1 KORINITU 7
7
Da paàrangu rukuna na lii lalei na lii mangoma
1Nàhu ka kupanii-ya na habata lii na maninya la huratu-mi wànggu. Na haàtu na tau mini jàka nda nalalei, nuna mahàmu-ya.#Na haàtu na tau mini jàka nda nalalei, nuna mahàmu-ya; jàka ndia: Jàka nda nalalei na haàtu tau mini, mahàmu-ya, wàmi nyimi. 2Tàka ka àmbu ningu ma-patitiru la patuya na hangia - hangia na manda jiaya, nahàmu-mapa nimbihu-na na tau mini ka ningu papaha-na, tàka na tau kawini ka ningu leina. 3Na lei màta ka na-palundu-nya na wai ngerana ba leiya hanggangu la papaha-na, dàngu na papaha màta ka na-palundu-nya na wai ngerana ba papaha-ya hanggangu la leina; nimbihu-da màta ka da-kawàra pa-lundungu wai ngerada. 4Na papaha nda na-kuaha wiki-aya na tàda ihina; na ma-kuaha-ya na tàda ihina na leina. Hamanai na lei nda na-kuaha wiki-aya na tàda ihina; na ma-kuaha-ya na tàda ihina na papahana. 5Àmbi pa-maraungu-du dua wikimi la ngera mapalei papahangu. Pekuna jàka nda pirana na mandaina, mili nyuda ba dadua ka da-kawàra pa-hamangu. Ba timi nu jiaya hi maràngga hamayangu, hi nda ningu maparatahu-nggai. Tàka ba tunaka nu, mi-kawàra pa-belingu bàdi, kai kawàra palihi la ngera mapalei ma-papahangu. Jàka nda timi nu napa na-titiru-kai wàndi akatu, nadu ba ndai màka pa-roputu wikimi la pa-itirungu.
6Ba kupanii-ya yiana nda hama tuna pareta-aya, tàka hama tuna panaungu-ya. 7Làti na parihi mbuhanggu mbuu ndàbana na tau ka natundu-ngga nyungga. Ba tuna haàtu - haàtu mbàda ningu-maka kanyuru mehana welingu lai Ala. Na haàtu ningu kanyuru tuna ni, tàka na haàtui ningu kanyuru tuna nu.
8Da tau da mandedi lalei mangoma dàngu da kawini da mambàda kawini meti lei, yiana-yaka na panaungu-nggu lai nyuda: Nahàmu-pa jàka jiapa-hapa ba daluri meha hama tuna nyungga. 9Na nyuna angu dedi jàka ndai màka pa-roputu wikimi, nahàmu-pa kai lalei kai mangoma. Nadu ba nahàmu-pa bai lalei bai mangoma, welingu ba na-ruwatu-kai itirungu-mi. 10Kulanja nyuda da mambàda lalei mangoma yiana-ya na paretanggu: (Làti nda nyungga-a ma-wuangu pareta, tàka i Miri duna.) Na haàtu na kawini na mambàda mangoma màtangu àmbu na-dunjaku-dunya na leina. 11Tàka jàka mbàda dunjaku-nanyaka, na-padaingu bàdi ba nda nahili mangoma, jàka ndia màta ka nabeli la leina. Dàngu na haàtu na mini lei àmbu na-pahewa-dunya na papaha-na.
12La hawia - hawiangu yiana-ya na panaungu-nggu – tàka panaungu-nggu nyungga-aya ndia i Miri-a – na tau Karitu na maningu papahangu kawini manda waiya i Karitu, tàka na papaha-na na-mbuhangu paluri dànya nyuna, na tau nuna àmbu na-pahewa dadunya na papaha-na. 13Dàngu na haàtu kawini Karitu na maleingu tau manda waiya i Karitu, tàka na leina na-mbuhangu paluri dànya nyuna, na papaha nuna àmbu na-pahewa dadunya na leina. 14Nadu na lei na manda pawai ràkana wàna-nyaka la paangu-nya na banjaru-na i Ala rukuna ba naleinya paraï papaha pambàda manguna i Ala. Tumbuna na papaha na manda pawai ràkana wàna-nyaka la paangu-nya na banjaru-na i Ala, rukuna ba na-papaha-nya paraï lei pambàda manguna i Ala. Jàka nda tuna nu, da anada hama tuna ana tau kapiru-duhaka, tàka pambàda reki-haka duda nu da anada ba angu banjaru-na i Alaha. 15Tàka nuna na tau na manda waiya i Ala ka na-dunjaku-nya na papaha-na jàka ndia na leina na ma-karitu, àmbu pamàndu-dunya. Na ngerana yiana na angu dedi kawini jàka ndia mini pa-hàlangu-nanyaka, nadu na pambuhana i Ala, nyimi kai luri papeku. 16Nadu nyumu angu dedi kawini, ba papaha-kau – na mambàda waiya i Miri – nggiki hama pi langatàka-munya nyumu ba nda peku pamàna-munya#nggiki hama pi langatàka-munya nyumu ba nda peku pamàna-munya; jàka ndia: nggiki hama pimunya ba nda peku pamàna-munya. na leimu? Hamanai nyumu angu dedi mini ba lei mambàda Karitu-kau, nggiki hama pi langatàka-munya nyumu ba nda peku pamàna-munya na papaha-mu?
