Yosua 6
6
O kota Yerikho leget pakleget moluksogo ’gwi legesa wene
1O kota Yerikho leget pakleget wogo a’ge ’goduk emde ’belak o’gwe aphwami Israel a’ge ’gu mia emagoluk ’gagalak modok welat, ’goduk modok di-dopnosogo larogu legesa. Asogo togulat e, aphwami logon o kota ai en libom-’guom ogulom modok mia o, oluk wene ’baligisa. 2Asogo tugukhwe, at Nenaik ’gain Onuk Logo a’ge en Yosua disogo mo’gulesi,
“Yogodak an en aphwami o kota Yerikho a’ge ’berlegat emin, onowi werik ai emin, onue ’gain emin, at osi segen eiye tentara enanni a’bik a’ge ’berlegat emin, hat he’gik pam pegi o. 3A’ge re, hat hebe emin, hosi enanni a’bik a’ge tentara emin, ererak poluk polik a’ge hene’gik 6 hari ebe lo’bok o eba hene’gik mesik pam waling hogu lomup ani o. 4Waling hogulat, is ap an eiye a’ge enebe sabiren en enebe lo’bok ene’bi’gong iak lok a’ge horloluk e, naduk lagaiam peti an en wene wusogo wokhenebegis o, oluk hele’gik a’ge ano ene’berlik e, woluk laga lemak o. Ye, agauwa sabirenam lagalomtik en, mesik sabit a’ge pam, is ap an eiye a’ge ene’bi’gong iak inghogwiam e, hat hebe emin, hosi enanni a’ge tentara emin, enemin e, o kota ai he’gik sabirenam wali’gip o. 5Asogo togulat pobuk e, is ap an eiye a’ge ai en, ene’bi’gong iak ’bal ho erlakma en hwedik ogwi modok welemak o. ’Bi’gong iak asogo hwedik ogwi modok oruakhwe iak henesa’go hologuptik e, is ap enanni a’ge tentara ebano ’berlegat eniak amitmit orlolu iak ’gela’ge ’baguak o. Asogo osoam e, o leget pakleget wogo a’ge ano ’berlegat abusak moluk-melak ua ani o. Asogo agoam e, his ’berlegat honolukhwe hegit o kota ai ’gwi lu o,” oluk mo’gulesi. 6Asogo mo’gulesimu, at Yosua Nun omlogo en e, ap Allah eiye a’ge worlentesimu wegesema re, disogo mo’gulentesi,
“His en peti Allah en wene wusogo woknenebegei, oluk hele’gik a’ge ano woluk lagaihwe, ap his a’ge logon henebe sabiren hene’bi’gong iak lok a’ge ano horloluk e, naduk ebela lu o,” oluk mo’gulentesi. 7Asogo mo’gulentesirik e, osi enanni a’bik a’ge tentara ebano a’gul ’gela’ge hwalogo, o kota Yerikho yeling-walingsogo lagalat, ap enanni a’ge tentara esan mesik wa’gun segen woluk naduk ebela lagaiam e, peti Allah en wene wusogo woknenebegei, oluk hele’gik a’ge ano ene’berlik woluk louwagoluk mo’gulentesi.
8-9At Yosua en,
Asogo tip, oluk mo’gulentesi a’ge hegitsogoat, is ap enanni a’bik a’ge tentara esan mesik wa’gun segen woluk ebela naduk legesema, ene’berlik is ap Allah eiye a’ge ene’bi’gong iak ing hil legesema, is ene’berlik peti Allah en wene wusogo woknenebegei, oluk hele’gik a’ge ano woluk legesema, is ene’berlik ebe pobuk ap enanni a’bik a’ge tentara ono’borlma lo a’ge legesa. Asogo lagalat e, ene’bi’gong iak il modok legesa. 10Asogo louwogoluk togumu, at Yosua en e, is ap enanni a’ge tentara ebano ’berlegat disogo mo’gulentesi,
“Heniak amitmit sup ogulat, heniak wei logon ogulat, ogup modok erlak o. We, an en,
Heniak amitmit tit, oso holuk nen, sup ip o,” oluk asogo mo’gulentesirik legesa. 11Asogo mo’gulentesirik, is ap enanni a’bik a’ge tentara ebano emin en peti Allah en wene wusogo woknenebegei o, oluk hele’gik a’ge ano woluk o kota ai ene’gik mesigenam waling hegesarik togolik o sum owi werikmu nogou wegesa.
