Matius 27
27
Yesus herle wusogo ’gain Pilatus
wogosu wegesa wene
(Markus 15:1; Lukas 23:1-2; Yohanes 18:28-32)
1Asogo tigisarik oruakma, hubet siaksogo is ap Allah eiye a’ge onuelak ’gaindek a’ge ebano emin, enarluedek ebano emin, ’berlegat en e, Yesus woruogoluk obok ’baligisarik e, 2e’gik herle wusogoat Pilatus ebe gubernur ’gain oruakma woluk wegesarik e, wogegisa.
At Yudas u’gwarek en ebe ’be’gi
wathwerlesi wene
(Peragenebesi 1:18-19)
3 #
Per. 1:18,19 Yesus asogo wene ebam poluk demat woruogoluk tugukhwe, at Yudas en woruagoluk yo’go laga a’ge ano il yerontoluk e, ede en e,
“An wiak tegis o,” oluk ede heberlegei. Ede heberlegeirik e, o’go uang perak a’ge 30 wogegisa a’ge ano pobuk uak wokho wogentaigoluk, is ap Allah eiye a’ge onuelak ’gaindek ebano emin, enarluedek ebano emin, oruakma wagarik wogentasulat e, disogo mo’gulentesi,
4“Eige! Ap ai wiak tu erlakmayat de, woruagoluk yo’go wegi ai o. Holuk e, wiagat tegismu hegi o,” oluk mo’gulentesimu, is ebano en e,
“Wene ai nis nenebam agama en de egen? Erlak o. Ai hat homuat o,” oluk mo’gulegisema re, 5at Yudas en uang perak a’ge 30 wogegisa ano Allah owi werikmu ebano hwikholuk e, u’gwarek en o’gorlop herle erlilogo ebe ’be’gi waraga.
6Asogo tegeimu, is ap Allah eiye a’ge ’gaindek ebano en uang perak a’ge 30 ano wegesarik e,
“Uang yu ap emep o’go ’baligisarikmu re, Allah paget uang pogumu eba po modok mia o,” oluk egesarik e, 7aphwami ap ’bok a’ge waragaiam ’gwiang salonobogulomma, ap mesik ’gwiang domul sogoluak a’ge hele’giso a’ge o’gwiangma re, at ebam o’go ’baligisa. 8Asogo tigisa ai en e, ’gwiang ai onuk ap emep ’begeimu oluk tualigisarikmu re, hwerli ai en ’bekhit yogodak ogo ogwiat. 9-10#Zak. 11:12,13Ai tigisa ai re, ap Yeremia Allah iak mo’gulentasu laga a’ge ano en eselat e,
“Nenaik ’gain Onuk Logo a’ge en mo’gulnesi hegitsogoat, is aphwami Israel a’ge en,
Ap ano ebe o’go yu o, oluk egesarik e,
uang perak a’ge 30 wik-wok e, ap sogoluak ’gwiang domul a’ge hele’giso a’ge ano o’gwiang o’go wogegisa,”
oluk pelal wokho pesi ano ebe ai erligeat, hegit aga.
At ’gain Pilatus en Yesus emdema wesi wene
(Markus 15:2-5; Lukas 23:3-5; Yohanes 18:33-38)
11At Yesus ap Pilatus gubernur ’gain a’ge ano e’bek woluk wegesema orogolema inlai lagama re, at en hin ebam wasulat e, disogo mo’gulesi,
“Aphwami Yahudi a’ge onue ’gain onuk logo a’ge ano harat a?” oluk mo’gulesimu, at Yesus en e,
“Hat e’gen aiat o,” oluk mo’gulesi a’geat de, 12is ap Allah eiye a’ge onuelak ’gaindek ebano emin, enarluedek ebano emin, enemin en, wene Yesus ebam a’bik pegesa a’ge re, at en e, pobuk wene mesik o’go mo’gulonto erlakma en mo egei. 13O’go u erlak mo egeimu, at ’gain Pilatus en e,
“Di wene yu wene a’bik hebam pogwi yema hesa’go hwelise legen erlak?” oluk mo’gulesi a’geat de, 14o’go mesik lagaksogo u erlagat mo egeimu re, at ’gain gubernur ano en e,
“Nogorlok o!” oluk erliktegei.
