Ratapan 3
3
E’gin pe’gin tagenebasu holuk enede ago werak onobo wene
1At Allah olot het en aphwami ’go’bu warenebiso ano pam watnebisokhwe obotut hegi ano re, an at o.
2An o dakharak a’ge pam louwagoluk, woknoboluk lo erlak, o hiktakma louwagoluk uknebasulat,
3Demat! Hwedik hwadik hubet en ’bekhit huba’go nebe edeap nobo erlakma en, watnebiso nak welat, taga laga o.
4Nebe weiyapsogo nebasulat, nagap ’bugap nebasulat, nuak porlologo nebasulat, tegei o.
5O sebelo’guogoluk ap wale’gik pogwi ai ’gela’ge at en e’gin-pe’gin nebam pasulat, nede oboturap nebasulat,
6Is ap pageat waregesarik o hiktakma welagai ai ’gela’ge, at en, nede hik ’bintak pasulat, tegei o.
7An libagoma no oluk, leget wokho ’gela’ge nebasulat, hweiye libagoma no oluk, ’besieme’gen herle modok e’gin a’ge pam hettak nebasulat,
8niak loksogoat, “Letniemin o,” oluk mo’guloso a’ge re, an se’ban oso a’ge ano at esa’go holu erlakma en ukpasulat,
9helep pakleget ’gagalak a’ge pam ne’gebela latil lasulat, tegeimu re ebela ’gwe ai lo mia aga o.
10-11 Beruang orlomusogo welat, singa hisakho welat, asogo togulomtik is no a’ge wago holuk yaum sarluktak poluk, lisogo woluk e’gelama ’gwilotluk lebil lebalsogo poluk ’bogologwi ai ’gela’ge, an nebe asogoat taknebasulat,
12At esegen e’gale peselak poluk, ogodok ’besingsogo an nebe nebam pou wagalat, tegei o.
13Dok e’gen geralogo e’gikmu woluk noso a’ge ano pam nede’burl lang-langsogo nebesi o.
14An na’gul a’ge ’berlegat en eidarak nobogulat, o hubet en ’bekhit huba’go hwerli weni pam mi-miarak nobo a’ge e ’gerlem worogulat, togwi o.
15E, e’gen erle a’ge nogumsogo nouwagoluk wokneselat, wam omotukhwe ’gela’ge, a’bosu esik wiak a’ge nouwagoluk wokneselat, tegei o.
16Helep e’gen nouwagoluk woknesi ano pam niak moluk-melaksogo nebasulat, ’gwiangma ulage pam ’boutak nebasulat tegeimu re,
17Nede sebelak welegi a’ge ano erlak agalat, nede aganhan welegi a’ge ano neperlak agalat, tegistik oruakhwe.
18An en eselat e, “Nebe,” ’gain otluk oruakhwe, erliknobogulat nonuk ogu legesa a’ge ano erlak agalat, ’gain Onuk Logo a’ge en taknobo a’ge paget nede eberak welegi a’ge ano erlak agalat, tegei o, oluk egi.
19An nonouk tagalat, dahan-yahan, neselat, erle a’ge nasulat, wam omotukhwe ’gela’ge esik a’ge nasulat, taga legi a’ge ano nede eberagat welegi o.
20Ebano a’ge ebetlau wagoam e, nogola ’gwe heselluk ’gwi lasu a’geat de,
21An en wene togolik ik a’ge yu, e’bet haik holuk, an togolik nanni taknobouwa o.
22Nenaik ’gain Onuk Logo a’ge en edeapnenebiselat, taknenebasu ano re, erlak om erlakma en taknenebil lo a’ge nak tiselat, Ede hwedik modok taknenebasu ano pam wusogo nonobo erlakma en uknenebasulat, tago aiat o.
23Nenebe ede en taknenebasu ano re, hubet dakha eselat tago ano pam omu modok ’get a’ge nak taknenebasulat, Ede hwedik en edeapnenebiso ai, modok lok logo a’ge at taknenebasulat, tago yo.
