1 KORINITU 9
9
Da hàkuda dàngu da wai ngerada da pa-pahurungu
1Màla nyungga yia nda tau ma-kalewa-aka? Nyungga nda pa-pahurungu-aka? Ndedi kuita-mayapa nyungga i Yehu, na Mirinda? Màla nu nyimi nda rukunggu nyungga-akai ba kuràma ndumana i Miri? 2Jàka nda dapeka-kai da tau hawiangu nyungga yia ba pa-pahurungu-ka, nyimi làti nu ana hawutu ràka peka-mami! Nadu na lurimi ba tau Karitu-kai, mbutiya ba pa-pahurungu-ka nyungga.
3Jàka ningu tau ma-pulungga, napa kuhema tunggunya yia: 4Màla nyungga nu nda ningu hàkunggu la pa-ngalangu pangangu dàngu pa-ngunungu rukuna na paràma-nggu? 5Làti jàka ningu papaha-nggu, màla nda ningu hàkunggu nyungga pa-kariangu haàtu papaha ma-karitu angunggu nàhu ba kulaku hama tuna ba wànguda da anguna paluhu i Miri Yehu dàngu da pa-pahurungu hawiangu, hamangui i Peturu-mbu? 6Jàka ndia hi didiyai Mbàranamba-a dàngu nyungga pa-pabukungu la pa-pamukarungu wikima pahimbu wiki ana paluri wàma? 7Nda ningua anggota tanatara pa-kawàri la pa-mbayaru wiki nduma lurina daa la pamba mahada ngàndi pabera! Nda ningua tau tungu woka ma-pamula angguru la wokana tàka hi nda nanganjai da angguru ihi wokana! Nda ningua mini pawangu na maradangu mbimbi tàka hi nda naunu-njai da wai huhu mbimbina!
8Nyungga hi ku-jakaru-nya nuna, nda palata wànggunya na pakàli ndàmangu-a na pawàngu hau lodu - hau lodu, tàka nuna ni-manyaka daa la Huratu Matua. 9Daa la mbukuna i Muha ni-manyaka na pa-tulihu, “Na hapi na ma-talànga yila wari puruhu uhu nggàndumu àmbu patanga-dunya na ngorana,” na mawàna. Jiaya na hapika nu na pa-hamata-na i Ala? 10Jàka ndia napa hi nyuta tau pawuku-na? Tubangu-ma nuna na pa-tulihu ndumanda nyutama nadu na tau na maràma woka dàngu na tau na ma-patimbu-nya na uhu nggàndumu, ràka-mana ba daràma ka ningu ana pangala-da hawiangu welingu la ihi woka, wàda. 11Nyuma ma-hàbaru-nggaika wini pangahu daa la lurimi. Ka jàka mamuti-hakaika da kanyuru pabanda-mi, màla karuhi-manya malalu dangu-maka nu welingu lai nyimi? 12Na tau hawiangu jàka ningu hàkuna la pa-monunggai nyimi, màla ka nda marihi nu la paningu hàkungu welingu lai nyuda?
Na nyuna ba tuna nyungga duku ndedi kuwa-anya na hàkunggu. Na belingu-na, màta ka kutanggu hàla bianya, màta ka àmbu ningu ma-paratahungu la pa-bobaru-ya na Lii Mànangu rukuna i Karitu. 13Mipi-manyaka duna angu dedi, da tau da maràma daa la Uma Ala, ba da-ngalangu pangangu daa la Uma Ala. Dàngu da tau da mapalokuha da kameti maraku ba da-ngalangu tangguda hawiangu la kameti pa-maraku wàngu lai nu. 14Tuna numbu i Miri mbàda kawuku-mana-nyaka, da tau da ma-bobaru-ya na Lii Mànangu, ba da-ngalangu bàdi paluri wàda welingu la lii pa-bobaru-da.
