Yosua 3
3
Aphwami Israel a’ge ik Yordan me’girik poluk, ’balogo liplau wegesa wene
1Asogo mo’gulegisema, o tono ’gela’ge re, at Yosua ebe emin, is aphwami Israel a’ge ’berlegat enemin, huberat sialogo enelaluk egesarik e, o Sitim o sum owi a’ge werigisema ebano ukpoluk ik Yordan olomu wegesa. Wegesarik, ik ’balogo liplau wom a’ge owan lau wom erlak welat, yetharok o sum owi a’ge ebano werigisa. 2Asogo werigisarik, agauwa henagan welegesarik en, is aphwami Israel a’ge onuelak enebe o lo’bok ’berlegat ene’bek ’gwelagentil legesa. 3Lagalat, aphwami Israel a’ge ’berlegat wene disogo mo’gulentigisa,
“Ap Allah eiye a’ge en peti Nenaik ’gain Onuk Logo a’ge en wene wusogo woknenebegei oluk hele’gik a’ge ano woluk lagaimu, henil entaguptik holuk e, his ogo re, o sum owi a’ge werikmu yema ukpoluk peti aiat woluk lagaimu ene’berlik lu o. 4Asogo a’geat de, henebe peti ai pam horoksogo ’gela’ge re, lagup no yo. We, e’berlik ’gek-’gek 1 kilometer ’gela’ge lu o. Asogo lagup holuk, his ebela lagup ai heneperlak a’geat de,
Ebela ’gwe ai hegirat lul hegi, oluk henaluk ema ani o,” oluk mo’gulentesi.
5Asogo mo’gulentegisema, at Yosua en e, aphwami Israel a’ge disogo mo’gulentesi,
“Hubet Nenaik ’gain Onuk Logo a’ge en his pobi togup en elalin a’ge logon his hene’gerlakma en tua ai en e, henebe Allah paget opsogoat degelogo poluk wolomup o,” oluk mo’gulentesi. 6Asogo mo’gulentesirik, is ap Allah eiye a’ge en peti ano woluk e, aphwami Israel a’ge enebe pema lok akhit pobugap onoboluk naduk louwagoluk mo’gulentesimu, is en at Yosua en mo’gulentesi ’gela’geat tigisa.
7Asogo tigisema, at Nenaik ’gain Onuk Logo a’ge en Yosua disogo mo’gulesi,
“An en o yogodak ya hwerli en hebe ’gainat takhebaik o. Asogo takhebasuam e, is aphwami Israel a’ge ’berlegat en e, hat hau wusogo erlikhobogulat, an en at Musa tenak modok welegi ’gela’ge, hat tenhiarok modok weleik a’ge ai, pobirak hobouwa o. 8A’ge re, hat en ap an eiye a’ge en, peti an en wene wusogo wokhenebegis o, oluk hele’gik a’ge ai woluk, ik ai olomu arat ’bali louwa ’gal e, ik olomu ’bekhit ’gwi louwarik e, ik esa’goma edik welemak oluk mo’gulontomup o,” oluk mo’gulesi.
9Asogo mo’gulesimu re, at Yosua en aphwami Israel a’ge worlentesimu wegesa. Asogo wegesema re, disogo mo’gulentesi,
“Nenaik ’gain Onuk Logo a’ge en mo’gulhentesi a’ge yu henesa’go opsogo hwelit o. 10-11Nenaik ’gain Onuk Logo a’ge ’bogorl ’gwiang eiye a’ge ano en epeti wene wusogo woknenebegei, oluk hele’gik a’ge ano, his pobugap honoboluk naduk ik Yordan ’balogo woluk libagaimu re, Allah elaluk a’ge ano his hene’gerlakma welat, his arat lagupmu re, aphwami ena’gul onuk Kanaan a’ge emin, Het a’ge emin, Hewi a’ge emin, Feris a’ge emin, Girgasi a’ge emin, Amori a’ge emin, Yebus a’ge emin, mukho lebigonobua hegi, oluk pobi togup en mesik mo’gulhentaik o. 12Holuk e, yogodak his en ap enebe 12 en aphwami Israel a’ge ena’gul onuk lo’bok ap enebe mesik-mesik wenakho onobomup o. 13Pobuk is ap Allah eiye a’ge en peti Nenaik ’gain Onuk Logo a’ge en wene wusogo woknenebegei, oluk hele’gik a’ge ano woluk ik Yordan onoyuk en sebelhogwiam e, ik ano legeik ’belak me’git agalat e, deng ua ani o. Asogo deng otluk e, ik mesikmu ye’gelemarik welema ani o,” oluk mo’gulentesi.
14-15O eria hegit e, di agan e’gen, yu agan e’gen ’balugumu eria pam, ik Yordan ebe modok a’bik waga yo. Asogo a’geat de, aphwami Israel a’ge ik Yordan ’balogo liplau mogoluk e, o sum owi a’ge werigisema eba en ukpoluk wegesarik, ap Allah eiye a’ge en peti Allah en wene wusogo woknenebegei o, oluk hele’gik a’ge ano naduk woluk wegesa. Asogo wagalat, ik Yordan onoyuk en sebel hogukhwe 16-17erianoat, ik waga laga a’ge ano lasogo ye’gelegei. Asogo lasogo ye’geliselat e, ik ano elaruk hegit walegat o onuk Adam, o kota Sartan hwerli eragam eba ye’geli laga. Asogo lerak welat ye’gelegeimu, ik o’but laut ye’gelak modok welagoma ’biso a’ge deng egeimu, aphwami Israel a’ge ik dengtak o’gwe o kota Yerikho hegit liplau wegesa. Is asogo liplau mogoluk e, is ap Allah eiye a’ge peti Allah en wene wusogo woknenebegei, oluk hele’gik a’ge ano woluk ik e’gen ede ’burl edik modok oruakhwe re, is aphwami Israel a’ge enebe ’berlegat ik ’balogo liplau wegesa.
Currently Selected:
Yosua 3: Wul
Highlight
Share
Copy
Want to have your highlights saved across all your devices? Sign up or sign in
