Yosua 11
11
Ap ’gain-’gain o o’borl akhit o’gwe welagai a’ge ebano o ’bulogo sebel enebegisa wene
1At Yosua arilak enemin en is ap ’gaindek enebe a’bigat warenebil lagai a’ge ebano, ap o Hazor a’ge onue ’gain Yabin ano esa’go hwelegeitik, ap o Madon a’ge onue ’gain Yobab emin, ap onue ’gain o Simron a’ge o Akhsaf a’ge ogo eminat, 2is Ap ’gain o dom petne o o’borl akhit o’gwe welegesa a’ge ebano emin, ik Kinerot ye’gelak o abel akhit o Yordan eperlak a’ge no’gorlogo pesimu? do’go erang pasegeimu ebano emin, dom petne mo il obuk oso hegit akhit eba emin, ik lok ye’gelak laut mesik iak pam dom hwedik a’ge Dor mo obuk ilasu akhit o’gwe ebano a’ge emin, 3-5Is ap o Kanaan ik Yordan etle akhit, ho’gorlakma yu akhit a’ge emin, dom ma, welagai a’ge ena’gul onuk Amori a’ge emin, Het a’ge emin, Feris a’ge emin, Yebus a’ge emin, ye, is ap Hewi o Mizpa dom Hermon e’biang ’balegeimu eba welagai a’ge emin, is ’berlegat la’bolik poluk, Israel a’ge enemin weim tuogoluk, yo’go enebesi.
Yo’go enebasuam, is ap ’gain-’gain onosi enesegen oruak a’ge hundomok-han domok pul he’gik emin, ono’gwiang so weim togwi a’ge paget hele’gik a’ge kuda en li luk lasu a’ge a’bigat emin, ik ’berlik ik iak pam welago ai ’gela’ge enebe modok a’bigat odoktu aga legesarik, ik onuk Merom elarukmu horok-horok eba at onowi sabo sum owi ut hwerlau wegesa
6onowi sabo ut hwerlau wagaiam e, at Allah en Yosua mo’guleselat, “O tono agauwa ai erlige pamat is aphwami ai, an en wokho his wokhentasuam e, enebe wusogo onobogulat, ono kuda onoyuk eme’gen ’balogo pogwi, ye, ono’gwiang so ai, odouk mu’galogo pogulat togupmu re, aphwami ai enebe paget honogorlok hagup no yo,” oluk mo’gulesi.
7Mo’gulosoam, at Yosua osi weim obogwi a’ge enebe a’bigat enemin is ap eneselei a’ge ik Merom elarukmu welagai a’ge ebano e’gerlik-pa’gerlik enebam ’gogu legesema. 8At Allah en aphwami ebano waronobuagoluk, is Israel a’ge wogentasuam modok lagak-pagaksogo warenebil-enebil o onuk Sidon-lokma en, ’bekhit lagak-’bagak til-til o Misrefot-Maim en warenebil-enebil o dogo onuk Mizpa o mo orlu ago hegit akhit ebano hwerliat enebei legesa. Is ap esan pulholuk enebam libegesa a’ge ano enelaluk mesik libom erlak ’berlek segi sogoat warenebegisa.
9Warenebi lagalat, at ’gain Onuk Logo a’ge Allah en Yosua mo’gulesi a’ge ano hegitsogoat kuda ebano onoyuk sagalogulat, ono’gwiangso ebano odouk narlogulat tegisa.
10At Yosua osi enemin en arat wusogo lip enebegisarik, pobuk togolik wagalat, ap ’gain onuk-Hazor ai, di ap yu ap ’gaindek-’gandek o eba welegesa a’ge ebano onue ’gain aiat oruakhweat de, ebe wusogo pogulat, at eiye welagoma ebano ebale sebel horlogulat, togu legesarik, 11aphwami at eiye welago a’ge ebano mesik nak ogo mesik enelaluk welemagoluk, u’gonobo erlakma en ’berlegat wa’gun pam erlagapsogo onoboluk, o kota kantor ebano arat perlengsogo oduk ’gwelabogo narlil legesa.
