Imamat 22
22
Allah ebaget pogwi a’ge ai re, modok degelagatma re, pobirak poluk no’gulom wene
1At Allah en Musa mo’guleselat,
2“Henaik Allah anatma re, an nonuk op modok omu degelak a’ge ano wiagapsogo po no oluk, is aphwami Israel a’ge en, di a’ge yu a’ge an nebaget pulogo nobou wagai a’ge ebano onogorloksogo, pobirak poluk nebaget pogu lemagoluk, Harun eiyagai enemin mo’gulontomup o.
3Asogo mo’gulentasulat, is aphwami Israel a’ge en an Allah nebaget degelogo pou wagaimu re, eba ap Harun eiyagai emin, e’balak emin weiyal etil laga lema a’ge ebano a’ge mesik, wene mesik ebam agokhweat de, lasu holuk e, ap ai an nil pam a’guluak erlagapsogo pogu lemak o. Wene yu ano re, is pobuk dagetil laga lema a’ge ebano modok-modok tugu lemagoluk, An Allah enat egi o.
4-5A’geat de, Harun eiyagai weiyelak a’ge mesik ebam aik ’belak a’ge oruak de a, hwami ap onogola a’ge pam en onomulen emin lebago a’ge de a, togwi holuk e, enebam oruak a’ge ano erlak emak oluk wam worogwi ai ’gela’ge, is en asogo mesik togwi erlakhwe, an nebaget degelogo pogwi a’ge ai, is en no’gulom mia o. Ye, ap mesik en ap werak a’ge mesik tenhasulat, ap onogola en lebago a’ge ano tenhasulat, onogum pam denagai a’ge mesik tenhasulat, ap mesik tenho mia o, oluk wene werak a’ge ebano a’ge ebam oruakhwe tenhasulat, di a’ge yu a’ge tenho mia o, oluk wene werak ai a’ge ’berlegat ap mesik en tenhasu ano pamat wiak ebam oruakhwe, ap Harun eiyagai weiyelak a’ge mesik en e, ap ano tenhasu holuk e, 6at ogo, wiagat agoma re, ik pam agap emerak erlakhwe nebaget odoktak a’ge ano no erlakhweat o mo obuk i louwak o. 7No erlakhweat o mo il obuk ilasu holuk nak e, arat op aga opoluk, nebaget polik a’ge ano re, at mesigaratma re, no op at o. 8Di a’ge yu a’ge warago a’ge a, orlomene en nasulat, ado pasu a’ge de a, nasu holuk e, at ebe wiagap pagathorloma re, at no mia o, oluk, An ’gain nonuk logo a’ge Allah enat egi ai o.
9Is ap ai, an nebaget togu lemak o, oluk, pulogo enebasu legi a’ge an Allah atma re, is ap an nebe eiye a’ge ebano en togu lemak o, oluk, mo’gulentasu a’ge re, mi-miarak pogulat, Sagalogo poluk, wiak togwi holuk e, enagap petne horak erlakma en wat ema no oluk togu lemagoluk egei a’ge ai tenakho welat, opsogoat til laga lemak o.
10An nebaget polik a’ge ai, ap an nebe eiye a’ge emin yabuk togwi a’ge en no obat a’geat de, aphwami we a’ge en sesogo no nage mia o. A’geat de, ap ’bok a’ge ap an nebe eiye a’ge emin welagai a’ge de a, ap at iabuk togwi holuk o’go wogentasuam a, ai ogo re no mia nagat o. 11Asogo tu a’geat de, ap an nebe eiye a’ge en ap mesik eragam a’geat welemagoluk, ouang pam o’go ’bal hwerlasu a, eragam a’ge e’birek welat, deriso a’ge de a, ai nak e, wagogu lemak o.
12Ap an nebe eiye a’ge emalik hwele mesik en ogun ap an nebe eiye a’ge erlak we a’ge hwerlasu holuk e, an nebaget polik a’ge pou wagai a’ge ano hwele ai wogogulom mia o. 13Ap an nebe eiye a’ge agalogo hwele mesik emalik owan doru erlakhwe, sugwe onobogwi a’ge de a, ogun en ukpasu a’ge de a, at aik an nebe eiye a’ge ano e’bek ’bok wago holuk nak e, hwele owan dogum welaga eriano sogoat aik emin oruakma re, at aik an nebe eiye a’ge en e, So’boru nebaget degelak a’ge ai, wogoum obat a’geat de, aphwami we a’ge ai nak e, wogonto mia o.
14Ap mesik en yu re Allah paget polik a’ge o, oluk eperlagat welat, nasu holuk e, ebalema ap an nebe eiye a’ge edip sebelil wagalat, ebam louksogo mu a’ge logon emin, wogosumak o. 15-16Aphwami Israel a’ge en An Allah nebaget pulogo nobou wagai a’ge holuk e, ap an nebe eiye a’ge en aphwami yogunat no obat opoluk wogontoma no’gwi holuk e, nebaget pogwi a’ge ano ing-dingtak poluk ebalema po a’ge ago holuk e, nebaget degelogo pogwi a’ge ano wiak agoma no oluk, is aphwami we yogunat nouwak oluk, we a’ge ’gela’ge takpo modok mia o. An nebaget pou wagai holuk e, pulogo pagathwerlasu legi ai re, an Allah enat taga legi o, oluk, egei oluk mo’gulontomup o,” mo’gulesi, ai o.
