Matius 28
28
Yesus ebe elaluk aga wene
(Markus 16:1-10; Lukas 24:1-12; Yohanes 20:1-10)
1Asogo tigisarik agauwa sabit a’ge pam Allah paget weat welegesarik en, hubet o’gwe hari Minggu pam, mo ’gerat pou wagokhwe, at hwe Maria owi Magdala a’ge ano emin, hwe Maria agaikhen ano emin, Yesus werak pegesema enil ’gwelakhouwogoluk wegesa. 2Wagaihwe erianoat, mouk lok a’ge erlang-perlang hasukhwe malaikat Allah ’bogorl pam en yo’go ’belagonobou ago a’ge mesik ’bu agarik, ’goduk helep a’ge dopnosogo larigisa a’ge ano erlebilogo poluk e, ebam huraga. 3At malaikat ano orogole re, obinal ’gela’ge tagalat e, osum ’buktak a’ge orogole ’gut modok amulit yebekhesi. 4Asogo tegeimu, is ap ’gagalak welegesa a’ge ebano onogorlok en onuak lup ’bo pogulat e, aphwami werak a’ge ’gela’ge enanni modok erlak agalat, takpegesa. 5Ye, at malaikat ano en e, is hwami ebano mo’gulentasulat e,
“Honogorlok hagup o. His e, Yesus e pam edikpoluk werigisa a’ge ano henil houwogoluk heratogu legep ai, an naluk o. 6A’ge re, ebe yema erlak o. At en mo’gulhentesi ’gela’ge, Allah en elalugap pesimu oruak o. At welagama ebale nak yema henil ’gwelakhau manis o. 7’Gwelakholuk e,
Yesus ano waragama Allah en elalugaptegeimu o, oluk, at osi iak wogu legesa a’ge ebano perleneat mo’gulentai lu o. Ye, his o Galilea owan lo erlak oruakhwe, at naduk louwarik oruakma henil hai lagup ani o. Holuk e, niak mo’gulhentegis ai eberak welemis o,” oluk mo’gulentesimu, 8is hwami ebano owikmu eba en lagalat onogorlok a’bik hegesa a’geat de, pobuk onogola enagai a’bik hil hilat, at osi iak wogu legesa a’ge ebano ene’bek pungtagat mo’gulentai legesa. 9Mo’gulontouwogoluk lagaimu ebela pam ebano at Yesus emin sarlok tigisarik e, disogo mo’gulentesi,
“Norokhwi o!” oluk mo’gulentesimu, is hwami ebano horok-horok legesarik e, oyuk ene’gik tenak pogulat e, hau wusogo ondogorlu pam huregesarik erliktigisa. 10Erliktigisema, at Yesus en e,
“Honogorlok hagup o. An nosi ebano o Galilea ligemagoluk, mo’gulentai lu o. Eba ligemarik enil niouwa o,” oluk mo’gulentesi.
Eniak eseiyat, “Yesus werak hisatluk
libegesema oluk mo’gulontomup o,”
oluk mo’gulentigisa wene
11Asogo mo’gulentesimu, is hwami eriano owan lagaihwe, is ap ’gagalak welegesa a’ge ebano pema o kota ma ’gwigisarik e, wene ’berlegat aga a’ge ebano,
“Disogo aga o,” oluk, is ap Allah eiye a’ge onuelak ’gaindek ebano en modok ’beling-’belangsogo mo’gulentigisa. 12Asogo mo’gulentigisema re, is emin, is ap enarluedek ebano emin, enemin enebe odoktak poluk wene ’bil-’bal e, is ap tentara a’ge ebano uang perak a’ge a’bigat wogontugulat e, 13disogo mo’gulentigisa,
“His en e,
Huba’go nis nogogukhwe, at Yesus iak wogu legesa a’ge ebano wegesarik Yesus werak hisatluk libegesema o, oluk mo’gulontogu lomup o. 14Wene aga a’ge ai paget e, at gubernur esa’go holua holuk e, his wene henebam ema no oluk, nis en e, at ogola ’gagaluok o,” oluk egesema re, 15is ap tentara a’ge uang ebano hwerlegesarik e, is ap ebano en egesa hegitsogoat tigisa. Wene asogo sagarak pegesema re, is aphwami Yahudi a’ge en e, yogodak hwerli ogo ogwiat oruak o.
At Yesus en e, “Op wene mo’gulentil laga lomup o,” oluk mo’gulentesi wene
(Markus 16:14-18; Lukas 24:36-49; Yohanes 20:19-23; Peragenebesi 1:6-8)
16 #
Mat. 26:32; Mrk. 14:28 At Yesus en osi iak wogu legesa a’ge enebe 11 ebano mo’gulentasulat e,
“O Galilea laguptik dom ai pam ligoroguptik wolomup o,” oluk, wene weragenebesi hegitsogoat legesarik ligegesa. 17Ligegesarik oruakma at Yesus ebe enil hegesarik e, hau wusogo ondogorlu pam hweriogo welat erliktugukhweat de, is pema akhit nak e,
“At ebeat a? Ye, at e, puk a,” oluk epegesa. 18Asogo opogukhwe, at Yesus ebe eneragam wagarik e, disogo mo’gulentesi,
“Allah en ’bogorl pam a’ge emin, ’gwiangma a’ge emin, ’berlegat e, an eiye taknebesimu o. 19-20#Per. 1:8Holuk e, di aphwami yu aphwami ena’gul onuk lo’bok ’berlegat an nosi emagoluk, naik Allah onuk pam, omlogo an nonuk pam, Arogun onuk pam, nononuk ’balogo ik olomu ’belabonobogulat, an en wene henesa’go weregis a’ge ai ’berlegat is aphwami en hegitsogo togu lemagoluk mo’gulontogulat, til laga lomup o. Yethemit! His asogo tagenebil lagaimu re, an nebe henemin modok oruakma en, hwerli o ologun pam en nak ema o,” oluk mo’gulentesi.
Currently Selected:
Matius 28: Wul
Highlight
Copy
Compare
Share
Want to have your highlights saved across all your devices? Sign up or sign in