24An nede en epasulat, “At ’gain Onuk Logo a’ge Allah ai re an nemining a’ge atma re At en taknobo a’ge ano togolik nanniap nobouwa o,” oluk, eselegi o.
Israel a’ge en enede hwedik wolom wene
25Is aphwami en at ’gain Onuk Logo a’ge Allah ede hwedik a’ge welat, enede en at motluk lagalat, togwi holuk, At en obabenebiso welago yo.
26“At ’gain Onuk Logo a’ge Allah enat letnontouwak o,” oluk, enede yamuksogo hweriogo welat, at yetharok welagai ano re, op modogat o.
27E e’gin a’ge sapi odogun pam pogwi ai ’gela’ge, ap mesik souwe owan a’ge welat, e’gin a’ge woluk lasulom ai op at o.
28Ap ano a’ge, e’gin ebam ago holuk, “At ’gain Onuk Logo a’ge Allah enat nebam pesi o,” oluk, disogo yusogo u erlakma en iak erlak omuat mosogo welemak o.
29Asogo oruakma, Allah en lethouwak oluk, ede sebelak poluk ul e’gerlakma en orogole petne ul egilogo welemak o.
30Ap mesik en ap ai werigoluk tago holuk e, woruagoluk ogopla’gen wogeselat, onuk wiagapsogo pogwi holuk, “Nonuk wiagat emak o,” oluk, mo eselat, tuak o.
31Nenaik ’gain Onuk Logo a’ge Allah en nis modok-modok uknenebasu erlagat o.
32-33At Allah nenebe ede en ede hwedik taknenebasu ano erlak ago erlakma en otok modok hwedigat welagoma re, ede hwedik taknenebasulat, nis aphwami en dogo a’ge ebano e’ginap nenebasulat, nis nenede hwenik emagoluk taknenebasulat, tago erlak o. A’geat de, nenede hwenik emagoluk taknenebasu lomtik en, pobuk nin edeapnenebasu at o.
34Is o ’gwiangma herle werak welagai a’ge ebano aphwami onoyuk en al ’besilogo enebi lagalat,
35At Logo modok welago a’ge ano il pam obap onobo a’ge oruakhweat de, muat tagonobogulat,
36onuak lolonobogulat, onowene opsogo ’balu a’ge oruakhweat de, wiak-wiak ’balogulat togwi ano, Nenaik Allah re, il yerentasu erlak epegep? Erlak o! ’Berlegat pobi tiso nak o.
37Nenaik Allah en e, his en tu a’ge wene le’gelogo mo’gulnentelep erlak en e, ap Sa en disogo emak o, osoam Nenaluk elep epegep?
38At modok logo welago a’ge en osoam, wiak a’ge emin, op a’ge emin, nenebam ago ano erlak no?
39Nis aphwami a’geatma re, wiak togwi ano pam e’gin nenebam ago holuk e, no oluk e en, “Yu taknenebasu logwe,” oluk, u epegep? Erlak at o!
40Nis til lagai a’ge ebano pobirak pogulat, nenebabut ’balogulat, takpoluk en pobuk togolik at ’gain Onuk Logo a’ge Allah motluk lagalat, togu lomup o.
41At Allah ’bogorl pam oruakma nene’gik lagabak pogulat, nenede ebam he’berik pogulat, takpoluk at mo’gulogulat,
42“Nis en wiak togulat, tu a’ge mo’gulnentasu a’ge ano nenebit en ukpogulat, tigema re, Hat ogo re, nonowiak erlagapsogo po erlakma enat welegen o.
43Sum lok ebak a’ge ’bukhorlogwi ai ’gela’ge holot het hebe hebam hwedik welat, muknonoboluk neselat, nenebe hedeap nonobo erlakma enat watnenebil lasulat, tigen ani o.
