Imamat 19
19
Allah en e, “Henebe an nu’gwarek nebaget degelak welat hegitsogo togu lomup o,” oluk mo’gulentesi wene
1-2 #
Ima. 11:44,45; 1Pet. 1:16 Nenaik ’gain Onuk Logo a’ge en e, Musa disogo mo’gulesi,
“Aphwami Israel a’ge Allah en e, disogo egei, oluk mo’gulontomup o,
An henaik ’gain Nonuk Logo a’ge Allah nu’gwarek nebaget degelak welegi ai en e, his an nebaget ogo degelagat welemis o. 3#Kel. 20:8,12; Ula. 5:12,16An Henaik ’gain Nonuk Logo a’ge re, anat ai en e, an en,
Asogo togu lomup, oluk mo’gulhentegis ai ’gela’ge, henebe lo’bok en henielak henaiklak heniak hau do’goksogo waronobogulat, agauwa sabit pam e, an nebaget weat wolomup o.
4 #
Kel. 20:23; 34:17; Ima. 26:1; Ula. 17:2-5 Henaik ’gain Nonuk Logo a’ge re, anat ai en e, an uknoboluk henede dogwi asua pam he’berik pei lagup o. Emas a’ge emin, perak a’ge emin, ’besieme’gen a’ge emin, heli’gogo dogwi asua werikpoluk erliktogulom mia o.
5His en an nemin la’buogoluk, wam di a’ge yu a’ge an nebaget wusogo nobouwogoluk holuk, an waik en e, an en,
Disogo togu lomup, oluk mo’gulhentegis ai ’gela’geat togu lomup o.
6Wam di a’ge yu a’ge ai ebe wusogo se’gerlogulat ai erlige emin, loruk o’gwe emin, ’gwerik e, we elirat no yo. A’geat de, tono ’gela’ge wolomtik hau ’gela’ge wam ’gwerik ai hweli ado oruak holuk, no mia aga ai en e, ’berleksogo odouk narlik po yo. 7Wam di a’ge yu a’ge no mia ago a’ge ai no’gwi holuk, wam an nebaget wusogo woknema a’ge ai an waik erlak o. 8Ap sa en,
Wam di a’ge yu a’ge ai Allah paget pege a’ge, oluk pobirak erlakma en, ’gwerik no mia aga a’ge ano nouwa holuk, wiak tua ai u’gwarek ebam wene pouwema re, an en,
At ai ebe an neiyagai a’ge oluk epaik erlak o.
9 #
Ima. 27:15; Ula. 24:19-22 Heniabukmu gandum yogo a’ge e’gen ’balogulat, esa’go ’gwe ’baktil louwa a’ge holuk, e’gen ’berlek ’balogup modok no yo. Ye, gandum e’gen ebano arat ’belakpolukmu en, ado ukpagup a’ge ai pobuk ’balilo modok miayat o. 10Ai ’gela’geat, Henaik ’gain Nonuk Logo a’ge anat ai en, heniabuk anggur yabukmu, e’gen naduk arat ’belakpolukmu en ado ukpouwa a’ge ’baluogoluk pobuk togolik wagup modok erlak o. Ye, e’gen omuat ’balogo ’buma a’ge ogo wagup modogat erlak o. We, ai ’berlegat aphwami ’bok a’ge emin, ena’ge erlak a’ge emin, enemin en horluagoluk ugonobomup o.
