Yosua 14
14
Ik Yordan yu akhit o’gwe ono’gwiang ’balogo so’but entegisa wene
1-2 #
Bil. 26:52-56; 34:13 At Allah en wene le’gelogo Musa mo’gulesi a’ge ano hegitsogo, ena’gul onuk 9 emin, a’gul onuk mesik pema me’gerik emin, ono’gwiang logon eiyetak pagathorloluk welemagoluk, ap Allah eiye a’ge Eleazar emin, ap Nun omlogo Yosua emin, is ap ena’gul onuk lo’bok onuelak ebano emin, en, ’gwiang ta naduk hwerlasumu-hul? oluk, helep e’gen pei lo wom walholuk, o Kanaan ik Yordan yu akhit aphwami Israel ’berlegat eiye ’gela’geat welemagoluk ono’gwiang so’burentegisa ano re, yuat o.
3 #
Bil. 32:33; 34:14,15; Ula. 3:12-17 Is ena’gul onuk ’biren emin, a’gul onuk mesik pema me’gerik emin, eriano re, eiye omtik wolom a’ge Musa en o mo liplau wago akhit o’gwe ik Yordan etle akhit arat so’but entegisa a’geat de, ap Lewi en a’ge nak e, eiye omtik wolom a’ge ono’gwiang eiye welemagoluk, ’balogo wogonto erlak. 4Is ap Lewi a’ge ono’gwiang ’balogo wogonto-erlak a’geat de, we enebe wolom a’ge paget nak o kota-kota emin, onuam sapi domba wolomma ono’gwiang emin, ai paget nak e, wogentigisa o. Ye, ap Yusuf ematek a’ge re, a’gul onuk mesik Efraim agalat, a’gul onuk mesik Manasye ye agalat, tegisa. 5Is aphwami Israel a’ge en ono’gwiang hwerlegesa ano re, at Allah en wene le’gelogo Musa mo’gulesi a’ge ano hegitsogoat hwerlegesa.
Ap Kaleb en o Hebron hwerlesi wene
6 #
Bil. 14:30
Agauwa ai erlige at Yosua ano o Gilgal oruakma, a’gul onuk Yehuda a’ge e’bek wegesarik, ap Kenas a’ge Yefune omlogo Kaleb en at Yosua mo’guleselat, “O Kades-Barnea welat, an emin, hat emin, nemin tu a’ge at Allah en at eragam a’ge Musa mo’gulesi ano hat halugat ani o. 7#Bil. 13:1-30An dagotluk oruakhwe tahun 39 takpoluk, mesik tisokhwe, at nenaik Allah eragam a’ge Musa o Kades-Barnea eba en an o yema nil ’gogolil wemagoluk, peraknobou wagama wegirik, noyuk pam loluk, o yema nil hegi a’ge wene ano niak esei erlak, dem a’ge nagat mo’gulentail legi o. 8Is nari nemin wege a’ge ebano, legesarik, aphwami enede erlak emagoluk, tagenebegesa a’geat de, an nak e, at naik Allah en telip epasu a’ge nak modok opsogo nak nebe nede pam enat daksogoat motluk legi ani o. 9#Bil. 14:24Asogoatma re, agauwa ai erlige at Musa en wene ologun daksogo ho’buk ’balogo mo’gulneselat, at naik Allah ede epasu a’ge ai re, hat modok opsogo hebe hede pam enat daksogoat motluk legenma re, ’gwiang hat hoyuk pil legen o’gwe ai re, hat emin, heiyagai emin, honowirak ’gela’ge modok-modok hono’gwiang eiyetak pagathorloluk wolorogup ani o, oluk, mo’gulnesi ani o.
10Asogoatma re, at Allah en Musa wene ano mo’gulesimu, oruakhwe, aphwami Israel a’ge o lei o’gwe no’gu legesarik yema ’bele lau wegesa hwerli re, tahun 45 arat agama re, at Allah en wene hwalogo pesi a’ge ano hegitsogo an eiye taknebasukhwe tahun 45 arat aga o. Asogoatma re, an dak egi hwerli en yogodak tahun 85 arat agama welegi ai o. 11Asogo a’geat de, agauwa yogodak ya pam nanni erlak om erlak oruakhwe o page Musa en peraknobou waga eriano pam nanni welaga eriano ’gela’geat weim welegimu re til lebeik, en enanni elit oruak o. 12Nanni elit oruakma re, agauwa ai erlige at Allah en, dom pam eba wokheik o, oluk, modok daksogo mo’gulneigen a’ge ano arat woknemin, o. Woknosoam o agauwa ai erlige aphwami Enak a’ge welagai o’gwe, onowi kota-kota modok lok pakleget wokho welagai ogwi, oluk, ogwi ano hat ogo hesa’go hweligen tigat oruakhweat de, at Allah en letniasukhwe, at egei a’ge ano hegitsogo aphwami ai, sebelogo enebaik o,” oluk, mo’gulesi.
13Asogo egeimu, Yosua en ap Yefune omlogo Kaleb ano, o Hebron eba owirak ’gela’ge eiye takpoluk welemagoluk, wogesirik ede aganhan ebam pesi. 14Ye, at Kenas a’ge Yefune omlogo Kaleb ano at Israel a’ge enaik Allah ede eberiso a’ge nak modok opsogoat ebe ede daksogo motluk lasu laga ano pam o’gwiang o Hebron owirak ’gela’ge tak pagathorloluk welemagoluk, wogesimu, o ano yogodak ogo e’balak dogoma a’ge oruagat o. 15O Hebron ano re, aphwami Enak a’ge ene’gerlakma ap mesik onuk oruak a’ge hegirat-onuk Arba welagama re, o Hebron naduk onuk Kiryat-Arba at ogu legesa. Ye, ’gwiang ebano, is Israel modogat hwerlegesarik, oruakhwe, o ebano weim la’guk u erlakma en o’borlogouk erlagat op ha’buksogo welaga.
Currently Selected:
Yosua 14: Wul
Highlight
Share
Copy
Want to have your highlights saved across all your devices? Sign up or sign in
