Ratapan 5
5
Naduk welegesa ’gela’ge tagonobouwagoluk se’ban egesa wene
1Hat Nenaik ’gain Honuk Logo a’ge Allah o. Nis nenebam aga a’ge ano ebetnentasulat, ye, nis sebelogo nenebegesema nononuk erlak aga a’ge ano hil yetnontoluk, pobirak nenebasulat, tin o.
2Nenemining a’ge ’gela’ge, nono’gwiang ano aphwami mu a’ge ene’gikmu agalat, nonowi werik a’ge ap ’bok a’ge en eiye agalat, tigisa o.
3Nis nenaiklak erlak en mongnuat welat, nenialak ebano tugwe ’gela’ge nak welat, asogo nak welege o.
4Nenegeik nouwogoluk e, o’go poluk no’gulat, nenagan ogo re, o’go ’balhorlogulat, togu lege o.
5E, ’belak e’gin a’ge ’gela’ge eniak anni wiak degenik-yegenik mo’gulnontogwiam, nenebe mabenap nenebasu a’geat de, “Set hwal-hwerlemit o,” oluk, mo’gulnonto erlagat welat, togwi o.
6Nonso’boru nonogumsogo elit no a’ge woknontouwagoluk, aphwami Mesir a’ge ene’gik demogo ’gonu mo’gulontogulat, aphwami Asyur a’ge ’gonu mo’gulontogulat, tige o.
7Nis nenaiklak en wiak tugu legesa a’ge ebano enebe erlak egesema en, is onowiak o’go enebam po a’ge ano nisat nenebam aga o.
8Aphwami eneragam a’ge en wene le’gelogo mo’gulnontogumu re, is ene’gikmu en delogo nonobo a’ge ap mesik ogo re, erlagat o.
9O leimu eba wa’gun pam ap werak nak sel’gwelsogo oruakma re, “Watnonobua ya, erlak a?” opogulat nonso’boru herahwerlil libaga lege ani o.
10Odouk narlogukhwe odouk en pato entasuam odouk orluk hogwi ai ’gela’ge, so’boru nele en nenebetne aganhan a’ge nak welege o.
11O Sion eba hwami wiagapsogo onobogulat, o Yehuda kota-kota eba hwelani ap enemin nogogwi erlak a’ge wiagap onobogulat,
12Is onuelak ’gain ’gain ebano ene’gik herle werak onoboluk e pam urlok tagonobogulat, ap enarlue ebano ap lok a’ge oluk onogorloksogo hau werak onobogulom erlakma en ugonobogulat,
13neneiyagai logomalik souwe a’ge en gandum agape’gen wogwi a’ge woluk lagalat ye, malik logomalik e ’gelak a’ge woluk lagaimu, e’gin en sebelak enebasulat,
14ap enarlue a’ge o kota ebela ’goduk ’gwi lagaimu odoktu agai erlakma en welat, malik souwe a’ge en gitar iak ogu erlakma en welat, togwi ai o.
15Nenede aganhansogo welege a’ge ano erlagat agalat, nonogola nenagai en weni si wonogulat amitmit sup ogu lege a’ge ebano erlagat agalat, ebalema re, nge tu a’ge nak taknenebasulat,
16’gare-’gare nena’gul pam ’buktak welaga a’ge ebano ’goroksogo ’belabil lasulat, tegei o. Nis wiak nak tugu lege ano pamat tagnenebasumu re, nonu’gwarek nenebe nenede o!
17-18Dom Sion ai, di iak yu iak erlak a’ge, o wogogwi agalat, orlomene nak eba welago yo. Nenede obotut modogat taknenebasulat, nenil hik taknenebasulat, tago yo.
19Hat naik ’Gain o. Hat ’Gain Honuk logo a’ge welat, wene le’gelogo modok-modok mo’gulnentasulemen o. Hat wene le’gelogo mo’gulentasulomma eba erlak ago erlak oruakhwe nak aphwami dagetil laga lema o.
20Hat no pagerat heperlagapsogo nenebasulat, no pagerat o page enat uknenebasulat, tigen no?
21-22’Gain Honuk logo a’ge Nenaik o. Hat en nis modok-modok uknenebasulat, hat holot het hwerli po erlakma en nenebam pasulat nak welat, tu opo mia a’ge erlak holuk, pobuk togolik woknonoboluk hat welegenma nonobou werinogoluk woknenebiselat, o naduk welege ’gela’ge taknenebasulat, taga lomup o.
Currently Selected:
Ratapan 5: Wul
Highlight
Copy
Compare
Share
Want to have your highlights saved across all your devices? Sign up or sign in
