2 KORINITU 2
2
1Jia-duyaka ba tuna nu hi mbàda bota-nggunyaka la panda hilu mai pa-tadalu-kai na pa-handuka eti wàmi. 2Nadu jàka nyungga-madua-ika ma-pahanduka-kai, ka hilu nggamuipa na ma-pamanda-ngga nyungga, jàka nda jiakai nyimi tau pambàda pa-handuka-nggu eti? 3Nuna-duya na pakiri-na hi ku-tulihu-ya yiana na huratu lai nyimi. Nda kubihu-a kai pa-handuka-ka nu ba ku-tadalu-kai, ma ba nyimi-duipa bàdi ma-panggaüru-ka nyungga. Nadu ba kupi-manya jàka ku-nggaüru nyungga, jiangu-mai dimi nyimi bai nggaüru ndàba. 4Nyungga ba ku-tulihu-nggai nyimi wàngu hawina dàngu mbotu etinggu ba wa - wàrada da wai matanggu. Na pawuku-nggu màta nyuda ka da-hawina nda wànggu-anggai, tàka màta kai pàdanya nyimi ba lalu mbuha-nggunggai.
Ba jàmanja da manjala
5Jàka ningu tau ma-pawiti-nya na pa-hawina wàngu, na ngerana nuna nda hanggangu-nanya lai nyungga-a, tàka hanggangu-nanya lai nyimi mbuu ndàbami jàka ndiakai hawiangu da angumi nyimi. Nyungga nda ku-mbuhangu patika pa-hanggàritu-nya na tau nuna. 6Na tau tungu nu, toma-mana-nyaka jàka nahuku-nya madangu la hongami nyimi. 7Nàhu nyimi màta kai jàmanya dàngu kai pamanda-nya ka àmbu natika pàku pa-hawina dàngu hi lupa nambota monungu. 8Jiaya hi kukarai-kai, kai paita belinya nyimi ba mbuha langatàka-maminya. 9Hi ku-tulihu-nggainya yiana na huratu, na pawuku-nggu ka kukama wànja wànggunggai, jàka danunju mànu-duha da panau - panaungu-nggu wànggu. 10Jàka mijàma-madu-nyaka nyimi na tau na manjala lai nyimi, kujàma-madunyai duku nyungga na tau nuna. Nadu jàka kujàma-madu-nyaka – jàka tuba ningudu tau paràka pa-jàmangu – kujàma-manya duku nyungga la hanggana i Karitu ndumana na hàmumi nyimi. 11Hi kiri tunggu nu ka àmbu ningu ngia papeku-na i Kambàliku la pa-kuaha-ta nyuta, nadu ba tapi-madunja da pa-pakaka-na.
Na pakadiku-na i Paulu la Tarua
12Ba jiayaka na tàkanggu la Tarua, ka bobaru-ya na Lii Mànangu rukuna i Karitu ba wànggu, i Miri na-bunggahu-manggaka ànda la paràma la ngabana lai nu. 13Tàka nda nangudu-a na etinggu nyungga, nadu ba nda ku-pahàmburu dànya na angu dedinda i Titu lai nu. Ka pa-belingu-nggunyaka langu la tau lai nu, hi kulaku la Makandonia.
Na talu rukuna i Karitu
14Tàka malangu-na i Ala! Nyuna na mairu ngàndi-kama la paï mànangu-na i Karitu, nadu ba maluri pa-mbulungu-du dàngu Nyuna. I Ala nawà-nggama nyuma, ka peku wewarungu-na na rukuna i Karitu, hama tuna na mbi kati na ma-hambungaru la nggi - nggini. 15-16Nadu nyuma ba hama tuna wau kaminyangu mbii kati-kama patunu-na i Karitu ndumana i Ala. Hanggangu la tau da ma-orangu la pa-làjaru, nyuma yia hama tuna wau meti ma-pameti-kama; tàka hanggangu la tau da pa-pamànangu, hama tuna wau mbii kati-kama nyuma na mangàndi paluri wàngu. Màla, nggamuka nu na ma-ngalangu pa-palundu-nya na wai ngera nuna? 17Nyuma duma nda hama tuna na tau hawiangu ba nadangu, na mabili batu wànya na lii welingu lai Ala, ba hama tuna malanja pa-danggangu-ya. Matànji-maha-duma da pawuku - pawuku-maka, nadu ba i Ala wiki-maka duma na matu-nggama wai ngerama. Dàngu naita wiki-makama i Ala hi ma-patàka-nya na lii nuna ba atana i Karitu-kama.
Currently Selected:
2 KORINITU 2: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
