Matius 19
19
“Ap onugwami wogo a’ge lologo ugenebagup
no yo,” oluk mo’gulentesi wene
(Markus 10:1-12)
1At Yesus en wene ai arat mo’gulentesirik e, o Galilea ukpoluk e, o Yudea ik Yordan etle akhit ’bi laga. 2’Bi lasumu aphwami a’bik e’berlik ’bi legesema re, at en o eba a’ge ou obabenebegei.
3Ou obabenebisokhwe re, is ap Farisi a’ge pema Yesus ebabut ’baluogoluk e’bek wegesarik e, disogo mo’gulegisa,
“Ap en e, hwami wogo a’ge ai, wene lok a’ge, wei a’ge, ebam pogulat e,
Nebit o, oluk lologo ukpo elit a? Mia ya,” oluk mo’gulegisema, 4#Kej. 1:27; 5:2at Yesus en,
“Allah en edipmu eba en walentasulat e,
Ap walhasulat, hwe walhasulat, walentesi o,
oluk wene pelal wogo ano onuk mo’gulik erlak welegep no? 5#Kej. 2:24Asogo walentesirik e, wene disogo mo’gulentesi,
Ap en e, aik ia ukpoluk ugwe e’birek op welat e, enebe ’biren a’geat de, mesik nagat emarik welemak o,
6oluk mo’gulentesi ai en e, enebe ’biren puk. Mesigat egesarik oruak o. At Allah enat asogo e’birek dipsogo enebesirikmu re, aphwami onu’gwarek en, dedelu re, modok erlak o,” oluk mo’gulentesimu, 7#Ula. 24:1-4; Mat. 5:31is en e,
“Holuk e, at Musa en,
Ap agaikhe en hwami wogo a’ge ukpaigoluk holuk e,
Hwe yu hebe nebit o. Ukhebegi o, oluk, pelal wokho e’gikmu wogotluk e, ukpo elirat o,
oluk egei ai no’gosogo en egei,” oluk mo’gulegisa. 8Asogo mo’gulegisema, at Yesus en e,
“Erlak o. Wene asogo mo’gulentesi ai re, his honogola modok ’buk welat mo’gulhentasuam henesa’go holu modok mia ai en,
Honugwami wogo a’ge lologo ugonoboat o, oluk mo’gulentesi ai o. Asogo a’geat de, edip pam Allah en walentasulat e, asogo modok egei erlak o. 9#Mat. 5:32; 1Kor. 7:10,11Holuk e, wene mesik yu mo’gulhentaik o. Ap sa en ugwe wogo a’ge ap agaikhe en ’babi tenhasu erlak a’geat de, lologo ukpolukhwe mu wasu holuk e, ’babiat tua o,” oluk asogo mo’gulentesimu, 10at Yesus iak wogu legesa a’ge ebano en,
“Holuk e, ap en hwami wogonobu erlak, hwami en ap wogonobu erlak, wolom e, op hegi,” oluk mo’gulegisema, 11at en e,
“Asogo a’geat de, wene ik yu, aphwami ’berlegat enebaget elit erlak o. We, is Allah en enebabut asogo til laga lemagoluk wogentesi a’ge nak e, pobi tua o. 12Ye, is ap pema re, enialak onogola en onouwarli erlak a’ge dagagalat e, hwami wogonobogwi erlak modok welagai o. Ye, is nin pema re, aphwami en onouwarli wogwiam e, onugwami wogonobogwi erlak welagai o. Ye, is nin pema re, Allah en eragam enebasumu eba, at ebaget togu lomogoluk enepenenat onugwami wogonobogwi erlak welagai o. Wene egi ai elirat wo holuk e, wemit o,” oluk mo’gulentesi.
“Malik wei a’ge ai ne’bek wemak o,”
oluk mo’gulentesi wene
(Markus 10:13-16; Lukas 18:15-17)
13At Yesus en asogo mo’gulentesirik oruakma, is aphwami pema en eneiyagai at en e’gik ena’gul sebelogo se’ban onobouwagoluk e’bek wogonoboluk wegesema re, at osi iak wogu legesa a’ge ebano en wene yagentigisa. 14Wene yagentigisa a’geat de, at Yesus en,
“Aphwami malik wei a’ge yu ’gela’ge ema holuk en nak de, ’bogorl pam Allah en eragam enebasumu eba eiye ema ai paget e, is malik wei a’ge eba an ne’bek wemak o. Wene ’balogup o,” oluk mo’gulentesi. 15Asogo mo’gulentesirik e, e’gik ena’gul sebelak onoboluk, eba en o momu laga.