12-13Asogo nogogisarik, loruk o’gwe at Yosua huberat siaksogo elaluk agarik e, is ap Allah eiye a’ge emin, ap heberlak tentara emin, tono ’gela’ge a’gul lisogo o kota waling hegesa ’gela’geat waling hegesa. Asogo waling hogulat, is ap enebabut heberlak tentara a’ge esan mesik ebela naduk wegesema re, ene’berlik is ap Allah eiye a’ge enebe sabiren ’bi’gong iak il-il legesema en, is ene’berlik ap Allah eiye a’ge peti Allah en wene wusogo woknenebegei, oluk hele’gik a’ge ano woluk legesema, ene’berlik ebe pobuk e, ap heberlak tentara esan mesik ene’berlik lo a’ge pobuk legesa. Asogo lagalat e, ’bi’gong iak il-il modok legesa. 14O kota ai naduk mesik waling hegesarik en, pobuk hubet o’gwe ene’gik mesigenam waling holuk togolik o sum owi werikmu ebano wegesa. Agauwa hebarligenam ebe lo’bok, ene’gik mesik asogo nak waling hegesa.
15Ene’gik hebarligenam asogo waling holuk wagalat togu legesarik nogo oluk e, agauwa mesik sabit a’ge pam e, huberat siaksogo o mo yegelogo orlu agokhwe, enebe naduk lo a’ge a’gul ’gela’ge lisogo naduk waling hogu legesa ’gela’geat a’ge re, ai erlige nak e, agauwa sabiren kota Yerikho waling hegesa. 16Ene’gik hebarligenam walinghegesarik, pobuk mesik sabit a’ge pam walinghouwogoluk, is ap Allah eiye a’ge en ene’bi’gong iak lok a’ge asogo inghogwiam e, at Yosua en e, ap tentara a’ge ebano ’berlegat eniak amitmit sup uagoluk mo’gulentasulat e, disogo mo’gulentesi,
“Nenaik ’gain Onuk Logo a’ge en o kota yu nis nene’gik pam arat pesi o. 17Holuk e, o kota Yerikho ’berlegat wiagap pogulat enebe emin, di a’ge yu a’ge emin ’berlegat e, Allah ebaget po ’gela’ge modogat erlagap pomup o. Asogo a’geat de, hwe Rahab danian nil noso a’ge ano na’ge, at en ap nis en enilen wouwagoluk peragonobou wege a’ge hisogo enebesi ano en e, at ebe emin, ia aik emin, orokhwi arilak emin, enemin na’ge, enelaluk ugonobomup o. 18Asogo ’berlegat erlagap onobogulat e, di a’ge yu a’ge hogul wege a’ge mesik modok wagup no yo. A’ge re, his logon en wegep holuk, o’go lagaksogo re, Allah en nis aphwami Israel a’ge en nonowi sum owi werikmu yema heman nonobouwarik, o orogole wiagap pouwa no yo. 19Holuk e, o modok erlagap pasulat, we, di a’ge yu a’ge perak a’ge emin, emas a’ge emin, tembaga a’ge emin, ’besie a’ge emin, ’berlegat ai nak e, Nenaik ’gain Onuk Logo a’ge paget poluk e, di a’ge yu a’ge at en a’ge welagoma ebano po yo,” oluk mo’gulentesi.