At Yesus ebe modok woruagoluk wene ebam pegesa wene
(Markus 15:6-15; Lukas 23:13-25; Yohanes 18:39–19:16)
15Is aphwami Yahudi a’ge seni Paskah lok sakho no’gulat, is en e,
“Aphwami ene’gik herle werak a’ge ai at ai ’gela’ge, hebilogo woknentemen o,” oluk ’gonu ogwiam e, at gubernur en hebilogo wogentasu laga. 16Asogo wogentasu lagarikmu no oluk e, ai erlige re, ap mesik onuk Yesus Barabas,
Wiak tiso a’ge, oluk obok modok sagarak pogu legesa a’ge e’gik herle werak ebano oruakma, 17-18aphwami a’bik odoktugukhwe, at ’gain Pilatus ano il holuk e,
“Is yema re, Yesus ebam ’bousogo enat woluk wegesa ani o,” oluk, pobi tegeitigat de, disogo mo’gulentesi,
“His henede en e, ap onuk sa hebilogo woknontouwagoluk opogu legep. Yesus Barabas a? Ye, at e, Yesus onuk mesik Kristus ogwi a’ge ano a,” oluk, mo’gulentesirik e, 19wene edip ’belo’gogumu eriano hweriogo oruakma, at ’gain Pilatus ugwe en ap mesik wene wusogo perakpou waga. Perakpou wagalat e, disogo egei,
“An hup nogosoma ap ai ebagerat nabi wiaksogo hegi o. Holuk e, at ebabut op a’ge ai hat hemin wene ebam pagup o,” oluk egeimu mo’gulosu wegesa a’geat de, 20is ap Allah eiye a’ge onuelak ’gaindek ebano emin, enarluedek ebano emin, enemin enat, aphwami esan ebano enede ’gagalugulat e,
“Barabas ai e’gik herle hebilnontugulat e, Yesus ai nak e, werip o, oluk mo’gulomup,” oluk mo’gulentigisema re, 21at gubernur ano en,
“Ap enebe ’biren ya re, at ap sa ’gela’ge herle hebilnontouwagoluk ogu legep,” oluk mo’gulentesimu is en e,
“Barabas ai herle hebilnentemen o,” oluk mo’gulegisa. 22Asogo mo’gulegisema, at Pilatus en e,
“Holuk e, Yesus onuk mesik Kristus yu re, no’gosogo tik,” oluk mo’gulentesimu, is ebano en e,
“E pam edikpoluk werip o,” oluk mo’gulegisa. 23Asogo mo’gulegisema, at en e,
“At no wiak tegeimu en,” oluk mo’gulentesimu re, is en eniak ningsogoat,
“E pam edikpoluk werip o,” oluk mo’gulegisa. 24#Ula. 21:6-9Asogo mo’gulegisema, at Pilatus en e,
“Is aphwami yema enat,
Worulat, oluk eniak ningsogoat ogulat ologunmu wiak omon paget, an niak ’burlat almasogo eselegi hegi,” oluk, ik ne’gak a’ge mesik wesirik e, aphwami ebano enil oruakhwe e’gik petne horagalat e, disogo mo’gulentesi,
“Ap yu emep e, an nebam ema erlak o. Hisat henebam ema o,” oluk, mo’gulentesimu, 25is ebano is eniak ningsogo ogulat e,
“At emep ai re, nis nenemalik neneminat nenebam welemak o!” oluk mo’gulegisema re, 26at Barabas ano e’gik herle hebilogo wogentasulat e, at Yesus nak e, ’go’bu lagal’bisok wusogo re, e pam edikpoluk woruagoluk wogentesi.
Is ap tentara a’ge en Yesus eniak esegen
yagegisa wene
(Markus 15:16-20; Yohanes 19:2-3)
27Pilatus en Yesus ebe wogentesimu re, at osi tentara a’ge ebano en wene edip ’belo’gogumu woluk ’gwigisarik e, at ebe ’burl eriano poluk, enarilak esan mesik emin logologu legesa a’ge enebe ’berlegat eragam wali’gogo odoktigisarik e, 28at osum no’gorlogo poluk e, sum orogole wibe’gen werak ’gela’ge mesik ’buktak pogulat, 29ap ’gaindek a’ge ene’gare-’gare ’buktogwi a’ge ai ’gela’ge, orlok wiak a’ge hwanesogo a’gul pam ’buktak pogulat, ’bon ’go’bu ’balogo e’gik ’bekhit akhit wogogulat, tugulat e, enebe ondogorlu pam huregesarik, eida a’bik obogu legesa,
“Eige! Aphwami Yahudi a’ge onue ’gain onuk logo a’ge ano harat hegi o,” oluk eniak esegen yagugulat e, 30was ebam topuksogo pei lagalat, ’bon ’go’bu ano delogo re, a’gul ’goloksogo worugulat, tigisa. 31Asogo til legesarik e, sum orogole wibe’gen werak a’ge ano no’gorlogo at u’gwarek osum a’ge ’buktak pogulat, tigisarik e, e pam edikpoluk woruogoluk woluk liplau wegesa.
