Yeremia 49
49
O Amon takpo wene
1 #
Yeh. 21:28-32; 25:1-7; Amo. 1:13-15; Zef. 2:8-11 Is aphwami Amon a’ge tagonobo wene re yuat o. At ’gain Onuk Logo a’ge Allah en eselat, “Is Israel a’ge enemalik mesik oruak a erlak a? Enaiklak enemining a’ge horlo a’ge enebe mesik oruak a erlak a? Oruakhweat de, no paget, asua Milkom en is Gad a’ge ono’gwiang eiye takpoluk welat, ye, is Gad a’ge onowi kota-kota at eiyagai, no paget han egesarik welat, togwi o?” oluk egei. 2“Is Amon a’ge onowi o kota Raba ebano weim tu a’ge niak u erlige horok lau womma re, niak osoam e, o ai, moluk-melaksogo pil lasulat, ye, o kota o’borl-o’borl ebe lobok ’berlegat odouk en nil lasuam e o’gwiang ebano modok ’buk emarik welema o. Asogo tisoam, aphwami en is Israel a’ge sebelak onobogulat, ono’gwiang eiyetak pagathwerlegesa a’ge ebano, Israel a’ge en is sebelak onobogulat, ono’gwiang horlul o,” oluk, At ’gain Onuk Logo a’ge Allah enat egei o. 3“O kota onuk Ai ano re, moluk-melagat tak pulmu re, is Hesybon a’ge ai, lo’gu marogulat, o kota Raba emalik hwelani ebano eniak loksogoat nge togulat, togu lemak o! Enasua Milkom ano woluk hwikhai lagalat, is ap at eiye a’ge emin, is emin welat togwi a’ge onu’gwarek a’ge emin en wogonoboluk lebik onobulmu re, sum derlelak wiak a’ge ’buktak poluk, enebaget nge togulat, enagap ’balogulat, lei wetil no’gulemak o. 4Hemalik wene tak a’ge opsogo tu erlakma en erlikhorlogwi ai, ono’gwiang o do’go moli modok oruak a’ge ano paget, no oluk en, enede en logo pagathorlogwi o? Di a’ge yu a’ge a’bik oruak a’ge ebano pam he’berik poluk ogulat, ap sa en nenebe watnonobua? Mia at o, oluk, ogumu re, 5Is di owi yu owi o’borl-o’borl welagai a’ge ’berlegat ebano en onogorlok etil lo a’ge enebam pou wagoluk, perakpouma o,” oluk, at ’gain Onuk Logo anni modok welago a’ge At enaik Allah en egeimu en, mo’gulhentegis o. “Asogo takpasuam, is enematek-enematek, o eba en mukho lebik enebasuam o da’gwil lagai a’ge ebano at mesik en is odoksogo onobouwa erlak at o.
6Asogo a’geat de, pobuk is o Amon a’ge ai o naduk welegesa ’gela’ge tagenebaik o,” oluk, At ’gain Onuk Logo a’ge enat egei o.
O Edom takpo wene
7 #
Yes. 34:5-17; 63:1-6; Yeh. 25:12-14; 35:1-15; Amo. 1:11,12; Oba. 1:1-14; Mal. 1:2-5 O Edom takpo wene ano re, yu at o. At Enaik ’gain Onuk Logo a’ge anni modok welago a’ge At Allah en eselat, “O kota Teman eba enede oruak a’ge welegesa ebano ’gela’ge yogodak logon oruak a, erlak a? Is ap enede oruak a’ge en wene op a’ge hwalogo mo’gulontogwi a’ge ebano, enebe modogat erlak a? Ye, enede oruak a’ge en wene hwalogo mo’gulontogwi a’ge ebano enede yarluk egei ia erlak a? 8At Esau e’balak weiyelak a’ge wiak ogo enebam pasulat, e’gin modok a’bik a’ge enebam pou wama re, enebam po erlige is o Dedan welagai a’ge ebano togolik hweiye ’bogulogo helep gagalak ele lo’gwe eba perleneat hisak lai louwak o. 9Ap anggur e’gen daganogwi a’ge en waga lemarik, e’gen daganil lagalat, ado pouwa ano erlak no? Is ap hisarogwi a’ge en, huba’go o mesikmu guagalat e, is en wul opogwi a’ge ebano nak horloluk louwa ano erlak no? 10Asogo togwi a’geat de, at Esau pam en weiyelak a’ge nak e, An en enemalik we ’bullak enebasuam, o mesik mu hisak lail-lagalat togumu no oluk, is hisak lai lagalom o’gwe ’berlegat selakma takpil lasulat, tik o. At pam en weiyelak a’ge emin, at ue ari emin, at emin welagai a’ge emin, ’berlegat erlagapsogo paikmu re, at a’gul onuk a’ge ’berlegat erlak ema ani o.
11Enemalik se’bin ’bullak a’ge emin nak e, nilen wogenebise leikmu re, ugonobouwak o. Ye, enialak hwami sugwe ai ogo, enede An nebam he’berik pouwak o,” oluk, egeimu re, mo’gulhentegis o.
