Imamat 20
20
Wiak togwi holuk, o’go tagonobogulom wene
1At Allah en Musa mo’guleselat.
2-3“Is aphwami Israel a’ge wene mo’gulonto ano re, yuat o. Is aphwami Israel a’ge mesik a, ap ’bok aphwami Israel a’ge ene’gerlakma oruak a’ge de a, emalik mesik asua Molokh ebaget wusogo wogoso ano pam an en delogo pasumu asuama ano wiagap pasulat, ye, nonuk modok logo omu degelak a’geat de, mi-miarak pasulat, tagoma re, ap ai ’gwelakho nebitmu re, no’borlma pasuam, arilak aphwami Israel odoktak a’ge ebano ene’gerlakma en a’guluak erlak emak oluk, helep pamat woruak o. 4Ye, ap emalik mesik asua Molokh ebaget wusogo wok ema a’ge ano arilak en woru erlakma en sebelogo ukpogwi holuk, 5an en ap ano ue ari enemin ’gwelak onto nebit en no’borlma onoboluk, hwe mesik ogun ukpoluk, ap mu a’ge en tuak oluk, ’gonu oso ’gela’ge, an uknoboluk, asua Molokh ebaget togulat, eli oso a’ge ano ’berlegat ap ai emin, aphwami Israel a’ge ene’gerlakma en ena’guluak erlagapsogo pouwa o.
6Hwe mesik ogun ukpoluk, ap mu a’ge en ten houwak oluk worlentasu ai ’gela’ge, is an uknoboluk aphwami enelaluk ’ga’go enarogun emin, hinwok a’ge emin, mo’gulontouwok oluk ’gonu mo’gulentai lagaiam e, is ap ai ’gwelak onto a’ge nebit en no’borlma onoboluk, enarilak ene’gerlakma en ena’guluak erlagapsogo paik ani o.
7Enaik Allah an nemategatma re, is en ogulat an mu ago erlak modok op a’ge at Allah paget a’ge poligat weleik o, oluk, mo’gulnogulat, holuk e, an Allah nebaget degelagat welemak o. 8Is mu agai erlak modok op welemagoluk pulogo enebasu ano re, an Allah atma re, wene legelogo mo’gulentasu a’ge ano ’gennesogoat tenak welat tilat laga lemak o.
9 #
Kel. 21:17; Mat. 15:4; Mrk. 7:10 Ap mesik en ia a, aik a, hweim pasu holuk e, waremak oluk, at modogat wusogo po obat o. Ye, at ia a, aik a, hweim pouwa ano pam e’gin ebam agalat, at emep lebago holuk e, wene mesik u erlakma en weat omuat ebam welemak o.
10 #
Kel. 20:14; Ima. 18:20; Ula. 5:18 Ap mesik en at emin welagai a’ge mesik ugwe tenhasu holuk ap hwe ano emin waremak oluk, wusogo onobogu lemak o.
11 #
Ima. 18:8; Ula. 22:30; 27:20 Ap mesik en aik ugwe ano emin nogoso holuk, at aik il salogo poluk, tagoma re, nemi ano emin, hwe at ia ano emin, waremak oluk, wusogo onobogu lemak o. Wusogo onobogwiam warema holuk wene mesik u a’ge erlak enemep is onomuat enebam welemak o.
12 #
Ima. 18:15
Ap mesik en omlogo ugwe de emin nogoso holuk e, togwi erlak a’geat tumu re, eminat waremak oluk. Wusogo onobogu lemak o. Wusogo onobogwiam warema holuk, wene mesik u erlak enemep is enebam nagat welemak o.
13 #
Ima. 18:22
Ap mesik en hwami tenontogwi ai ’gela’ge, ap at a’ge de tenhasu holuk, togwi erlak a’ge modok wiagat tuama re, eminat waremak oluk, wusogo onobogu lemak o, wusogo onobouwama warema holuk, wene mesik u mia enemep is onomuat enebam welemak o.
14 #
Ima. 18:17; Ula. 27:23 Ap mesik en hwe mesik ia emalik emin wogenebiso holuk e, wiak logatma re, wiak ai a’ge ene’gerlakma weiyal agoma no oluk, ap emin hwe ano emalik emin, enelaluk ’ga’goat odouk narlik onobogu lemak o.
15 #
Kel. 22:19; Ima. 18:23; Ula. 27:21 Ap mesik en wam a, mene a, tenontogwi holuk, at ebe waremak oluk, wusogo onobogulat, ye, wam a, mene a, ai ogo re, wusogo pogulat, togu lemak o.
