Matius 26
26
Yesus ebe woruogoluk obok ’baligisa wene
(Markus 14:1-2; Lukas 22:1-2; Yohanes 11:45-53)
1At Yesus en wene ai ’berlegat arat mo’gulentesirik e, pobuk osi iak wogu legesa a’ge ebano disogo mo’gulentesi,
2 #
Kel. 12:1-27
“Agauwa ’biren wolomultik en, seni Paskah tul ai his henalugat ani o. Asogo tugukhwe, an abat daklau wegi ano, ap en yo’go louwema, is nin pema en e pam ediknoboluk watnobuagoluk ene’gikmu nobouwa o,” oluk mo’gulentesi. 3Ai erlige re, is ap Allah eiye a’ge onuelak ’gain a’ge emin, enarlue a’ge ebano emin, at ap Allah eiye a’ge onue ’gain onuk Kayafas ano owi pam odoktigisarik e, 4Yesus il walsogo tenak poluk woruogoluk obok ’balogu legesa. 5Obok ’balugulat e, disogo egesa,
“Seni logat sorugumu ai re, eniak loksogo tagaluano oluk e, tenak po erlak wolomultik en de, o we erlige ’gela’ge holuk en tenak pouwok o,” oluk obok ’baligisa.
Hwe mesik a’bosu e’ben op a’ge Yesus a’gul pam ’belabegei wene
(Markus 14:3-9; Yohanes 12:1-8)
6Asogo tigisarik oruakhwe, at Yesus o Betania ap Simon ou hwena’go ’gela’ge onogorlok a’bik a’ge pageat ebam aga a’ge ano owi pam eba ’gwi lagarik oruakma, 7#Luk. 7:37,38hwe mesik a’bosu e’ben op a’ge o’go a’bik a’ge o’go ’balogo sogoluak helep onuk pualam hele’gik a’ge pam ogola na’gogo woluk Yesus so’boru nasumu e’bek ’gwi lagarik e, a’gul pam ’belabegei. 8Asogo ’belabegeimu, at Yesus osi iak wogu legesa a’ge ebano enil hegesarik e,
“A’bosu we ’burlat almasogo ’belabegei yu, nopaget,” oluk, onolot het egesarik e, hwe ano wene yagugulat e,
9“A’bosu ai o’go modok a’bik a’ge ’balogo re, is ena’ge erlak a’ge so’buronto a’ge,” oluk egesa. 10Asogo egesema re, at Yesus en enebabut enagat pobi enebegeitik e, disogo mo’gulentesi,
“Hwe yu en obat taknebesi a’geat de, nopaget wene yagogu legep. 11#Ula. 15:11Is aphwami ena’ge erlak a’ge ai his henemin modok wolorogup a’geat de, an nak e, his henemin modok wolomul erlak o. 12At hwe yu en a’bosu herlilnebegei yu re, an pobuk watnobuema nebe wareikmu re, werak salnobuogoluk egilnobu ’gela’ge arat egilnobu waga o. 13Niak demat mo’gulhentaik. Hwe yu eberak welemagoluk, aphwami wene op wene ano, o di owi yu owi mo’gulentil no’gulat e,
Hwe ai disogo tegei o, oluk obok op ogu lema o,” oluk mo’gulentesi.
At Yudas en Yesus woruagoluk ap yo’go laga wene
(Markus 14:10-11; Lukas 22:3-6)
14At Yesus en wene asogo mo’gulentesimu re, at osi iak wogu legesa a’ge enebe 12 ebano a’ge, mesik onuk Yudas Iskariot ano, is ap Allah eiye a’ge onuelak ’gain ’gain ebano ene’bek lagarik e,
15 #
Zak. 11:12
“An en Yesus ai wokhentaikmu re, his en o’go no’gwe woknorogup no,” oluk mo’gulentesimu, is ap ebano en e,
“O’go uang perak a’ge 30 wokhomul o,” oluk mo’gulegisarik e, ene’gik wenakho wogegisa. 16O’go arat pegesema re, at Yudas Iskariot ano en e,
“Yesus ebe panoasuak no’gosogo oruakma ene’gikmu paik e,” oluk obok ogola welat wenemennei eberise laga.
