Habakuk 1
1
“Wiak taknenebasukhwe agauwa meren pam uknonoboluk wolom no,” oluk Allah mo’gulesi wene
1Nenaik ’gain Onuk Logo a’ge en iak ap Habakuk en mo’gulontuagoluk ebam pesimu abi ’gela’ge pam il yethesi re, yu.
2Allah ’gain Honuk Logo a’ge, naik. Aphwami enebabut enanni wiak a’ge en wiagapnonobogwi ai, delnenebinogoluk yo’go hebasu legi a’ge agauwa ’ge erlige en hesa’go hologun. Hesa’go holholugat delnonobu pugat welegen yema re! 3Enanni wiak modok togwiam nil yerentasu lemagoluk ukpasu legen ai nopaget. Hat hiak sagalogo asogo wiak togukhweat de, hil ontoluk mo ese legen ai nopaget. An neragam o’gwe etleba yema enebabut enanni wiak wiagap onobogulat, weim obogulat, yeik pogulat, togwi modok oruak ai o. 4Nonuelak ’gaindek pemerintah a’ge en,
“Disogo togu lomup, asogo togu lomup,” oluk ogwi a’ge ai, logap pogwi erlak. We, miayat ago. Wene hegitsogo hwalontogwi erlak. Enebabut wiak a’ge en enebabut op a’ge mabenap pogwi o. Wene hegitsogo hwalonto a’ge re, eniak lagaksogo wiak togwi ai o, oluk Allah mo’gulegis o.
Wene o’go Allah en Habakuk mo’gulesi wene
5 #
Per. 13:41
Asogo mo’gulesimu, at Nenaik ’gain Onuk Logo a’ge en e, eiyagai mo’gulontuagoluk wene disogo mo’gulnesi,
“Aphwami ena’gul onuk lo’bok his heneragam o’gwe da ya welagai a’ge ai, yogodak his oruakhwe an en mesik tik ani o. His en henil opsogo wolomup o. Henil yerontoluk modok erliktogup o. An en tik a’ge ai, aphwami en mo’gulhontogwiam, his en henesa’go hil-hol e,
Demat, oluk opo puk a’ge togup o. 6#2Raj. 24:2Is ap o Babel a’ge enebabut e, enanni wiak, yorlo-’gorlo a’ge, ai, enanni emagoluk an enat tagenebaik o. Asogo tagonoboma, onowi pam en liplau wotluk, esan pulogo re, aphwami ena’gul onuk lo’bok di owi yu owi welagai a’ge onowi lo’gwe sebeluogoluk wagai o. 7Wagalat e, onu’gwarek en erlikhorlogulat, is ado eniak hologo tu erlakma en onu’gwarek enede opoluk nak togulat, aphwami logon onogorlok emagoluk nak togulat, enarogun lobogulat, til wagai ai o. 8'Baik lok a’ge omut a’bik a’ge ai, mia o. We, is onuam kuda ai nak e, omut a’bik o. Orlomene emde nele en huba’go wago ai re, ebabut weiyat op ’gela’ge a’geat de, is onuam kuda ai ebabut modok wiak o. Is ap ai onowi walekma en, kuda o’borl pam ligotluk, pungtagat wotluk, tue pedi-pedi en tosogo wotluk tue weriso ai ’gela’ge, warenebil wagai ai o. 9Onosi enemin esan logologo enannisogo mabenap onoboluk wagaiam e, aphwami a’bigat onogorlok agai o. Mabenap onoboluk e, is logon enebe ene’gik wenaru mia a’bigat ene’gik herle wusogo wogonoboluk lagai o. 10’Gain ononuk logo a’ge onogola en mi-miarak onobogulat, onosi ononuk oruak a’ge eida onobogulat, til wagai ai o. Asogo til wagalat, selei a’ge ’guano oluk leget pakleget ningsogo werik a’ge, onogola en e,
We, leget-legerat werik ’gela’ge, oluk eida togulat, ’gwiang a’ge ebela ’berlasogo leget siatle hasogo ’gogwi ai o. 11Mabenap onobo ’gwi lotluk e, o sogwei pusogo lasu ai ’gela’ge, momuat lagai ai o. Aphwami onomu’gat pam he’berik welagai ai ’gela’ge, is en e,
Nis nenanni oruak o, oluk onu’gwarek enanni pam he’berik oruak ai o,” oluk Allah en egei.
At Habakuk en, “Aphwami enebabut modok wiak togukhweat de, hebakhenne ugenebasu legen ai nopaget,” oluk Allah wene yagesi wene
12Honuk Logo a’ge, naik. Hat edip pam enat nenaik Allah at welegen o. Hebabut ’gektak modok welat, helaluk modok-modok welegen a’ge ai, hebe an naik Allah at o. Is ap Babel a’ge ai en, nis wene nenebam pou wagoluk hat en wenakho pulogo yo’go enebegen hegi! Helep edipmu op welagai ai ’gela’ge, hat heragam sennentarok welegen a’ge, naik. A’geat de, hat en nenesa’go werigoluk, is ap ai enanniap enebegen ai o. 13Asogo a’geat de, is ap ai enebabut modok wiak welat, lalogo wiagap onobogukhweat de, hil ontoluk, ugenebasu legen ai nopaget. Hebabut wiak tago erlak modok ’gektak welegen a’ge en, is logon wiak togwiam, hil nak wolom no? Wiak togwiam, hil ontoluk ugonobo no? Is ap ai enebabut modok wiak a’ge enat, enebabut op a’ge wiagap onobogukhwe hepe mosogo welegen ai, nopaget?
14Nenebe aphwami a’geat de, hiane ’gela’geat taknonobogulat, ina’ge ue ’gain erlakma welago ai ’gela’geat taknenebasulat, taga legen ai nopaget. 15Is ap Babel a’ge ai en, aphwami a’geat hiane oluk, hiane iak pam sarluksogo wogulat, mul sum ogola yagasogo woluk lagai ai ’gela’ge, wogonoboluk lagalat, onogola enagai holuk amitmit supsogo lagai ai o.
16Is en e,
“Nonosum yu pam en op a’ge sabusogo hwerlogulat, no’gulat, togu lege,” oluk e, onosum ai pam he’berik welat, uam warogulat, e’ben op a’ge narlogulat, togwi.
17Is ap ai ’garok lisogo waronobogulat, aphwami ena’gul onuk lo’bok enebe enedeap onobo erlakma en waronobogulat, tu a’geat, asogo togwi modok welagai no? oluk Allah mo’gulegis.
Currently Selected:
Habakuk 1: Wul
Highlight
Copy
Compare
Share
Want to have your highlights saved across all your devices? Sign up or sign in