12At ’gain Onuk Logo a’ge Allah en egei ano re, yuat o. “Is aphwami a’bosu ne’gak no puk a’ge at de, menit, egeimu ne’gesema re, aphwami Edom a’ge ebano, is nogumu no, mia ukpouwok opogwi a? Is en ukpo opogwi ai re, erlak! Is ogo nouwagat o, oluk, e’gin enebam pesi. 13O kota Bozra moluk-melaksogo po ano pam, aphwami en onogorlok etil lo a’ge tak ai o, oluk ogulat, bi-’belap takpogulat at onuk ’balholuk hweim pogulat, togu lema ani o. Ye, at o o’borl-o’borl kota-kota ’berlegat ogo moluk-melaktak nagat modok-modok welema o, oluk, nonuk ho’buk ’belak pagathorloluk enat egi o,” oluk, At ’gain Onuk Logo a’ge Allah enat egeimu en mo’gulhentegis o.
14O Edom ai, wale’gik pouwogoluk odoktogulat, weim enemin obuagoluk leik-louk togulat, togu lemak o, oluk, aphwami ena’gul onuk lo’bok oruakma mo’gulentai louwagoluk, peragenebesi. At ’gain Onuk Logo a’ge Allah en an mo’gulnosokhwe hwelegis a’ge re ai at o. 15Asogoatma re, At Allah en eselat, “An en aphwami ena’gul onuk lobok ene’gerlakma at onuk weiyap paikmu, aphwami en at mi-miarak pogu lemagoluk takpasulat, tik o. 16Aphwami onogorlok houwagoluk takpasulat, enede logo pil lasulat, takpasu laga ano pam, at u’gwaregat lal horloluk, helep edip-edip eba welat, dom-dom yat a’ge eba eiyetak pagathorloluk welat, tago ai, sue pen ’gela’geat owi yatsogo werik oruak a’geat de, An en moluksogo belebak pou weik o,” oluk, egeimu en, mo’gulhentegis o.
17“O Edom ai moluk-melaktak pouwa ano pam is aphwami ebela o’gwe ai lagalat, egin-pegin ebam om a’ge tagene, enemde piok eselat, onogorlok etil lagalat togu lema o. 18#Kej. 19:24,25O Sodom emin, Gomora emin, modogat erlagapsogo pasulat, o kota-kota o’borl o’gwe ’berlegat erlagapsogo pesi ’gela’ge, is aphwami o eba mesik welema erlak o,” oluk, At ’gain Onuk Logo Allah enat egeimu en mo’gulhentegis ai o. 19“Singa ik Yordan olomu e’gela huk takma en liplau wotluk, domba ’gela’ge en annisogo oruakhweat de, ebam ’golekho ligago ’gela’ge, An inagalat, is o Edom oruak a’ge ebano aromsogo lebik enebaik o. Lebigenebaiktik, ap mesik pulogo edikpaikmu wene ga’galogo mo’gulentasu lema re, sa en An nemin hegit en, nemin walhasulat hat ai, no paget en tigen no? oluk, sa en An mo’gulneselat, ye, is domba degelonobogwi a’ge mesik sa en An en tu epasu a’ge ebano ’gwe ’baliselat, tu epegep? Modok erlagat,” oluk, egei o. 20Asogoatma re, At ’gain Onuk Logo a’ge Allah en o Edom takpo a’ge hwalogo pasulat, e, is o kota Teman oruak a’ge ebano tagonobo a’ge hwalogo pasulat, tegei a’ge yu, hologu lomup o. Domba emalik ’gela’ge is enemalik logomalik-hwelani ebano lisogo lebik enebasulat, ye, is en togwi ano pam domba enagan e’gela nil nogumu ’gela’ge, is welagaimu ebano modok wiagap pasulat, tua o. 21“Arat sebelegei o,” oluk, ngai-wai ogwi ano pam ’gwiang lebe eselat, nge ye wo ogwi a’ge ano, ik Laut Merah hwerli lail lasulat, tua o. 22Sue pen agapsaburl hebilogo darak ligagalat, o Bozra o’borl petne agapsaburl hebilogo darak denagalat, tago ’gela’ge, ap ai asogoat tagoma hagup ani o. Asogo tua ai erlige is o Edom a’ge onosilak enesegen oruak a’ge ai, hwe malik nonouk tagalat, ede erlak ago ’gela’ge, enede asogoat erlak ema ani o.
O Damsyik takpo wene
23 #
Yes. 17:1-3; Amo. 1:3-5; Zak. 9:1 O Damsyik takpo wene ano re, yu at. “Is Hamat a’ge emin, Arpad a’ge emin, wene wiak a’ge hwelegisarik, enegerli agalat, enede lebe tisokhwe welat, ik laut o’borlogouk erlak welago erlak, erliak-gwerliak tagalat welago ’gela’ge, is enede asogoat, tago yo. 24O Damsyik ano alo’gwe sa eselat, bogoluogoluk togwi a’geat de, enede erlak agama, mia agalat, hwe malik doru horok agoam nonouk wiaksogo tago ’gela’ge nonouk tagalat, ede obotut ’gela’ge welat, tago yo. 25O kota modok nogorlok a’ge holuk logo pogulat, ye, kota An nagai epasu a’ge hegitsogo togwi a’ge ebano nage no oluk en ukpoluk bogolu erlakma en oruak o? 26At emalik logomalik ebela lok o’gwe waretil lagalat, at osi enesegen oruak a’ge ebano agauwa ai erlige wusogo enebi lagalat, tua oluk demat egi o. 27O Damsyik pak wogo a’ge An en odouk ’gwelebak paikmu re, odouk nil lasulat, ap ’gain Benhadad ebe op wolomma owi o lok opsogo weregei a’ge ano odouk en nil lasu lema o,” oluk, At ’gain Onuk Logo anni modok welago a’ge At Allah enat egei o.
