Yosua 4
4
Enede eberak welemagoluk helep ebe 12 pam uak wusogo pegesa wene
1Is aphwami Israel a’ge ano ’berlegat asogo liplau wegesarik, enebe ’berlegat ik yu akhit lau wegesema, at Nenaik ’gain Onuk Logo a’ge en Yosua disogo mo’gulesi,
2“Ap enebe 12 en ena’gul onuk lo’bok mesik-mesik pulenebip o. 3Asogo pulonoboguntik e, helep ebe 12 at ik Yordan ede ’burl ap an eiye a’ge enebe edik oruakma a’ge wa ’gwi lotluk woluk woroguptik e, o yogodak hup agoam o sum owi a’ge worumu eba pei louwagoluk mo’gulontomup o,” oluk mo’gulesi. 4Asogo mo’gulesimu, at Yosua en, enebe poligenebesirik e, enebe worlentasuam wegesema re, 5disogo mo’gulentesi,
“His ik Yordan e’gen ede ’burl ’gwi laguptik e, peti Nenaik ’gain Onuk Logo a’ge en wene wusogo woknenebegei, oluk hele’gik a’ge ano oruakma olukhwema ’gwi lit o. ’Goluk e, nis aphwami Israel a’ge nena’gul onuk 12 pamat oruak hegitsogoat, henebe lo’bok helep ebe mesik-mesik, la’bulogo 12 pamat woluk manup o. 6Aphwami en mo’gulhonto ’gela’ge, helep ai pam, Nenaik ’gain Onuk Logo a’ge en tegei a’ge ai, his aphwami Israel a’ge henede eberak wolomup o. Pobuk heneiyagai en e,
His en helep ebe yema no’gosogo oluk pegepma oruak, oluk hin wokhontogwi holuk e, 7disogo mo’gulontogu lomup o, erlak o,
O pageat nis peti Allah en wene wusogo woknenebegei, oluk hele’gik a’ge ano woluk liplau wagaimu, ik Yordan lasogo deng egeimu, woluk liplau wege a’ge o, oluk mo’gulontogu lomup o. Wene ai, is aphwami en henede eberak pogulom ’gela’ge, helep ai en,
Allah en disogo tegei, oluk his aphwami Israel a’ge henede eberak pasu lema o,” oluk mo’gulentesi.
8Asogo mo’gulentesimu, is ap enebe 12 ebano en at Yosua en mo’gulentesi ’gela’geat tigisa. At Nenaik ’gain Onuk Logo a’ge en,
“Disogo tip o,” oluk Yosua mo’gulesi ’gela’geat, aphwami Israel a’ge ena’gul onuk 12 oruak a’ge hegitsogoat, helep ebe 12 enat ik Yordan ede ’burl ebano en wegesarik e, aphwami Israel a’ge en o sum owi worumu ebano pou wegesa. 9Ik Yordan ik ede ’burl eba ogo re, at Yosua en helep ebe 12 at, ap Allah eiye a’ge peti Allah en wene wusogo woknenebegei, oluk hele’gik a’ge ano woluk edik welegesema eba at uak wusogo pesi. (Helep uak wusogo pesi a’ge ai hwerli yogodak ya ogo oruagat o.) 10Is ap Allah eiye a’ge ano ik ede ’burl edik modogat oruakhwe, is aphwami Israel a’ge en Nenaik ’gain Onuk Logo a’ge en,
“Disogo tip o,” oluk Yosua mo’gulesimu mo’gulentesi a’ge arat tigisema en, liplau wegesa. Asogo tigisa ai, at Musa en,
“Disogo tip o,” oluk Yosua mo’gulesi ’gela’geat tigisa. Asogo togulat, aphwami Israel a’ge perleneat ik Yordan ’balogo liplau wegesa o. 11Enebe ’berlegat ik esa’go yu akhit liplau wegesema en, ap Allah eiye a’ge ebano, peti Allah en wene wusogo woknenebegei oluk hele’gik a’ge ano woluk is pobugap onoboluk naduk wegesa. 12At Musa en e,
“Disogo tip,” oluk mo’gulentesi a’ge hegitsogoat, is tentara aphwami Israel a’ge enebaget weim obu a’ge ena’gul onuk Ruben a’ge emin, Gad a’ge emin, Manasye a’ge logon emin, is aphwami Israel a’ge pema pobugap onoboluk naduk ik ’balogo liplau wegesa. 13Ap modok onua’gun enesegen wik-wok weim obu a’ge enebe ’berlegat e, 40.000 pam liplau wegesa. At Nenaik ’gain Onuk Logo a’ge ilemat ik ’balogo liplau wegesarik, o Yerikho hegit do’goma eba poluk egesa.