Yesus ebe e pam edikpoluk werigisa wene
(Markus 15:21-32; Lukas 23:26-43; Yohanes 19:17-27)
32Yesus ebe woruogoluk woluk, o selimu en arat liplau wegesarik, wagaimu, ap mesik onuk Simon, owi o Kirene a’ge emin sarlok tigisarik e, eniak ningsogoat disogo mo’gulegisa,
“Yesus e pam edikpoluk worua a’ge e yu hat wemen o,” oluk mo’gulegisa. 33Asogo mo’gulegisema, wesimu re, dom a’gul onuk nis neniak pam Ena’guluak ’Belak duk pam
u ’gela’ge, is eniak pam Golgota duk pam eba wegesa. 34#Mzm. 69:21Wegesarik e, anggur e’gen a’bosu emin, wam omotukhwe ’gela’ge esik wiak a’ge a’bosu emin, emin ne’gerlak-he’gerlak takpoluk, at nouwagoluk wogegisema, nekhesi ’gal e, no ebit agama, ukpesi. 35#Mzm. 22:18Asogo tigisarik e, at ebe e pam edikpoluk osum no’gorlak ebano,
“Salak ’gela’ge horlouwa,” oluk helebe’gen hwikhai lagalat hwikhau wagalat, tigisarik e, helebe’gen enebam aga a’ge holuk sum ano so’busogo hwerlegesa. 36Arat so’busogo hwerlegesarik e, Yesus eragam eriano ’gagalak welegesa. 37Welat e,
“Ap yu re, wene edip yu pam pegerik en werige o,” oluk u ’gela’ge, “YESUS APHWAMI YAHUDI A’GE ONUE ’GAIN ONUK LOGO A’GE EBE YUAT O,” oluk pelal wokho e pam a’gul hegitsogo dopnorak pegesa.
38Yesus ebe asogo e pam ’burl edikpegesarik e, is ap enebe ’biren aphwami ena’ge yogorlia wogu legesa a’ge mesik e’gik ’bekhit akhit, mesik e’gik hware akhit, edigonoboluk eminat warenebegisa. 39#Mzm. 22:7; 109:25Asogo edigenebegesema oruakhwe, aphwami ebela ai o’gwe lak-wak ogulat at Yesus ano disogo mo’gulegisa,
40 #
Mat. 26:61; Yoh. 2:19 “Eige! Hat en, disogo e’gen epegi,
Allah owi werik a’ge yu moluksogo poluk e, agauwa ’birenam werise leiktik agauwa henaganak a’ge en arat ologun ’balogo werik o, oluk e’gen ano re, hebe Allah omlogo holuk e, hu’gwarek en hebe e ai pam en hagap delogo ’bi suk da!” oluk ena’gul ’gwani hogulat eniak esegen yagogu legesa. 41Asogo tugukhwe re, is ap Allah eiye a’ge onuelak ’gaindek ebano emin, Allah iak pelal wogo eiye a’ge ebano emin, enarluedek ebano emin, enemin eniak esegen yagogulat e,
42“At en e, is aphwami muon elirat delenebise laga a’geat de, u’gwarek en nak e, delhorlo mia hegi. E ai pam en delogo ’bu ago holuk e, nenil holuk, at ai nis aphwami Israel a’ge nonue ’gain onuk logo a’ge demat o, oluk, pobi tul en oluk, ’bumak da! 43#Mzm. 22:8Ede Allah ebam he’berik welat,
An Allah omlogo yo, oluk ese laga ano re, at Allah enat delik epesi holuk e, doluak e,” oluk egesa. 44Ye, is ap yogorlia wogwi en warenebegisa a’ge eriano en ogo Yesus eniak esegen asogoat yagegisa.