Ap mesik ebe souwe a’ge, a’ge a’bik a’ge en
Yesus e’bek waga wene
(Markus 10:17-31; Lukas 18:18-30)
16At Yesus asogo lagarik oruakma, ap mesik e’bek wagarik e, disogo mo’gulesi,
“Guru, nue o. An noburlal-hoburlal taknobuagoluk, an op a’ge on e, no’gosogo tagalom epegen,” oluk mo’gulesimu, 17at Yesus en e, disogo mo’gulesi,
“Hat op ’ge ’gela’ge tagalom paget oluk an mo’gulnigen ai, no’gosogo en. Op tiso a’ge re, at mesigat nak oruak o. Hat enelaluk modok wolomulmu eba ’gwilo hagai holuk e, wene Allah en nenesa’go weregei wene ai hesa’go hologuntik e, hegitsogo taga lemen o,” oluk mo’gulesimu, 18#Kel. 20:13-16; Ula. 5:17-20at ap ano en e,
“Wene ai ebe ’gesogo paget egen,” oluk, hin wokhesimu, at Yesus en e,
“Wene ai Allah en disogo egei,
Aphwami enebe waronobogup o.
’Babi tenentagup o.
Yogorlia wagup o.
Henepenenat onobok ’balogup o.
19 #
Kel. 20:12; Ima. 19:18; Ula. 5:16 Henaiklak henialak hau do’goksogo waronobogu lomup o. Henebe honu’gwarek henede hwedik welegep ai ’gela’ge, is aphwami muon henemin welegep a’ge ai ogo, henede hwedik wolomup o,
oluk nenesa’go weregei wene ai paget egi o,” oluk, mo’gulesimu re, 20at ap souwe a’ge ano en e,
“Wene ’berlek mo’gulnigen ai re, nesa’go hwelak welat hegitsogo taga legi a’geat o. A’ge re, ’ge a’ge tu erlak welegi epegen,” oluk mo’gulesimu 21at Yesus en e,
“Hat hebe modok op eigoluk holuk e, yema en laguntik e, ha’ge di a’ge yu a’ge ebano ’berlegat is muon enebam o’go ’bali lu o. O’go ’baloguntik e, o’go wokhema a’ge ai, is aphwami muon enerlagaik a’ge eba so’busogo wogontomup o. Asogo wogentagunmu re, hat ’bogorl pam a’ge logat eiye orogun o. Holuk e, arat asogo so’busogo wogontoluk e, an ne’berlik denaga lorogun en e, manup o,” oluk mo’gulesi. 22Asogo mo’gulesimu, at ap souwe a’ge ano esa’go hwelegeirik e, a’ge modok a’bikmu no oluk, ede wiak agarik laga. 23Lagama at Yesus en e, osi iak wogu legesa a’ge ebano disogo mo’gulentesi,
“Aphwami ena’ge a’bik ai ’bogorl pam Allah en eragam enebasumu eba no’gosogoat ’gwilo ’gela’geat o, oluk demat mo’gulhentegis o,” oluk mo’gulentesi. 24Asogo mo’gulentesirik e, at en e,
“Wene ai a’geat pobuk lagaksogo mo’gulhentaik o. Wam unta ebe lok a’geat de, hin ele lo’gwe ’gwelabumu re, elit sollongsogo ’gwilo a’geat de, is aphwami ena’ge a’bik a’ge ai Allah en eragam enebasumu eba ’gwilo modok mia o,” oluk mo’gulentesi. 25Asogo mo’gulentesimu re, at osi iak wogu legesa a’ge ebano enesa’go hweligisarik e, onogorlok a’bik egesarik disogo mo’gulegisa,
“Holuk e, Allah en aphwami salak ’gela’ge nak e, elit delonobua hwe,” oluk mo’gulegisema, 26at Yesus en is enebam il pesirik e, disogo mo’gulentesi,
“Aphwami en mesik tu puk a’geat de, at Allah en di a’ge yu a’ge tu nak e, elit o,” oluk mo’gulentesi.
27At Yesus en asogo mo’gulentesimu, at Petrus en e,
“A’ge re, nis hat he’berlik no’gu lomogoluk di a’ge yu a’ge ’berlegat ukpoluk wegerik hemin no’gu lege a’ge yu nak e, no woknontouwa,” oluk mo’gulesimu, 28#Mat. 25:31; Luk. 22:30at Yesus en e,
“An demat mo’gulhentaik. His an ne’berlik no’gu legep a’ge yu re, di a’ge yu a’ge Allah en pobuk ’get mu a’geat tuarikmu en, an abat daklau wegi ano pobuk weiktik, erliknobugukhwe, nebalema eba ’gain oruakma, his neragam eba honoboluk 12 enebale delakma ’gainat welat, aphwami Israel a’ge ena’gul onuk 12 ebano his en wene enebam pogulat, no’gorlogulat, togu lema o. 29Holuk e, an nonuk lok emagoluk ap sa en owi werik emin, ot ue emin, orokhwi emin, aik ia emin, eiyagai emin, iabuk siok emin, ukpoluk wago holuk e, ebalema Allah en o’go ebe a’ge modok a’bigat wogeselat, noburlal-hoburlal wogeselat, tua o. 30#Mat. 20:16; Luk. 13:30Asogo a’geat de, is aphwami o yogodak ya ’gain ononuk oruak a’ge a’bigat, pobuk ononuk erlak ema o. Ye, is pema yogodak ononuk erlak oruak a’ge pobuk ononuk oruak ema o,” oluk mo’gulentesi.
Currently Selected:
Matius 19: Wul
Highlight
Copy
Compare
Share
Want to have your highlights saved across all your devices? Sign up or sign in
