku hi napanii, “Nàhu lua kàdiwa, napa handàka ka ku-paaunggau-ka jàka ningu kalongga-na,” wàna. 26Làti duna i Peliku monungu-nanya pa-ngalangu àmahu welingu lai Paulu. Jiaya làti hi nakàli paràhangu tau papaau-nya i Paulu la papanii dànya nyuna.
27Palàngangu dàmbu ndaungu, i Perikiu Petuhu hilu-nanyaka i Peliku panggumbunuru. Tàka i Peliku ka nambuha-wangga tau Yahundi ba wàna, màta bia-nanya i Paulu la uma kapàtangu.
Currently Selected:
NA RUKUDA DA PA-PAHURUNGU 24: KAM
Highlight
Share
Compare
Copy
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
