Ratapan 4
4
O Sion e’gin modok lok a’ge ebam pesi wene
1Emas amolit deleng-deleng oso a’ge ano erlak agalat, emas op a’ge nak hele’gik welago a’ge ebano amolit erlak etil lasulat, di helep yu helep o’go lok a’ge Allah owi werikmu welago a’ge ebano ebela ’gwe hwik-hwak haiegesema welat, “Tigisa yu re, logwe! Eige.”
2Emas op a’ge pam nak hele’gik holuk e, o’go a’bigat welago ai ’gela’ge, “o Sion emalik ai re, nede hwedigat o,” oluk, ogu legesa a’ge ano, “Yogodak ap ’gwiang orlogomsogo hele’gogwi a’ge en ik e’be ’gwiang pam hele’giso a’ge ’gela’ge at ai aga o,” oluk, ogumu re, eige!
3Orlomene en enemalik enagamu wogontogwi a’geat de, an na’gul a’ge nak e, hogobi o leimu welat, emalik edeap onobu erlakma en ukpoluk noso ai ’gela’ge, wiak asogoat til no’gwi ai o.
4Malik ’get dogo a’ge agamu nele en enemage harlo eselat, malik tuarik a’ge so’boru ’gonu mo’gulontogwi a’geat de, wogontogwi erlagat welat, asogoat togwi o.
5Is naduk en so’boru yorum oduk op a’ge nak no’gu legesa a’ge ebano re, yogodak onso’boru nele en ebela ’gwe waretil lagalat, is page en sum op ’gut a’ge pam nogogu legesa a’ge ebano re, yogodak en e, aphwami enemdesing poluk orluk ti lagai a’ge pam nogogulat, togwi o.
6 #
Kej. 19:24
O Sodom togwi a’ge o’go e’gin a’ge enebam pesi ano re, is logon en leronto erlakhwe, Allah enat o agauwa mesik erlige lagak-’bagaksogo warenebegei ano re, logo ’gela’geat a’geat de, An na’gul a’ge en wiak tugu legesa ebano re, modok loksogo at wiak tugu legesa ai en e, e’gin wiak a’ge enebam pesi ano re, modok lok a’geat enebam aga o.
7Is onuelak ’gain ’gain ai re, o a’gurlok arogun ai ’gela’ge erlak a’ge welat, we enebe modok op horak a’ge amolit delengtak welat, mu agai erlakma en welat, enebe ai re, enagap ’gut modok ye’berlangtak welat, ye, helep amolit deleng oso ai ’gela’ge onorogole asogo at amolit deleng eselat, op nagat welegesa a’geat de,
8yogodak en e, is enagap pam hobu en soduk ’baliso ai ’gela’ge tagenebasulat, enagap ’bulongtak pasulat, e ’buk ago ai ’gela’ge onuak ere’gik pasulat, takpasuam asogo ebela ’gwi lagai a’geat de, aphwami en e, “Is yu denagai o,” oluk, opogwi erlagat welagai o.
9Is so’boru nele en waragai ai, eniabuk yogo a’ge erlak holuk, so’boru nele en nonouk tugulat, enebe mabenap enebasumu re, wa’gun pam wusogo, waragai ai re, obat a’geat de, so’boru nele en waragai ai nak e, modok e’ginat o!
10 #
Ula. 28:57; Yeh. 5:10 Asogoatma re, is an na’gul a’ge wusogo enebil legesa ai erlige hwami enede oruak a’ge en is onu’gwarek enemalik a’geat de, onso’boru nele en onso’boru ’gela’ge wusogo sakhorlogu legesa o.
11At ’gain Onuk Logo a’ge Allah olot het, mo u erlakma en ’bekhitsogo enebam herlilogo pasulat, olot het odouk ai ’gela’ge, aphwami enebam herlelik pil lasulat, taga lagarik, o Sion ebano odouk magalesogo pesimu modok dagalogo nil lasulat, ’gwiang nak ukpesi o.
