Imamat 17
17
Emep no’gulom mia o, oluk mo’gulesi wene
1At Allah en Musa mo’guleselat,
2“An Allah en wene disogo tip, asogo tip, oluk at Harun emin, at eiyagai enemin, is aphwami Israel a’ge enebe ’berlegat enemin mo’gulonto ano re, yuat o. 3-4Is aphwami Israel a’ge mesik en sapi domba de a? kambing a, Allah ebaget wusogo paik opoluk, woluk nemin hwedik togumu nowi sabo sum a’ge werikmu ’godukmu eriano an Allah nil pam wosuom erlakma en aphwami onowi sabo odipmu a? we, o’borlma eba de a, wusogo pasu holuk at en wene werak a’ge ano Sagalogo pasulat, emep we erlakma herlilogo ukpasu a’ge o’go po a’ge ano at ebamat omma re, arilak ene’gerlakma enat, a’guluak erlagat welemagoluk parema eba lebikpogu lemak o. 5Wene yu re, is aphwami Israel a’ge en an nebaget wusogo po opogulat holuk e, o’borlma yabukmu en we yogunat wusogo pogwi ano ukpoluk, nowi sabo sum owi werikmu ’godukmu en nak an Allah nebaget wusogo pogu lemagoluk, mo’gulhegis ai o. Nebaget wusogo po a’ge ano, woluk e, an nemin hwedik togumu nowi sabo werikmu ’godukmu eria an Allah woknosu aga lemarik, is nemin hwedik welemagoluk, ap an nebe eiye a’ge en an nebaget wusogo po a’ge ano a’geatma, oluk, wogogwi holuk e, nil pamat nebaget wusogo woknemak o, 6wusogo poluk, emep ano nemin hwedik togumu nowi sabo werikmu ’godukmu an Allah nebaget odouk narlogumu eragam eba herlelik pasulat, ye, esei amua’go a’ge holuk e, odouk narlogumu an Allah e’ben op hasulat, nogola nagai haik en e odouk narliselat, taga lemak o. 7Hwe mesik ogun ukpoluk, ap mu a’ge mesik emin hwedik tiso ai ’gela’ge, Is aphwami Israel a’ge en enaik Allah an uknoboluk, enasua kambing ’gela’ge ebaget wusogo pogwi a’ge ano pobuk emin ebaget wusogo pogulom mia o. Wene ano re, is aphwami Israel a’ge enemin eneiyagai ene’balak dak etil laga lema a’ge ebano emin, modok-modogat togu lemak o, oluk, mo’gulonto ani o.
8Asogo mo’gulentasu loroguntik, pobuk mesik mo’gulonto ano re yuat o. Is aphwami Israel a’ge mesik en de a, aphwami ’bok Israel a’ge ene’gerlakma welagai a’ge mesik en de a onuam wusogo an nebaget odouk narlogwi holuk de a, an nebaget wusogo pogwi holuk a, 9an nemin hwedik togulomma nowi Sabo werikmu ’godukmu eria an Allah nebaget wusogo po erlakma en o’borlma we yogun wusogo pasu holuk ap arilak ene’gerlakma en a’guluak erlagapsogo parema lebikpogu lemagoluk, mo’gulontomup o, oluk, mo’gulesi.
Emep emin omu werak a’ge emin, no’gulom mia o, oluk, mo’gulesi wene
10-11 #
Kej. 9:4; Ima. 7:26,27; 19:26; Ula. 12:16,23; 15:23 #
Ibr. 9:22
Mo’gulesirik wene mesik emin is ano mo’gulontouwak oluk, Musa mo’guleselat, di a’ge yu a’ge enelaluk welagai a’ge ’berlegat ano re, enelalugap tago a’ge edip enemep aiat o. Enemep ai pam en, wiak o’go waronobu erlakma en, ugenebasu legimu re, is waronobu erlakma en onowiak erlagap poluk nemin hwedik tuok oluk an nebaget uam wusogo odouk narlogumu ebalema ebano enebaget emep herlilogo pogu lemak o, oluk, mo’gulentegismu re, Is aphwami Israel a’ge mesik en a, aphwami ’bok ene’gerlakma enemin welagai a’ge mesik en a, emep mesik nasu holuk e, an en nil ’gwelakho nebitmu re, no’borlma ukpoluk arilak ene’gerlakma en lisogo a’guluak erlak welemagoluk, lebikpaigat ani o. 12Asogoatma re, Is aphwami Israel a’ge emin, aphwami, ’bok a’ge ene’gerlakma welagai a’ge emin, emep no’gulom mia o, oluk, Is aphwami Israel a’ge mo’gulentanok oluk, mo’gulhegis ai o.
13-14Di a’ge yu a’ge ’berlegat ai re, enelalugap pasu a’ge edip enemebatma re, Is aphwami Israel a’ge mesik en a? aphwami ’bok ene’gerlakma welagai a’ge mesik en a, no’gwi a’ge tu ede a, ’baik de a, mesik elaluk tenak poluk, worogulat, emep herlilogo lebikpoluk e, ’gwe ’balogo sebelak pogu lemarik, ebe no’gulemak o. Asogo tugu lema ano re, di a’ge yu a’ge ’berlegat enelalugap tago a’ge edip enemebat oruakhweat de, no’gwi holuk e, enarilak ene’gerlakma en lisogo ena’guluak erlagat welemagoluk, libagalom no oluk, emep mesik no’gulom mia o, oluk, aphwami Israel a’ge mo’gulentegis a’ge ano edip e aiat oluk en mo’gulhentegis ai o.
15A’geat de, is aphwami Israel a’ge mesik en de a? aphwami ’bok is ene’gerlakma welagai a’ge mesik en a, omu enat wat ago a’ge einnyo ’gwerik emin mene orlomene anni a’bik a’ge en iak lebelisoam einnyo a’ge emin, nasu lomtik holuk e, osum opsogo ik emeriselat, ebe opsogoat ’gume weriselat, tagalomtik ebe wiagap pagathorloluk oruakhwe o mo il obuk ilasu holuk e, obat ema o. 16A’geat de, at osum emet hwerlasulat ebe ’gume wathwerlasulat, tago erlak holuk nak e, e’gin at omuat houwa egei o, oluk, mo’gulontomup o,” oluk mo’gulesi.
Currently Selected:
Imamat 17: Wul
Highlight
Copy
Compare
Share
Want to have your highlights saved across all your devices? Sign up or sign in