Luriwa hama tuna ba na-kapipi-kau i Miri
17Màtawa haàtu - haàtu ka na-palànyapu-ya na lurina tundunya ba na-kapipi-ya paraïna i Miri, hama tuna na pambàda kawukuna i Ala ba napaau-nya la papawai lai Nyuna. Nunaya duku na kalaratu na pa-ajarunggu la hau kabunggu - hau kabungguru. 18Ngera hama tuna na tau na pambàda kàri ba na kataku-ya na paaungu-na i Ala, àmbu na-pakakangu-du la paàli-nya na tanda kàrina. Hama-mbunai na haàtu na pandedi kàri ba napaau-nya paraïna i Ala, na tau nuna àmbu nakarai-du la pakàri-ya. 19Nadu ba tundunya na kalaratu kàri jàka ndia ba nda patundu-nya, hamama-ada ba nda nggàra linguda. Na malingu duna jia-maaya ba katundu-nja da pareta-na i Ala. 20Màtawa haàtu - haàtu ka na-padaingu ba naluri hama tuna na hadana ba na-kataku-ya na paaungu-na i Ala. 21Ba napaau-nggau, nyumu ka atakau, àmbu handuka wadunya bau patandanya na rukuna nuna. Tàka napa jàka ningu pekuna bau pahàlangu, ka jiayaka hiu pahàlangu.#Tàka napa jàka ningu pekuna bau pahàlangu, ka jiayaka hiu pahàlangu; jàka ndia: Tàka ka jiapa ka napeku-kai bau pahàlangu, narihi hàmupa kau paloku paha - hàmu-maya na ngeramu ba atakau. 22Nadu na ata na mambàda pawai lai Miri, tauna i Miri-yaka na ma-pahàlangu. Dàngu na tau pahàlangu na mambàda pawai lai Miri, nyuna atana i Karitu-yaka. 23Mbàda palundu-mana-nggaika wilimi ba nakeikai paraïna i Ala. Jia-duya nu, àmbi pahiangu-du wikimi la paata-nggai tau. 24Ba tuna, angu dedi, jiapa nda nggikina na hadami ba paaunggai, màtawa ka na-padaingu na lurimi angu i Ala.
Ngerada da tau da mandedi lalei mangoma dàngu da kawini meti lei
25Nàhu na ngerada da tau da mandedi lalei mangoma. Na ngerana nuna nyungga ndedi ku-ngalangu ndokua pareta ngga - nggàra welingu lai Miri. Na nyuna ruku pa-namungu-na i Miri, nyungga ba tau ràka parongu-ka, màta ka kuwua-nja panaungu wànggunggai.
26Ba tapinya mbuu ndàbana na pahanduka wàngu na maora-nda la rehi nàhu, ba kureki-ya nahàmu-mapa na tau ka napadaingu paluri wànya na hada lurina nàhu. 27Jàka mbàda ninguka papaha-mu àmbu kehangudu pa-pahàlangu welingu la papaha-mu. Jàka ndedi ningu papaha-mu àmbu himbudu papaha-mu. 28Tàka jàka mulalei mu-mangoma, nuna nda njala-aya. Tumbuna na haàtu na bidi kawini jàka na-mangoma nda manjala-aya. Jia-aya, nyuda da malalei da ma-mangoma napa hangga-danya na handuka dangu. Nyungga duku màta ka peku hinggilu-da welingu la handuka nuda wànggu parinju-nggu.