17Ebaget a’ge at Allah wasu erlak wene mo’gulesirik, at Allah en Musa mo’guleselat,
18“Ap Harun eiyagai emin, aphwami Israel a’ge emin, wene mo’gulonto ano re yuat o. Ap Israel a’ge mesik a, ap ’bok Israel a’ge enemin oruak a’ge mesik de a, is en nemin wene mesik daksogo ’balu a’ge eberiselat, woknema ya, o’go erlak a’ge weat woknosuma ya, oluk epasu lemarik, an Allah nebaget wusogo odouk narlu a’ge paget pou wom ano re, 19an en wasu leiktik, nagai enebam paik en e, sapi a, kambing domba ya, aik ’belak erlak a’ge ierak a’ge holuk nak nebaget pogu lemak o. 20#Ula. 17:1Ebam aik ’bal-’bal legenak a’ge de, woknosu agai holuk e, an en weik tik nagai enebam paik erlakma re, asogo tak a’ge holuk nebaget pou wagaimu no yo. 21Ye, ap mesik en nemin wene daksogo ’balu a’geat eberiselat woknoum a, o’go erlak a’ge weat woknosuom a, opoluk Allah emin hwedik weleik o, oluk, lembu sapi a kambing domba de a, an Allah woknosu agai holuk e, nogola nagaisogo wayogoluk aik ’belak erlak a’ge op a’ge holuk nak woknosu aga lemak o. 22Asogoatma re, onuam il sogolik a’ge holuk, uak porlok tak a’ge holuk, o’borluak de tak a’ge holuk, ebam perik a’ge holuk, yebil aik ’belak a’ge holuk, agap ’bugwa a’ge holuk, an Allah nebaget pou wagalat, ye, an Allah nebaget wusogo e narlogumu pou wagalat, togumu no yo.
23A’geat de, sapi a, domba a, So’boru ede pam dungsogo lasu erlak a’ge herle ’gela’ge holuk a’gul ’gogo a’ge dogo holuk e, nemin wene daksogo ’balogu lege oluk eberiselat, woknoso holuk, an en waik erlak a’geat de o’go erlak weat woknosuom holuk e, op at o. 24Onuam mesik ouwarli perik welat, al ’biso a’ge holuk, ouwarli orlong tak a’ge holuk, ouwarli lebilik holuk, ouwarli wogo holuk, ano re, an Allah nebaget pou wagaimu no yo. Ye, is onowi pam eba ogo asogo togumu no yo.
25Is ap ’bok a’ge en onuam asogo tak oruakhwe wogontogwi holuk e, yu re, nenaik Allah ebaget a’ge o, oluk, odoksogo poluk, nouwak oluk, wogonto mia egei, oluk, mo’gulontomup o,” oluk, mo’gulesi,
26Mo’gulesirik, at Allah en Musa mo’guleselat,
27“Sapi emalik a, kambing domba emalik a, derisoam agauwa 7 pam ia emin welemak o. A’geat de, o loruk o’gwe Allah nebaget wusogo odouk narlu op at a’geat de, 28enia onogulani enemin agauwa mesik pam waronobu nak e, mia o.
29A’geat de, ’Gain nonuk logo a’ge an Allah nomuat wa, oluk mo’gulnemak oluk, nebaget wusogo pogulat holuk e, an nede aganhan henebam pasulat, wayogoluk, wene werak a’ge yu ’gela’geat togu lorogup ani o, 30wusogo no’gulat holuk e, pema hubet nouwok oluk po mia o. A’geat de, o agauwa ai erligeat ’berleksogo no’gu lorogup ani o, oluk an Allah enat egi o.
31Henaik Allah anatma re, wene disogo tip, asogo tip, oluk, mo’gulhentasu a’ge ano his en ’gennesogo tenak welat, til laga lomup o. 32Henaik Allah anatma re, is aphwami Israel a’ge en an mu ago erlak omu enak a’ge degelak oruakhwe niogu lemagoluk, nonuk modok op a’ge omu degelak oruak a’ge ano, oluk, nonuk arat op omu degelak oruak a’ge ano his en mi-miarak pogulom mia o. His mu agai erlakma en degelak op nak welemagoluk pulogo henebasulat, 33Ye, henaik Allah anat eik oluk, o Mesir en wokhonoboluk liplau wagalat, tigis ano re, ’gain nonuk logo a’ge an Allah enat tigis o,” oluk, mo’gulesi.
Currently Selected:
Imamat 22: Wul
Highlight
Copy
Compare
Share
Want to have your highlights saved across all your devices? Sign up or sign in
