Yosua 9
9
Ap Gibeon a’ge en Yosua o’borl pam liga wene
1Is ap ’gain ’gain ik Yordan mo obuk oso hegit akhit dom-dom petne welagai a’ge emin, duk petne welagai a’ge emin, ik lok yegelak laut iak petne en, dom Libanon er einnyo hwerli ap ’gain-’gain Het a’ge emin, Amori a’ge emin, Kanaan a’ge emin, Feris a’ge emin, Hewi a’ge emin, Yebus a’ge emin, ’berlek en, at Yosua en tiso a’ge ano enesa’go hwelegisarik, 2enebe ’berlegat la’bulogo, at Yosua Israel a’ge enemin-weim obuogoluk, wene balegisa
3Ye, is ap Gibeon a’ge nak e, Yosua en aphwami o Yerikho a’ge emin, o Ai a’ge emin, tagenebesi a’ge enesa’go hwelegisarik, 4-5We eniak eseiat,” wene disogo uok, “oluk egesarik, karung derlep-derlap sak page a’ge pam onso’boru roti erlebe-erleba tak a’ge tono hau worogo a’ge ebano yagasogo wam keledai o’borl pam peligagalat, anggur o’bosu na’gogwi a’ge domba agap pam ebale hele’gik poluk wiak-wiagat serlebensogo wogulat, ye, onoyuk owi sepatu derlep-derleptak-a’ge eba logon ’buk horlogulat, ono’bogoyum modok soduk wiak eba logon ’buk horlogulat, tegisarik. 6At Yosua aphwami Israel a’ge enemin, o Gilgal eba o sum owi werik-poluk enemin ebano oruakma entau wegesa. Entau wegesarik, at Yosua ogo, is ap Israel a’ge ogo, mo’gulontogulat e, Nis nonowi o walek eba en his henemin la’bolul tik, wene modogat daksogo ’baluogoluk, hentau wege ai o.
7 #
Kel. 23:32; 34:12; Ula. 7:2 Oluk mo’gulentegisemaat de, is ap Israel a’ge en, is ap Hewi a’ge ebano mo’gulontogulat, his honowi horokho nenemin welegema ya enat wegeptik at de, wene modok daksogo ’balu a’geat de, ’gesogo ogu legep o.
8Oluk mo’gulentegisema, is en Yosua mo’gulogulat,” nis yu re, his heneragam a’geat wege o. “Oluk mo’gulegisema, at Yosua en is mo’gulentasulat,” his e, Salak o? Ye, henebe ’geba en wegeptik en mo’gulnogu legep o?
9Oluk mo’gulentasuam, is en at mo’gulogulat, “His heneragam a’ge nis Yu, nonowi modok walegenat At henaik Allah onuk lok aga ai enat wege o. At en o Mesir dogo eba til lasulat, 10#Bil. 21:21-35Ye, ik Yordan mo liplau wago akhit hegit etle akhit ap ’biren enebe ’gain Amori a’ge mesik onuk Sihon o Hesybon eiye oruak, ye, mesik onuk Og owi o Asytarot welat, o Basan eiye welat, togukhwe, takhenebesi a’ge ano nenesa’go holigerikmu re, 11nis nonuelak enemin, is nis nonowi pam nenemin welege a’ge emin, is ’berlek en nis mo’gulnontogulat, ebela pam lagalat, no a’ge honso’boru holi horloluk, is oruakma eba laguptik, mo’gulontogulat, nis his heneragam a’geatma re, his henemin la’bolik poluk wene modok garoksogo ’baluogoluk wegema re, mo’gulontomup o, oluk peraknonobou wegesema re, 12nonso’boru roti yu yethemit o. Nonowi pam en nonso’boru roti ’gerat werakho woluk wege yu a’geat de, modok arat erlebe egeitik, tono a’ge ’gela’ge agama oruak yu hemit o. 13Ye, anggur a’bosu nang horlo a’ge domba agap ’get hele’gik a’ge pam na’gogo woluk wom a’geat de, derlep-derlap eselat, ebela ogo o walegenat wagaimu, nonosum emin, nonoyuk owi sepatu emin, modok derlep-derlap eselat, tegei yu yethemit o.”
