Yosua 10
10
Aphwami Israel a’ge en aphwami Amori a’ge eneragam a’ge ’gela’ge enebegesa wene
1Aphwami en e,
“Ap Yosua en e, aphwami o kota Yerikho a’ge emin onue ’gain ononuk logo a’ge emin, modok wollo’gen dagalogo warenebegeirik, a kota Yerikho sebelegei ai ’gela’ge, aphwami o kota Ai a’ge emin onue ’gain onuk logo a’ge emin, modok wollo’gen dagalogo warenebegeirik a kota sebelegei at o,” oluk egesema, aphwami Yerusalem a’ge onue ’gain onuk logo a’ge onuk Adoni-Zedek ai esa’go hwelegei. Ye, mesik e, aphwami en e, “Aphwami o kota Gibeon a’ge en e, aphwami Israel a’ge mo’gulontogulat,
Nis his henemin op welat, hene’gerlakma yogunat wolomul o, oluk arat wene werak pegesema, oluk egesema at esa’go hwelegei.”
2Asogo hwelegeirik, o kota onuk Ai weiyat a’geat de, o kota Gibeon nak e, modok logat e. Ye, o kota da ya logon onuelak ’gaindek ononuk logo a’ge oruakma welagai ’gela’ge. Ye, ap tentara Gibeon a’ge onogorlok modok erlak welat, weim enebam harowiak ai en e, at ap ’gain Adoni-Zedek ebe emin, aphwami Yerusalem welagai a’ge emin e, onogorlok modok egesa. 3Asogo onogorlok aga ai en e, at ’gain onuk logo a’ge Adoni-Zedek en op logon yo’go enebesirik, ap ’gaindek ononuk logo a’g, mesik onuk e, Hoham o kota Hebron a’ge, ye, mesik onuk e, Piream o Yarmut a’ge, ye, mesik onuk e, Yafia o kota Lakhis a’ge, ye, mesik onuk e, Debir o kota Eglon a’ge, ene’bek perakpasulat e, disogo mo’gulentai lu o, oluk egei, 4“Aphwami Gibeon a’ge en e, Nis his henemin op wolomok, oluk Yosua emin, aphwami Israel a’ge emin, enemin wene ’baligisa ai en e, an nemin en waronobul en e, manup o, egei, oluk mo’gulontomup o,” oluk egei. 5Asogo mo’gulentesimu, legesarik, mo’gulentigisema re, is ap ’gain ena’gul ononuk a’ge ena’gul Amori a’ge, mesik e, ’gain onuk logo o kota Yerusalem a’ge, mesik e, o kota Hebron a’ge, mesik e, o kota Yarmut a’ge, mesik e, o kota Lakhis a’ge, mesik e, o kota Eglon a’ge, enemin la’bulogo egesarik e, onosi tentara a’ge ’berlek en aphwami o Gibeon a’ge o lasogo waronobuogoluk wegesa.