Yesus osi emin, seni Paskah ne’gesa wene
(Markus 14:12-21; Lukas 22:7-14,21-23; Yohanes 13:21-30)
17Yudas asogo ogola eberisokhwe, is aphwami Yahudi a’ge e’gen roti poruagoluk ogola ’gwelabogwi a’ge ano ogola ’gwelabu erlak, we werakho no’gwi a’ge ano nouwogoluk naduk ’gomuk no’gwi ’gela’ge nouwogoluk tugulat, is Yesus osi iak wogu legesa a’ge ebano e’bek wegesarik e, disogo mo’gulegisa,
“Nue. Hat domba wam seni Paskah paget nagun en, nis di a’ge yu a’ge o ’geba degelogo pei lo hagai epegen,” oluk ebam hin wegesema, 18at Yesus en e,
“O kota ano laguptik e, ap mesik eba oruak a’ge ano re, wene disogo mo’gulomup.
At nonue wene mo’gulnentasu a’ge ano en e,
An tik a’ge arat horok lau wagama re, an nosi niak wogwi a’ge enemin, at owi pam eba seni Paskah sakho nouwogoluk, mo’gulesi lit o, oluk mo’gulnentesimu mo’gulhosu wege o, oluk mo’gulomup,” oluk mo’gulentesimu re, 19is ebano, at en egei hegitsogoat legesarik e, di a’ge yu a’ge seni Paskah ano paget modok degelogo pegesa. 20O arat hup agama re, at Yesus osi iak wogu legesa a’ge ebano enemin legesarik e, enebe 12 ebano enemin huregesarik, 21seni no’gulat e, disogo mo’gulentesi,
“His ap ya a’ge mesik en, an nebe watnobuagoluk e, yo’go louwa ani o, oluk, demat mo’gulhentegis o,” oluk mo’gulentesi. 22Asogo mo’gulentesimu, is ebano enede modok wiak egesarik disogo mo’gulegisa,
“Nue! An de e’gen a? An e, erlak,” oluk, enebe lo’bok en il legesa. 23#Mzm. 41:9Asogo il legesema re, at Yesus en e,
“Hat mesik an ne’birek nene’gik mesik erlige piring ogola ’gwelebak poluk a’bosu egilogo ne’ge a’ge ai enat, watnobuagoluk yo’go louwa o. 24An abat daklau wegi ano re, tik a’ge pelal wogo oruak hegitsogoat tik a’geat de, at ap nebe watnobuagoluk yo’go louwa a’ge ai nak e, eige. Modok wiagat ema o. At ap ai dagelep erlakma re, obat wellep o,” oluk mo’gulentesimu, 25at Yudas, Yesus woruagoluk yo’go laga a’ge ano en e,
“Holuk e, nue. An de a? An e, erlak,” egeimu at Yesus en e,
“Harat a’geat de, ese legen o,” oluk mo’gulesi.
Yesus osi enemin so’boru emin, anggur e’gen a’bosu emin, ologun pam ne’gesa wene
(Markus 14:22-26; Lukas 22:15-20; 1 Korintus 11:23-25)
26At Yesus en wene asogo mo’gulentesirik e, so’boru no’gulat e, so’boru roti a’ge e’gikmu wesirik e, Allah hau weregeitik e, ebe ’gusogo is ebano so’burentasulat e, disogo mo’gulentesi,
“Yu an nebeat o. Waguptik e, menit o,” oluk mo’gulentesirik, 27-28#Kel. 24:8; Yer. 31:31-34pobuk ik e’be anggur e’gen a’bosu ne’gak a’ge e’gikmu wesirik, Allah hau wusogo se’ban egeitik, is ebano wogentasulat e, disogo mo’gulentesi,
“Yu re, an nemebat o. Allah en wene wusogo wokhenebik egei ano, an nemep namogo watnobua ai pam aphwami esanat di wiak yu wiak togwi a’ge erlagapsogo ukpaik ai pam demat ema o. Holuk e, henebe ’berlegat menit o. 29Wene mesik yu mo’gulhentaik. Anggur e’gen a’bosu yu noluk e, an pobuk mesik no erlak weleiktik en, hwerli naik en eragam onobouwa ai hwerli his henemin a’bosu ’get a’ge nul o, oluk, demat mo’gulhentegis o,” oluk mo’gulentesi.
30Wene asogo mo’gulentesirik e, weni Allah oweni mesik werak poluk libegesarik e, dom Zaitun a’gul pam ligegesa.