29Na pawuku-nggu nyungga tuna nu, angu dedi: Nyuta nda nadangu-apa na kalongganda. Piti welingu nàhu na tau na mambàda ningu papahangu, màta bia ka naluri hama tuna na manda ningu papahangu-ya; 30na tau na mahii, màta bia ka naluri hama tuna tau manda handuka-ya; na tau na mariki, màta ka hama manda hawola-ya; na tau na mambàda kei, màta ka hama manda ningu ngga - nggàrangu-ya; 31dàngu na tau na maningu ulangu la ngera pinu tana, màta ka naluri hama tu biana ba nda nggàra ningu ulana. Nadu ba nda namandai-apa yiana na pinu tana, la dalu hadana na maninya nàhu, napa na-molungu!
32Na parinju-nggu màta nyimi kai pahàlangu welingu la handuka. Na tau na manda ningu papahangu, na-pambulu-maanya na kanandingu-na la hangia - hangia na ngerana i Miri, nadu ka nahàmu wàngu na etina i Miri, ba wàna. 33Tàka na tau na maningu papahangu, napa nadangu-mapa na kanandi-nanya na ngera pinu tana, nadu ka nahàmu wàngu na etina na papaha-nggu, ba wàna; 34hupu hàla luana pa-biwangu-nanyaka na kanandingu-na. Na haàtu na kawini na manda mangoma, jàka ndia na haàtu na bidi kawini, nadangu ningu na kanandi-nanya na ngerana i Miri, nadu ba na-mbuhangu ka pekuna na tauna dàngu na hamangu-na ka manguna i Alaya. Tàka na kawini na mambàda ningu leingu, na-pambulu-nya na kanandingu-na la hangia - hangia ngera pinu tana, nadu ba na-mbuhangu ka nahàmu wàngu na etina na leinggu, ba wàna.
35Hi ku-tulihu hàlaya na rukuna yiana ndumana na pahàmu wàna na wikimi nyimi, màta ka kuhiri-nja lai ni lai na nda wànggua. Na pambuha-nggu jia-aya màta ka daliya na ma-deningu dàngu na maràka-na wànggu-anggai, dàngu ka pekuna bai pambulu-nya kanandingu-mi lai Miri, wànggu.
36Jàka ningu haàtu tau ba nakaka-ya ba nda ràka-ana ba tunanya nu na kawini tubana tàka nda peku roputu-na wikina, dàngu ka ku-kanoma-ya na bidi kawini nuna jàka wàna, puli bianya ka nawànya na mahàmu la etina.#Jàka ningu haàtu ... na mahàmu la etina; jàka ndia: Jàka jiaya-ka na haàtu tau mini dàngu na anana kawini: jàka nareki-ya ba nda na-paàndangu-a na ngera nda pa-mangoma-nanya, tàka hi toma matua-mana-nyaka la pa-mangoma, lupangu na-pahàra-nyaka bàdi na pawuku-na dàngu ka na-pamangoma-ya nu na anana kawini. Nyuna nda nanjala-a jàka dapakanoma nyuda. 37Tàka jàka ningu haàtu na mambàda botaya la etina la panda kanoma-ya na tubana,#la panda kanoma-ya na tubana; jàka ndia: la panda pa-mangoma-ya na anana kawini. dàngu ba nabota-ya nu nda ningumbui ma-pambana-ya, nu ba tuna nu nahàmu, mili namàka nyuna pa-pajàngapu-nya. 38Na kawàndi-na, na tau na mapaumangu#na ma-paumangu; jàka ndia: na ma-pamangoma anana kawini. nahàmu, tàka na tau na manda pa-umangu#manda pa-umangu; jàka ndia: na manda pa-mangoma anana kawini. na-rihingu hàmuipa.
39Na haàtu na kawini na mambàda mangoma, la nditaku-na na mini lei-nanyapa ba naluri-pa. Tàka ba nameti-ka na leina, peku wàngu etina pahili mangoma la pambuha-na; mili nu nyuna ka pa-umangu Karitu-ya. 40Na nyuna rihi utungu-manapa jàka nda nahili mangoma. Nuya na wininggu nyungga, tàka ba ku-kanandi-nya hi kutiki-ya nuna ruku kuaha-na na Ngahuna i Ala-maya.
Currently Selected:
1 KORINITU 7: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
