1 KORINITU 8
8
Na ngerada da pangangu da pambàda mangejingu la marapu
1Nàhu jiaha da pangangu pa-payemangu ba mangejingu la marapu. Tubangu-ma nyuna ba ningu mapanii, “Tapi-manya ba ningu ndàbaka pingunda,” na mawàna. Ba tuna na pingu na-pawiti-nya pangamba na tau, tàka na mbuhangu na-pahadangu anguna patau. 2Na tau na makaka-ya ba dangu papina, làti duna ndedi napi-anya na ma-tanjiku halawàla. 3Tàka na tau na mambuha langatàka-nya i Ala, natanda-maya duna paraïna i Ala.
4Na ngera ngangu pangangu da pambàda mangejingu la marapu, tapi-manya na marapu paninu maü-nanya na manda nimbunya duna làti. Dàngu tapi-manya na Ala ba haàtu-ana; nda hili ningu hawiangu. 5Tubanguma ba dadangu da pa-patamungu ala dàngu da miri; nu da maninja la awangu hamanai da maninja la pinu tanambu. 6Tàka nyuta duta, haàtu-ana na Ala, nu i Ama na ma-padika-nya mbuu ndàbana. Ndumana Nyuna-maka nyuta hi taluri. Dàngu na Miri jia-mayai ba haàtu-ana, nu i Yehu Karitu. Palinya Nyuna hi padika-nya mbuu ndàbana-ka, dàngu lumuna Nyuna nyuta yia hi taluri.
7Jiapa ka tuna nu, nda jia pi hàla-ananya nuna paraï tau. Ninja àmangu da mandàmangu pa-lumungu marapu. Jia ba tuna nu lundu nàhumbu dapàda-manyapa da pangangu da pambàda mangejingu la marapu, ba pangangu marapu-ha. Jàka danganja da pangangu nuda, da pàda-manya ba njala-danya; nadu na papida ba ndedi na-kapànduku-mapa. 8Làti duna da pangangu nda jia manaü pamàndu-adanya na pa-nuangu-nda dàngu i Ala. Jàka tanganja da pangangu nuda, nda ningua utungu ngga - nggàra pangalanda. Belingu-na jàka nda tanganja da pangangu nuda, nda ningumbui parunggi-nda ngga - nggàra.
9Na nyuna, pananjarungu! Napa hi ningu bia tau hawiangu manjala wànya – nadu na papina ba ndedi na-kapànduku – rukuna bau wàngu etimu la pawunda-ya jàka nggàra biaya. 10Na pawuku-nggu tuna nu: Ngera hama tuna nyimi ma-kapànduku papimi, ba talànga ngangumu la uma marapu. Tunaka nu hi ningu maita-kau bau mandapu pangangu lai nu. Na tau nuna jàka nda na-kapànduku na pa-kawana-na, màla nda rukumu nyumu nu hi natoru mbeni wàngu panganja da pangangu pambàda mangejingu la marapu? 11Ruku tuna nu, na pa-kawana-mu nyumu jiayaka na ma-panjàra-nya na pa-kawana-na na tau nuna na mandedi kapànduku papina. Làti hi nameti i Karitu lumuna na tau nunambu. 12Dàngu jàka utuyaka na njala tungu nu hangganja da angu dedi Karitu-mu – bau paruha-ya na pa-kawana-da nyuda da ma-lamanga – ka njala bokulu dumunyaka nyumu lai Karitu. 13Nunaya na kirina, jàka ruku pangangu ma-pawiti-nya hi nanjala na angu dedinggu, nyungga nda kuhili ngangu ndoku-apa duku tolungu. Raï ai duna hi nanjala na angu dedinggu, hi rukunggu nyungga biaka wànggu.
Currently Selected:
1 KORINITU 8: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