“Hat en Yesus neperlak o, oluk, elabe togun ani o,” oluk Petrus mo’gulesi wene
(Markus 14:27-31; Lukas 22:31-34; Yohanes 13:36-38)
31 #
Zak. 13:7
Dom Zaitun pam ligegesarik e, at Yesus en e,
“At Allah en,
At ap domba wam pekharok welago a’ge ai ebe an en werikmu re,
domba mesikmu orlobosogo oruak a’ge ai, hweiye ’bogolua ani o,
oluk egeimu, pelal wokho pegesema oruak ai en e, yogodak hup ya, his ’berlegat an uknoboluk hweiye ’bogologup ani o. 32#Mat. 28:16A’geat de, an watnobuema pobuk Allah en nelalugapnebisoam e, an naduk o Galilea ligegeiktik honlogotma weleik o,” oluk mo’gulentesimu, 33at Petrus en e,
“Is ’berlegat ukhoboluk ’bogologwi holuk e, an nak e, ukhoboluk modok lebeik erlak o,” oluk mo’gulesimu, 34at Yesus en e,
“Yogo hup sue ayam iak modok u erlak oruakhwe, hat en e,
Yesus ai an neperlak, oluk, he’gik henaganam elabe togun ani o, oluk, demat mo’gulhegis,” oluk mo’gulesimu, 35at Petrus en e,
“Erlak o. An ne’biregat watnonobuema re, obat o. An en,
Hat neperlak o, oluk, elabe hebik erlak o,” oluk osoam e, is Yesus osi iak wogu legesa a’ge ebano pema akhit ’berlek en e, asogoat il legesa.
At Yesus Getsemani e owi yogoma en se’ban eselat Allah yo’go pesi wene
(Markus 14:32-42; Lukas 22:39-46)
36Asogo egesarik e, at Yesus ebe emin, osi iak wogu legesa a’ge ebano emin, enemin Getsemani e owi yogoma legesarik osi disogo mo’gulentesi,
“An horok ya laiktik se’ban osokhwe re, his yema hweriogo welemis o,” oluk mo’gulentesi. 37Asogo mo’gulontoluk e, Petrus emin, Zebedeus eiyagai enebe ’biren eriano emin, wogonoboluk lagarik e, ede obotut agalat, hwenik agalat, tegeimu re, disogo mo’gulentesi,
38“An nede modok hwenik agarik warom ’gela’ge taknebasu o. Holuk his ya welat e, neminat nenebabut heberlogo wolomok o,” oluk mo’gulontoluk e, 39at ematekma ’gela’ge horoksogo lagarik orogole sogup ’bou egeitik e, Allah yo’go pasulat disogo mo’gulesi,
“Naik o! An wiagapnobua ai delnobogun holuk e, delnebip o,” oluk u ’gela’ge,
“Ik ne’gak nouwagoluk woknema ai, wokho elit holuk e, wokhomup o. Ye, erlak holuk e, an nede epegi a’ge ai erlak o. We, hat hede epegen a’ge aiat taknobomup o,” oluk se’ban egei. 40Se’ban asogo oluk osi ebano ene’bek waga ’gal e, is modok nogo lebektakma en e, at Petrus ebam disogo mo’gulesi,
“His e, hup ya 1 jam mesik erlige paget an nemin nenebabut heberlogo wolom e, mia hwi a. 41Wiak tuagoluk henede ’gagalil wema no oluk, henebabut heberlogo welat e, se’ban ogu lemis o. Henede en elirat tu oluk opogu legep a’geat de, henebe en asogo tu re, mia o,” oluk mo’gulentesirik e, 42se’ban naduk egei ano ’gela’geat, pobuk togolik lagarik e, disogo egei,
“Naik o! An wiagapnobua yu re, delnobu mia holuk e, hat hede epegen hegitsogoat emak o,” oluk, se’ban egei. 43Se’ban oluk pobuk waga ’gal e, is osi ebano nogo enil agama nogogumu entau wagarik, 44se’ban naduk ’birenam egeitik, pobuk mesik emin igoluk lagarik e, naduk egei ’gela’geat egei. 45Arat oluk osi ene’bek wagarik e, disogo mo’gulentesi,
“His set hwalogo nogogwi modok wolorogup a? Ap mesik en ap wiak togwi a’ge en an abat daklau wegi ano watnobuagoluk ene’gikmu nobouwa ano arat nebaiyogoluk wago yu yethemit o! 46Holuk e, lul en his inemis o. Ap an watnobuagoluk yo’go laga a’ge ano re, arat horoksogo waga etle o,” oluk mo’gulentesi.