12Ap ’gain-’gain o ’gwiang pam welagai a’ge emin, aphwami o di owi yu owi welagai a’ge ’berlegat emin en, “Is o Sion a’ge enemin weim hwerlitak a’ge holuk e, enemin il ’belak a’ge holuk, o Yerusalem ’goduk ’gwi lagai o’gwe ’gwilouwa modok erlak o,” oluk, asogo enedemu en opogu legesa a’geat de, we atnik hweat ’gwi legesa o.
13Asogo ’gwigisa ano re, is Allah en mo’gulentasukhwe mo’gulontogwi a’ge en wiak tugulat, ye, is ap enede op oruakhweat de, enemep enamogo enebegesa a’ge Allah eiye a’ge en ogo wiak til lagalat, tigisa ai enat ’gwi legesa o.
14Is ap wiak togu legesa ano re, ap enil wiak a’ge en ene’gik dapak no’gwi ai ’gela’ge ebela ’gwe no’gwi ai o. Onosum ologun petne, aphwami enemep dak-paksogo oruakma re, “Onosum tenho a’ge onogorlok en onogoiye onobogulat,” togwi ai o,
15“His e, ogoiye onobogwi a’ge nakma re, lit o,” oluk, mo’gulontogulat, “Nis nenebam agoma no oluk henebe yamuksogo momu lit momu lit,” oluk, mo’gulontogulat, togwi holuk, is ’bogulogo di ap yu ap welagai o’gwe, da ’goluk ya ’goluk no’gwi holuk e, is aphwami ebano en e, “Nenemin yema aregen wolom mia o,” oluk, mo’gulontogwi o.
16At ’gain Onuk Logo a’ge Allah enat is enebe mukho perak enebesimu re, il en wogonobu erlakma enat welago yo. Asogoatma re, aphwami en is at ebe eiye a’ge ebano onogorlok hogulat, is ap enebe enarlue a’ge enedeap onobogulat, tu erlakma enat welagai o.
17“Nis letnentelep logwe,” oluk, nenil yetharok at welege a’geat de, we almasogoat nenil obotut nak hege o. Aphwami ena’gul onuk mu a’ge mesik en letnentauma oluk, o enilen wogonobogwi a’ge werikmu ebano memerentarok welege a’geat de, letnentauwom erlagat o.
18Ebela lagaimu, nenemin il ’belak a’ge en enilen woknonoboluk no’gulegesarikmu re, nonowi odipmu, libagalom erlakma en we mosogoat welege ani o. Nis dak ege ’gwe agauwa modogat erlak etil lasulat, nenelaluk wolom hwerli arat lail lasulat, ye, nis warom o’gwe horok lau wagalat, tegeimu re,
19Tue pedi-pedi o ’burl ya darak lak wak oso ai logo ’gela’geat a’geat de, is en nis muknonoboluk no’gwi a’ge onomut nak e, modok mu ebeletak oruakma re, dom-dom petne muknonoboluk no’gulat, o lei o’gwe en nonorogole ’gwe balnenebil no’gu legesa o.
20Nis nenelaluk wolom a’ge eiyerak nenebasu a’ge at ’gain Onuk Logo a’ge Allah en at a’bosu poluk herlilogo edikpo a’ge pulogo pesi a’ge ano, ’gwiang ele delakma ’bisoma tenak pogulat, di aphwami yu aphwami ene’gerlakma welat, at eragam op wolom epege a’geat de, tenak pogulat, tigisa o.
21O Edom agalogo o Us eba welegen a’ge hat yu o. Eida tagalat, hogola hagai hasulat, tu epasulat holuk osolomupat o. Hat ogo re, a’bosu ne’gak a’ge wokhosoam naguntik hede ’balotluk oruakhwe, hosum no’gorlogo hage golom hobouwa o.
22O Sion agalogo hat yu o. Tigen a’ge ogo e’gin a’ge hebam pogwi ai erlagat agalat, wokhoboluk o momu hebeilua erlak a’geat de, o Edom agalogo hat nak e, at ’gain Onuk Logo a’ge Allah en wiak tigen a’ge o’go takhebasulat, howiak telakma takhebasulat, tua o.
Currently Selected:
Ratapan 4: Wul
Highlight
Copy
Compare
Share
Want to have your highlights saved across all your devices? Sign up or sign in