14Asogo liplau wegesa ai erlige, at Nenaik ’gain Onuk Logo a’ge en di a’ge yu a’ge tagalat, is aphwami Israel a’ge en Yosua ap ’gain oluk eniak sakhosogo mo’gulogu lemagoluk tagenebesi. Asogo tagenebesimu, is en naduk Musa eniak sakhosogo mo’gulogu legesa ’gela’geat pobuk, at Yosua ebe elaluk oruakhwe ogo eniak sakhosogoat mo’gulogu legesa.
15-16At Nenaik ’gain Onuk Logo a’ge en asogo tagenebesirik, pobuk at Yosua en ap Allah eiye a’ge en peti at en wene wusogo woknenebegei, oluk hele’gik a’ge ano woluk ik Yordan olomu welegesa a’ge ebano liplaumagoluk mo’gulontuagoluk mo’gulesi. 17Asogo mo’gulesimu, at Yosua en e, wene mo’gulesi hegitsogoat mo’gulentesi. 18Asogo mo’gulentesimu, is ap Allah eiye a’ge ebano enebe ik esa’goma liplau wegesa ’gal e, ik ano husogo wagarik e, ik ogum naduk welaga ’gela’geat ’betesogo ukpesi.
19Asogo ukpesimu, is aphwami Israel a’ge ik yu akhit liplau wegesa ai, dugwi is en naduk-naduk ene’gik wenarogu legesa a’ge ano pam tanggal 10 pam liplau wegesa. Asogo liplau wegesarik, o sum owi a’ge o onuk Gilgal o Yerikho abel mo orlu ago hegit eba werigisa. 20Werigisema o eba at Yosua en helep ik Yordan olomu a’ge ebe 12 pam wegesa a’ge ebano o helep uak ’gela’ge wusogo lagabak pesi. 21Asogo wusogo pesirik, aphwami Israel a’ge disogo mo’gulentesi,
“Pobuk his heneiyagai en e,
Helep yema ebe ’gesogo a’ge paget oluk pegepma oruak, oluk hin wokhontogwi holuk e, 22his en e,
O pageat nis aphwami Israel a’ge ik Yordan yu deng egeimu ik alo’gwe liplau wagalat werige a’ge o. 23-24Aphwami ’gwiangma yema welagai a’ge ’berlek en e,
Aphwami Israel a’ge enaik ’gain Onuk Logo a’ge ai anni modok a’bik o, oluk enaluk agalat, ye, his en Nenaik ’gain Onuk Logo a’ge Allah hau worogulat erliktogwi modok welat, togu lorogup ani oluk, Nenaik ’gain Onuk Logo a’ge en ik Laut Merah ye’gelak a’ge dengtak pesimu liplau wege ai ’gela’ge, ik Yordan dengtak pesimu nenebe ’berlegat liplau wagalat helep yema woluk ik esa’go akhit arat liplau wege a’ge o, oluk mo’gulontogu lomup o,” oluk mo’gulentesi.
Currently Selected:
Yosua 4: Wul
Highlight
Share
Copy
Want to have your highlights saved across all your devices? Sign up or sign in
