Zakharia 3
3
Agauwa Allah uganak a’ge pam Allah eiye a’ge onue Imam Yosua ano en abi pam hesi wene
1 #
Ezr. 5:2; Wah. 12:10 Asogo toluk, ap Allah eiye a’ge onue Imam Yosua ano, Allah en perakpou waga a’ge malaikat eragam edik welat, ye, mukat ano, disogo tigen o, oluk, mo’gulemagoluk, at abel pema akhit edik oruakhwe, welegesa a’ge ebano en worlniesi o. 2#Yud. 1:9Worlniesimu, at Allah en at mukat ano mo’guleselat, “hat mu’gat yu o. Odouk aro’go’go ano ’berlek nasumu no oluk, hesilogo lebikpogwi ’gela’ge, at ap yu, asogoat oruakhweat de, hat mukat en e’gen pam an Allah enat wene yakheselat, kota Yerusalem pulogo pagathwerlegi a’ge an Allah enat modok o’go takhebasulat, tik o,” oluk, mo’gulosoma hegi o.
3Mo’gulosokhwe, Yosua ano osum sing a’ge ’buksogo malaikat eragam edik welagama re, 4at malaikat ano en at ebaget togwi a’ge eriano edik welagai a’ge ebano mo’gulentasulat, “Osum sing a’ge ’buktak ai, no’gorlogo pemit o.”
Mo’gulentasuam no’gorlogo pegesema, “At Yosua mo’guleselat, Hat howiak ano, an en arat hwik hegirik, hosum modok op ’get a’ge ’buktak hebasu legi yu, yethemin o.”
5Mo’gulosoam, an en, “Sum sing a’ge wokholuk op a’ge holuk a’gul pam hettak pemit o,” mo’gulentasuam, at Allah en perakpou waga a’ge malaikat ano eria edik oruakhwe, sum op a’ge ano a’gul pam hettak pogulat, ebe sum ’buktak pogulat, togukhwe entegis o.
6Asogo togukhwe-ontoluk, at Allah en perakpou waga a’ge malaikat ano en Yosua hin wokhasulat, 7“At anni modok welago a’ge Allah en egei a’ge ano mo’gulheik o. An en tu a’ge at mo’guloso a’ge ano hegitsogo til lasulat, ye, an nebaget tagalat, disogo taga lomup o, oluk, mo’gulentasu a’ge ano, at en hegitsogo tagalat, tago holuk, an nowi werikmu eba eiye welat, an nowi odipmu yabuk togwi a’ge ebano ’gwelagentarok welat, taga leik o. Ye, is an nebaget togulat neragam edik oruak a’ge yu, at emin enat an nebaget togu lemagoluk, edikpaik o.
8 #
Yer. 23:5; 33:15; Zak. 6:12 Ap Allah eiye a’ge onue at Yosua emin, is at arilak emin, hweriogo oruak a’ge eba emin, pobuk tuom a’ge il wala’ge isatma re, wene yu, opsogo hologu lemak o. An neragam a’ge onuk, esemis o, oluk ogu lema a’ge ano perakpou weik o. 9Ye, helep il hobun pe’gen tak a’ge Yosua eragam pegi a’ge ai, pobi tuak o. Helep mesigat a’ge ai pam lologun-ologun obuak 7 atma re, helep ai a’ge pam odok pelal wokho pasulat, ye, agauwa mesik pamat is o yema welagai a’ge ebano onowiak erlagapsogo pasulat tik o, oluk, nanni modok welago a’ge an Allah enat egi o.
10 #
Mik. 4:4
Agauwa ai erlige hundomok-han domok enarilak yo’go onobogwiam, waga lemarik, enagan anggur emin, enagan ara emin, edipmu ebano hweriogo welat enede pok lielagat welema o, oluk, nanni modok welago a’ge an Allah enat egi o, oluk egeimu re, mo’gulhegis o,” oluk, at Yosua mo’gulosoma hegi o.
Currently Selected:
Zakharia 3: Wul
Highlight
Copy
Compare
Share
Want to have your highlights saved across all your devices? Sign up or sign in
