Nahum 3
3
O Niniwe, e’gin ebam pouwa wene
1O kota aphwami enemep enamogumu eniak esei nak ogumu eba mo u erlakma en aphwami en a’ge hogul wokho woluk nak pou wagalat, togwi welagaimu re, o kota hat yu hebe nede o!
2’Go’bu waronobogwiam enagap o’borlogouk eselat, kereta weim togwi a’ge ano oyuk o’borlogouk kerlit-’gerlat eselat, kuda pungtak lagalat, onoyuk o’borlogouk ’golok-’golok lagalat, kereta la’gok-pa’gok oluk lasulat. Asogo ’berlegat togwi a’ge ai hesa’go hwelin o.
3Is ap kuda pam hurotluk pungtak weim til lagalat, ’besi wa’gun amolit deleng-deleng eselat, wa’gun ’get a’ge amolit yebekhasulat, aphwami a’bigat enebe werak a’ge wogulat, enebe werak a’bigat orluk-orluk odoktak welat, enebe werak a’bigat ene’gik wenaru miama re, ai pam? Onoyuk a’gul dungsogo lagalat, tugukhwe entegis ai o.
4Hwe danian a’ge en yogunat tenniouwak, oluk, til lasu ai ’gela’ge, ap enede en nouwak oluk, orogole ebil-ebeltak pasu ano ’gela’ge, hin wok a’ge edip ’gela’ge, at kota Niniwe ai asogoatma re, danian ’gela’ge til lasulat, di aphwami yu aphwami herle wusogo ’gela’ge enebasulat, aphwami ena’gul onuk lo’bok ’berlegat eragam a’geat tagenebasulat, tegei ano pam, at asogo takpasukhwe hegi o.
5Asogoatma re, at anni modok welago a’ge ’gain Onuk Logo a’ge Allah en o kota Niniwe mo’guleselat, “Hat nemin weim ’belak oruakma re, heserli lisogo hogum pam peligagalat tikmu, di aphwami yu aphwami en hagap enil houwak oluk takhebaikmu, is aphwami ebano en ha’ge enil houwagoluk, telakma takpasulat, tikmu he’gerli hagun ani o. 6Enemel-mel a’ge hebe hebam lo’boktak pasulat, enemelmel a’ge yu nebit e, oluk, mo’gulhogulat, aphwami en disogo tak oruak yu nogorlok e, oluk, mi-miarak hobogu lemagoluk, takpasulat, tik ani o. 7Hat asogo wolorogun holuk e, aphwami ’berlegat en hat ukhoboluk hweiye ’bogologulat, o kota Niniwe ano, arat wiak agama re, sa en ebaget lo’gu marua o? Oluk, uama re, hede iak werak hobouwagoluk, ap ’ga en herasogo perakpouma epegen erlagat o,” oluk, mo’gulhosoma hwelegistigen, egi o.
