1 KORINITU 15
15
Na rukuna i Karitu na pa-paluri beli welingu la meti
1Tàka nàhu angu dedi, màta kai namu beliya wànggu na Lii Mànangu welingu lai Ala, na pa-bobaru-nggunggai nyimi àmangu. Mi-kataku-yaka dàngu miwai-yaka i Karitu rukuna nuna na Lii Mànangu. 2Jàka mikata pamàndu-nya jàka nggàraya na pambàda bobaru-nggunggai, na Lii Mànangu nuna na-pamàna-manggai duna; hinggilu-na jàkai pawai dàngu nda piminya.
3Nggàraya na pa-patàka-nggunggai angu dedi, jia-mayai-ka duku na pambàda kataku-nggu. Na ma-paihikungu, hama tuna na pa-tulihu la Huratu Matua, ku-patàka-nggai nu i Karitu nameti lumuda da njalanda; 4ba pa-taningu-ya, hàla hi paluri beliya la lodu patailu wàna. Nunambu pa-tulihu-ya la Huratu Matua. 5Nyungga ku-bobaru-mbunggainya, i Karitu na-papaluri beli na-paitangu-maka wikina lai Peturu, hàla hi na-paitangu wikina la hakambulu madua pa-pahurungu. 6Hàla patuna nu na-handàka pa-itangu wikina la tau lima ngahu rihi makiku-nya. Dangu-mapa welingu lai nyuda da tau nuda luri-madanya-pa nàhu, tau mapira-aha da mambàda meti. 7Hàlaika nu i Karitu napaitangumbu wikina lai Yakombu tàka la malamiri la pa-pahurungu mbuu ndàbada.
8Tàka la malamiri dehi na-paitangu wikina lai nyunggambu – nyungga ba beringu anarara madedi ndedi rehina!#madedi ndedi rehina: jàka ndia: na manda hàmu dedina. 9Nyungga pa-pahuru-na i Miri marihi ngia wawaka. Nyungga duku nda ràka-ana pa-pahurungu ka wànangga tau, nadu nyungga ba mbàda pa-mayila-nggunyaka na kabungguru-na i Ala. 10Tàka paraï ruku mila etina i Ala lupa tunggu yia-duka nàhu. Dàngu nda kahewa-ana i Ala ba najàma-ngga. Màlai jiaka nyungga-maka marihi mbangatu paràma welingu la mbuu ndàbada da pa-pahurungu hawiangu. Na nyuna làti duna nda rukunggu nyungga-aya; tàka rukuna i Ala-maya duna na mambuha-ngga dàngu na maràma dàngga. 11Ba tuna, welingu lai nggamu biaya bai ngalanya na Lii Mànangu – ka welingu lai nyunggakai jàka ndia ka welingu la pa-pahurungu hawiangu-kai – nda pabata wàngu-aya. Na ma-papingi jiaya ba ma-bobaru-nggainya na Lii Mànangu tàka nyimi hi mipawai.
Na ngerana na tau ba pa-paluri beliya welingu la meti
12Jàka jiaya i Karitu na pa-bobaru-ma ba mbàda pa-paluri beli-yaka welingu la meti, nggikina hi ningu la hongami nyimi mapanii, na tau meti napa nda pahilu paluri beli-ayapa hi wàda? 13Jàka tuba-manaka napa da tau meti ba nda pahilu paluri beli-ahapa, nu na àndana, i Karitu-mbu nda pa-paluri-aya welingu la meti. 14Dàngu jàka era nda pa-paluri beliya i Karitu welingu la meti, ka nda ningu-apa linguna nyuma ba mabobaru-nggai ngga - nggàra dàngu nda ningumbu linguna nyimi bai pawai, nadu na pawaimi nyimi ba nda ningu ndoku latana ngga - nggàra. 15Ri - rihi na rukuna nuna, wuwa-nanyaka ba panii ànga-manya nyuma na rukuna i Ala, nadu ba mabobaruya ba mbàda paluri beli-nanyaka i Karitu welingu la meti, bundu nda paluri beli-nanya padua duna paraïna i Ala – jàka tuba duna ba nda pa-paluri beliha da tau meti! 16Nadu jàka nda pa-paluri beli-mahapa da tau meti, i Karitu-mbu nda pa-paluri beli-aya welingu la meti. 17Tàka jàka nda pa-paluri beliya i Karitu, na pawaimi ka mbulungu manggadipangu-madua-yaka; nuna na àndana nyimi jiapa-kaipa ba dàngu njalami dàngu ba nda hili ningu ndokupa pa-monungu. 18Nuna na àndana da tau Karitu da mambàda metimbu nda ana nggàra-apa pamonu-da. 19Na monungu-nda nyuta lai Karitu jàka padirangu-ma-ana-nyaka la lurinda nàhu la pinu tana,#Na monungu-nda nyuta lai Karitu jàka padirangu-ma-ana-nyaka la lurinda nàhu la pinu tana: jàka ndia: Jàka jia-aya na monungu-nda lai Karitu na pamangu-nda la lurinda nàhu. tau marihi dimangu-madua-taka nyuta welingu la mbuu ndàba tau la pinu tana yiana!
