Matius 18
18
Yesus osi en, “’Gain e, sa no?”
oluk hin wegesa wene
(Markus 9:33-37; Lukas 9:46-48)
1 #
Luk. 22:24
Ai erlige re, at Yesus osi iak wogu legesa a’ge ebano e’bek wegesarik e, disogo mo’gulegisa,
“Allah ’bogorl pam a’ge eragam enebasumu eba, ’gain onuk logo a’ge re, sa welema o,” oluk hin wegesa. 2Asogo hin wegesema re, at en malik wei a’ge mesik worlhesimu e’bek wagama re, is ebano ene’gerlakma ’burlmu edikpoluk welat e, 3#Mrk. 10:15; Luk. 18:17disogo mo’gulentesi,
“His aphwami yu re, henebabut heberlotluk malik wei a’ge yu enebabut ’gela’ge orogup erlak holuk e, ’bogorl pam Allah en eragam enebasumu eba ’gwi lagup modok erlak o, oluk demat mo’gulhentegis o. 4Ap sa en,
An nebe mia a’ge, oluk ebabut malik wei a’ge yu ebabut ’gela’ge ede u’gwarek en sebelak poluk welema holuk e, at ai ’bogorl pam Allah eragam enebasumu eba ’gain onuk logoat welema o. 5Ye, ap sa en malik wei a’ge yu ’gela’ge an nebaget wasu holuk e, an nebeat woknebiso yo,” oluk mo’gulentesi.
Aphwami en is agaikhen wiak tuagoluk
onogola ’gagalogwi wene
(Markus 9:42-48; Lukas 17:1-2)
6Asogo mo’gulentesirik e, mesik disogo mo’gulentesi,
“Ap sa en malik wei a’ge yu ’gela’ge mesik ede an nebam he’berik oruakma ’goboksogo uknobouwagoluk ogola ’gagalua ano pam an ’goboksogo uknobouwa holuk, at ogola ’gagaliso a’ge ano helep lok a’ge o’gorlop pam herle erlilogo re, ik laut omugwe ede ’burl eba pela’gogo ’belakpoma ik olomu loma re, op o. 7Is aphwami ’gwiangma a’ge yema, is pema en an ’goboksogo uknobouwagoluk onogola ’gagalumu modok wiak ema ai en e, nede o. An ’goboksogo uknobouwagoluk onogola ’gagalogu lema a’geat de, is onogola ’gagalogwi a’ge ai Allah en modok wiagabonobua a’geat oruak o. 8#Mat. 5:30Hene’gik en de a? Honoyuk en de a, wiagaphonobu ’gela’ge ago holuk e, pema akhit ’balogo hwikholuk, pema akhit nak welat, enelaluk modok wolomma eba ’gumu re, op o. A’geat de, hene’gik honoyuk ai pema-pema oruakma re, odouk nekhi oso erlakma eba perakhonoboma re, wiak o. Holuk e, pema akhit ’balogo hwikhemit o. 9#Mat. 5:29Ye, henil en wiagaphonobu ’gela’ge ago holuk e, pema akhit hwelilogo hwikholuk, henil pema akhit nak welat enelaluk modok wolomma eba ’gwi lo re, op o. Henil pema-pema oruakma re, odoukmu perakhonoboma re, wiak o. Holuk e, pema akhit hwelilogo hwikhemit o,” oluk mo’gulentesi.
“Domba wam nalomtik oruakma heratu o,”
oluk wene ebam elitsogo mo’gulentesi wene
(Lukas 15:3-7)
10 #
Luk. 19:10
Asogo mo’gulentesirik e, mesik disogo mo’gulentesi,
“Malaikat Allah ’bogorl pam en yo’go ’belabonobou ago a’ge en malik wei a’ge yu ’gela’ge tenentarok welat naik ilem modok welagai ai en e, malik ai honogola en mi-miarak enebagup o. [ 11An abat daklau wegi ano re, aphwami nal agai a’ge ai herasogo delenebigoluk wegi o.] 12Henede ’gesogo epegep. Ap mesik uam domba ebe 100 welaga a’ge re, 99 nak duk pam ligagalat ebano opsogo oruakhwe, mesigat nak ebela nelakpoluk nal lai lasu holuk pobuk herati lo erlak no? Herati loat o. 13Ye, ap ano uam hwiakhorloluk e, 99 welegesa a’ge ai enebaget e, ogola horok weisogoat agai ho a’geat de, mesik nak nal lai laga a’ge ano ebe hwiaregeitik en nak e, ogola agai modok a’bik ho yo, oluk demat mo’gulhentegis o. 14Ai ’gela’ge re, henaik ’bogorl pam a’ge ano en e,
Malik wei a’ge ai ’gela’ge mesik nak nal lai lo re, modok ebit o, oluk epasu o,” oluk mo’gulentesi.
