Imamat 21
21
Ap Allah eiye a’ge en wiak tu erlakma en op nak wolom wene
1At Allah en Musa mo’guleselat,
“Is an nebe eiye a’ge Harun eiyagai ebano wene mo’gulonto ano re, yuat o. Ap an nebe eiye a’ge ano ebe ebam wiagap pagathorlouwano oluk ue ari walekma a’ge waragai holuk e ne’bek lo mia o. 2Asogoat a’geat de, at en a’ge opsogo ia ya? aik de a, emalik hwelani logomalik a, ereilak ap a, 3ereilak ogun owan horlo erlakma en emin oruak a’ge a, waragai holuk nak e, ’gwelak entai lo op at o. 4Ye, at ugwe ia aik, ereilak enemin waragai holuk nak e, at ebam wiagap pagat, hwerlasumu no, oluk ’gwelak onto miayat o.
5-6 #
Ima. 19:27,28; Ula. 14:1 Is ap an nebe eiye a’ge ano re, wiak tu erlakma en op modok a’ge en enaik Allah an nebaget degelak welagaimu re, nonuk wiagapsogo nobouwa no oluk, enasu ena’gul hapsogo ’balogulat, enemde asu ’bunsogo ’balogulat, enagap ’bisok pam perleng togulat, tu re, mia o. Is en e, enaik Allah an nebaget wusogo odouk narlogulat, di a’ge yu a’ge yema re, Allah hat hebagerat o, oluk, delnasogo woknogulat, asogoat tugumu re, wiak tu erlakma enat modok opsogo nebagerat degelak welemak o.
7Is ap an nebe eiye a’ge Imam ai re, wiak tu erlakma en opsogo modok enaik Allah an nebaget degelagatma re, hwami danian a’ge holukhwe ugonobogwi a’ge holuk, is ap an nebe eiye a’ge en wogonobogulom modok mia o. 8Ap an nebe eiye a’ge ano re, di a’ge yu a’ge yu re, nenaik Allah ebagerat o, oluk, woknogulat, ye, an Allah en, is enede op horak a’ge modok opsogo welemagoluk, pulogo pasu legi a’ge an ano nedemu ago erlakma en opsogo nak welat, togu legema re, is ap an nebe eiye a’ge ai modok arat Allah paget opsogoat degelak welagai a’ge o, oluk, onobogu lemak o.
9Ap an nebe eiye a’ge agalogo mesik en Nonuk op welago a’ge ai, lok logo erlak o, oluk, hwele danian sogo takpil lasu holuk e at aik onuk wiagapsogo pil lasumu re, elaluk ’ga’go odouk narlogu lemak o.
10Ap an nebe eiye a’ge onue ano re, arilak oruakhwe, ap an nebe eiye a’ge onue welemagoluk, a’bosu herlilogo edikpogwi a’ge ano a’ge at a’gul pam herlilogo pasulat ye, is ap an nebe eiye a’ge onosum ’buktogwi a’ge ebano at ’buk horlouwak oluk pulogo edikpasulat, tagoam e, ebam a’ge lebil lebalsogo ’bukhwerlasulat, ye, asu tual hwerlasu erlakma en ing-dingsogo welat, tu mia o. 11-12Ap an nebe eiye a’ge onue ai re, aik Allah an nebaget polik welemagoluk a’bosu a’gul pam herlilogo pogwiam ap waragoma en nebaget tugumu asuema eba wolom o,” oluk, wene werak a’ge ano Sagalogo pasulat, ye, ebe ebam wiagap pagathwerlasulat, tuno oluk, ia aik waragaiam at de, yerentai lo mia o. Oluk an henaik Allah enat egi ai o.
13Ap an nebe eiye a’ge onue ugwe horlo ano re, Hwe ap en tenho erlak a’ge ebe owan dogum oruak holuk nak ugwe hwerlasu lemak o. 14-15Hwe sugwe pouwa a’ge holuk, Hwe ukpogwi a’ge holuk e. Hwe ap agap erle a’ge holuk, danian a’ge at horlo mia o, oluk, wene werak oruak a’geat de, hwami ai a’ge hwerlasu holuk, ue ari ebano en e, at eiyagai enebam eberogulat e, wo mia ogukhwe wesi a’ge emalik ebano yema o, oluk enebirap onobogulom no oluk, hwami ai a’ge horlo mia o. A’geat de, at a’gul onuk a’ge enemalik hwele ap enemin nogou erlak a’ge holuk nak hwerlasu lemak o. Wiak tu erlakma en op nak welemagoluk, pulogo pasu legi a’ge an Allah enat egi o, oluk, egei o, oluk, mo’gulontomup o, oluk, mo’gulesi.
16Mo’gulesirik, at Allah en Musa mo’guleselat e,
17“Hat en Harun mo’guloum ano re, yuat o. At eiyagai e’balak weiyelak a’ge enebe lo’bok ’berlegat enagap pam eniebil aik ’belak oruak holuk e, di a’ge yu a’ge enaik Allah an nebaget pogwimu re, eba wagalom mia o. 18At eiyagai a’ge nak enebe lo’bok enil wiak a’ge holuk, enawe edenak a’ge holuk, onorogole pam youk ogwi erlak a’ge holuk ono’borl porlok tak a’ge holuk, 19ene’gik de a, onoyuk de a, porlolak a’ge holuk, 20ono’borl porlok tak a’ge holuk, wogonoboluk ’gu ago a’ge holuk, enil ’gorlu a’ge holuk, igani a’ge holuk, yebil mulen soluk tak a’ge holuk, onouwarli lebelik a’ge holuk, 21Ap an nebe eiye Imam Harun eiyagai emin, e’balak emin, weiyal etil laga lema a’ge ebano en enebam aik ’belak a’ge holuk, an Allah nebaget wusogo odouk narluak oluk, neragam wagalom mia o. Ebetne yebil a’ge oruakhwe di a’ge yu a’ge aik Allah an nebaget wusogo woknosuom mia o. 22Aik Belak oruakhweat de, di a’ge yu a’ge aik Allah an nebaget odoktak a’ge asua modok a’ge nebaget modok degelak a’ge emin, nebaget odoksogo polik a’ge emin, ebano nak e, at no op at a’geat de, 23aik ’belak a’geatma re, sum emde lasogo pangtak oruakma wagalat, nebaget odouk narlogumu wagalat, tago holuk e, nebaget tugumu asuama eba tugulom a’ge paget wene werak a’ge ano Sagalogo po ebele takma re, wom mia o. Nebaget tugulom a’ge paget holuk e polik welemagoluk, ’belak pegi re, an Allah enat egi o, oluk, egei, oluk mo’gulemin o,” oluk, mo’gulesi.
24At Allah en Musa asogoat mo’gulesimu, Musa en wene Allah en mo’gulesi a’ge ano Harun emin, eiyagai emin, aphwami Israel a’ge emin, enebe ’berlegat mo’gulentesi.
Currently Selected:
Imamat 21: Wul
Highlight
Copy
Compare
Share
Want to have your highlights saved across all your devices? Sign up or sign in