20Tàka na ma-langatàka duna i Karitu mbàda pa-pahada belingu-yaka welingu la meti. Jia-yaka yiana na ma-pakaràngi-ya da tau da mambàda meti napa ba pa-paluri beliha. 21Nadu na pameti wàngu hi natama la pinu tana paraï ruku haàtu tau, tuna numbu na luri beli welingu la meti pa-wuangu-ya na tau paraï ruku haàtu taumai. 22Hama tuna na nggubulu-na na tau hi nameti ba napapohungu-duka dàngu i Andamu, tuna numbu napa mbuu ndàbana ba paluri-ya nadu ba na-papohungu-duka dàngu i Karitu. 23Tàka haàtu - haàtu napa pa-paluri-ya nunjuya na pandàki - pandàkingu-na: la kawungana i Karitu, hàlaka napa tomaya na rapa tàka belina, hi da-pandàkingu da tau da pamangu-na i Karitu. 24Hàlaka nu tàka-nanyaka na mulungu. La rehi nu i Karitu hi na-panyàku hàlaha da pareta, da kuaha dàngu da kapàru mbuu ndàbada; hi namangu pa-pakata belinya napa na kuaha-na ba hanganjiya, lai Ala, na Amanda. 25Na pareta pangalangu-ma bàdi i Karitu, lundu na-panyàku hàlaha lai Karitu paraïna i Ala mbuu ndàbada da muhuna i Karitu. 26Na muhu malamiri dehi na pa-panyàku napa jiaya na meti-duka. 27La Huratu Matua tuna yia na pa-tulihu, “I Ala mbàda panyàku hàla-nanyaka ngara mbutana lai Nyuna,” na mawàna. Lohangu-mananya, “ngara mbutana” ba wàna nda na-awahu-aya i Ala, na ma-panyàku-ya ngara mbutana lai Karitu. 28Tàka ba na-panyàku-yaka nggubulu-na la lumbu pareta-na i Karitu, Nyuna wiki nu, na Ana Ala, napa na-panyàku wikina lai Ala, na mambàda panyàku-ya ngara mbutana lai Nyuna. Tàka i Ala wiki-maka duna napa na ma-pareta ndàbaya nggubulu-na.
29Jàka nda pa-paluri beli-maduha da tau meti, nggikina hi ningu tau pa-parunungu lumuda da tau meti? Nggàra lingu-naka hi da-paloku-ya nuna? Jàka tuba langatàka-maduna napa ba nda pahili paluri beli-ahapa da tau meti, nggàra lingu-naipa hi da-paloku-ya nuna? 30Dàngu nggàra lingu-naka hi ma-mbuhangu nyuma pahangga mànunya na maharui hau lodu - hau lodu? 31Angu dedi! Nimbihu lodu nyungga ba ku-patoru-nya na mayila karia-na ba na-bokulu na etinggu rukuna na lurimi bai pawai lai Karitu Mirinda. 32Jàka tàngaru-ya welingu la ngaba tanggunda pataua, nggàra lingunaka duku ba ku-pajàrungu ba beri hama tuna ma-paràkapu dàngu banda bohuka la paraingu yiana, la Epihu? Jàka ma-tubangu-ya ba nda pa-paluri beliha da tau meti, narihi hàmu-mapa ka tawànya na palara lii tau, “Màlawa ka tangangu ka ta-ngunungu, ka ta-hanggela hawola, nadu haromu ba meti-madu-ndanyaka,” ba wàna.
33Àmbu na-panyonga-kai! Na panggolu manda hàmu na-paruha-ya na huri na mahàmu. 34Ipàdanya-wa nàhu, dàngu àmbi hilu njala-dupa. Ràka-manaka jàka mimakia, nadu la hongami ba ningupa tau mandedi tandaya i Ala.
Na hadana na taunda ba hàla paluri beli welingu la meti
35Talànga wanguna ningu ma-paàrangu, “Nggiki-naka na tau meti ba paluri beliya? Nggiki-naka na tauda na pa-wuangu-ha ba hàla pa-paluri beliha?” wàda. 36Nduba langatàka! Na wini na patondu-mi la tana, nda jia ailulu tumbu-ana, jàka ndedi-madu nameti nuna na wini. 37Dàngu na wini na patondumu nu la tana – ka wini uhu nggàndumuya jàka ndia wini hauyakai – jiaya na karohu wini nuna-aka duna na-patondu-mu, ndau tondu mangu hada-anya nu na matumbu napa. 38I Ala wikima duna napa na mawua-nya hadana na wini nuna nunjuya na pa-pakaka-na na pahàmu wàna na wini nuna. Hau mata - hau matangu wini, i Ala na mawua-nya hada wikina na matumbu - matumbu-ka.