8O kota Tebe ik Nil iak pam, oruak a’ge ai, helep pak wogo a’ge ’gela’ge ik nak wale’gik oruakma re, sebelogo po a’ge mia oruakhweat de, “At ai re, mia, ye, an nak e, lok nebe elit oluk epasu legen a? O kota Tebe ebe op wolom a’ge re, ik onuk nil aiat o. Ye, at egelep pak wogo a’ge ’gela’ge ai, ik wale’gik oruak aiat o. 9At Tebe anni erlak om erlakma en ningtak modok oruak ai re, o Kusi emin, o Mesir eminat o. Ye, is enemin otluk, til lagai ai, o Put emin, Libia eminat welagai o. 10Asogoat welagai a’ge at de, sebelogo poluk, aphwami herle waronoboluk o walekma eba enebei lagalat, at emalik ’get dogo a’ge ano ’gebela ologun-ologun ’berlek ebano ena’gul sapsogo pil lagalat, onuelak ’gain-’gain ebano at sa en eragam a’ge tak pagathwerlasumu hul? oluk, enede we’gerlemagoluk helep pam walhogulat, ye, onuelak ’gain ononuk oruak a’ge ebano herle wusogo onobogulat, tigisema re,
11hat ogo re, ik a’bosu noluk enede ’balagai ’gela’ge takpoluk is henemin weim ’belak a’ge en hwiak hobu no oluk hisak lai lasulat, hagap delhorloluk, hweiye lasulat, togun ani o. 12E, ara e’gen egesiso a’ge momi modok agoam e edip ano erlang-erlang hogwiam e’gen dagan-dagan is ap edip erlang hogwi a’ge, enemdema yagat ago ai ’gela’ge, hat heleget pak werik a’ge ano re, asogoat tak welago yo. 13Is hosilak weim togwi a’ge he’gerlakma welagai a’ge ebano re, hwami ’gela’ge oruakhwe entegis o. Asogo oruakma o hat ho’gwiang pam ’goduk ’gwi lagaimu ’goduk lerak a’ge ano, odouk en nil lagarik ’goduk hwerik emde larakma re, heselei a’ge we ’gela’ge ’gu agai o. 14Heselei a’ge en howi pam hutla’gumogoluk walhogulat tuama re, hegeik no a’ge na’gogo pasulat, heleget pak werik a’ge modok anniapsogo pil lasulat, ’gwiang orlogomtak a’ge ebelogo poluk, helep ’gela’ge ebelogo pasulat, orlogomtak a’ge ano ebelak poluk. Helep ’betesogo pil lasulat, ele delak holuk e, lo’boktak pil lasulat, taga lomup o. 15Hat welegenma eba en hebe odouk nasulat, wa’gun en e, hebe damuk takhebasulat, ho’bukhak en e’gela dengsogo nasu ’gela’ge, hebe asogoat takhobogulat, tua ani o. Asogoatma re, ha’bukhak yarluk oso ’gela’ge yarluk ogulat e, ’borlue yarluk oso ai ’gela’ge yarluk ogulat, togu lemis o! 16Hwesagal a’bigat ’bogorl pam welago ai ’gela’ge erlak, we is ap hat hebaget o’go ’balil no’gwi a’ge ebano nak e a’bigapsogo enebegen a’geat de, ’borlue yen di a’ge yu a’ge ’berleksogo noluk lasu ai ’gela’ge, is ap hebaget o’go ’balil lagai a’ge ai, di a’ge yu a’ge o’go ’balil laga lotluk, asogoat pungtak ’bok lagai o. 17Is hat tenhiarok welagai a’ge ai re, ’borlue da bele no’gwi ai ’gela’ge welat, is hat hosi enemin togwi a’ge ai re, ’borlue esan o sogwei holuk helep pak werik a’ge ogola oluksogo ’gwi lot-luk, pobuk mo yeriso holuk, libotluk we darak erlak lai lasuam, aphwami eneperlak welagai ai ’gela’ge, welat, togwi welagai o.
18O Asyur onue ’gain yu o. Domba degelonobogwi ’gela’ge, hosilak tenentarok welagai a’ge ebano nogo nil agalat, hat hosilak ’gain-’gain ebano set hwal horlogulomok oluk, ’bourak welat tugumu re, is aphwami heragam welagai a’ge ebano hweiye ’bogolil dom-dom eba petne legesarik oruakma re, ap mesik en odoksogo onobou wom a’ge ebe erlakma re, enebe nede o. 19Wathebegisema hiebil mep ai oso oruak a’ge ano op om a’ge a’bosu erlagatma re, ai pamat warorogun o. Hat aphwami enebe en mo u erlakma en hede ’buksogo welat, wiak nak til lasu ano re, takpo erlakma en mesik sa oruak epegen? ’Berlegat takpil nak lasu legenma re, is aphwami ’berlegat hat tago a’ge ai, enesa’go hologu lemarik, enede aganhan en ene’gik dap tugu lema, a’ge mo’gulhegis o,” oluk, mo’gulegis.
Currently Selected:
Nahum 3: Wul
Highlight
Copy
Compare
Share
Want to have your highlights saved across all your devices? Sign up or sign in
