2 KORINITU 1
1
1Angu dedi kabungguru-na i Ala la Korinitu dàngu mbuu ndàbana na banjaru-na i Ala la nggubulu Akaya.
Nyungga, Paulu, pa-pahurungu-na i Karitu Yehu, na pawotu ruku pawuku-na i Ala, anguma i Timutiu na angu dedinda, 2ma-monungu màla àru i Ala Amanda dàngu i Miri Yehu Karitu, ka na-wuangu-ya na kanyuru dàngu mànjaku lai nyimi.
I Paulu na-pamalangu-nya i Ala
3Pa-wotungu-ya i Ala, na Amana na Mirinda i Yehu Karitu. Nyuna Ama malalu hàmu etiya, dàngu Nyuna na Ala na mawua-nya pa-màndungu wàngu eti na tauka. 4Nyuna ma-pamàndu-nja da etima la nggàra handuka bia na pahunggu-ma, ka pekuna ba da-màndungu tuda nu da etima na pawua-nanggama i Ala, ma-ngalangu-mbu nyuma pa-pamàndu-nja da etida mbuu ndàbada da tau la dalu handuka-da. 5Da mayila - mayila da pahunggu-na i Karitu mbàda dangu-madaika duma da pahunggu-ma. Dàngu rukuna i Karitu da etima nyuma màndungu langatàka-madanya-ka. 6Era hungguma ma-handuka, nuna jia-mayaka na pa-màndungu wàda da etimi lumuna na pa-mànangu wàmi. Jàka pamàndu-njaka da etima nyuma, nyimii dimi da-màndungu wàngumbu da etimi, hi peku màkami la pa-pajàrungu la handuka - handuka-mi, hama tuna na pahunggu-ma nyuma. 7Na kawàndi mànuma na pimanya nyuma ba nda ana nggidiku-da da etima rukuna na ngerami nyimi, nadu ba pi-mamanggai nyimi bai mayila dànggama nyuma. Dàngu jiambu-duyaka ba tuna nu nyimi hi pamàndu karia-nggama dàngu nyuma.
8Angu dedi! Màta ka dapinya wàmanggai rukuna na handuka na pahunggu-ma la ngabana la Ahia. Na mayila na pa-hambeta-ma lalu mbotuya ba mapàda-nya, hi lupa nda ningu-mapa monungu-ma la paluri; 9ba mapàda-nya hama tu-ma-anaka na hukungu meti. Tàka hi natumbu na matuna nu, màta ka àmbu ma-monungu màka wikima, ka mbulungu mamonu-nya i Ala-a na ma-paluri tau meti. 10Nyuna-maka na ma-pamara-kama welingu la hanggàri bokulu pameti wàngu.#hanggàri bokulu pameti wàngu: da lawiti ndai da manda pirada: na meti na ma-wirungu. Dàngu nyuna-mbuka napa na ma-pamara-kama la lodu - lodu malamiri, nadu ba lai Nyunadu na ngia pa-monungu-ma. 11Mapi-manya paraï ruku da hamayangu-mi ndumama nyuma, i Ala napa nahili pamara-kama welingu la ma-hanggàri. I Ala na-orangu la pa-kanyuru-nggama ba hema-nanja da hamayangu-mi da madangu ndumama nyuma, dàngu jia-duyaka napa hi nadangu na tau na ma-pamalangu-nya i Ala.
I Paulu ba na-panjilu-nya na pa-pakaka-na
12Nyuma ma-hamemu, nadu daa la eti daluma ba pi-kawàndi-mama-nyaka na lurima la pinu tana yiana – ri - rihi na papuingu-ma dàngu nyimi – ba mbàda palaku-manyaka wàngu eti tànji#eti tànji: da lawiti ndai da manda pirada: matua. eti yahangu-mamaka. Nu ba malaku-nya, nda wàngu-manya manggàna taua, tàka wàngu-manya na kapàru na pawua-nanggama i Ala. 13-14Da pa-tulihu-ma lai nyimi jia-aha da hangia - hangia da paràka pambaha-mi dàngu da paràka pa-jàngapu-mi. Nàhu ndai jàngapu hàmu-a-kama, tàka ku-monungu napa mi-jàngapu paha - hàmu-nggama. Jia ba tuna nu, napa la rehi tàkana i Miri Yehu, hamemu wàmi-nggamaka nyuma, hama tuna nyumambu ba ma-hamemu wànggai nyimi.
15Ruku pimanya nunadu-ka làti nyungga la wungana hi ku-pakakangu la pa-tadalu-kai, ka peku ngalangu-mi kanyuru pandua wundangu. 16Nyungga ku-patikingu pa-tadalu-kai, nàhu ba talànga lakunggu la Makandonia dàngu hi kuhili laku li lai nyimi jàka kubeli, ka peku ndula-mingga la àndanggu ba ku-pangalangu la Yundia wànggu. 17Tàka ku-panjilu-nyaka na pa-pakaka-nggu, màla, tanda-nanyaka nu ba nda na-màndungu na wininggu? Ba jiaya na patikingu-nggu la pa-pakaka-nya nuna, wàngu-nggunya eti wiki-ma-angguka, tiangu “wua” hi wànggu, tàka hili tiangui “ndia” hi wànggu? 18Lumuna i Ala na ràka pawai, ba kuràndi-kai, nda “wua” dàngu nda “ndia”-aya. 19Nadu i Yehu Karitu, na pa-bobaru-danggai nyimi paraï da i Hila dàngu i Timutiu dàngu lupa nyungga wiki nda tau “wua” dàngu “ndia”-aya. Tàka làti duna Nyuna jia-mayaka na pahema wàna “wua” ba wàna i Ala. 20Nadu ba lai Nyuna-maka i Ala, “wua” ba wàna rukuda mbuu ndàbada da paràndi-na. Palata-nya nuna-maka nyuta “Amingu” hi wànda lai Ala lumuna i Yehu Karitu. Hi kiri tuma nu ka pekuna ba maraku-nya i Ala. 21I Ala wikima duna mangu rukungu nyuta hi ta-màndungu la pa-pambulungu dàngu i Karitu; Nyunama duna na mapindi pawingu-nda nduma wikina. 22Ndumana nuna-maka i Ala hi na-pakaràngi-ya ba mangu-nanda nyuta, hi nawua-ndanya na Ngahuna daa la etinda, ba kawuku-ya rukuna nawua hàla-nandaha napa da paràndi-naka.
23I Alama duku na hakahii-nggu – nadu ba napinya na ihi etinggu – hi nda kutoma palua la Korinitu, nadu ka àmbu da-kahàdiku da etida wànggunggai. 24Nyungga nda ku-pambana-akai jàka nggàraya bàdi na pawaimi, nadu ba mbàda pawai langatàka-madu-mika lai Karitu. Nyungga duku ràma dà-anggunggai ka peku parukangu-mi bai pa-ohangu.
Currently Selected:
2 KORINITU 1: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
