2 KORINITU 3
3
Da ma-lumungu la pa-ràndingu bidi
1Màla nu la paita wàngu mata beri hama tuna wotungu-manya wikima? Jàka ndia ma-ngalangu-maka bàdi huratu wotungu ndumami nyimi, jàka ndia welingu lai nyimi, hama tuna na pa-karuhi-da tau hawiangu? 2Nyimi wiki jia-makaika huratu wotungu-ma nyuma, na pa-tulihu daa la etima nyuma, dàngu na papina dàngu na pambaha-na nimbihu-na na tauka. 3Nyuda wiki daita-maya, nyimi ba beringu huratu pa-tulihu-na i Karitu-kai na pa-pangàndingu la ruku lumungu-ma nyuma. Na huratu nuna na pa-tulihu, na panda wàngu wai mitingu, tàka wàngu Ngahuna i Ala na maluri; dàngu nda pa-tulihu la watu tulihu-aya, tàka la eti tau.
4Hi mapanii tuma nu, ka ba mapi hàmu-dunya i Ala rukuna i Karitu. 5Nda nggàra-a latana duma ka mapanii wàngu ba àtalu-ma nyuma-maya la pa-palaku-ya na paràma yiana, tàka i Alama duna na mawua-nggama pa-duluku wàngu. 6Nyuna na ma-paduluku-kama la pa-lumungu ndumana na hau pa-ràndingu bidi; na pa-ràndingu na ma-kanderungu la Ngahuna i Ala, nda la uku pa-tulihu-a. Nadu na pa-tulihu ba mangàndi pameti wànguya, tàka na Ngahuna i Ala ba ma-wuangu luriya.
7Ba pandoi-ya dàngu ba huratu-ya la watu nu na pa-ràndingu mangàndi meti, na handaraku-na i Ala na-hanggilangu turuku-ya na matana i Muha. Na handaraku-na nu kanjupu hanggilangu-ya hi lupa nda da-duluku pa-tàngaru-ya na matana i Muha paraï banjaru Ihirailu, jiapakai ka mbàda ngeri màlina la rehi nu na hanggilangu la matana. Ba tuna, jàka pa-karàngi wànya hanggilangu ma-bokulu tungu nu ba pandoi-ya na pa-ràndingu mangàndi meti, 8ka narihi-aipa duna pa-hanggilangu ba pa-karàngi-ya nu na pa-ràndingu pawua-na na Ngahuna i Ala. 9Jàka tuna nu na-hanggilangu-na na pa-ràndingu na mahuku-nya na tau, ka narihi-maka duna pa-hanggilangu na pa-ràndingu na ma-pakalongga-ya na tau la pa-papeku dàngu i Ala. 10Peku-mbuna papanii, na ma-hanggilangu la wungana, nda na-hanggilangu-apa ba na-pahipungu ka na hanggilangu la rehi nàhu. 11Jàka tuna numaka na hanggilangu-na na hangia na ma-torungu hawutu, ka narihi-aipa duna pa-hanggilangu nu na hangia na ma-palupangu.
12Paraï ruku ba ninya na monungu-ma la matungu nu, jia-duyaka hi matoru mbeni papanii tuma nu. 13Nyuma duma nda hama tuana i Muha ba na-palumburu-nya na matana ka àmbu naita-ya paraï banjaru Ihirailu nu na-kamàda dàngu na munangu-na la matana i Muha na handaraku-na i Miri. 14Na kanandingu-da nyuda na-palumburungu-ka. Dàngu lupa toma la lodu nàhu na kanandingu-da na-palumburu-nya tamalingu ba dambaha-ha da mbuku rukuna na pa-ràndingu ndai. Hi na-ngalangu pa-tawainggahu nuna na tamalingu, mbulungu-ana jàka pambulu dànya i Karitu. 15Nàhumbu, jàka mbaha-danja da mbukuna i Muha, na-palumburu-manjapa tamalingu na kanandingu-da. 16Na nyuna na haàtu na tau jàka na-hurungu lai Miri, na tamalingu nuna pa-wainggahu-ya welingu la matana.#Na ndalaru 16 pekuna ka tuna yia na haleli-ndanya: Tàka na tamalingu nuna pekuna pa-bunggahu-ya welingu lai nyuna hama tuna na paniina na Huratu Matua rukuna i Muha: “Na tamalingu-na pa-bunggahu-ya welingu lai nyuna ba jiaya na hurungu-na lai Miri,” wàna. 17Na, na Miri ba wànda ni kawai, jiaya i Ngahu-duka. Dàngu jàka ngginiya na Ngahuna i Miri, lai nu nimbunya na marandeka. 18Nàhu nyuta duta mbuu ndàbanda, nda na-palumburu-anjapa tamalingu da matanda, tàka nyuta paninu-ndanyaka na hanggilangu-na i Miri Yehu. Dàngu jia-duyaka tapanga - ngalangu pa-panjilungu la pahama-nya Nyuna; parukangu pamandai parukangu-ndanyaka pa-hanggilangu. Na hanggilangu nuna ma-pawelingu lai Ngahuya, tàka na Ngahu nuna jiaya i Miri.
Currently Selected:
2 KORINITU 3: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
