Yosua 7
7
Ap Akhan wiak tegei wene
1Yosua en aphwami Israel a’ge. Mo’gulentasulat e,
“Aphwami Yerikho a’ge ena’ge eba re, at Allah ebaget a’ge poligatma re, wo mia o,” oluk mo’gulentasukhweat de, ap mesik a’gul onuk Yehuda a’ge onuk Zerah. Zerah omlogo Zabdi. Zabdi omlogo Karmi. Karmi omlogo Akhan ano en di a’ge yu a’ge pema wesimu. At Nenaik ’gain Onuk Logo a’ge olot het agalat, Israel-a’ge enebam pesi.
2Olot het enebam oruakhwe, at Yosua en at osi mo’gulentasulat, o Yerikho yema en o Betel o mo orlu ago hegit-akhit o Ai o Bet-Awen horoksogo eba henil en wogenebil lit o, oluk perak enebasuam, o eba enilen wogenebil legesa.
3Arat enilen wogo onoboluk, togolik wegesarik, Yosua mo’gulogulat, “Ap Ai a’ge ai, enebe we ’biren ’gela’ge nak entigema re, is aphwami a’bik eba re, ebela al miasogo loma re, is loksogo ya oruakhwe, nenebe we, 2.000 de a, 3.000 a, nonomu nak aphwami Ai a’ge warenebi louwagoluk, perak nenebemin o.” 4Oluk, mo’gulentegisema, aphwami we 3.000 nak o ai o wisogo lebik onobul a’ge, oluk lagaimu, is aphwami o Ai a’ge ebano onowi edipmu en is ap Israel a’ge ebano enebam libegesarik mugonoboluk wagalat, 5lagak-pagaksogo wat enebil til-til helep o woruagoluk damologu legesa hwerli ebano onobou wagalat, dom abel-abel ebano ene enebe 36 at waronobou wegesa. Wat onobou wagaiam e, is aphwami Israel a’ge ebano eneme’gen orlou eselat, onuak erlak agalat, enede erlak aga.
6Asogo warenebil wagai en, at Yosua emin, is aphwami, Israel a’ge onuelak emin, ebano en onosum derlep-derlapsogo pogulat, ul hi ha’bok ena’gul pam pogulat, togu legesarik at Allah e peti hele’gik a’ge ano eragam ma onorogole sagain ’bou etil legesarik oruakhwe, o arat hup aga. 7O hup agama, at Yosua en Nenaik ’gain Onuk Logo a’ge mo’guleselat, hat nenaik hotok modok welegen a’ge naik Allah o. Aphwami Amori a’ge en nis aphwami Israel a’ge yu, nenebe erlagap nonobo a’ge paget wogentagun en, woknonoboluk ik Yordan yu akhit wagokhwe, nis eba wolom a’ge wene daksogo hwalige puktik, no paget en o ik yu akhit liplau wege logwe. 8Neneselei a’ge en nis aphwami Israel a’ge mabenap nonobogwiam hweiye ’bogolik wegerikmu re, hat naik Allah o. An no’gosogo ik o? 9Wene yu, is aphwami Kanaan a’ge emin, is aphwami o yema welagai a’ge emin, en hol houwarik, nis hup owi erlagap nonobogwiam, o yema en nononuk erlagapsogo pogwi holuk, sa en hat honuk logo pasu lemano? Erlagatma re, ’gesogo togun o, naik,” oluk, mo’gulesi.
10Mo’gulesimu, at Allah en Yosua mo’gulesi, “No paget hat horogole sakhun ’boutak welegen? In emin o. 11Aphwami Israel a’ge ai, an nemin wene modok daksogo ’balogo poluk, togu lemagoluk, mo’gulentegis a’ge ano opsogo holu erlakma en sagalogo ukpoluk, wiak tegisa o. No’borl pam ligagalat, an en a’geat hisarigisarik, is ena’ge-a’ge e’gerlakma hisogo pagathorloluk, oruak ai o.
12Hisogo poluk oruak a’ge ai pam henebe modok erlagap henebegisema honorogole erlagat welegepma re, ap heneselei a’ge en wathenebil wagai holuk, pangtu erlakma en hweiye hono’borl dagonu hisak lail-lagai hentegis tikmu re, an nage erlagapsogo po a’ge oruakhwe, ap hisogo pesirik oruak a’ge ai, erlagapsogo onobo erlakma en oruak holuk, an his henemin weleik erlak ani o.