16Hwe mesik en wam en a, mene en a, an tenniouwak, opoluk eneragam lasuam tenhogwi holuk, hwe ano waremak oluk, wusogo pogulat, mene a, wam a, ai ogo waremak oluk, wusogo pogulat, togu lemak o. Wusogo onobogwiam waragai holuk e, wene mesik u erlakma en enemep is onomu enebam nak oruak o.
17 #
Ima. 18:9; Ula. 27:22 Ap mesik en at aik emalik hwelani a, ia hwe mesik wogo a’ge emalik hwele de a, wasu lemarik, tenhasu holuk, at orat de tua ano re, togwi erlak a’geat de, e’gerli erlagat tuama re, ue ari enil oruakhwe, emin-eminat ena’guluak erlagapsogo pogu lemak o. Ap ai, orat tak welarat de, at ten houwa ano pam, e’gin e at omuat hasu lema o.
18 #
Ima. 18:19
Ap mesik en hwe mesik dugwi sogo oruakma hwe ano tiso holuk, ap ano en dugwi sogo welagoma eriano selakma takpasulat, ye, hwe ano en tuak oluk, a’ge ano telakma takpasulat, tisoam e, arilak ene’gerlakma en ena’guluak erlagapsogo pogu lemak o.
19 #
Ima. 18:12-14
Ap mesik en la a’ge de a, ogonuan a’ge de a, ten entasu holuk, is a’ge wiagapsogo onoboma re, ten ontogulom mia o. Tenontogwi holuk, hwe ap emin e’gin enebam ema ano is onomuat enebam welemak o.
20Ap mesik en aik ugwe emin nogoso holuk, at aik mi-miarak poluk, tisoma re, hwe ap emin wiak tua a’ge ano o’go enemalik onogulani doru erlakma en abeli a’ge nagat welemarik warema o.
21 #
Ima. 18:16
Ap mesik en erei ugwe opo erlakma en mi-miarak poluk, delogo horlouwa holuk, is emin wiak tua a’ge o’go enemalik onogulani dagonobu erlakma en abeli nagat welemarik warema o.
22An Allah en o ’gwiang nebei louwama ’gwiang eba en eme lukho enebasumu no oluk, an en wene wusogo mo’gulentasu a’ge emin, togulom a’ge wene mo’gulentasu a’ge emin, is en modok ene’gik ’gennesogo tenak welat, til laga lemak o. 23Is o eiye welemagoluk an en di aphwami yu aphwami o eba welagai a’ge mukho lebik onoboma ebano a’ge en wene tu mia o oluk egi a’ge ebano til lagai holuk, an modok nebit enebam pasu legimu re, is en til lagai a’ge ano is Israel a’ge en motluk lo mia o. 24Di aphwami yu aphwami oruakhwe, an enaik Allah en is onomuat an neiyagai welemagoluk, pulogo enebegimu re, is aphwami ai, ono’gwiang modok op a’ge agamu a’bosu emin, gin a’bosu emin, ik elaruk horluk-horluk lebago ’gela’ge oruak a’ge ano, his eiye wolorogup en e, wokhentaik o, oluk mo’gulentegis a’ge anoat wogentaik o.
25Asogoatma re, is an neiyagai Israel a’ge en di a’ge yu a’ge emep oruak a’ge emin, di tue yu tue emin, orogole pobirak poluk, yu asuama re no mia hegi, yu asua erlakma re, we yogunat no hegi, oluk, togu lemak o. Di a’ge yu a’ge emep oruak a’ge emin, di tue yu tue emin, onogum pam no’gwi a’ge emin, ai a’ge no mia o,” oluk, pulogo pegi a’ge ebano no’gwi holuk, enebe wiagap pagathorloma re, no mia o. 26Is an neiyagai nak welemagoluk an mu ago erlak modok op a’ge an Allah ano en di aphwami yu aphwami oruakhwe, is Israel a’ge nak enekho enebegimu re, is an nebaget degelagat welemak o.
27Ye, ap mesik de a, hwe mesik a, aphwami waragai a’ge enarogun en abi ’gela’ge pam mo’gulogukhwe aphwami mo’gulentasulat, hin wok a’ge en tisoam, waremak oluk, helep pam togou sogo worogu lemak o. At worua ano pam warema holuk, emep lebema a’ge ano paget e, wene mesik ua erlak we omuat ebam welemak, oluk mo’gulesi, oluk, mo’gulontomup o,” oluk mo’gulesi.
Currently Selected:
Imamat 20: Wul
Highlight
Copy
Compare
Share
Want to have your highlights saved across all your devices? Sign up or sign in