44Hat hebe o hena ogola e’girlogo pagathwerlegenma re, nis se’ban ogwi a’ge ano hat welegenma eba lasu erlak o.
45Di aphwami yu aphwami ene’gerlakma enemdesing ’gela’ge yu, Nene mel-mel o, oluk, ogu lemagoluktak nenebegen o.
46Nenemin il ’belak a’ge en enemdema yagat nonobuak oluk enemde lasogo welat,
47Nenede erlagap nonobogulat, gume e’gerlema nonobou wogoluk taknonobogulat, nenebe erlagap nonobogulat, wiagap nonobogulat togwi ai o,” oluk, ogu lomok o.
48An na’gul onuk a’ge erlagapsogo onobogumu re, an nge ik eraluk hwedik libago ai ’gela’ge nge tago modok welegi o.
49-50Nil a’bosu erlak ago erlak, loruk hopmu nge do’gok eselat ’belabu ago modok oruakma en, ’gain Onuk Logo a’ge at Allah ’bogorl pam en ’gwelakniau wagalat, pobirak nebasulat, tago holuk nak e, an nge nil a’bosu ’garok ua o.
51Nowi kota ogulani hwelani, tagenebesi a’ge oruak holuk e, nede obotut modok taknebasulat, tago yo.
52Tue motluk ono’gwi ai ’gela’ge is edip erlak a’ge pagerat de, enebirapnobogwi a’ge ebano en an muknoboluk no’gulat,
53An waremagoluk ’gwiang ele delakma hwik nia’bogulat, helep pam watnobogulat, tigisa o.
54Asogo togukhwe, ik na’gul hwerli ligagoam, “An arat sebel nobua hegi,” oluk, nede epegi o.
55Asogo epasulat, Hat naik ’gain Honuk Logo a’ge Allah o, an ’gwiang ele delak a’ge ’gela’ge hede pam modok welat, honuk ’balogo mo’gulheselat,
56“Letniemin o, oluk, niak loksogo mo’gulheselegi a’ge yu, hesa’go lerak poluk wolom mia o,” oluk, mo’gulheselat, tagoam an en ’gonu mo’gulhegis a’ge ano hesa’go hweliselat,
57Niak mo’gulhoso a’ge hesa’go hwelak poluk neragam ’gwelakniau wegentik, “Hogorlok hagun o,” oluk, mo’gulneselat, tigen ani o.
58Naik o. An nowene modok hwelak nebasulat, nelaluk welemagoluk nagap delogo nebasulat, tigen ani o.
59Naik ’gain Onuk Logo a’ge Allah o. An wiagapnobogwi a’ge ebano arat hil entigenma re, neli wokho nebemin o.
60Is enebit modok nopogwi a’ge ’berlegat hil yerentasulat, An wiagap nobouwogoluk enede mesigarap poluk eberogwi a’ge ebano arat pobirak enebasulat, tigen o.
61-62Hat naik ’gain Honuk Logo a’ge Allah o. Is an nemin hwerlirak a’ge en an mi-miarak nobogwi a’ge ebano hesa’go hweliselat, enede mesigarap poluk, eniak ngorluk pam an taknobo a’ge o huberen ’bekhit huba’go lai lasukhwe, ’gagalogo pogwi a’ge ebano halugat agalat, tigen ani o.
63Is hweriogo welat, edik welat, weni an mi-miarak nobo a’ge edip lebogwi yu hil yerentemin o.
64Hat naik ’gain Honuk Logo a’ge Allah o. Is ene’gik tigisa a’ge mukho o’go hegit-hegit tagenebasulat,
65enede erigap poluk, hweim enebasulat tin o.
66Hat naik ’gain Honuk Logo a’ge Allah o, Holot het en mugonoboluk magonoboluk, neselat, o ’bogorl edipmu yema en enebe erlagapsogo enebemin o.
Currently Selected:
Ratapan 3: Wul
Highlight
Copy
Compare
Share
Want to have your highlights saved across all your devices? Sign up or sign in