Yesus ebe tenak pegesa wene
(Markus 14:43-50; Lukas 22:47-53; Yohanes 18:3-12)
47Yesus en,
“Horogat waga etle o,” oluk osokhwe erianoat, at Yudas, ebe Yesus osi enebe 12 ebano a’ge yo’go lagama, is ap Allah eiye a’ge onuelak ’gaindek ebano emin, enarluedek ebano emin en, is ap enebe esan logolak a’ge yo’go onoboluk peragonobou wegesema, ’garok emin, ’go’bu emin, woluk enebe modok pulholuk enemin wegesa. 48At Yudas Yesus woruagoluk yo’go laga a’ge ano en, wene disogo weragenebesirik en wegesa,
“Ebe pobi togup en e, an naduk laiktik hau emde motok weriso holuk e, his en e,
I, ebe aiat hegi, oluk, tenak pei lu o,” oluk arat wene weragenebesimu no oluk e, enalugat oruakma, 49at naduk Yesus e’bek wagarik e.
“Nue e,” oluk, hau emde motok werisoma re, 50at Yesus en,
“Not yu! Hat nopaget wegen,” oluk mo’gulesimu, is ap ebano Yesus eragam wegesarik e, ebe modok tenak pegesa. 51Tenak pogwiam e, ap mesik Yesus emin welegesa a’ge ano en ’garok owi ogola yagarak welaga a’ge, auwak o’gwe en lit-lat wesirik e, ap Allah eiye onue ’gain a’ge eragam a’ge mesik werigoluk lelhesi ’gal e, esa’go nak sebasogo ’bo pesi. 52Asogo ’bo pesimu, at Yesus en e,
“Is ap ’garok pam waronobogwi holuk e, o’go ’garok pamat waronobogwi o. Holuk e, he’garok ai hauwak o’gwe togolik ’gwelabin o. 53Yogodak an nebe erlele woknobuagoluk e, naik ’gonu mo’gulummu, at en is malaikat Allah ’bogorl pam en yo’go peragonobou ago a’ge ebano enebe esan 12 weiyat a’geat de, esan modok a’bik yo’go onoboma, pulholuk delnebil wom mia epegen a? 54Elirat delnebil wom a’geat de, delnebelipmu re, Allah enat,
Asogo ema, oluk egeimu pelal wokho oruak ano re, no’gosogo e’birek hegit elep epegen. Erlak o. Hegit emagoluk asogo yo’go po erlak ukpegi ai o,” oluk, mo’gulesirik e, 55#Luk. 19:47; 21:37is ap a’bik wegesa a’ge ebano disogo mo’gulentesi,
“Ap yogorlia wogumu tenagonobou wagai ai ’gela’ge, his en asogoat an tennobuogoluk, ’garok emin, ’go’bu emin, modok woluk wegep yema re! An nin erlige-nan erlige Allah owi werikmu hweriogo welat wene mo’gulentasukhwe, his en an disogo tennobu erlak welegeptigat de, 56is ap Allah iak mo’gulontogu legesa a’ge en pelal wegesa ano emin hegit emagoluk taknebegep o,” oluk, mo’gulentesimu re, is ap at osi iak wogu legesa a’ge ebano, at ebe ukpoluk hweiye modok ’bogoligisa.
Yesus woruogoluk wene ebam pegesa wene
(Markus 14:53-65; Lukas 22:54-55,63-71; Yohanes 18:13-14,19-24)
57Hweiye asogo ’bogoligisema re, at Yesus ebe tenak pegesarik e, ap Allah eiye a’ge onue ’gain Kayafas e’bek woluk legesa. Legesema re, eba is ap Allah iak pelal wogo eiye a’ge emin, enarluedek emin, odoktak oruakma legesa. 58Yesus asogo woluk lagaihwe, at Petrus ano pobuk ene’berlik daduk lasu lagarik e, ap ’gain Kayafas ano owi dipmu ’gwi lagarik,
“Yesus paget no’gosogo tua,” oluk il yerontoluk e, at Kayafas osi Allah owi werik tenak welagai a’ge logon ene’gerlakma huraga.