13-15Asogoatma re, is aphwami Israel a’ge ai, an nage mesik hisogo poluk oruak a’ge ano owan hwikho erlak oruakhwe, is eneselei a’ge en Israel a’ge warenebil wagaihwe, pang tuarik welema erlagatma re, loruk hopmu is ena’gul onuk lo’bok enebe dogo ’gwe a’ge lo’bok hundomok-han domok enede horo tik en e, an Allah nilem odoktu agai modok welemak o. Odoktu agai holuk, an en, ap a’gul onuk wigalak ai a’ge en hisaregei o, oso holuk onowi yawi lo’bok en an neragam wagai holuk, an en, ap onowi Yawi ai a’ge en tegei o, oso holuk, onowi yawi mesigat ai a’ge ’berlegat odoktu agai holuk, an en, ap ai a’ge enat hisaregei o, oso holuk en nak e, ap ai, an nemin enat wene modok daksogo hwalogo mo’gulentegis a’ge ano, sagalogo ukpasulat, is aphwami Israel ononuk wiagapsogo pegimu re, an na’ge hisogo poluk oruak a’ge ano emin, at ebe emin, at en a’ge emin, ue ari ’berlegat e narlik onobo a’ge an Israel a’ge enaik Allah an nomuat egirikmu re, tono en tisokhwe niouwak oluk is aphwami Israel enebam an mu ago erlak a’ge nebaget pulogo pagathorloluk welemagoluk, inoroguntik mo’gulentai lak o,”
16Mo’gulesimu, at Yosua ano hubet siaksogo inagarik, Israel a’ge wemagoluk, mo’gulentesimu wagaiam, ena’gul onuk lo’bok hundomok enede horotil laga-laga is ena’gul onuk Yehuda a’geat enebam aga. 17Enebam agama re, is ena’gul onuk Yehuda a’ge me’gerik hundomok enede horo tagalat, ap Zerah eiyagai weiyelak a’geat enebam aga. Enebam agoam e, is en dogoma a’ge enebe lo’bok enede horo tagalat til-til, ap Zabdi eiyagai weiyelak a’geat enebam aga. 18Enebam lai lasuam e, ap Zabdi eiyagai enebe hundomok enede horo tagalat til-til, ap a’gul onuk Yehuda a’ge Zerah eba Zabdi omlogo Akhan anoat ebam aga.
19Ebam agama re, at Yosua en at Akhan ano mo’guleselat, “Hat tigen a’ge ano hisogo poluk wolom ai mia o. At e, At Israel a’ge enaik Allah il pam ebe hogorloksogo welat hat tigen a’ge ano ’baksogo mo’gulnemin o, Nomlogo.”
20Oluk mo’gulesimu, at Akhan en Yosua mo’guleselat, “Demat o, naik. An ano at Israel a’ge enaik Allah ano wiagap pegirikmu re, opsogoat mo’gulheik o. 21Hogul ’gogulat sum yat modok op a’ge o Babel a’ge paget egeik a’ge ebe op a’ge mesik emin, uang perak e’gin walhogwi a’ge pam walsogo ’biren a’ge ene mesik me’gerik-emin, emas e’gin mesik ’burl pam waltak a’ge. Emin, an en nil hegirik, nagai en wegirik, nosum owi onuk kemah werikmu ano ’gwiang palholuk uang perak ano abel pema poluk, pema o’borl pam pegimu oruak o, naik.”
22Asogo mo’gulesimu, at. Yosua en, ap mesik perakpesimu at ano pungtak toluk Akhan owi sum owi kemah ano legesarik, uang perak ano abel pema-pema poluk sum di a’ge yu a’ge ebano o’borl pam pesirik oruakma hwiarigisa. 23Hwiogo poluk legesarik, o kemah owi en di a’ge yu a’ge ebano ’berlegat woluk ap Yosua emin, aphwami Israel a’bik ebano emin, eneragam pou wegesarik, At Allah il pam ’berlegat ’bulogo selakma pegesa. 24’Bullak pegesema, at Yosua aphwami Israel a’ge enemin en ap Zerah eba Akhan ano emalik logomalik hwelani emin uam keledai lembu emin, kambing domba emin, uang emas ano emin, uang perak ano emin, sum egeik babel a’ge ano emin, o kemah werik a’ge ano emin, a’ge-a’ge emin, ’berlegat wokho ’bule belabogumu ebano woluk belebak pei legesa. 25Pei legesema, Yosua en Akhan ano mo’guleselat, “Hat en nis modok wiagapsogo ’bule ’belap nenebigoluk tigentikmu re, o yogodagat At Nenaik ’gain Onuk Logo a’ge en hat wiagap hebik oluk tago yo,” oluk, is Israel a’ge ’berlek en ap Akhan emin, at eiyagai emin, helep pam wusogo onoboluk, enebe werak emin, ena’ge-a’ge emin, ’berlegat odouk narlik-poluk. 26Helep uak wusogo o’borl pam pogwiam, at Allah olot het odouk ’gela’ge lobuk ese laga a’ge ano, sebelil laga. Agauwa ai pam en o la’boma ano onuk ’bule ’belebak pogumuat o, oluk egesema re, o yogodak ogo ogwi modogat oruak o.
Currently Selected:
Yosua 7: Wul
Highlight
Share
Copy
Want to have your highlights saved across all your devices? Sign up or sign in