O Kedar emin, Hazor emin, takpo wene
28O Kedar emin, is Hazor a’ge onuelak ’gain eneragam onobogumu emin, ap o Babel a’ge onue ’gain Nebukadnezar en sebelak enebesi wene ano yuat o. “At ’gain Onuk Logo a’ge Allah en eselat, at en inagalat, o Kedar wale’gik pogogulat, is o mo orlu ago akhit o’gwe welagai a’ge ebano, erlagapsogo pasulat, tuak o. 29Asogo tagalat, is onowi sabo werik a’ge o ou’gwa selak sum ebak a’ge emin, onuam domba emin, woluk lasulat, o ou’gwa salogwi a’ge sum ebak a’ge emin, ena’ge-a’ge ’berlegat emin, onuam unta emin, perlengsogo wasulat, asogo tagalat, ede erlik uagoluk, o hono’borl o’gwe henagap alib-alib ua a’ge henebam aga o, oluk, ngai-wai uok o.
30At ap o Babel a’ge onue ’gain Nebukadnezar ano en warenebik oluk wene ’gagalogo pasulat, ye, sebelogo onobouwogoluk, wene a’bosu ’balogo pasulat, tegeimu re, is aphwami o Hazor a’ge ai, hweiye perleneat bogologulat, helep gagalak elema ogola hisak lagogulat, tuak o,” oluk, At Allah ’gain Onuk Logo a’ge enat egeimu en mo’gulhentegis o. 31“Nis nenede we yogunat lielak welat, nonowi pam op nak welege, oluk opogulat, onowi pak wogo a’ge ’goduk hwerigat welat, is onowi werik pagathorloluk, onomu nagat welat, togwi a’ge ano onowi sebelhwerla ’guak o,” oluk. At Allah ’gain Onuk Logo a’ge enat egei o.
32“Onuam unta ’berlegat hogul wogulat, onuam lembu sapi a’bik oruak a’ge ebano ene’gik abusagat wogulat, tua o, enasu pema-pema hapsogo ’balogulat enebe ebano, o Yasobu di owi yu owi wetil lasumu ebano perakpasulat, is wiak enebam emagoluk ebela ologun-ologun en perakpou wagalat, tua o. 33O Hazor ai, is mene orlo owi hisogo wolomma at agalat, o ai moluk-melaksogo o wogo owi modok-modogat welat, tuama re, aphwami mesigat nak ogo mesik o eba welema erlak o,” oluk At Allah enat egeimu en, mo’gulhentegis o.
O Elam takpo wene
34At Zedekia ano is Yehuda a’ge onue ’gain otluk wene ’gagalogo owan mo’gulentasu oruakma, At en o Elam takpo a’ge at mo’gulosokhwe mo’gulentasu a’ge Yeremia mo’gulesi ano re, yuat o. 35At ’gain Onuk Logo anni modok welago a’ge At Allah en eselat, “Is Elam a’ge enede he’berik poluk enanni welagai a’ge enesegen ano, demat porlologo paik o. 36An en aphwami o Elam a’ge oruakma o yasobu erabu orogobu akhit en, abel pema-pema en, perakpouma ano pam wogonoboluk erabu-orogobu abel pema-pema en perakpaikmu aphwami ena’gul onuk lobok oruakma ’gwilouwa erlak ai erlak, ’berlegat ene’gerlak o’gwe ’gwi laga lema o. 37Eneselei a’ge eneragam wagalat. Enebe waronobogulat mugonoboluk wagalat, togwi holuk, is aphwami Elam a’ge enede nal emagoluk tagenebasulat, An nolot het odouk ’gela’ge ligagalat, e’gin modok mia a’ge enebam pasulat, tik o,” oluk, At ’gain Onuk Logo a’ge Allah enat egei o. “Wagun en enebe muk en til-til erlagapsogo pasulat, tik o. 38Is onue ’gain emin, at emin togwi a’ge onu’gwarek a’ge emin, enebe erlagapsogo poluk o Elam ebano wene ’gagalogo mo’gulontogulomma at takpasulat, tik o,” oluk, At ’gain Onuk Logo a’ge Allah enat egei o. 39Asogoat tik a’geat de, pobuk o Elam naduk welaga ’gela’geat tak paik o, oluk, At Allah enat egei o, oluk mo’gulentesi.
Currently Selected:
Yeremia 49: Wul
Highlight
Copy
Compare
Share
Want to have your highlights saved across all your devices? Sign up or sign in
