Yosua 5
5
Enagap ene’gerlimu a’ge ’balogulat seni serigisa wene
1Asogo agama, aphwami en e,
“At ’gain Onuk Logo a’ge en eiyagai Israel a’ge ik ’balogo liplaumagoluk, ik Yordan dengsogo ukpesimu, liplau wegesa o,” oluk ogwiam ap ’gaindek aphwami Amori a’ge onuelak ’gain-’gain o ik onuk laut ’Burl ye’gelakma eragam welagai a’ge ’berlek emin, enesa’go hweligisarik e, aphwami Israel a’ge enalik en onogorlok agarik e, onuak erlik ’bo pegesa.
O Gilgal welat enagap ene’gerlimu a’ge ’balenebigisa wene
2Ai erlige re, at Nenaik ’gain Onuk Logo a’ge en Yosua disogo mo’gulesi,
“Ap Israel a’ge enagap ene’gerlimu a’ge ’balonobuogoluk ’bisok helep a’ge hele’gip o,” oluk mo’gulesi. 3Asogo mo’gulesimu, at Yosua en Nenaik ’gain Onuk Logo a’ge en mo’gulesi ’gela’geat, ’bisok helep a’ge heli’gogo ap Israel a’ge enagap ene’gerlimu a’ge ’balenebegeitik e, o eba onuk,
“Dom enagap ene’gerlimu a’ge ’balenebigisema, o,” oluk tualigisa. 4-6#Bil. 14:28-35Aphwami Israel a’ge o Mesir en liplau wagalat, ap segen wo a’ge ’gela’ge lail lagai a’ge ebano ’berlegat e, Allah wene enesa’go hologwi erlak en at Allah en eselat, An en ’gwiang agamu a’bosu emin, ’gin a’bosu emin, ik eraluk ’gela’ge horluk-horluk ligotluk, enagap ene’gerlimu a’ge ’belak welat en liplau wegesa. Asogo a’geat de, is o leimu aphwami erlakma eba agaikhenma en agaikhenma wagalat 40 tahun welat, eneiyagai dagenebigisa a’ge ap mesigat nak ogo enagap ene’gerlimu a’ge ’balenebigisa erlak. Ye, is ap tentara ’goluk weim obu hegitmu o Mesir en liplau wegesa a’ge, Nenaik ’gain Onuk Logo a’ge iak hologo tu erlagat ai en e, enebe waretil waga legesarik 40 tahun arat agama enebe arat ’berlek perlengsogo waregesa ai o. At Nenaik ’gain Onuk Logo a’ge en ho’buk disogo ’balegei hegitsogo re,
O ’gwiang moli op di a’ge yu a’ge a’bikmu eba re, hisat wokhentaik o, oluk his hene’balak wene werak enebegimu eba his henil hagup modok erlak o, oluk ho’buk ’balogo mo’gulentesi hegitsogoat enebe waregesa ai o. 7Is eneiyagai ap pobuk dagetil wegesa a’ge ’berlegat enagap ene’gerlimu a’ge asogo ’balonobu erlak ai en e, is pobuk dagegesa a’ge ai, at Yosua en enagap ene’gerlimu a’ge ’balenebegei ai o.
8Asogo arat ’balenebegeimu, enebe ebela lobom erlakma en o sum owi werikmu eba welegesarik en, yebil arat aga’but agama en ebela libegesa. 9Eria hegit, Nenaik ’gain Onuk Logo a’ge en Yosua wene mesik disogo mo’gulesi,
“His aphwami o Mesir a’ge en eneragam a’ge ’gela’ge tenhentarok oruakma, we, hene’gerli aga legep a’ge ano yogodak arat erlagap pegi o,” oluk, mo’gulesi ai en, o eba onuk Gilgal tualigisema hwerli yogodak ogo ogwi modogat oruak o.
10 #
Kel. 12:1-13
O Gilgal ’gwiang do’go lioktakma o Yerikho horoksogo eba is aphwami Israel a’ge o sum owi werik poluk, we, lodu paget welat dugwi ai pam tanggal 14 hopmu’gwe Allah en delnenebegei o, oluk ai paget eming ontoluk laga a’ge pa’get seni Paskah sakho ne’gesa. 11Seni onuk eming nontoluk laga oluk seni sakho ne'gesa. Sakho ne’gesarik loruk o’gwe re, aphwami Israel a’ge en di a’ge yu a’ge o Kanaan yogo a’ge e’gen, oduk eneperlak a’ge, gandum e’gen odouk e’gen pam worogo a’ge emin, so’boru roti peruagoluk e’gen ’belebak erlak a’ge worogo a’ge emin, o Kanaan yogo a’ge nadugat ne’gesa. 12#Kel. 16:35Ai erlige re, so’boru manna ’bogorl pam en ’bu aga laga a’ge ano logon ’buom modok erlakma re, aphwami Israel a’ge so’boru manna a’ge hwerli ai hwerli en no erlakma en mo egesarik, di a’ge yu a’ge o Kanaan en owi yogo a’ge nak ne’gesa ai o.
Ap segen eiye a’ge mesik Yosua e’birek la’boligisa wene
13Agauwa mesik erlige at Yosua o Yerikho horoksogo eba welat, ap mesik ’garok lisogo woluk ebe ’ga en ’gela’geat orogolema edik oruakma il hesi. Asogo il hesirik, eragam horoksogo lagarik e, disogo mo’gulesi,
“Hat e, hebe nis oruak o’gwe a’ge a? At e, selei a’ge a,” oluk hin wokhesimu, at en e,
14“An his oruak o’gwe a’ge ogo erlagat, ye, heneselei a’ge ogo erlagat o. An e, we, Nenaik ’gain Onuk Logo a’ge osi heberlak a’ge tentara onue at wegi o,” oluk mo’gulesi.
Asogo mo’gulesimu, esa’go hwelegeirik e, perleneat odogorlu pam hurotluk erliktegeirik, disogo mo’gulesi,
“An nebe re, nue hat heragam a’ge o. Holuk e, an en hat hebaget ’gesogo tik o,” oluk mo’gulesi.
15Asogo mo’gulesimu, Nenaik ’gain Onuk Logo a’ge osi heberlak a’ge tentara onue ano en e,
“’Gwiang hat hebe edik welegenma eria re, Allah u’gwarek o’gwiang ai en e, hat hoyuk sum ’buktak a’ge ai no’gorlogo pemen o,” oluk mo’gulesimu, Yosua oyuk sum ’buktak a’ge ano no’gorlogo pesi.
Currently Selected:
Yosua 5: Wul
Highlight
Share
Copy
Want to have your highlights saved across all your devices? Sign up or sign in
