Matius 20
20
“Ap logon yabuk anggur yabuk togu legesa,”
oluk ebam elitsogo mo’gulentesi wene
1At Yesus en pobuk disogo mo’gulentesi,
“’Bogorl pam Allah eragam enebasumu eba emin hegit e, disogo ’gela’ge. Ap ’gwiang eiye a’ge mesik yabuk anggur yabuk tuagoluk ap heraenebil e, huberat yo’go libaga. 2Libagarik, ap yo’go enebesi a’ge ebano emin wene disogo mo’gulentesi,
Agauwa mesigat paget togup holuk e, o’go uang agauwa mesigat paget togwiam wogontogwi hegitsogoat henebe lo’bok mesik-mesik wokhentaik o, oluk mo’gulentesimu, is en e,
Elirat o, oluk mo’gulegisema, at iabukmu peragenebesi. 3Peragonoboluk e, o mo wago eria pam laga ’gal e, is ap logon mu a’ge pasar eba weat oruakma il entesi. 4Il entesirik e,
Ap yu logwe. His e, an niabuk anggur yabuk eba eneminat ti lit o. Togupmu re, an en o’go hegitsogoat wokhentaik o, oluk mo’gulentesi. 5Asogo mo’gulentesimu is ano legesema re, ap ’gwiang eiye a’ge ano naduk tegei ’gela’geat, pobuk asogoat erlige jam 12 ’gela’ge is nin pema yo’go enebasulat, hopmu akhit, jam 3 ’gela’ge is nin pema yo’go enebasulat, taga laga. 6Pobuk o hik iogoluk tagokhwe jam 5 libagarik e, is nin pema weat edik oruakma il entesirik e,
His e, hubet hwerli enat we edik modok welegep yema nopaget oluk mo’gulentesimu re, 7is ap ebano en e,
Yabuk logon tuagoluk yo’go nonobogwi erlak ai en welege o, oluk mo’gulegisa. Asogo mo’gulegisema, at ap iabuk eiye a’ge ano en e,
Holuk e, his eneminat an niabukmu anggur yabuk eba ti lit o, oluk yo’go enebesi. 8#Ima. 19:13; Ula. 24:15Asogo yo’go enebesimu legesema, o arat hik egeimu re, ap iabuk eiye a’ge ano en, is ap ebano yabuk tugukhwe ’gwelagentarok welaga a’ge en mesik disogo mo’gulesi,
Ap yabuk togwi a’ge ebano worlentai lak o. Wagai holuk e, is pobuk ’gwi legesa a’ge ai naduk o’go wogontoluk en, is naduk ’gwi legesa a’ge ai o’go pobuk wogentagun o, oluk mo’gulesi. 9Asogo mo’gulesimu, is pobuk jam 5 pam ti legesa a’ge ebano naduk wegesema re, o’go uang yabuk agauwa mesigat paget togwiam wogontogwi ano hegitsogoat mesik-mesik wogentesi. 10Ye, pobuk e, is naduk ti legesa a’ge ebano we, onogola en,
Nis loksogo ’gela’ge ebam louksogo logon woknontouwa hwi a? enede opoluk wegesa a’geat de, o’go uang ano ebelesogoat mesik-mesik is pema naduk wogentesi ’gela’geat wogentesi. 11Asogo wogentasukhwe re, is ebano en uang wogulat e, enebabut sikhak-pukhaksogo tugulat e, ap ’gain iabuk eiye a’ge ano disogo mo’gulegisa,
12Is pobuk wegesa a’ge yu re, we, 1 jam ’gela’ge weiyat til legesa a’geat de, nis hubetsogo legerik, mo orlouk a’bik hege a’geat de, nenemin hegitsogoat wogentigen ai nopaget, oluk mo’gulegisema re, 13ap iabuk eiye a’ge ano en, ap is a’ge mesik disogo mo’gulesi,
Not o. An dagansogo wokhegis erlak o. O’go uang mesigat wokhentaik egirikmu re,
I o, oluk egepma re, egep hegitsogoat wokhegis o. 14Holuk e, horloluk lak o. An nede enat is pobuk togu legesa a’ge yu ogo, hat wokhegis ’gela’geat wogentaik o, oluk 15an nu’gwarek na’ge oruak oluk u a’ge enat egi ai mia epegen a? An loksogo wogentegis ai en hat ’bou tigen? oluk mo’gulesi. 16#Mat. 19:30; Mrk. 10:31; Luk. 13:30Asogo mo’gulesi, ai ’gela’ge re, is pobuk a’ge ai naduk ema o. Ye, naduk a’ge ai pobuk ema o,” oluk mo’gulentesi.
“An watnobua o,” oluk, ’birenam mo’gulentesirik e, pobuk lagaksogo
mo’gulentesi wene
(Markus 10:32-34; Lukas 18:31-34)
17At Yesus en asogo mo’gulontoluk, at ebe o Yerusalem ’biogoluk e, at osi iak wogu legesa a’ge enebe 12 ebano worlentesirik e, wogonoboluk onomuat ebela’gwe ’bugulat e, disogo mo’gulentesi,
18“Nosi o. Nis yogodak e, o Yerusalem ’bugu lege o. ’Bultik holuk e, an abat daklau wegi ano, ap en yo’go louwarik an nebe is ap Allah eiye a’ge onuelak ’gaindek emin, is ap Allah iak pelal wogo eiye a’ge emin, ene’gikmu nobouema re, is en e, ap muon en watnobuagoluk wene nebam pouwa o. 19Wene nebam pogulat e, is ap o’borlma a’ge en eniak esegen yaknogulat, lagal’bisok ’go’bu watnobugulat, tugulat e, nebe e pam ediknoboluk noruagoluk wogontouwa o. Ye, arat watnobogwiam, agauwa ’biren werak weleiktik en, agauwa henaganak a’ge re, Allah en nelalugapnobua o,” oluk mo’gulentesi.
