Nahum 2
2
O Niniwe wiagap po wene
1“Hat O Niniwe yu o! Hat wiagaphobou a’ge, arat horok lau wagama re pak werikmu en yetharok welat, ’goduk ’gu agaimu hil opsogo welat, hesegen dok modok leik-louktak poluk welat, hanni tak pagathorloluk welat, taga lomup o. 2E, anggur e’gen lologunsogo daganogulat, ede’bi dak-paksogo pogulat, togwi ai ’gela’ge ap wiagap onobogwi a’ge en is Yakub a’ge welagaimu eba, asogo at takpogu legesa a’geat de, is Israel a’ge welagaimu eba naduk mubelesogoat tak en e, Eige! Nogorlok e,” oluk, erliktogu legesa ’gela’ge, is Yakub a’ge welagaimu asogoat tak paik ani o. 3“Weim tu a’ge enalukhwe hwalogulat, at wiagapsogo po a’ge osilak enebam a’ge enaksogo e e’bek weim tuogoluk enebe orlomu togwi a’ge ebano ’borlu ’belak a’ge ebano wogulat, at osilak weim togwi a’ge onosum ’borlu ’belak a’ge ’buk horlogulat, ono’gwiang so weim togwi a’ge ’besi uak a’ge pam hele’gik a’ge ebano leik-louk togukhwe amolit deleng-deleng eselat, onokuda en e, louwok, oluk,” ning ogulat, togu legesa o.
4“Esaga ’gwiak ai ’gela’ge, o obinal yebekhasu’gela’ge, is ono’gwiang so ano onoyogut o’borlogouk til-til ebela ’gwe wagalat, kota ’seli ’gwe ebano muk-mak ontogulat, togwi ai o. 5Asogo togulat, ap onue ’gain en osilak weim togwi enaluk a’ge? Ebano worlentasuam ebela pam, lagaimu onoyuk a’gul dungsogo wathwerlil lagalat, is pungtak o kota-kota helep pak werikmu ebano loluk parema en wiagarogwi a’ge ebano wokho pou wagalat, togwi o. 6Ik hwalogo ’gwelabogumu ebano ’goduk husogo pil lagaiam, ap ’gain a’ge owi o lok opsogo werikmu ebano ’gwi lasulat wiagap pasu o. 7Hwe lok a’ge ano tenak poluk osum no’gorlogo poluk, woluk libagalat, hwelani dogum at owi pam ebaget yabuk togwi a’ge ebano tue motluk iak yiwu oso ai ’gela’ge ogulat, ene’gik en enemik puk-puk wathorlogulat, togwi hegi o. 8O Niniwe ai, ik ye’gelak a’ge ele posogo lebago ai ’gela’ge asogoat agama, pelang-pelang libagaihwe, ’buk o! ’buk o! oluk, eniak loksogo mo’gulontogwi a’geat de, is pema en onolukhwe edenogo wom erlakma en lebagai hwe modok hegi o.
9Asogoatma re, o kota di a’ge yu a’ge erlak om erlakma en op nak welagoma re, perak ano wogulat, emas ano horlogulat, tit o,” oluk, mo’gulentesimu, 10O Niniwe a’ge di a’ge yu a’ge op nak welago a’ge ebano wogulat, o wogowiat takpogulat, yogo a’ge edip henekho pil lagalat, togwi en, enede yarluk eselat, onuak erlik-erlik ogulat, onogorlok agalat, youk ogulat, onorogole erlak agalat, asogo tugukhwe entegis o.
11 Singa owi ’belak a’ge ebano re, yogodak ’ga oruak epegep? Singa emalik agamu wogosuma ebano no’gosogo aga o? Singa ierak-holou emalik emin onogorlok erlak a’ge libom’guom tugumu ebano re ’geba o? 12Singa ierak a’ge ano en emalik onogumsogo nouwagoluk is en no a’ge weriselat, at are holou a’ge en nouwagoluk ’balogo pasulat, takpoluk woluk no’gumu ebalema ebano ’betesogo po’gwiselat, owi ’belakma ’betesogo po’gwiselat, tago a’ge ano no’gosogo aga o?
13At anni modok welago a’ge ’gain Onuk Logo a’ge en Allah en is mo’gulentasulat, his e, an nemin weim ’belak oruakma re, hono’gwiang so weim tugu legep a’ge ano odouk paikmu hobu saga eselat, singa emalik ’gela’ge honosi weim togwi a’ge ebano weim en waronobuak oluk takpasulat, His e aphwami en a’ge hogul wokho honowi pam pou wegep a’ge ai An en togolik his hene’gikmu a’ge waikmu re, ye ’gwelakhentarok wolom a’ge o’go uang pou wagoluk, honosi en aphwami mo’gulentai legesa a’ge ebano eniak erlagapsogo enebasulat, tik o, oluk, mo’gulentasumu hegi o.
Currently Selected:
Nahum 2: Wul
Highlight
Copy
Compare
Share
Want to have your highlights saved across all your devices? Sign up or sign in