12At Allah eragam a’ge Musa ano en wene le’gelak mo’gulentesi a’ge ano hegitsogoat, ap ’gain a’ge enebe emin, is o eiye welagaimu o kota-kota emin, Yosua osi enemin en modogat e’gerlal dabopsogo perlengsogo warenebegisa a’geat de, 13onowi mesikmu ebano nak worogulat, dom elit til legesarik weregisa a’ge kota-kota oruak a’ge ebano nak e, odouk narlil lo erlak. At e, o kota Hazor nak Yosua osi enemin en oduk ’gwelabil legesema ne’gei.
14Ye, oduk narlil lagaihwe, onuam emin, ena’ge di a’ge yu a’ge onowi pam welaga a’ge emin, ’berlegat hogul-a’ge aphwami Israel a’ge en woluk lispat hegesa a’ge de, enebe nage mesigat nak ogo pellik libom erlak modok ’berlek puk nagaiksogoat warenebegisa. 15At Allah en at eragam-a’ge Musa wene le’gelak mo’gulosoam e, Yosua mo’gulesi a’ge ano tagalat, at Allah en Musa disogo tip-asogo tip, oluk mo’gulesi a’ge ano mesik ukpo erlakma en modok hegitsogoat tegei.
Israel a’ge enanni lok logo welaga wene
16Dom petne emin, o Kanaan o abel akhit lei lok duelakma emin, o Gosyen lok sagarak ’berlek emin, dom e’biang ’balil lasegeimu o mo obuk oso akhit emin, ik o Yordan neperlak no’gorlogo eliko duelak pesimu-eba emin, dom ho’gorlagap pasulat, e’biang ’balil lagama aphwami Israel a’ge wolomma emin, 17hwerli dom onuk Gundul esa’go o Seir akhit ogut takpei lagama eba en ’bekhit, dom Hermon olukhwe akhit dogo onuk Libanon o Baal-Gad ai hwerliat ap ’gain-’gain ’berlegat tenakho enebe wusogo onoboluk, ono’gwiang sebelhwerlegesa. 18Ye, at Yosua osi enemin en is ap ’gaindek enemin weim obogukhwe, o momuat lai laga 19-20#Ula. 7:16At Nenaik ’gain Onuk Logo a’ge en wene le’gelak Musa mo’gulesi a’ge ano hegit-hegit weim enselei a’ge enemin obogulat, enebe enede onto erlakma en enebe modok erlagapsogo onobouwagoluk, Israel a’ge enemin weim obuok o, oluk uagoluk, at Allah enat onoweim eneselei a’ge ano enede anniap enebesimu, weim enemin hwerlirak a’ge mesik en, Israel a’ge enemin la’boluok o, oluk enemin hogul ’bullu erlak a’geat de, is aphwami Hewi o Gibeon welagai a’ge ebano onomu nage enemin la’bolik welemagoluk, weim hogul ’bullegisa.
21Agauwa ai erlige at Yosua osi enemin legesarik, is aphwami Enak a’ge onowi dom petne o Hebron emin, o Debir emin, o Anab emin, dom petne o ap Yehuda a’ge wolomma emin, o ap Israel a’ge wolomma emin, oruak holuk, warenebil lagalat, onowi kota-kota emin, enebe emin, ’berleksogoat ena’guluak erlagap enebegesa. 22Is aphwami Israel ono’gwiang wolomma eba aphwami Enak a’ge welemagoluk, mesik ukpo erlak, ’berlek segi sogoat warenebegisa a’geat de, o Gaza emin, o Gat emin, o Asdod emin, we ’biren nak ’gela’ge ugenebegesa.
23At Allah en, Musa mo’gulesi a’ge hegitsogoat, Yosua osi enemin, en o ai ’berlegat sebelhwerlegesarik, aphwami Israel ena’gul onuk dogo ’gwe a’ge nak enebe lo’bok agai a’ge hegit-hegit o’go ’gela’ge ono’gwiang eiyetak pagathorloluk welemagoluk, at Yosua en so’burentesi. So’burentasuam, o ebano weim o’borloguk u erlakma en, o’borloguk erlagat op at welaga.
Currently Selected:
Yosua 11: Wul
Highlight
Share
Copy
Want to have your highlights saved across all your devices? Sign up or sign in