Yesus ebe waraga wene
(Markus 15:33-41; Lukas 23:44-49; Yohanes 19:28-30)
45Asogo mo’gulogwi oruakma re, o erlige ’burl jam 12 pam o hik egeitik e, o eba ’berlegat hwerli jam 3 hiktak welaga. 46#Mzm. 22:1Hiktak oruakhwe, jam 3 arat lai lagama re, at Yesus en aik Allah disogo mo’gulesi. Nis neniak pam e,
“Naik Allah! Naik Allah! An nopaget uknebegen,” oluk u ’gela’ge,
“Eli, Eli, lama sabakhtani,”
oluk iak ’beraksogoat mo’gulesi. 47Asogo mo’gulosoam, is aphwami nin pema eba welegesa a’ge enesa’go hweligisarik e,
“Ap yu Elia worlhasu,” oluk egesema 48#Mzm. 69:21ap is a’ge mesik pungtak lagarik e, hwali sabus ’gela’ge pam anggur e’gen a’bosu esik wiak a’ge udalogo nouwagoluk e paiyo pam dongsogo wogesimu re, 49is nin pema en e,
“A! At Elia en deluma ya? I a. Nenil wolomok,” oluk egesa. 50Asogo egesema, at Yesus pobuk iak mesik erlige loksogo egeitik e, arat lebeksogo waraga. 51#Kel. 26:31-33Waragoam e, Allah owi werikmu sum kain a’ge o ogorlirak dit akhit o’gwe ’belak welaga a’ge erabu en ’burl heisogoat ’bak-’bak ’bu agalat, mouk erlanghasulat, helep ’bageselat, tegeimu re, 52aphwami werak a’ge ’gwiangma salonobogwi a’ge ebano omuat ’goduk huretil lasulat e, Allah eiyagai waregesa a’ge enebe esanat salenebigisa’gwe en enelaluk egesarik inetil legesa. 53At Yesus ebe elaluk agama re, is enelaluk egesa a’ge ai, o kota Yerusalem Allah u’gwarek owi ogwi ano ’gwigisema re, aphwami enebe a’bik enat enil entigisa. 54Ye, ap tentara a’ge onue ’gain a’ge emin, osi pema akhit Yesus eragam ’gagalak welegesa a’ge ebano emin, mouk erlanghasulat, di bele yu bele tagalat, tegei ano enil hegesarik onogorlok a’bik egesarik e,
“Ap yu re, Allah omlogo demat o,” oluk egesa. 55#Luk. 8:2,3Asogo tugukhwe, is hwami Yesus lethogu legesa a’ge ebano o Galilea en ’bi legesarik Yesus ebe e pam edikpegesema enil walekma en yetharok welegesa. 56Is hwami eria re, mesik Maria owi Magdala a’ge. Ye, mesik e, hwe Maria Yakobus o, Yusuf o, enia ano. Ye, mesik e, Zebedeus eiyagai enia ano o, hwami muon logon eneminat welegesa.
Yesus ebe werak owikmu pei legesa wene
(Markus 15:42-47; Lukas 23:50-56; Yohanes 19:38-42)
57O arat hup agama re, ap e’gik oruak a’ge owi Arimatea a’ge onuk Yusuf, at Yesus eragam ’goluk iak wasu laga a’ge en, 58Pilatus e’bek lagarik, Yesus werak ’gonu mo’gulesimu re, at Pilatus ano osi en wogemagoluk mo’gulentesi. 59Ye, arat wogegisema re, sum kain ’get lenan a’ge pam e’girlogo re, 60at Yusuf owik u’gwarek en ’gerat hele’gegeimu ai pei lagarik e, helep ’goduk ebak lok a’ge erlebilogo pou wagarik dopnosogo lerak poluk laga. 61A’ge re, at hwe Maria owi Magdala a’ge ano o, hwe Maria agaikhen ano o, hweriogo welat Yesus werak pegesema enil welegesa.
Ap pema Yesus werak pegesema ’gagalak
welegesa wene
62Is aphwami Yahudi a’ge loruk o’gwe agauwa sabiren Allah paget weat wolomogoluk e, yogodak ’gela’ge di a’ge yu a’ge nomlogo poluk, is ap Allah eiye a’ge onuelak ’gaindek ebano emin, is ap Farisi a’ge emin, enebe odoksogo Pilatus e’bek legesarik e,
63 #
Mat. 16:21; 17:23; 20:19; Mrk. 8:31; 9:31; 10:33,34; Luk. 9:22; 18:31-33 “Nonue. Aphwami lalenebil nese laga a’ge ano, elaluk welat mo’gulentasulat e,
Agauwa ’biren werak weleiktik e, henaganak a’ge en e, nelaluk eik o, oluk egei ano en e, 64at osi ebano en werak ano hisogo pei louwarik aphwami mo’gulontogulat,
At Yesus ai waragama Allah en elalugaptegeimu, oluk ogu lemano. At naduk aphwami lalenebil denaga laga ano wei ’gela’ge. A’geat de, pobuk asogo tumu re, loksogoat lalonobuano oluk e, agauwa henagan ya paget ’gagalak welemagoluk e, ap logon yo’go enebemen o,” oluk mo’gulegisema, 65at Pilatus en e,
“’Gagalak welema a’ge enebe ya. Holuk e, werak pegesema eba opsogo ’gagalak welemagoluk, wogonoboluk lit o,” oluk mo’gulentesi. 66Asogo mo’gulentesimu, is ebano wogonoboluk wegesarik e, aphwami en ’goduk horogumu no oluk, werak oruakma helep ’goduk dopnosogo larigisema ano ebam silo pogwi ai ’gela’ge a’bosu werak poluk, is ap ’gagalak wolom a’ge ebano ’gagalak onoboluk legesa.
Currently Selected:
Matius 27: Wul
Highlight
Copy
Compare
Share
Want to have your highlights saved across all your devices? Sign up or sign in