6Asogo wegesema, aphwami Gibeon a’ge en at Yosua o Gilgal o sum owi werik oruakma ebano mo’gulesi louwagoluk wene wusogo peragenebegesema legesarik e, disogo mo’guligisa,
“Nue, nis nenematek nak ’goboksogo uknenebagun no yo. Is ap ’gaindek ena’gul onuk Amori a’ge dom petne a’ge onuelak onuk logo a’ge ’berlegat onosi tentara a’ge enemin la’bul egesarik en, nis watnonobuogoluk wegesarik oruak ai en e, perleneat delnonobu manup o,” oluk mo’gulesi legesa. 7Asogo mo’gulesi legesema, at Yosua ebe emin, osi heberlak a’ge tentara a’ge ’berlegat emin, weim enebam harowiak a’ge esan pulhogu legesa a’ge emin, eneminat weim obuogoluk o Gilgal en wegesa. 8Womogoluk togumu, at Nenaik ’gain Onuk Logo a’ge en Yosua disogo mo’gulesi,
“Hat hanni erinogoluk, an arat epegi ai en e, hogorlok hagun o. Holuk e, is a’ge logon mesigat a’ge en ogo pangtua modok erlak o,” oluk mo’gulesi. 9Asogo mo’gulesimu, at Yosua emin, osi heberlak a’ge tentara esan logolak emin, o hup lok a’ge ono’borlogouk-ono’borlogouk nak o Gilgal en o Gibeon wegesa. Wegesarik, aphwami Amori a’ge wongat oruakma enebam libegesa. 10Asogo libagaimu re, Nenaik ’gain Onuk Logo a’ge en aphwami Amori a’ge enebabut modok dong-pong tagenebesimu re, enil tentara Israel a’ge yerentigisa ’gal e, enede ’balegesa. Asogo agama, is Israel a’ge en aphwami enebe modok a’bik o Gibeon en warenebigisa. Asogo warenebigisarik, pema enelaluk a’ge mugonoboluk o dom petne en Bet-Horon ’belakma eba ’belabenebegesarik, hwerli o walegat o Azeka emin, Makeda emin, ik o’but hegit eba ’belebak enebegesa. 11Asogo mugontogwiam, aphwami Amori a’ge weim hweiye hisagomogoluk dom pam en edipmu ’bogukhwe, Nenaik ’gain Onuk Logo a’ge en moru hagarle’gen ’bogorl pam en modok loksogo ’belakpou wagama, warenebil-enebil hwerli o Azeka hwerli eba enebil laga. Enebe aphwami Israel a’ge enebe en warenebigisa re, weiyat ’gela’ge a’geat de, moru hagarle’gen en warenebegei nak e, modok a’bigat warenebegei o.
12At Nenaik ’gain Onuk Logo a’ge en, aphwami Israel a’ge enanni emagoluk enanniap enebesimu, aphwami Amori a’ge warenebigisa ai erlige, at Yosua en Nenaik ’gain Onuk Logo a’ge mo’gulesirik, is aphwami Israel a’ge enilem disogo egei,
“Hat mo yu. Hebe aphwami Gibeon a’ge,
ena’gul hegit mo ip o.
Ye, hat dugwi re,
o Ayalon do’go yema en lagun no yo,”
oluk egei. 13#2Sam. 1:18Asogo egeimu, at mo lo erlak mo eselat, dugwi lo erlakma en welat, tegeirik en, aphwami Israel a’ge en eneselei a’ge mabenap onoboluk arat warenebigisema en laga. Wene asogo aga a’ge ai tuesi’ga onuk Yasar ai pam pelal wokho pegesa. O ai erlige re, o mo ’bogorl ede ’burl mo egeitik aregenat welagarik en obuk egei. 14At Nenaik ’gain Onuk Logo a’ge en aphwami onogola enagai a’ge eniak hologo re, ebe aphwami Israel oruak o’gwe agarik, weim obogumu, o, agauwa mesik erlige asogo tegei ai ’gela’ge re, o page re, asogo tu erlak, ye, pobuk asogo mesik ema erlak a’geat de, ai erlige aga aiat o.
15Weim asogo arat oboluk at Yosua emin, osi tentara a’ge emin, togolik o sum owi werikmu o Gilgal legesa.
Yosua osi enemin en ap ’gain a’ge nak enebe 5 warenebigisa wene
16Wagaihwe, ap ’gain enebe 5 eriano, hweiye owik onuk Makeda ebanoat hisaklai legesa. 17Hisaklai legesa a’ge ano is aphwami en, “Ap ’gain 5 eriano owik onuk Makeda hisogo oruakhwe entige o,” oluk Yosua mo’gulogwiam e, 18At Yosua en eselat, “Helep lok a’ge wokho owik ai emde lerak poluk, liplau wagaimu no oluk, his logon ’gwelagentarok oruakhwe, 19his logon nak e, heneselei a’ge yu, at henaik Allah en pageat hene’gik pam pesimu re, is onowi kota-kota ’gwi lagaimu no oluk, set hwal horlo erlakma enat ene’berlik-ene’barlik modok mugonoboluk warenebil lit o. 20Asogo mo’gulentesirik, at Yosua emin, is aphwami Israel a’ge ebano emin, ene ap mesik nak ogo mesik ukpo erlak, is ’berlegat ena’guluak modok erlagapsogoat warenebegisa a’geat de, is logon mesik-mesik o kota lo’gwe leget pakleget werik a’ge ogola ’gwil legesa a’ge ebano nage ugonoboluk, 21Is Yosua osi ebano ’berlegat enebe op degelak o Makeda onowi sum owi werikmu ano odipmu ebano Yosua oruakma, e’bek wagaiam, ap mesik en, asogo de tu a’ge tigep o,” oluk mo’gulonto erlakma en onogorlogap poluk, mo egesarik welegesa.