11 #
Kel. 20:15-16; Ula. 5:19-20 Yogorlia wogulat, lalonobogulat, heniak esei mo’gulontogulat, togu lorogup no yo. 12#Kel. 20:7; Ula. 5:11; Mat. 5:33Henaik ’gain Nonuk Logo a’ge Allah re, anat o. An nonuk wiagap po ai en e, his en aphwami di a’ge yu a’ge obok mo’gulontogulat, honogola en,
Wogeik erlak, oluk opogulat holuk, an nonuk ho’buk ’balogo obok mo’gulonto mia o. 13#Ula. 24:14,15His en aphwami henemin welegep a’ge, heniak ningsogo,
Woknemin, oluk lalonobogulat, ena’ge delogo horlogulat, tu re, modok mia o. Aphwami logon en o’go wogontuagoluk yabuk uthontouwa a’ge ai, ene’gik o’go wogonto erlakma en tenak poluk agauwa hup mesik wolom mia o. 14#Ula. 27:18Henaik ’gain Nonuk Logo a’ge re, anat ai en e, an honogorloksogo welat erliknobogulat e, aphwami enesa’go lerak a’ge hweim onobogulat, enil hepnik a’ge onoyuk a’gul dungsogo wathorluagoluk helep onorogole ’balogo ’gwe ’belak pogulat, tu modok mia o.
15 #
Kel. 23:6-8; Ula. 16:19 His en, is logon wene enebam pogulat, no’gorlogulat, togulat e, wene hegitsogo hwelakpoluk til laga lomup o. Aphwami ena’ge erlak welat enerlagaik a’ge ai enakhit agalat, ena’ge a’bik welat enilmu ’bullak a’ge ai honogorloksogo welat, togulom modok mia o. 16Henaik ’gain Nonuk Logo a’ge re, anat ai en e, his henebabut togup a’ge pam en aphwami henemin welegep a’ge logon waronobuano oluk e, aphwami his a’ge logon enil pam onobok wiak il-il sagarak po modok mia o.
17 #
Mat. 18:15
Is aphwami logon enebaget his wiak tuno oluk e, is logon enemin hwerlirak ’gela’ge welegep a’ge ai, enebam wene e’gen dogo poluk wolom modok mia o. We, erlagapsogo poluk wolom o. 18#Mat. 5:43; 19:19; 22:39; Mrk. 12:31; Luk. 10:27; Rom. 13:9; Gal. 5:14; Yak. 2:8Henaik ’gain Nonuk Logo a’ge anat ai en e, aphwami en wene e’gen henebam dogo poluk oruak holuk e, his en o’go pogulat, henebirap onobogulat, togup no yo. We, honu’gwarek henebe henede hwedik welegep ai ’gela’ge, is aphwami logon henemin welegep a’ge ai enebe henede hwedik wolomup o.
19 #
Ula. 22:9-11
An en,
“Disogo togu lomup, asogo togu lomup, oluk mo’gulhentegis a’ge ai hologoat togu lomup o. Wam a’gulmu a’ge pam hwederik pogulom mia o. Ye, yabuk sorlun mesigat a’ge pam owi agaikhen a’ge agaikhen a’ge mesikmu yoru mia o. Ye, herle esi agaikhen a’ge agaikhen a’ge emin mesikmu tualogo sum egeik poluk lo’bok tu re, mia o.
20Ap mesik eragam a’ge hwele salesik a’ge ap mesik ugwe welemagoluk ebam o’go ’baligoluk obok nak mo’gulotluk, at ap o’go ’balu a’ge ano en owan o’go ’balu erlak oruakhwe, at hwele ano ue naduk a’ge ano emin nogogwiam e, eminat wene enebam po yo. Asogo a’geat de, hwele ai ap ano eragam a’geat oruakma re, enebe modok waronobu mia o. 21At ap hwele ano emin nogogisa a’ge ano en,
An wiak tegis o, oluk wam domba ierak a’ge an nebaget nowi werik a’ge ’godukmu pou wom o. 22Pou wagaiam, ap ai wiak tegei a’ge ano, an en erlagapsogo horuagoluk, ap an nebe eiye a’ge en an en aphwami wiak tigisa a’ge ho onobuagoluk an nebaget togulat, wam domba ai agaikhen watnoum o. Asogo togwiam an en at wiak tegei a’ge ai erlagapsogo ukpaik o.