“Henarilak honorokhwi wiagaphonobogwiam disogo togu lomup,” oluk enesa’go weregei wene
15 #
Luk. 17:3
At Yesus en asogo mo’gulentesirik e, mesik disogo mo’gulentesi.
“Hat mesik herei hare en wiagap hebiso holuk e, hat at e’bek laguntik henematek nak welat e,
Asogo togun o, oluk ’baksogoat esa’go werip o. Asogo werisoam, esa’go hweliso holuk e, wene ano erlagapsogo poluk e’birek op om o. 16#Ula. 19:15A’geat de, esa’go hweliso erlak holuk e, disogo tu o. Allah iak pelal wokho pasulat e,
Aphwami en is pema wene enebam pouwogoluk holuk e, aphwami pema enebe ’biren a?
Henagan a, wiak togwiam enil hogwi a’ge en,
Demat nenil hege o, oluk ogwi holuk demat opo yo,
oluk egeimu pelal wokho pegesa ai en e, aphwami enebe ’biren a? Henagan a, yo’go onoboluk henemin e’bek lu o. 17Lagupmu re, is ano eniak enesa’go hologwi erlak holuk e, Allah eiyagai enebe odoksogo oruakma mo’gulontomup o. Mo’gulentagupmu re, is Allah eiyagai enebe ’berlek ebano eniak esa’go hweliso erlagat holuk e, at ai henerei henarilak a’geat de, is uang pemerintah paget ’gonu oluk wogwi a’ge ebano enebit a’ge ’gela’ge leget o’borlma a’ge ’gela’geat aga o, oluk opomup o,” oluk mo’gulentesi.
Allah en oso hegitsogoat, “Yu tu mia,” ogulat,
“Yu tu op,” ogulat, ogwi wene
18 #
Mat. 16:19; Yoh. 20:23 At Yesus en asogo mo’gulentesirik e, mesik disogo mo’gulentesi,
“Wene mesik yu mo’gulhentaik o. His en e, ’gwiangma yema a’ge paget,
Asogo togup erlak, oluk wene ’balogup holuk e, Allah ’bogorl pam a’ge en wene ’balegei ’gela’geat ua o. Ye, his en e, ’gwiangma yema a’ge paget,
Asogo tu re, op o, oluk ogup holuk e, ai Allah ’bogorl pam a’ge en op egei ’gela’geat ua o.
19-20Ye, wene mesik yu mo’gulhentaik.
His henebe ’biren a? Henagan a, an nonuk pam odoktogup holuk e, an nebe hene’gerlakma eba weleik ai paget e, his henebe ’biren henagan en ’gwiangma yema welat, henede mesigat otluk, his en,
Mesik woknentemen, oluk, we, no’gwe a’ge Allah ’gonu mo’gulorogup a’ge ai, an naik ’bogorl pam a’ge en heniak esa’go holuarik e, wokhontouwayat o,” oluk mo’gulentesi.