15Ba tuna nyungga ndedi ku-handàkangu-mapa duku pawàngu habata welingu da hàku nuda. Dàngu ba ku-tulihu-ya yiana na huratu nda jia-aya na pawuku-nggu màta ka wànjawa nuda nàhu hanggangu lai nyungga nda wànggua. Rihingu hàmu ka kumeti jàka kuwàru-ma-anyaka nuna na pa-hamemu wànggu. 16Nàdu, jàka jia-aya na bobaru-ya na Lii Mànangu welingu lai Ala, nda ningua hàkunggu la pa-hamemu wànya, nadu bai Ala-maka na ma-pareta-ka la palaku-nya nuna. Hanggàmaru-nggunyaka, jàka nda ku-bobaru-ya nuna na Lii Mànangu! 17Ngera hama tuna làti ba kulaku-nya na paràma nuna ka wàngu-nggunya eti wikinggu, peku-manaka duku ba ku-monungu la pa-ngalangu wunda. Tàka nyungga ba ku-bobaru-ya nuna na Lii Mànangu jia pàkuya ba pa-patanggungu-ka. Nyungga na-paràha-ngga i Ala la palaku-nya nuna. 18Jàka tuna nu ka nggàraka wundanggu? Yianaya na wundanggu: Ba peku bobaru-nggunya na Lii Mànangu wàngu nda ningu haàtu pa-pambotu-nggu matanggu wuangga wundanggu, nadu nyungga ba nda ku-karuhi-aha da hàkunggu ba ma-bobaru Lii Mànangu-ka.
19Nyungga ba nda nggamudu maata-ngga; nyungga tau kalewa-ka. Jiapa ka tuna nu, nyungga duku mbàda pa-jàmangu-ngguka wikinggu ka naata-ngga tau mbuu ndàbana. Hi kulaku-nya nu màta ka peku da - dangu-kina na patalu-nggu ndumana i Karitu. 20Ba kuhangga-nja da tau Yahundi, nyungga ku-panggàduku tau Yahundingu-ma, ka peku talu-nggunya na tau Yahundi ndumana i Karitu. Ba kuhangga-nja da tau da maluri tundunja da ukuna i Muha, na nggàduku-nggu hama tumana na ma-pamàndu-nja da uku nuda, làti duku ba nda ku-pamàndu-anja. Nu hi tunggu nu ka peku iru ngàndi-nggunja la pa-kikungu lai Karitu. 21Ba kuhangga-nja da tau nda Yahundi, na nggàduku-nggu hama tumana na tau nda Yahundi na maluri la hambeli ukuna i Muha. Nu hi tunggu nu màta ka peku iru ngàndi-nggunja ka da-kikingu lai Karitu. Na nyuna nda tanda-ana ba nda ku-manundu-nja da pareta-na i Ala; tàka jia-mayaka nu ba dakuahaka da pareta-na i Karitu. 22La padua-da da tau da ma-lamanga papida, nyungga na nggàduku-nggu hama tumana na tau na ma-lamanga papina, ka pekuna ba kuiru ngàndiha lai Karitu. Na kababa-na, nyungga duku màla ndàba bia nggubulu-na ndumana na tau mbuu ndàbana ka peku pamara-nggunya hawiangu welingu lai nyuda wànggu.
23Hi kulaku-nya nuna mbuu ndàbana lumuna na Lii Mànangu welingu lai Ala, ka pekunai duku ba ku-ngalangu kanyuru, wànggu. 24Mipi-manyaka angu dedi, la dalu parimbungu mbuu ndàbada da ma-parimbu dapalai, na nyuna haàtu-ana duna na ma-ngalangu wundana. Nu ka timi nu bàdi bai palai ka peku ngalangu-mi wundami. 25Nimbihu-na na tau na ma-pandàmangu wikina, na-roputu wikina la mbuu ndàbana. Hi tuna nu ba rinjungu-nanya ka pahàngalu-nya wàla ai pa-pahilapungu tanda talu, nu na wàla ai na maluu malaï. Tàka nyuta duta yia hi ta-roputu wikinda la hangia - hangia, ba rinju-ndanya na wàla ai pa-pahilapungu ka pahàngalu-nda na manda hilu malaï. 26Jia-duyaka nu nyungga hi kupalai dàngu ninya na pawuku-nggu na pambàda tiki hahangu. Hama tuna la parimbungu pa-patàkilu, nyungga nda àtalu tungu-anggu. 27Nyungga ku-pajàmangu wikinggu la pa-parajaku pa-mbangatu-ka hi lupa ku-manyàmu-nya. Hi kiri tunggu nu, nadu ba nda ku-mbuhangu, nyungga matanggu pawànda patama la parimbangu, nyungga wiki hi nda pa-pahia-nggai, wànggu.
Currently Selected:
1 KORINITU 9: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