20 #
Ibr. 11:30
Asogo mo’gulentesimu, o ai erlige arat wale’gogulat tegisarik agauwa mesik ologun pam wale’gogulat is ap Allah eiye a’ge en ene’bi’gong iak inghegesa. Asogo iak inghogwiam e, ap Israel a’ge ’bi’gong iak enesa’go hweligisarik e, eniak amitmit loksogo sup ogwiam e, o kota Yerikho leget pakleget wogo a’ge modok moluk-melaksogo ’bullegei. Asogo ’bullisoam e, ap tentara Israel a’ge ’berlegat onolukhwe lo’bok ’bekhit o kota ano arat sebeli ’gwigisa. 21Asogo sebelogulat, aphwami enebe ’berlegat, ap enebe souwe a’ge emin, enarlue a’ge emin, ap emin, hwami emin, o kota eba welegesa a’ge enebe ’garok pam modogat warenebigisa. Asogo waronobogulat, wam sapi emin, domba emin, keledai emin, ’berlek werigisaat.
22Asogo waronobogulat e, at Yosua ap enebe ’biren naduk enil ’gogolil legesa a’ge ano disogo mo’gulentesi,
“His e, hwe danian denago a’ge ano owi pam ’gwi lagalat e, ebe emin, aphwami ue ari at en a’ge ’berlegat emin, enemin, his en wene weragenebegep a’ge hegitsogoat wogonoboluk liplau manup o,” oluk mo’gulentesi. 23Asogo mo’gulentesimu, is ap enebe ’biren ebano ’gwi legesarik e, at hwe Rahab ebe emin, ia aik emin, orokhwi arilak emin, at ue ari emin, eneragam a’ge emin, enemin ’berlegat wogonoboluk liplau wegesarik, aphwami Israel a’ge o sum owi a’ge werigisema eba horoksogo enebe waronobu erlakma en opma eba degelogo enebegesa. 24Asogo tigisema re, pobuk is ap tentara Israel a’ge en o kota eba emin, di a’ge yu a’ge ogola welaga a’ge emin, ’berlegat perlengsogo odouk narligisa. Asogo odouk nasulat, di a’ge yu a’ge emas a’ge emin, perak a’ge emin, tembaga a’ge emin, ’besie a’ge emin, e narlu erlakma en ukpegesarik, woluk wegesarik e, di a’ge yu a’ge Nenaik ’gain Onuk Logo a’ge welagoma ebano pou wegesa.
25 #
Ibr. 11:31
Asogo warenebigisa a’geat de, hwe Rahab danian nil nese laga a’ge ano ebe emin, aphwami ue ari at en a’ge ’berlegat emin, enemin na’ge, at Yosua en ap enebe ’biren yo’go onoboluk, enil ’gogoluagoluk o Yerikho peragenebesi a’ge hisogo enebesi ai en e, enelaluk ugenebegesa o. (Asogo ugenebegesema, hwerli yogodak en aphwami hwe Rahab en dogo’gwe a’ge nis aphwami Israel oruakma eba welagai o.) 26#1Raj. 16:34Asogo tigisa ai erlige, at Yosua en wene disogo egei,
“Sa en o kota Yerikho ya togolik ebalema werigoluk walhouwa holuk e, Nenaik ’gain Onuk Logo a’ge en heman ebam pouwa o. Holuk e,
Sa en o ’bobuk ’belabua holuk e,
omlogo naduk a’ge ’belakpouwa ani o.
Ye, sa en leget pakleget emde ’belakma,
’goduk ai togolik ebalema hele’gua holuk e,
omlogo labo a’ge ’belakpouwa ani o,”
oluk wene mo’gulentesi.
27At Yosua Nenaik ’gain Onuk Logo a’ge en tenharok modok oruakma re, obok obat o eba da ya ’berlegat lasu laga ai o.
Currently Selected:
Yosua 6: Wul
Highlight
Share
Copy
Want to have your highlights saved across all your devices? Sign up or sign in
