Imamat 18
18
Yogunat ten ontogulom mia o, oluk, mo’gulesi wene
1At Allah en Musa mo’guleselat,
2“Is aphwami Israel a’ge wene mo’gulonto ano re, yuat o. Enaik Allah an nemategatma re, 3Is naduk welegesema aphwami o Mesir a’ge en togwi ai ’gela’ge tugulat, ye, an en wogonoboluk, o Kanaan enebei loma is aphwami eba a’ge en tugwi ai ’gela’ge tugulat, tugulom mia o. 4Is enaik Allah anatma re, an en togulom wene mo’gulentasu a’ge ano pobirak poluk nak togulat, ye, wene le’gelogo mo’gulentasu a’ge ano modogat motluk lagalat, togu lemak o. 5#Neh. 9:29; Yeh. 18:9; 20:11-13; Luk. 10:28; Rom. 10:5; Gal. 3:12Is enaik Allah anatma re, wene le’gelogo mo’gulentasu a’ge ano emin, tugulom a’ge wene ano emin, is modok tenak welat, opsogo nak til lagai holuk enelalugat welema o.
6Ap mesik en hwe at en a’ge horoktak a’ge holuk e, tu mia o, oluk, an henaik Allah enat egi o. 7Ap mesik en aik il salogo poluk, ia at de tenho mia o. At ia ai re, aik ugweatma re, tenho mia o. 8#Ima. 20:11; Ula. 22:30; 27:20Ye, ap mesik en aik uge, a’geat de, ap mesik tenhasu holuk e, aik il sogulogo poluk tenho a’ge ogo re, tu mia nagat o. 9#Ima. 20:17; Ula. 27:22Ap mesik en erei emin dogo a’ge de a, hwe mesik ap mu a’ge en emalik dogo pesimu re, hwe ano ap ano aik wasu holuk a, ai emin ereiatma re, tenonto mia o.
10Ap mesik en eba ap omlogo a, eba hwele ai omlogo a, ten entasu holuk at pam en wigalak a’ge ononuk wiak agalom no oluk, tenonto mia o.
11Ap mesik aik ugweat de, are mesik agalogo hwele a’ge deriso holuk e ano re, at ereiatma re, tenho miayat o. 12#Ima. 20:19,20Ap mesik en at aik orokhilak ai ogonuan lagat ogonuan lagatma re, tenonto mia o. 13A’geat de, at en at ia o silagatma re, tenonto mia nak o.
14Ap mesik aik ot ugwe ai, at iaatma re, tenhasu holuk e, aik anoat wiagapsogo po ai en e, tenho mia o.
15 #
Ima. 20:12
Ap mesik omlogo ugwe ai, omlogo ugeatma re, hwele ai aik en tenho mia o.
16 #
Ima. 20:21
Ap mesik en e, ue de a, ot de a, ugwe tenhasu holuk e, wiagapsogo po a’ge oruakma re, tenho mia o.
17 #
Ima. 20:14; Ula. 27:23 Hwe mesik emalik hwele a’ge dogoma re, ap mesik en, wasu lemarik agalogo ano ia e’birek tenonto mia o. Ye, hwe ai emalik ap logomalik a? hwele agalogo de a, ano re, at e’balagatma re, ten entasu holuk e, babiat tuama re, tenonto mia o.
18Ap mesik ugwe elaluk oruakhwe, ugwe ano ot wasu lemarik, tenho mia o.
19 #
Ima. 20:18
Hwe mesik dugwi uan hasu holuk ebe wiak agalat oruakma re, emin nogou mia o.
20 #
Ima. 20:10
Ap mesik en at emin welago a’ge ugwe tenhasu holuk e, at ebe wiagap pagathorloma re, tenho mia o.
21 #
Ima. 20:1-5
An henaik Allah anatma re, enaik Allah an nonuk mi-miarak pogumu no, oluk, asua Molokh erliktugulat, at ebaget wusogo odouk narluak oluk enemalik wogoum mia o
22 #
Ima. 20:13
Is ap-ap nak tenontogwi holuk e, an Allah nebit modok epasu legimu re, hwami tenontogwi ’gela’ge, ap-ap nak tugulom mia o.
23 #
Kel. 22:19; Ima. 20:15,16; Ula. 27:21 Ap ebe wiagap pagathorlo no oluk, mene a, wam a, tenonto mia o. Ye, hwami en ogo re, mene a, wam a, en tenontouwak oluk, enede eberak poluk eneragam lagaiam e, togwi erlak a’geat de wiak a’geat, tumu re, eneragam lo modok mia nagat o.
24Asogo togwi a’ge ai re, is o wogontoma di aphwami yu aphwami an en mukho lebik enebasumu ebano en tugulat, wiagap pagathorlogu legesema re, Is Israel a’ge asogo tugumu no yo.
25Asogo wiak nagat til lagai ano pam enebe emin, ono’gwiang emin, eba, wiak agama re, wiak togwi o’go enebam pil lasu ai en eme lukho pogwi ai ’gela’ge, ono’gwiang en, eme lukho ugenebesi.
26-27Is wiak togwi a’ge ano an nebit modok epasu legi ai, is wolomma ebano ’gwilo erlakhwe, is aphwami ai a’ge en til lagai ano pam ono’gwiang wiak agama re, is Israel a’ge dogo a’ge emin, is ap ’bok a’ge enemin welagai a’ge emin, is togwi ai a’ge mesik tugulom mia o. A’geat de, an en wene le’gelogo mo’gulentasu a’ge emin, tugulom a’ge wene mo’gulentasu a’ge emin, modogat tenakho welat, til laga lemak o. 28An en mo’gulentasu a’ge opsogo togwi erlak holuk, ono’gwiang wiagat agoma re, is wolomma ebano lebago erlakhwe di aphwami yu aphwami ono’gwiang en eme lukho ukpesi ano ’gela’ge, ’gwiang ai en is Israel a’ge asogoat eme lukho ukpouwa o.
29Ap mesik en di a’ge yu a’ge an nebit epasu a’ge tago ai, arilak ene’gerlakma en a’guluak erlagapsogo pogu lemak o.
30Enaik Allah anatma re, is wolomma owan ’gwilo erlak oruakhwe di aphwami yu aphwami eba a’ge en di a’ge yu a’ge an nebit epasu legi a’ge togwi erlak a’ge til lagai ano, is Israel a’ge en til lagai ano pam wiagap nobouwa no oluk, an en wene is mo’gulentasu a’ge ano modogat tenak welat, til laga lemak, oluk, mo’gulontomup o,” oluk, mo’gulesi.
Currently Selected:
Imamat 18: Wul
Highlight
Copy
Compare
Share
Want to have your highlights saved across all your devices? Sign up or sign in
