2 KORINITU 4
4
Na banda welingu la awangu la kanaingu welingu la tana
1Hi makata-nya nyuma na paràma yiana ruku mila etina i Ala-aya. Jiaya ba tuna nuduka hi nda nambota na monungu-ma nyuma. 2Nyuma duma nda mawàngu-a huri kapàtangu na pa-makia wàngu. Nda ma-mbuhangu-a paràma kahilingu dàngu la pa-panjingu njànganya na puluna i Ala. Ba malumu-nya nyuma i Ala wàngu-manya eti yahangu-mama tundunya na pambuha-na. Jiaduya nu hi ma-monungu, mbuu ndàbana na tau ka na-pabila dàngu hàmu-nggama daa la eti daluna. 3Jàka ndedi manyàmu hàmu-manyapa na Lii Mànangu na pa-bobaru-ma, ka mbulungu da tau da ma-orangu la pa-làjaru-duaka nu da manda manyàmu-nya. 4Na wàndi akatu na ma-kuaha-ya na pinu tana yiana na-pandàda-njaka da kanandingu-da nu da tau da manda pawai. Nyuna-maka na madi - dimbaku-ha nyuda ka àmbu peku ita-danya na handaraku welingu la Lii Mànangu na ruku bokulu-na i Karitu, ba jiaya na hadana i Ala. 5Na lii langu pa-patàka-manggai nu nda lii langu ruku wikima nyuma-aya. Na lii langu nuna jiaya na lii langu rukuna i Yehu Karitu; ba Miri-maya duna Nyuna; tàka nyuma duma ba atami-nggama lumuna i Karitu. 6I Ala na mapanii: “Màtawa welingu la kapàtangu ka nahunga na harii,” na mawàna, jiaya i Ala nuna-maka na ma-pahunga-ya na harii daa la etinda, ka peku habola-na na kanandingu-nda la pa-manyàmu-nya na hanggilangu-na i Ala na ma-handaraku la matana i Karitu.
7Tàka na banda pangahu nu na ma-manandangu mangàndi wànya na wikima nyuma yiana na manda palingu, na pa-pandoi welingu la tana. Jia ba tuna nu lohangu-nanyaka ba lai Alaya duna nu na bokulu kuaha, nda lai nyuma-aya. 8Pahada ngàndingu-kama nyuma welingu la nggi - nggini, tàka nda ma-ngiangu-a la ma-panggàpi nggihungu. Ma-hondaru-mai nyuna, tàka nda jia njàpu-ana na monungu-ma. 9Dangu mamuhu-nggama, tàka ndedi ma-handàkangu-ma padidi meha-kama. Dàngu jiapa ka kàli palu panjoru-kama-kadu, ba tuna nda mameti-a. 10Naingu-mana ba mapàda-nya na metina i Yehu la tàda ihima, ka peku wuwana na lurina la tàda ihima nyuma. 11La ngala lurima, naingu nàpu-mana-nggama pameti wàngu lumuna i Yehu, màta ba tuna nu, ka peku wuwana na lurina i Yehu la tàda ihima nyuma ni na manda payatangu. 12Jia ba tuna nu na meti ràma-nanya daa lai nyuma, na nyuna ma-hawola wànya ba jiaya na luridu na maràma daa lai nyimi.
13Daa la Huratu Matua ningu palara lii wàngu na pa-tulihu: “Ba kupawai, jia-duya hi ku-kareuku,” na mawàna. Na, jiaya na ringgitu pawai tungu nuduka, hi ma-kareuku, nadu ba mapawai. 14Mapi pa-ihiku-manyaka i Ala na mambàda paluri beliya i Miri Yehu, napa na-paluri belimbu-kama dàngu i Yehu, hi na-karia-nggai nyimi, dàngu nyuma la hanggana. 15Mbuu ndàba-daka nuda ndumana na pahàmu wàmi nyimi-maka. Nadu jàka manaü danguna na tau na mangala-nya na mbuhangu-na i Ala, manaü dangumbu-dunai na hamaya pamalangungu na pa-patàkangu lai Ala; nuya na-pamangara wànya i Ala.
Luri wàngu pawai
16Nuna-duya na latana nyuma hi nda nanjàpu-nggama monungu. Jiapa-kadu la paita wàngu mata manaü ruha-mamanya, ba tuna daa la eti daluma ba pa-pabidi-ya-padua hau lodu - hau lodu. 17Dàngu na handuka na manda pirana yiana, na paera-ma ba nda nggi tuna mandaina, napa ba hanggau wàma-nyaka na pa-ohangu na manda ningu hamangu dàngu na ma-palupangu. Na pa-ohangu nuna naliru lànga-nyapa jàka pamenja-nya dàngu nuna na handuka. 18Nadu nyuma duma nda ma-tàngaru niaha jàka ngga - nggàraha da paita wàngu mata, tàka jiaya na panda ita duma. Na paita wàngu mata nda nggi mandai-ana ba na-torungu, tàka na panda ita wàngu mata nunaya duna na ma-mandai pa-lupangu.
Currently Selected:
2 KORINITU 4: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
