Yosua 13
13
Di owi yu owi sebelu erlak wene
1Asogo toluk, ap Yosua ano di tahun yu tahun takpoluk, arat sebal agama, at Allah en at mo’guleselat, “Hat arat sebalat egentikmu re, ’gwiang his wolomma modok a’bik sebelogupmu eba sebelak erlak owan oruak o.
2His wolomma ’gwiang sebelak erlak owan oruak egi ai ebe yuat, Is aphwami Filistin a’ge emin, aphwami Gesur a’ge emin, ono’gwiang a’bik 3o Mesir o mo wago hegit yema akhit ik Sikhor hwerli en ’bekhit ’gwiang Ekron o o’borl abel akhit o’gwe hwerli is Kanaan a’ge welagaimu o Filistin ap ’gain-’gain Gaza emin, Asdod emin, Askelon emin, Gat emin, Ekron emin, wene le’gelogo mo’gulontogumuatma re, ebano emin, o abel akhit aphwami Awi a’ge ono’gwiang emin, 4Is aphwami Kanaan a’ge ono’gwiangma aphwami Sidon a’ge o Meara oruakma eba en ’bekhit, aphwami Amori a’ge ono’gwiang o Afek hwerli emin, 5Aphwami o Gebal a’ge ono’gwiang ebano emin, o Libanon a’bigat o mo orlu ago hegit akhit dom Hermon edipmu o Baal-Gad en ’bekhit, o Hamat ebela lagai hwerli ebano emin, ’berlegat mukho lebik onobo erlakma en oruak o. 6#Bil. 33:54Ye, aphwami a’bik dom petne o Libanon en ’bekhit, Misrefot-Maim aphwami Sidon a’ge ’berlek welagai a’ge ebano nak e, an naduk otluk sebelak enebaikmu re, ono’gwiang ai, is aphwami Israel a’ge eiyesogo so’buronto yo oluk, an en wene le’gelogo mo’gulhentegis a’ge hegitsogoat 7is ap ena’gul onuk 9 ai emin, ye, a’gul onuk, Manasye a’ge ado me’gerik ebano emin, enemining a’ge ’gela’ge eiyesogoat ’gwiang sobut entagun ani o,” oluk mo’gulentesi.
Ik Yordan etle akhit ono’gwiang balentesi wene
8 #
Bil. 32:33; Ula. 3:12 At nenaik ’gain Onuk Logo eragam a’ge Musa en ik Yordan etle akhit o mo liplau wago akhit o’gwe ono’gwiang ’balogo wogonto ono ’gwiang’balonto a’ge hwalogo pesi a’ge hegitsogo hegirat a’gul onuk Manasye a’ge ado me’gerik ebano emin, is Ruben a’ge emin, Gad a’ge emin, eiye enemining a’ge ’gela’geat ’gwiang wogentesimu hwerlegesa
9Is ono’gwiang hwerlegesa hwerli re, ik Arnon lasu ho’gorlak o’borl o dogo o Aroer hop-hop ho’gorlak o’borl pam ’burl o kota werik ano pam en ’bekhit o Medeba horok duk mesik pam en ’bekhit o dogo Dibon en ’bekhit 10is Amori a’ge onue ’gain Sihon eragam poluk oruakhwe o Hesybon pam at owi kota-kota ’berlegat hwerli en ’bekhit, is aphwami Amon a’ge ono’gwiang hwerli aiat o, 11is ono’gwiang wogentesi ai, o Gilead emin, is aphwami o Gesur welagaimu a’ge emin, is aphwami Maakha welagaimu emin, dom Hermon edip ’berlegat emin, ’gwiang Basan hwerli o Salkha emin, wogentesi. 12O Basan wogentesi ai, is Basan a’ge onue ’gain welat o Asytarot a’ge emin, o Edrei a’ge emin, wene le’gelogo mo’gulentasu laga a’ge ap onuk Og aiat o. At Musa en is Refaim a’ge sebelak onoboluk, ’berlegat mukho lip enebil lasulat, ologun pam ap Refaim a’ge ’gain Og anoat mukho lebikpesimu, at eragam poluk oruakhwe o Basan eba ’berlegat emin wogentesi. 13A’geat de, is Israel a’ge en is aphwami Gesur a’ge emin, is Maakha a’ge emin, mukho lebik onobo erlakma re, is ai, Israel a’ge emin, o yogodak ogo oruagat o.
14 #
Ula. 18:1
Ye, a’gul onuk Lewi a’ge ai at Israel a’ge enaik Allah en wene hwalogo mo’gulentesi a’ge ano hegitsogo, is horlo a’ge eiye om ’gela’ge re, Allah paget wusogo e narlogwi a’ge eiye wolomatma re, ono’gwiang wogonto erlagat o.