22Asogo toluk, at Yosua en eselat, “Owik ’goduk lerak a’ge ai, horik paguptik e, ap ’gain a’ge enebe 5 eria wogonoboluk an ne’bek onobou manis o.” 23Mo’gulentasuam, ap ’gain ebano mesik Yerusalem a’ge, mesik Hebron a’ge, mesik Yarmut a’ge, mesik Lakhis a’ge, mesik Eglon a’ge, enebe 5 eriano re, aiat owik ogola en wogonoboluk wegesarik, 24at Yosua eragam pou wagaiam, at Yosua en ap Israel a’ge ’berlegat odoktumagoluk, mo’gulentesimu odoktu egesarik oruakhwe, ap segen eiye a’ge onuelak Yosua emin weim obogu legesa a’ge ebano mo’gulentasulat, “Horoksogo ya woroguptik, ap ’gain-’gain yu, ono’gorlop uak pam honoyuk en sebelogu lemis o.” Mo’gulentesimu, wegesarik, onoyuk en ono’gorlop uak pam sobut onobogukhwe, 25Yosua en at osi ebano mo’gulentasulat, “Honogorlok hogulat henede duk-duk togup o. Is aphwami henemin weim hwerlirak a’ge ai, at Allah en disogo takpouwama re, henede lebe u erlakma en henede o’borloguk erlagap poluk wolorogup ani o,” oluk mo’gulenteserik, 26ap ’gain-’gain ebano wusogo onoboluk, e. 5 a’ge ebano enebe e ologun pam dongsogo-dongsogo? Onoboluk edik enebegesema oruakhwe, mo arat obuk i laga.
27O mo ano arat obuk egeimu ap werak e pam dongsogo-dongsogo enebegesa a’ge ebano wokho ’belak onobo’bumagoluk, at Yosua en wene tu a’ge mo’gulentasuam ’belak onobo’bu egesarik, owik hisogo welegesema ebano onodogun konnuk-kennaksogo ’belebak enebegesarik helep lok a’ge en ele lerak onoboluk pegesema, o yogodak hwerli ogo oruagat o.
28Agauwa ai erligeat at Yosua en o Makeda sebelhwerla ’gwiselat, ap mesik nak ogo mesik ukpo erlakma en, ’berleksogoat warenebiselat, ye, o Yerikho ap ’gain-’gain tagenebesi ano ’gela’ge, ap Makeda a’ge ’gain ano-ogo asogoat wusogo pasulat, tegei.
Yosua en o kota-kota sebelhwerlesi wene
29Asogo toluk, Yosua ano Israel a’ge ’berlegat enemin o Makeda en o Libna ano legesarik, enemin weim togukhwe, 30at Nenaik ’gain Onuk Logo a’ge en o kota ai emin, ap ’gain a’ge emin, is Israel a’ge ene’gik pam pesimu o libna sebelogulat, ap ’gain o Yerikho a’ge tagenebegesa ano hegitsogoat Yosua osi enemin en ap ’gain o libna a’ge worogulat, onowi kota eba welegesa a’ge mesik ugonobo erlakma en ’berlegat wa’gun pam waronobogulat tegisa.