“Wiagaphonobogwiam erlagapsogo ukpogulom o,” oluk mo’gulentesi wene
21 #
Luk. 17:3,4 At Yesus en asogo mo’gulentesimu re, at Petrus e’bek wagarik e, disogo mo’gulesi,
“Nue. An nare mesik en wiagapnebiso holuk e, wene ai e’gen doru pukmu en e, agauwa merenam ’gela’ge pam erlagapsogo ukpo yo. Hwerli agauwa sabit pam en erlagapsogo ukpo elit a? Mia ya,” oluk mo’gulesimu, 22#Kej. 4:24at Yesus en e,
“Agauwa sabit pam erlagapsogo ukpoma re, modok mia o. At e, a’bigat aphwami enebe 70 ene’gik 7 pam lau wago holuk en nak de, elirat erlagapsogo ukpogulom o. 23Ai ’gela’ge re, Allah en eragam enebasumu eba emin hegit e, ap ’gain onuk logo a’ge mesik, at en a’ge osi en tenakho welegesa a’ge worlentesi. An nak sabusogo nebegesarik a? Is pema enebam ’belak oruak a, oluk e’gik wenarigoluk worlentesimu wegesema re, 24at en a’ge ebano e’gik wenarisokhwe re, osi ebano a’ge mesik uang lok juta modok a’bik ebam ’belak welaga a’ge e’bek woluk wegesa. 25Woluk wagaiam il ’gwelakhesirik e, at en o’go wogonso re, mia agama re, at ap ’gain ano en osi pema disogo mo’gulentesi,
Ap yu ebe emin, ugwe emin, eiyagai emin, a’ge di a’ge yu a’ge emin, modok perlengsogo o’go ’baloguptik e, o’go wagup a’ge ai an woknosu manup o, oluk mo’gulentesi. 26Asogo mo’gulentasukhwe, at ot ano en odogorlu pam huragarik hau weriselat e, disogo mo’gulesi,
Nue. Hedeap noboguntik e, il mesigat nak wolomup o. Woloroguntik worogunmu re, modok wokheigat o, oluk mo’gulesimu re, 27at ’gain ano en e, at ot ano ede agarik e,
Holuk e, an na’ge hat hebam ’belak oruak a’ge ebano weat horlomup o. An ukpegi ai o, oluk wene erlagapsogo ukpoluk perakpesi. 28Asogo perakpesimu re, at ot ano odipmu libaga ’gal e, at are ap ’gain ano ot mesik, at libaga a’ge ano o uang 1.000 a’ge weiyat wogosi a’ge ebam ’belak oruakma e’birek sarlok tigisa. Sarlok tigisarik ebe tenak poluk e, o’gorlop ’betesogo tenak welat,
Na’ge hebam ’belak oruak ano o’go woknemin, oluk mo’gulesimu re, 29at are ano eragam ’gonu egeitik hau weriselat e,
Nare o. Hedeapnoboluk il mesigat nak wolomup o. O’go wokheigat o, oluk mo’gulesi a’geat de, 30are ano en,
Nebit o, oluk ap ai ebam ’belak a’ge ano o’go owan wogoum erlak oruakhwe, ap ene’gik herle wusogo onobogwi a’ge en o ene’gik herle wusogo onobogumu ’gwelakpoluk welemagoluk, wogentesi. 31Asogo tisokhwe, ap ’gwelakpesi a’ge ano arilak pema en enil hegesarik enede modok wiak egesarik e, is en pobuk yo’go ap ’gain ano wene ’berlegat mo’gulosu wegesa. 32Mo’gulosu wegesema re, ap ’gain ano en ap ai wemagoluk mo’gulesimu, wagama re, disogo mo’gulesi,
Hat hebabut modok wiak yu re! An na’ge hat hebam ’belak welaga a’geat de, hat hiak herlagaik hiak mo’gulnigenma,
Weat horlomup o, oluk mo’gulhegis ebano re. 33A’geat de, an hat nedeaphebegis ai ’gela’ge, hat asogoat hare ai hedeaptelinmu re, oluk mo’gulesirik, 34olot het en e, ap ano ebam ’belak a’ge ’berlek perlengsogo wogoum erlak oruakhwe, is ap ene’gik herle wusogo onobogumu welagai a’ge ebano en ’go’bu worugulat pekharok welemagoluk wogentesi. 35Ai ’gela’ge, his henari honorokhwilak en wiagaphonobogwi a’ge ai henede enat erlagapsogo ukpogwi erlak holuk e, an naik ’bogorl pam a’ge en asogoat takhonobouwa o,” oluk mo’gulentesi.
Currently Selected:
Matius 18: Wul
Highlight
Copy
Compare
Share
Want to have your highlights saved across all your devices? Sign up or sign in
