1 KORINITU 14
14
Da lii kaloka rukuda da kanyuru welingu la Ngahuna i Ala
1Màtawa nu kai pa-mukarungu la pambuha-nya na tau hawiangu. Dàngumbu kai pa-mukarungu-ma la pa-kataku-ha da kanyuru - kanyuru pawua-na na Ngahuna i Ala, ri - rihi na nggàhungu la pa-patàka-nja da pa-pakaka-na i Ala la tau. 2Na tau na ma-kareuku wàngu hilu pa-hangàtarungu, na tau nuna nda panii dàngu-nanya taua; panii dànanya i Ala. Nda ningua tau mapinya jàka nggàraya na papeka-na, nadu ba na Ngahuna i Ala hi kiri pekana hangia - hangia hi mbulungu i Ala-a duna na mapinya. 3Tàka hauya duna na tau na ma-patàka-nya na lii welingu lai Ala, patàka-nanya la tau; la pa-paundu-nja, la pa-pahayandalu-ha dàngu la pa-pangaüru-ha. 4Na tau na ma-kareuku wàngu hilu pa-hangàtarungu pa-undungu-nanya wiki-ana; tàka na tau na ma-patàka-nya na lii welingu lai Ala, ndula-nanya na kabungguru ka na-parukangu pa-pabonjangu.
5Lalu mbana hàmu-aya làti angu dedi mbuu ndàbami jàka ipingu pa-kareuku wàngu hilu pa-hangàtarungu. Tàka na marihi hàmu angu dedi jàkai màka pa-bobaru-ha da pa-pakaka-na i Ala. Nadu na tau na ma-patàka-nya na lii welingu lai Ala, ba na-bokulu ningupa welingu la tau na makareuku wàngu hilu pa-hangàtarungu; hauya duna na tau ma-kareuku wàngu hilu pa-hangàtarungu jàka napingu pa-kaloka-nya nuna na pa-kareuku wàna, ka peku ningu linguna la mbuu ndàbana na kabungguru. 6Jàka era mainggu lai nyimi, tàka hi ku-kareuku wàngu ma - màtu hilu pa-hangàtarungu lai nyimi, nggàra lingu-naka nu lai nyimi? Nda nggàra ndoku linguna! Hauyai duna, jàka ku-wàlahu-nggainya na palara liina i Ala, jàka ndia ku-pakaloka-nya na rukuna i Ala, jàka ndia ku-patàkanggai-nya na lii welingu lai Ala, jàka ndia ku-ajaru-kai.
7Da malingu pa-parànjangu wàngu ludu da manda ningu luringu hawutu, hama tuna da taleli dàngu da jungga, jàka nda pa-kàritu paloha-nja, nggiki hama pi-nanyaka tau jàka nggàra wiliku-ya na pawotu? 8Na hili hau ngerangui: Jàka àtalu palingu biaha da taropitu, nggamu-yaka napa na ma-hawanjiru palaku pa-pabera? 9Tuna numbu na nggàhungumu la pa-kareuku wàngu hilu hangia - hangia pa-hangàtarungu. La nggàhungu-mu nu bau tikiha da kareuku da manda lohangu, nda haàtu-a mapinya jàka nggàra wàmu bau panii. Da kareuku-mu nuda napa dambulangu nda pahilu pinja. 10La pinu tana yiana dangu hilu, tàka nda ningu hau welingu nuda da hilu da manda ningu àndangu. 11Tàka jàka nda kupinya na hilu na patiki-na na tau, na tau na matiki-ya na hilu nuna ka tau hangàdangu-duyaka hanggangu lai nyungga; hamanai duku nyungga hanggangu lai nyuna. 12Na ngerami nyimi wiki, kupimanggai bai rinjungu-mai dimi pa-ngalangu kanyuru welingu la Ngahuna i Ala. Tàka na ma-paihikungu, màtawa kai pa-mukarungu la pawànya na nggàhungu-mu pandula-ya na kabungguru ka na-bonjangu.