14Oluk mo’gulontogwiam, At Nenaik ’gain Onuk Logo a’ge mo’gulom erlak oruakhwe, is enede opoluk en onso’boru hweli dedelik a’ge ano logon ne’gesarik, 15At Yosua en, nemin hwedik modok wolomok oluk, henelaluk ukhenebege o, oluk, enemin wene ano modok daksogoat mo’gulentesimu, is ap onuelak wene a’bosu ’balogwi a’ge ebano en e, Allah uak o, oluk, ho’buk ’balogo pegesa.
16Arat ap Gibeon emin, la’boligisarik, nogo henagan oluk, “ap yu, onowi horok-horogat a’ge de, henemin la’boligep ai o,” oluk, mo’gulontogwiam is Israel a’ge enesa’go hwelegisarik, 17agauwa ai erligeat hup ’biren nogoluk hubet aphwami eba, onowi kota-kota Gibeon emin, Kefira emin, Beerot emin, Kiryat-Yearim emin, arat ene’bek ’bok-’bok legesa. 18Arat ene’bek legesarik is Israel a’ge la’bolik onuelak wene a’bosu ’balogwi a’ge ebano en at ’gain Onuk Logo a’ge Israel a’ge enaik Allah uak ho’buk ’balogo erlele wogo onobogulat e, waronobogup erlak o, oluk, ugenebegesa. Ugonobogwiam, is Israel a’ge la’bolik ’berlek en onuelak ebano ’berlegat enebit-enebat tagonobogwiam, 19Is onuelak wene hwalogwi a’ge ebano en is Israel a’ge a’bik ebano mo’gulontogulat, At nenaik Israel a’ge enaik Allah uak ho’buk ’balogo erlele wokho enebegerikmu re, wik-wiaktak onobo ai re, mia o.
20Nis Allah uak ho’buk ’balogo enelaluk welemagoluk, eneli wokho pegerikmu, en, wiagap pogwi holuk Allah olot het nenebam pasumu no oluk, ugonobouwok o. Ye, ugonoboma welat, tugulom a’ge paget nage yu o. 21Is enebe enelaluk ugonobulmu re, nis ’berlegat la’bolik nenebaget neneragam a’ge welat, ik nang nensai lagalat, nenagan ’gel nensai lagalat, togwi a’geat welemak o. “Oluk, is Israel a’ge onuelak en wene ’balogo pegesa ai pam ap Gibeon emin wene ’balegisa ano selang u erlakma en anniat welaga.
22Wene ano arat hwelak pogwiam, at Yosua en is aphwami Gibeon a’ge ebano wemagoluk, worlentesimu wegesema, mo’gulentasulat,” his honowi horok-horogat yema welarat de, nonowi o modok walegat o, oluk, wene heniak eseiat no paget en mo’gulnentigep? 23Wene heniak esei asogo mo’gulnentigepma re, o yogodak hwerli en modok-modok nis en a’ge di wai lit-yu wai lit welat nenaik Allah owi werik a’ge paget ik nai lagai, e’gel esi lagalat togu lorogup ene hweim henebege ai o.
24Mo’gulentesimu, is en wene o’go at Yosua mo’gulogulat, “Nis hat heragam a’ge yu, aphwami o yema welagai a’ge ’berlegat ena’guluak erlagapsogo poluk, o ’gwiang yu ’berlegat, his wokhentaik o, oluk, at ’gain Onuk Logo a’ge henaik Allah en tu wene hwalogo eragam a’ge Musa mo’gulesi a’ge ano opsogoat nenesa’go hweligerik, his henebe at paget nenede erlak agama at pamat nenede heberik welat, nis asogoat watnonobu hwia oluk nonogorlok o, oluk, neniak eseiat asogo tige o, nenaik. 25Asogoatma re, o yogodak yu hwerli en nis nenebe his hene’gik pam welegema re, nis en tige a’ge pam en his en tagonobul epegep a’ge holuk hegitsogo taknonobo obat o,” oluk, mo’gulegisa.
26Ye, is Israel a’ge en waronobogumu no oluk, at Yosua en is eneli wokho ugenebesi ano re, ebe aiat o. 27Ugenebesirik, ai erligeat Israel oruak a’ge ’berlegat enebaget togulat, ye, at Allah ebaget wusogo wogogulomma at Allah en pulogo pagathwerlesimu ebano togulat, asogo togulat e, ik nang entai lagalat, enagan ’gel entai lagalat, togu lemagoluk, eiye tagenebesimu re, yogodak ogo asogoat togwi oruak o.
Currently Selected:
Yosua 9: Wul
Highlight
Share
Copy
Want to have your highlights saved across all your devices? Sign up or sign in
