1 KORINITU 13
13
Na mbuhangu
1Jiapa ka kupingu-kadu nyungga pa-kareuku wàngu hilu tau hangia - hangia, dàngu ka kuwàngu-mbu hilu papalewa awangu, tàka jàka nda kumbuha-nya na angunggu patau, nuda da kareuku-nggu, lingu manda palingu-ha. 2Jiapa ka kupingu-kadu pa-patàka-nya na lii welingu lai Ala, dàngu ka kupi ndàbanya na hangia - hangia na matanjiku, dàngu ka kupi hàlanya mbuu ndàbana dàngu ba kuwai langatàka-ya i Ala hi lupa kupeku-mbu pa-paleli-nja da palindi, tàka jàka nda kumbuha-nja da tau hawiangu, nyungga nda nggàra ndokua lingunggu! 3Jiapa-kadu mbuu ndàbada da pa-bànjalu-nggu, ka kuhunggunja la tau mila, dàngu ku-pajàmangu-mbu wikinggu la patunu-ka,#la patunu-ka; da pa-haleli ndai da manda pirada: ka peku hamemu. tàka jàka nda kumbuha-nja da angunggu patau, nuda mbuu ndàbada nda wàngu paningu ndoku linguda.
4Na tau na ma-mbuhangu tau hawiangu, na-lerangu etina dàngu nahàmu etina. Nyuna nda na-mbumbaru-a na kapihi-na, nda na-abungu dàngu nda na-ngànjangu-a. 5Nyuna nda na-pawawa anguna, nda na-hanggàritu, nda na-dàhiku-a tau hawiangu la patundu-nya na pambuha-na nyuna, nda narengga unjaru dàngu nda na-paumbingu. 6Na tau na ma-mbuhangu tau hawiangu, nda na-mbuhangu-a ma-akatu, mbulungu mahàmu-a duna pambuha-na. 7Nyuna na-torungu pa-hanobaku-ha mbuu ndàbada hangia - hangia dàngu na-orangu pawaiya na marihi hàmu la ta - tauka; jiapa ka nda nggikina-kadu na tau na ma-mbuhangu anguna nda na-mbulangu-a na monungu-na dàngu natorungu pa-patia-nya ngara mbutana mbuu ndàbana.
8Nda ana ninguma duna rehina napa, ba na-pànjangu pa-maràngga pa-mbuhangu na tau. Nàhu ningu tau ma-manggàna pa-patàka-nya na lii welingu lai Ala, tàka napa napadirangu la pa-patàka-nya nuna na lii. Nàhu ningu mapingu pa-kareuku wàngu hilu hangia - hangia pa-hangàtarungu, tàka napa na-padirangu pa-kareuku wànja da hilu nuda. Nàhu ningu tau madangu papina hangia - hangia, tàka napa jàka nggàraha da papina pa-marombangu-ha. 9Nadu na pingunda dàngu na màkanda nyuta la pa-patàka-nya na lii welingu lai Ala, ndedi na-jàngapu lundungu. 10Napa natàka na rehina i Ala ba na-pajàngapu lundunya, tàka na manda jàngapu lundungu napa na-mbulangu.
11Ba anakeda kuduka, ba kupanii hama tuna anakeda kuduka dàngu ba ku-palàdangu hama tuna anakeda kuduka, dàngu ba ku-kanandingu hama anakeda kuduka. Nàhu ba ku-matua-ka, na huringgu ba hama anakeda kuduka, kuwàru-nyaka. 12Nggàraya na paitanda nàhu beri hama tuna na ninu malamaruya la kaninu. Tàka napa nyuta taita pangalanya na ma-habola. Nàhu nyungga ndedi kupi hàlanya, tàka tiangu napa kupi hàlanya hama tuna i Ala ba napi hàlanya na ngera wikinggu nyungga.
13Jia ba tuna la rehi nàhu ningu tailu batana bàdi na palaku-nda na ma-padaingu: na pawai, na monungu dàngu na maràngga pa-mbuhangu. Tàka na marihi paihikungu welingu nu ba tailu batada jiaya ba ta-mbuhangu angunda.
Currently Selected:
1 KORINITU 13: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