39Na tauda da hau dika - hau dika da maningu luringu nda da-pahama ndàba-a. Na tau ninguma duna hadana na tauda, da banda hau-mayai na hadana na tauda; da ma-hawurungu haumbuyai duda na hadana na tauda, dàngu da iyangu hili haumayai duda na hadana na tauda.
40Tuda numbu da maninja la awangu dàngu da maninja la pinu tana. Da maninja la awangu ni - ningu mehama duda manandanguda, dàngu tuda numbu da maninja la pinu tana. 41Na manandangu-na na matalodu hau-mayai duna welingu la manandangu-na na wulangu. Da kandunu-mbu ni - ningumai duda manandangu mehada. Malai da kandunu nimbihu-da ha - haumahai duda na manandangu-da.
42Tuda numbu napa da tau meti da papaluri beli. Da taunda da maninja la reti, jiahaka duda da ma-làjaru, tàka da taunda da pa-paluri beli jiahaka duda da manda hilu làjaru. 43Ba jiaya natani-nya na taunda, na taunda nuna na-kambànga na-maluputu; tàka ba jia-yaka na-paluri beliya, na taunda nuna nahàmu na-kapàru. 44Ba jiaya natani-nya na taunda, na taunda nuna ma-pawelingu la pinu tanaya; tàka ba paluri beli-yaka, na taunda nuna tau pawua-na na Ngahuna i Ala-yaka. Ningu tauna na tau ma-pawelingu la pinu tana, tàka ningumai tauna na tau ma-pawelingu lai Ala. 45La Huratu Matua ninya na pa-tulihu, “Na kawunga tau, nu i Andamu dika maluri-ya,” tàka i Andamu malamiri Ngahu ma-paluri-ya. 46Na mamai mangilu jiaya na ma-pahada taungu, nda ma-pangahu-aya. Na ma-pangahu jiaya na matàka malamiri. 47I Andamu na ma-wungangu, pa-padedi welingu la tanaya, tàka i Andamu padua wàna ma-pawelingu la awangu-ya. 48Da tau la pinu tana yiana hamada i Andamu na ma-wungangu, na pa-padedi welingu la tana, tàka da tau awangu hama jiangu-maka Nyuna na mamai welingu la awangu. 49Hama tuna nyuta nàhu ba jiangu-mata hama tuna i Andamu na pa-padedi welingu la tana, napa nyuta dedi-ndanyaka#napa nyuta dedi-ndanyaka: da lawiti ndai da manda pirada: màlawa nyuta ka tadedi. hama tuna Nyuna na mamai welingu la awangu.
50Na pawuku-nggu, angu dedi, jiaya: da taunda da pa-padedi welingu la la ria dàngu tolu, nda peku tama-ada la Pinu Tana Bidina i Ala; dàngu da taunda tiangu da mapeku la pameti nda peku njadi-ada pa-palupangu.
51Panau-maya yiana na pa-winingu: Nda jia meti ndàba-anda nyuta napa, tàka mbuu ndàbanda nyuta napa ta-panjilungu. 52Na ngerana nuna napa jia njadi harabàndangu biana la ha-kambàdiku wua mata, la rehi palingu-ya na taropitu na pajiaka wàna. Nadu ba rongu-yaka na lingu taropitu, da tau meti napa pa-paluri beliha wàngu tauda na ma-palupangu, tàka nyuta mbuu ndàbanda napa pa-panjilungu-ta. 53Da taunda yiada da mapeku la pameti, pahilu-manja bàdi wàngu taunda da manda peku la pameti, dàngu da taunda welingu la pinu tana pa-pahilu wànja bàdi wàngu taunda welingu la awangu. 54Jàka pahilu-njaka da taunda da mapeku la pameti wàngu taunda manda peku la pameti, dàngu da taunda welingu la pinu tana pahilu wànjaka wàngu taunda welingu la awangu, la rehi nu hinaka hi na-pajàngapungu na pa-tulihu la Huratu Matua, “Na meti papamau-yaka; na talu hàrangu-nanyaka!”
55“Ha meti nggiyaka na talumu?
Ha meti nggiyaka na upahu-mu?” na mawàna.
56Na upahu-na na meti jia-duyaka na njala, tàka na njala hi na-pambangatu-ya na rukuna la uku anggama. 57Tàka malangu-na i Ala; na mawua-nda talu lumuna i Yehu Karitu na Mirinda!
58Jia-duya nu, angu dedi pa-mbuhangu, màtawa kai àtalu dàngu kai màndungu. Ràma pangalangu ndumana i Miri, kai weli eti pa-langatàkangu, nadu bai pi-madunya mbuu ndàbana na paràma-mi ndumana i Miri, napa nda kahewa-ana.
Currently Selected:
1 KORINITU 15: KAM
Highlight
Copy
Compare
Share
Want to have your highlights saved across all your devices? Sign up or sign in
@LAI 1995 Indonesian Bible Society (Lembaga Alkitab Indonesia)