13Nuya na pakiri-na, na tau na makareuku wàngu hilu pa-hangàtarungu, màta ka na-kamahingu lai Ala ka peku wua-mbunanya pa-nggàhungu wàngu la pa-kaloka-nya jàka nggàraya na papanii-na. 14Nadu nyungga jàka ku-hamayangu wàngu hilu pa-hangàtarungu, na ndewanggu hamayangu-madu-nanya, tàka na kanandingu nda na paruku-a. 15Jia ba tuna, nggàra wànggu-aka bàdi? Yianaya napa na pawunda-nggu: Napa ku-hamayangu wàngu ndewanggu, tàka napa ku-hamayangu wàngu-madui kanandingu-nggu. Napa kuludu wàngu ngahunggu, tàka na nyuna, ka kuludu wàngu kanandingu-mbunggu wànggu-madui. 16Nadu angu dedi jàka mi-pamalangu-nya i Ala ka wàngu ndewa-ami, tàka hi ningu tau hawiangu na manda pinya na hilu pa-hangàtarungu welingu la Ngahuna i Ala, na tau nuna nda peku panii-anapa, “Jia-maduya!” ka wànanya na hamaya pamalangungu-mu; ka ba nda napinya jàka nggàra wàmu. 17Jiapa ka nahàmu ailulu-kadu nuna na hamaya pamalangungu-mu, ba tuna na hamayangu nuna nda ningu ndoku linguna la tau hawiangu.
18Nyungga ku-pamalangu-nya i Ala, nadu nyungga wiki ba kupingu pa-kareuku wàngu hilu hangia - hangia pa-hangàtarungu marihi-nggai nyimi mbuu ndàbami. 19Ba tuna, la pauhi - pauhi ba lumunya i Miri, kurihi mbuhangu-mapa ka kuwunda ana lima mbua kareuku papi tau welingu la pawunda riu rata pulungu la hilu pa-hangàtarungu. Hi kurihi mbuhanya na matungu nu, ka peku ajaru-nggu tau wànggu.
20Angu dedi! Àmbi pa-tandangu hama tuna anakeda. La ngera ma-akatu, màtawa kai pa-daingu hama tuna na anakeda. Tàka la pa-kanandingu màtawa ka hama mambàda matua-kai. 21Daa la Huratu Matua ninya yiana na pa-tulihu,
“Napanii i Miri, ‘Wàngu pa-palua-nya la tau da
ma-kareuku wàngu hilu ngganangu,
ba kupanii dànya napa na kabungguru yiana.
Jiapa, wàngu pa-palua-nya la tau hangàdangu napa kupanii dànya na kabungguru-nggu;
jiapakai ba tuna, nyuda nda darongu-maya duku na paniinggu,’ ” na mawàna.
22Ba tuna, na pa-wuangu la pa-kareuku wàngu hilu pa-hangàtarungu hau tandaya nduma la tau manda pawai, nda nduma tau mapawai-a. Dàngu na pa-wuangu la pabobaruya na pa-pakaka-na i Ala la tau, jiaya na tanda nduma tau mapawai, nda nduma tau manda pawaia.
23Jia ba tuna, jàka era pauhi-na na kabungguru, nggubulu-na na kabungguru ka na-kareuku wàngu hilu pa-hangàtarungu, hàla hi nàmunjai duda ba mapira-ha da tau welingu la hambeli, jàka ndia tau manda Karitu, da tau nuda napa ba dakaka-kai bai tau katoba ndàbaha wàda-dunggaika. 24Tàka nyimi angu dedi mbuu ndàbami jàkai patàka-nya na lii welingu lai Ala, hàla hi natàka na haàtu na tau nda Karitu jàka ndia tau la hambeli, hangia - hangia da pa-bobaru-mi napa mbuu ndàbada pawuwa-danja da njalada da tau nuda, hi da-patanda wànja da njalada. 25Hangia - hangia da ma-kawiningu la etina napa wuwa-danyaka, hi lupa na pa-wawangu wikina ba nalumu-nya i Ala. Nyuna napa na-mangaku i Ala langatàka ninya la padua-da nyuda, wàdanggai.
