Zakharia 4
4
Agauwa huap a’ge pam esaga ’gwialogo pogwi a’ge emin, e zaitun ’biren emin, abi pam hesi wene
1Ap mesik nogosoma, elalugap pogwi ai gela’ge, at emin weneane ege a’ge malaikat ano agauwa mesik pam togolik niau wagarik, an nelalugap noboluk,
2mo’gulneselat, “Hat no hil hasu legen?” oluk, mo’gulnosoam, an en at mo’guleselat, “esaga ’gwialogo pogwi a’ge mesik emas a’ge pam nak hele’gikmu re, minyak ne’gak a’ge ologun pam daintak a’ge ai pam odouk ’gwialogwi a’ge ebe 7 welaga, ye, oduk ’gwialogwi a’ge 7 hundomok-han domok eriano pam e’gerle 7 at ’gwelabogo-’gwelabogo welat, 3#Wah. 11:4ye, minyak ne’gak abel pema-pema ebano re, e zaitun ogut heli’gogo heli’gogo welat, asogo oruakma, hegi o,” oluk mo’gulegis o,
4mo’gulegistik, at emin wene’gak ogu lege a’ge malaikat ano mo’guleselat, “Naik o. Tak a’ge ’berlek yu, wene ebe ’gesogo oluk o?”
5Asogo mo’gulosoam e, at en an mo’gulneselat, “asogo tak ai re, wene ebe hat heperlak no?” oluk, mo’gulnosoam an en naik o. An neperlagat o.
6Oluk mo’gulegismu, at en an mo’gulneselat, “At Allah en at Zerubabel mo’guloum a’ge mo’gulnesi a’ge ebe yuat o. At anni a’bik a’ge, at anni pam nak, tua erlak o. At e, an narogun pam tagokhwe tik o, oluk, at anni modok welago a’ge Allah enat egei oluk, mo’gulomup o.
7Asogoatma re, dom yat a’ge hat yu o. An nanni a’bik oruak o epasukhwe, at Zerubabel wagalat, hat ’goluk-’gelaksogo takhoboluk, o dogo takhobouwa o. O dogo takhoboluk, helep naduk-naduk obule dem agokhwe, aphwami en ngai-wai ogulat, Allah ede aganhan hebam oruak o. Allah ede aganhan hebam oruak o, oluk at mo’gulema o,” oluk, dom ano mo’gulosoma hegi o.
8Asogo hasuam, at Allah en an mo’gulneselat, 9“At Zerubabel en an nowi yu, obuleat dem etil lagama re, at enat ebe o’borl pamat wusogo pouwa-o. Ai wusogo pasuam e, is an neiyagai en, at anni modok welago a’ge Allah en demat Zakharia wene mo’gulnontouwagoluk perakpou wagama hege o, oluk, ua ani o.
10 #
Ezr. 5:2
#
Wah. 5:6
Asogoatma re, is orogat worogwi a’ge yu, arat worua erlak hege o, oluk, mi-miarak onobogwi ai salak en o? herle-wal togwi a’ge ano ap Zerubabel e’gikmu oruakma enil hogulat, onogola enagai ho’gu lema o,” oluk, mo’gulnosoma hegi o.
Ye, esaga ’gwialogwi a’ge 7 ai re, at Allah il o ’gwiangma yema ’berlegat il orlok tagalat. Welago anoat o.
11 #
Wah. 11:4
Mo’gulnesimu, an en at malaikat ano mo’guleselat, “ye, esaga ’gwialogwi a’ge heli’gogo abel pema-pema akhit e zaitun ’biren a’ge lo’boktak ai wene ebe no’gosogo oluk o?”
12oluk mo’gulegistik, mesik eminat hin wokhasulat, “zaitun a’bosu na’gogo esaga ’gwielak a’ge pam ’gwelebak ma en, emas a’ge pam hele’gik ’biren eragam, e zaitun esemis-le’gik ’biren eriano re, wene ebe ’gesogo oluk o?”
13mo’gulosoam, at en an mo’gulneselat, “E zaitun oluk, e’gik esemis ’biren eriano re, wene ebe hat heperlak a?” oluk, mo’gulnosoam e, an en e, “Naik o, wene ai, ebe an neperlagat o.”
14Mo’gulosoam, at en an mo’gulneselat, “Esemis e’gik ’biren eriano re, o ’gwiang yema ’berlegat eiye welago a’ge at Allah paget togu lemagoluk a’bosu herlilogo edik enebesi a’ge ap ’biren eria yat o,” oluk, mo’gulnosoma hegi o.
Currently Selected:
Zakharia 4: Wul
Highlight
Copy
Compare
Share
Want to have your highlights saved across all your devices? Sign up or sign in