59Hweriogo oruakhwe, is ap Allah eiye a’ge onuelak ’gaindek emin, wene Allah paget edip ’belo’gogwi a’ge ’berlek emin, at Yesus woruogoluk, disogo egesa,
“Aphwami en at wiak tagoma enil hegesa a’ge uagoluk heraenebit o,” oluk, eniak esei enat wene ebam pou wagoluk heraenebigisa a’ge re, 60enebe esanat eniak eseiyat wene ebam pouwogoluk wegesa a’geat de, erlak agama, pobuk ap enebe ’biren a’ge wegesarik e,
61 #
Yoh. 2:19
“At yu enat,
Allah owi ai moluksogo hwikholuk e, ebalema, pobuk agauwa ’biren pam werise leiktik en, henaganak a’ge ologun ’belakpoluk werik o, oluk egei a’ge,” egesema re, 62at ap Allah eiye a’ge onue ’gain ano inagarik e,
“Is ap yema wene a’bik mo’gulhogwi yema, hat en o’go mesik mo’gulentagun erlak a? O’go mo’gulentagunmu re,” oluk mo’gulesi a’geat de, 63at Yesus iak erlak mo egeimu re, at ap ’gain Allah eiye a’ge ano en e,
“Allah omlogo Kristus perakpouma egesa ano, ebe hat holuk e, mo’gulnentagun en, at Allah elaluk modok welago a’ge onuk ho’buk ’balogo mo’gulhegis o,” oluk mo’gulesimu, 64#Dan. 7:13at Yesus en e,
“Hat en e’gen aiat o. A’ge re, wene yu an en his ’berlegat mo’gulhentaik o. Hwerli yogodak en e, an abat daklau wegi ano, at Allah anni a’bik di a’ge yu a’ge tu a’ge nakma re, ne’birek eragam e’gik ’bekhit akhit ’gainat weleiktik e, pobuk ’bogorl pam eba en o hena ogola ’bu agoma henil niagup ani o, oluk mo’gulhentegis,” oluk mo’gulesimu, 65#Ima. 24:16is ap Allah eiye onue ’gain ano osum derlepsogo hwikhasulat e, disogo mo’gulentesi,
“At ogola en Allah mi-miarak poluk onuk wiagap pesi ai hegep a? Aphwami en at wiak tagoma enil hegesa a’ge wene se’geksogo uagoluk nopaget yerentarok wolomul. At en Allah ogola mi-miarak pasulat onuk wiagap tago ai arat henesa’go hweligep o. 66Holuk e, his no’gosogo opogu legep,” oluk mo’gulentesimu, is en e,
“Ebe modogat woruok o,” oluk mo’gulegisa. 67#Yes. 50:6Asogo mo’gulegisarik e, was ebam topuktak pogulat, ’go’bu worugulat, ene’gik en damuk-demaksogo worugulat, tugulat e,
68“Kristus! Sa en wathebegei no. Mo’gulnentemen da,” oluk, mo’gulogu legesa.
At Petrus en, “Yesus neperlak,”
oluk elabe tegei wene
(Markus 14:66-72; Lukas 22:56-62; Yohanes 18:15-18,25-27)
69Asogo mo’gulosokhwe, at Petrus ano o ho’gorlakma hweriogo oruakma, hwele mesik eneragam a’ge e’bek wagarik e, disogo mo’gulesi,
“Hat ogo re, Yesus Galilea a’ge ai emin no’gu legep a’ge epegi,” oluk mo’gulesimu, 70at Petrus en aphwami a’bik enilemat, disogo mo’gulesi,
“Hat e’gen ai an neperlak o,” oluk, 71ebela lok emde ’belak lebagai o’gwe liplau weigoluk tisoma re, at hwele agaikhen en e, eneragam a’ge mesik muat il yetholuk aphwami a’bik ebano disogo mo’gulentesi,
“Ap yu Yesus Nazaret a’ge ano emin nese laga a’geat de,” oluk mo’gulentesimu, 72at Petrus en naduk egei ’gela’geat pobuk Allah onuk ho’buk ’baliselat e,
“Ap ai an neperlak o,” oluk, mo’gulentesirik, 73erianoat oruakma, is aphwami a’bik ebano Petrus e’bek wegesarik e, disogo mo’gulegisa,
“Hat hebe demat is a’geat o. Hiak enak a’ge pobi togu lege o,” oluk mo’gulegisema, 74at Petrus en e,
“Ap ai ebe an neperlak o, naik Allah uak! Niak esei egi holuk e, at en watnobuak o,” oluk, ho’buk ’balisokhwe erianoat sue ayam iak egei. 75Sue ayam iak egeimu, at Petrus en e,
“I. Yesus en an mo’gulneselat,
Sue ayam iak u erlak oruakhwe, hat en e,
Yesus an neperlak o, oluk hat he’gik henaganam elabe togun ani o, oluk mo’gulnesi ano ebe arat elabe tegis yu hegi,” oluk, ede eberak poluk libagarik e, lo’gu modok edemu duk-duksogo maregei.
Currently Selected:
Matius 26: Wul
Highlight
Copy
Compare
Share
Want to have your highlights saved across all your devices? Sign up or sign in