23His o Kanaan arat ’gwi lagup holuk, di agan yu agan e’gen no’gwi a’ge ai owi yogo poluk, tahun henagan welat e’gen naduk ua a’ge ai re, nagup no yo, oluk pobirak poluk no erlakma enat wolomup o. 24Tahun henagan wolomtik en tahun mesik pam en e’gen oso holuk, an Henaik ’gain Nonuk Logo a’ge hau wusogo re, an nebaget po yo. 25Tahun ugan wolomtik tahun mesik en e, e’gen his elirat no’gulom o. Henaik ’gain Nonuk Logo a’ge re, anat ai en e, an en,
Disogo togu lomup, oluk mo’gulhentegis a’ge ai hegitsogo togup holuk e, e eba e’gen a’bigat ese lema o.
26 #
Kej. 9:4; Ima. 17:10-14; Ula. 12:16,23; 15:23; 18:10 Mep a’ge no’gulat, di hwarl yu hwarl elalin togwi a’ge logon togulat, togulom mia o. 27#Ima. 21:5; Ula. 14:1Henasu ’berleksogoat ’balugulat, henemde asu perlengsogo ’balogulat, tu re, mia o. 28Henaik ’Gain Nonuk Logo a’ge re, anat ai en e, aphwami waragaiam, henede wiak en henagap me’gin ’balogulat, henebetne pelal ’gela’ge mesik wogulat, tu re, modok mia o.
29 #
Ula. 23:17
Honogulani honogola en mi-miarak onoboluk e, odogwi asua owi werikmu eba danil denaga lemagoluk tagenebagup o. His en asogo togup holuk, honowi pam wiagapsogo pogulat, o his welegepma eba wiak henebam e’gerlik modok welat, tua o. 30#Ima. 26:2Henaik ’gain Nonuk Logo re, anat ai en, agauwa sabit a’ge pam an nebaget weat welat, ebale an erliknobogulom a’ge werikmu eba erliksogoat togulat, togu lomup o.
31 #
Ula. 18:11; 1Sam. 28:3; 2Raj. 23:4; Yes. 8:19 Henaik ’gain Nonuk Logo re, anat ai en, hin wok a’ge aphwami werak a’ge enarogun ondogun pam welat wene mo’gulentasu a’ge ai en henesa’go woruagoluk ene’bek lo re, mia o. Ene’bek lagup holuk, henebe wiagapsogo pagup ani o.
32Henielak henaiklak honogorloksogo welat, hau do’goksogo waronobogulat, togu lomup o. Henaik ’gain Nonuk Logo a’ge anat ai en e, an hau do’goksogo watnobogulat, honogorloksogo welat, togu lomup o.
33 #
Kel. 22:21; Ula. 24:17,18; 27:19 Ap ’bok his honowi pam welagai a’ge ai wiagapsogo enebagup o. 34Henaik Allah ’gain Nonuk Logo a’ge anat ai en e, aphwami his a’ge enebaget tagonobogu legep ai ’gela’ge, his en ap ’bok a’ge ai enebaget ogo asogoat, enebe henede hwedik welat, togu lomup o. Is ap ’bok a’ge oruak ai ’gela’ge, his ogo re, asogoat o Mesir welegep ebano henede eberip o.
35 #
Ula. 25:13-16; Ams. 20:10; Yeh. 45:10 His en di a’ge yu a’ge aphwami logon enebam a’ge o’go ’baluogoluk, elira’ge meter emin, kilo emin, liter emin, walhegeik wogontogwi hegitsogo wogonto erlakma en heniak eseiyat lalonobogup o. 36Henaik ’Gain Nonuk Logo a’ge re, an enat his o Mesir en wokhonoboluk liplau wegi ai en, elira’ge meter emin, kilo emin, liter emin, ebe demat a’ge pam hegitsogo walhogu lomup o. 37Henaik Allah ’gain Nonuk Logo a’ge, anat ai en e, an en,
Disogo togu lomup, asogo togu lomup, oluk mo’gulhentegis a’ge ai, ’berlegat hwelak poluk togu lomup o, oluk egei o, oluk mo’gulomup o,” oluk mo’gulentesi.
Currently Selected:
Imamat 19: Wul
Highlight
Copy
Compare
Share
Want to have your highlights saved across all your devices? Sign up or sign in