Da kalaratu la kabungguru
26Ba tuna angu dedi, nggàraya na àndana yiana mbuu ndàbana? Jàka mi-pauhi la palumu-nya i Miri, ningu maludu, ningu ma-ajaru, ningu ma-bobarungu hangia welingu lai Ala, ningu ma-kareuku wàngu hilu pa-hangàtarungu, dàngu ningu ma-pakaloka-nya nuna na kareuku. Tàka nuna mbuu ndàbana lupangu-ma bàdi kai wànya la pa-ajaru dàngu la pahàmu wàna mbuu ndàbana. 27Jàka ningu màta ka ku-kareuku wàngu hilu pa-hangàtarungu jàka wàna, mbulungu ka tau madua jàka ndia dangu-mada-nyaka ka madua haàtua bàdi ka dawàngu pa-pahilu - pahilungu. Dàngu ningumai bàdi mapingu pa-kaloka-nya na papanii-na nuna na tau na ma-kareuku. 28Jàka nda ningu tau mapingu pa-kalokangu, da tau da ma-kareuku wàngu hilu pa-hangàtarungu da-kandii bàdi daa la pauhi. Màta bia ka dapanii dànya i Ala la etida. 29Madua jàka ndia madua haàtu tau maningu lii welingu lai Ala lupangu-ma ka da-patàka-nya na lii nuna, tàka hawiangu la rehi nu ka datimba-nya nuna na papeka-da. 30Tàka jàka era ningu lii welingu lai Ala na matàka-nya na haàtu na ma-mandapu nu la pauhi, na tau na ma-talànga panii, na-pànjangu bàdi. 31Ba wàngu patuna nu angu dedi mbuu ndàbami, peku màra haàtu - haàtungu-mi pa-patàka-nya na lii welingu lai Ala, ka peku ngalangu-na mbuu ndàbana lii pa-ajaru dàngu hi na-parukangu papawai. 32Na pa-wuangu welingu lai Ngahu la pa-patàka-nya na lii welingu lai Ala pekuna ka nauli-nya paraï tau ma-patàka-nya na lii nuna. 33I Ala, Ala ma-mbuhangu ma-lànyapu-ya; nda Ala ma-mbuhangu ma-kanyaüru-aya duna.
Hama tuna na pawàngu la kabungguru-na i Ala mbuu ndàbada, 34da kawini dakandii bàdi la rehi pauhi kabungguru. Nyuda nda pa-pahiangu-aha la pa-kareuku. Nyuda nda peku-ana la pa-pairungu, nuna pa-jàngapu-nya na uku anggama. 35Jàka da-mbuhangu nyuda papinya jàka nggàraya, màta ka da-paàra bianja da leida la uma. Pa-makia wànguya era ningu kawini ma-kareuku la pauhi kabungguru.
36Màla na puluna i Ala tàkana welingu lai nyimi? Jàka ndia mbulungu lai nyimi-aka na ngia pa-patàka-nya nuna na pulungu? 37Jàka ningu tau ma-pàdangu wikina ba ningu pa-wuangu-ya la pa-patàka-nya na lii welingu lai Ala, jàka ndia ba ningu pa-wuangu-ya hangia welingu la Ngahuna i Ala, na tau nuna màta ka napàda-nya, ni jàka nggàraya na pa-tulihu-nggu ba pareta welingu lai Miriya. 38Tàka jàka ningu manda kataku-ya yiana, àmbu eti wadunya.
39Jia ba tuna angu dedi, pamukarungu-wa la pa-patàka-nya na lii welingu lai Ala, tàka àmbi hiri-dunya na tau na ma-mbuhangu pa-kareuku wàngu hilu hangia - hangia pa-hangàtarungu. 40Na nyuna bai lakunya nuna nawàngu papakei pa-hàmungu-ma bàdi.
Currently Selected:
1 KORINITU 14: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