Yakobus Yohanes e’birek, enia en Yesus ebam mesik ’gonu egei wene
(Markus 10:35-45)
20At Yesus en asogo mo’gulentesirik oruakma, at Zebedeus ugwe en emalik wogonoboluk Yesus e’bek wagarik odogorlu pam huragarik hau weriselat e,
“Nis mesik ’gonu mo’gulhomogoluk he’bek wege o,” oluk mo’gulegisema 21at Yesus en e,
“Hat hede ’gesogo epegentik en egen,” oluk mo’gulesimu re, hwe ano en e,
“An nemalik ’biren ya re, aphwami ’berlegat hat heragam enebagunmu eba heragam, at mesik he’gik ’bekhit akhit, ye, mesik he’gik hware akhit, ’gain welemagoluk, edigenebagun en mo’gulhegis o,” oluk mo’gulesi. 22Asogo mo’gulesimu, at Yesus en e,
“His ’gonu mo’gulnigep ai re, wene ebe heneperlak welat mo’gulnigep o. An di obotut yu obotut taknobouwa ai re, his asogo elit takhonobo epegep?” oluk u ’gela’ge re,
“An negeik ne’gak naik ai re, his elirat no epegep?” oluk mo’gulentesimu, is en e,
“Elit noat o,” oluk mo’gulegisa. 23Asogo mo’gulegisema, at Yesus en,
“An di obotut yu obotut taknobouwa ai ’gela’ge, his asogoat takhonobouwa a’geat de, hat mesik an ne’gik ’bekhit akhit, ye, mesik ne’gik hware akhit nemin ’gain wolomul ai nak e, an en edikhonobo, mia o. We, an naik en pageat welemagoluk pulogo enebesi a’geat onobouwa o,” oluk mo’gulentesi. 24Asogo mo’gulentasukhwe, is at osi pema akhit enebe 10 enesa’go hweligisarik e, onolot het is ap enebe ’biren ot ue e’birek eriano enebam pegesa. 25#Luk. 22:25,26Asogo onolot het enebam pegesema re, at Yesus en enebe ’berlegat odoktuagoluk worlentesimu odoktigisema disogo mo’gulentesi,
“Is aphwami o’borlma a’ge onuelak pemerintah a’ge en e’gin-pe’ginsogo tagonobogulat, ye, is ap ’gaindek ai en, wene harosogo mo’gulontogulat, togwi ai henaluk. 26-28#Mat. 23:11; Mrk. 9:35; Luk. 22:26A’ge re, his is togwi ai ’gela’ge, asogo tugulom modok mia o. An abat daklau wegi ano re, his aphwami an neragam a’ge welemagoluk wegi erlak o. At e, an en his heneragam a’ge welat his henebe herle hettak ’gela’ge welegep a’ge ai, henebe a’bigat herle hebilhenebik en e, anat watnobuagoluk wegi ai o. Ai ’gela’ge, his ap sa en,
An onue ’gain eik o, epasu holuk e, honot emak. Ye, his ap sa en,
An e, ’gain eik, oluk, epasu holuk e, heneragam a’ge ’gela’geat emak o,” oluk mo’gulentesi.
Ap enebe ’biren enil hopnik a’ge
dektak enebesi wene
(Markus 10:46-52; Lukas 18:35-43)
29Yesus emin asogo til legesarik e, o Yerikho en libagaimu re, aphwami modok a’bik e’berlik oluktak legesa. 30Lagaihwe re, ap enebe ’biren enil hopnik a’ge ebela pam hweriogo oruakma, aphwami ebano en e,
“Yesus wago yo,” oluk egesema enesa’go hweligisarik, eniak loksogoat ogulat e, Yesus disogo mo’gulegisa,
“Daud en dogo’gwe a’ge nonue a! Hedeapnenebemen a,” oluk mo’gulegisema re, 31is aphwami a’bik ebano en e,
“Heniak o,” oluk, wene yagentigisa. Asogo wene yagentigisa a’geat de, is ebano en eniak pobuk ebenagaikmu loksogoat disogo mo’gulugulat e,
“Daud en dogo’gwe a’ge nonue a! Hedeapnenebemen a,” oluk mo’gulegisa. 32Mo’gulegisema, at Yesus ebe duksogo inagarik worlentasuam wegesema re, disogo mo’gulentesi,
“An en no’gosogo takhonobouwagoluk mo’gulnigep,” oluk hin wogentesimu, 33is en ogulat e,
“Nonue o. Nis nenil hopnik a’ge yu dektak nenebanogoluk mo’gulheige o,” mo’gulegisa. 34Asogo mo’gulegisema re, at Yesus en edeabonoboluk e, e’gik enil pam tenentesimu re, erianoat op egesarik, Yesus e’berlik legesa.
Currently Selected:
Matius 20: Wul
Highlight
Copy
Compare
Share
Want to have your highlights saved across all your devices? Sign up or sign in