Ena’gul onuk Ruben a’ge ’gwiang ’balogo wogentegisa wene
15A’gul onuk Ruben a’ge dogoma a’ge hunsogo Musa en ’balogo wogentesi ano re, yuat. 16Is ono’gwiang ano hwerli re, ik Arnon ho’gorlak o’gwe lasu a’ge ai o’borl pam o dogo o Aroer horok lai-loluk ho’gorlak ano o’borl iak pam ’burl o kota oruak a’ge ano pam en lagarik, o Medeba horoksogo dom pam en o dogo hwerli mesik wogentesi 17ono’gwiang ’balogo wogentesi ano re, o Hesybon emin, o dogo hulat la’buk takpesimu kota Dibon emin, kota Bamot-Baal emin, kota Bet-Baal-Meon, emin 18emin, kota Yahas emin, Kedemot emin, kota Mefaat emin, 19kota Kiryataim emin, Sibma emin, o dogo hebat la’buktak a’ge dom o’borl pam kota Zeret-Hasahar emin, 20dom Pisga esa’goma kota Bet-Peor emin, kota Bet-Yesimot emin, ebano ogo wogentasulat, 21Is Ruben a’ge ono’gwiang pema wogentesi ano re, lo’boksogo o dogo erang pesimu ebano kota-kota ’berlegat emin, ap ’gain Sihon eragam poluk welagama ’berlegat emin, wogentasulat tegei. Is Amori a’ge onue ’gain o Hesybon welat, wene hwalogo mo’gulosokhwe at Musa en is Midian a’ge onuelak ’gain-’gain o eba welat, ap Sihon emin otluk, weim obogu legesa a’ge ap Ewi emin, Rekem emin, Zur emin, Hur emin, Reba emin, wusogo onoboluk, ap ’gain enemin a’ge emin, weregisa ano re, ap Sihon aiat o. 22Ye, ap hin wok a’ge Beor omlogo Bileam ano ogo, is Israel a’ge en wusogo pegesa. 23Is Ruben a’ge ono’gwiang ’balogo wogentesi o mo obuk ilasu hegit akhit hwerli ano re, ik Yordan aiat. Is Ruben pam en weiyelak dogoma a’ge nak hundomok eiye om ’gela’ge ono’gwiang kota-kota eba emin, kota-kota ai, o seli wei-o’gwe-lok o’gwe a’ge emin, ’balogo wogentesi aiat o.
A’gul onuk ’gat a’ge ono’gwiang ’balogo wogentesi wene
24A’gul onuk Gad a’ge en dogo ’gwe a’ge nak enebe lo’bok hunsogo Musa en ono’gwiang ’balogo so’but entesi ano re, yuat o. 25Is ono’gwiang ’balogo so’burentesi ai re, o Yaezer a’ge emin, Gilead di kota yu kota a’ge emin, is Amon a’ge ono’gwiang ado hwerli o Raba horok kota Aroer a’ge emin, wogentesi. 26Ono’gwiang wogentesi hwerli re, o Hesybon horoksogo en ’bekhit o Ramat-Mizpa en, o Betonim hwerli en, o Mahanaim pam ene ’bekhit o Debir eba hwerli pegesema welaga. 27Ye, o dogo eba kota Bet-Haram emin, o kota Bet-Nimra emin, o kota Sukot emin o kota Zafon emin, ye, ik Yordan som toluk ’bekhit erabu ik Galilea yegelak hwerli en o mo orlu ago akhit o’gwe etle akhit is aphwami Hesybon a’ge onue ’gain Sihon eragam poluk welat ado owan wogonto erlak a’ge ebano emin wogentesi. 28Is Gad pam en weiyelak dogoma a’ge enebe lo’bok eiye om ’gela’ge ono’gwiang ’belak a’ge pam o kota-kota eba emin, o kota-kota eba pobuk togolik ono’borl o’gwe o seli wei a’ge emin, ’balogo wogentesi re aiat o.
A’gul onuk Manasye a’ge ado me’gerik ono’gwiang ’balogo so’burentesi wene
29A’gul onuk Manasye a’ge ado me’gerik at Manasye pam en weiyelak o’gwe en dogo o’gwe a’ge lo’bok eiye om ’gela’ge ono’gwiang ’balogo wogentesi ano re, yuat o.
30Is ono’gwiang hwerli ano re, o Mahanaim horoksogo en ’bekhit, o Basan ’berlegat emin, is aphwami Basan a’ge onue ’gain Og eragam poluk welagoma eba ’berlegat o Basan eba seli wei-o’gwe lok o’gwe 60 o Yair eba welagai a’ge emin, 31O Gilead pema emin, ye, o Basan welat, wene le’gelogo mo’gulentasu laga a’ge ap ’gain Og owi kota Asytarot emin, owi kota Edrei emin, ’berlegat wogentesi. Manasye omlogo Makhir pam en weiyelak eiyagai logon dogo enebe lo’bok so’burentesi ano aiat.
32At Musa ano o Yerikho akhit en o mo liplau wago akhit o’gwe ik Yordan etle akhit o Moab dogoma welat eiye om ’gela’ge ono’gwiang ’balogo so’burentesi ano re, aiat o. 33#Bil. 18:20; Ula. 18:2Asogo a’geat de, a’gul onuk Lewi a’ge nak e, at Musa en mo’gulentesi a’ge ano hegitsogo eiye om ’gela’ge ono’gwiang ai re, at Israel a’ge enaik Allah eiyeat wolomma re, eiye om ’gela’ge ’gwiang mesik ’balogo wogonto erlagat o.
Currently Selected:
Yosua 13: Wul
Highlight
Share
Copy
Want to have your highlights saved across all your devices? Sign up or sign in