31Warenebegisarik, at Yosua ano Israel a’ge enemin ’berlegat o Libna en o Lakhis at onowi sum owi werik poluk, enemin, weim obogukhwe, 32At Allah en aphwami Lakhis a’ge ebano, is Israel a’ge ene’gik pam pasuam, enemin weim togukhwe, nogoluk hubet o’gwe onowi pam ’gwegisarik, o Libna tegisa ano ’gela’geat onowi kota ano sebelogulat, enebe ’berlegat wa’gun pam wusogo-wasogo enebegesa. 33Asogo togukhwe, Gezer a’ge onue ’gain Horam en is ap Lakhis a’ge lerentaik oluk, tu aga a’ge, at Yosua osi enemin en ap ’gain ai emin, osi enesegen oruak a’ge emin, mesik ugonobo erlakma en ’berleksogoat wusogo enebegesa.
34Arat waronoboluk, at Yosua aphwami Israel a’ge enemin ’berlegat o Lakhis en o Eglon horok lai legesarik, onowi sum owi werik poluk, enemin, weim obogulat, 35agauwa ai pamat o Eglon sebelegisarik, o Lakhis eba tigisa ano ’gela’geat, aphwami enelaluk welegesa a’ge ebano mesik ugonobo erlakma en ’berlegat wa’gun pam ’berlek wusogo enebegesa.
36Asogo toluk, Yosua aphwami Israel a’ge enemin, ’berlegat o Eglon en o Hebron at legesarik, enemin weim toluk, 37o Hebron sebelogulat, o Eglon tegisa ano ’gela’geat ap ’gain emin, onowi kota welegesa a’ge ebano emin, mesik nak ogo mesik ukpo erlak ’berlegat wa’gun pam odouk e’gerlak nak dabopsogo wokhesi.
38Arat wusogo onoboluk, at Yosua aphwami Israel a’ge enemin, ’berlegat pobuk togolik, aphwami o Debir a’ge enemin weim tagalat, 39Libna emin, o Hebron emin, is ’gaindek emin eneminat tagenebegesa ano ’gela’geat, aphwami o Debir kota welagai a’ge emin, ap ’gaindek emin, o seli wei o’gwe-lok o’gwe horoksogo welagai a’ge emin, mesigat nak ogo mesik ugonobo erlakma en ’berlegat wa’gun pam e’gerlal nak dabopsogo-modogat dopnosogo waronoboluk o Debir sebeligisa.
40At nenaik ’gain Israel a’ge enaik Allah en wene le’gelogo mo’gulesi a’ge ano hegitsogo, at Yosua osi enemin en is aphwami dom edip-edip o’gwe-dom petne welagai a’ge emin, o lei abel petne abel petne welagai a’ge emin, dom hogorlak-hogorlak mo obuk oso hegit o’gwe welagai a’ge emin, duk abel petne abel petne welagai a’ge emin, di owi yu owi aphwami enelaluk welagai a’ge ’berlegat onuelak ’gaindek mesigat nak ogo mesik ugonobo erlak ’berlegat perlengsogoat e’gerlal dabopsogo warenebegeitik ono’gwiang sebelhwerlegesa.
41O sebelil ’gwegisa ano re, o Kades-Barnea hwerli en e ’bekhit o Gaza hwerli emin, ’gwiang ’Gosyen sagalak hwerli a’bigat ene ’bekhit, o Gibeon hwerli emin, ’berlegat Yosua osi enemin en, sebelak pegesa. 42At Israel a’ge enaik Allah ano enemin otluk weim tegisema at Yosua osi enemin, agauwa mesik libegesa ai pam enat ap ’gain-’gain yu ’berlegat wusogo-wasogo onoboluk, ono’gwiang sebelhwerlegesa. 43Arat sebelegisarik, at Yosua aphwami Israel a’ge enemin, ’berlegat togolik onowi sum owi o Gilgal ebanoat wegesa.
Currently Selected:
Yosua 10: Wul
Highlight
Share
Copy
Want to have your highlights saved across all your devices? Sign up or sign in
