Yeremia 48
48
O Moab takpo wene
1 #
Yes. 15:1–16:14; 25:10-12; Yeh. 25:8-11; Amo. 2:1-3; Zef. 2:8-11 O Moab takpo wene ano re, yuat o. At ’gain Onuk Logo anni modok welago a’ge Israel enaik Allah en eselat, “O kota Nebo ano re, erlagapsogo pou wama re, enebe nede o! O Kiryataim sebel horlouwama re, ene’gerli agalat, kota helep pak annisogo werik a’ge ano moluksogo pou wama re, ene’gerli agalat, tua o. 2O Moab wiagapsogo pouwogoluk, aphwami o Hesybon eba en wene hwalogulat, is aphwami Moab a’ge ’berlegat erlagap enebi louwok o, oluk ogumu re, o Moab mesik emin logo pogu lema erlagat o. Ye o kota Madmen a’ge ogo, wa’gun en enebe nil lasuam e, di iak-yu iak erlak nagat welema o. 3Is aphwami o Horonaim welat, wik-wiak taknonobogulat, erlagap nenebegesa o,” oluk, eniak ogwi a’ge ano enesago hologu lemak o.
4O Moab modok moluk-melaksogo pegesema, at emalik en ngai wai ogwi a’ge ano, o Zoar en enesago hwelil lagai o. 5Ebela Luhit o’gwe legeik ligagalat, lo’gu a’ge nge a’ge pam ligegesa. Ye, ebela Horonaim o’gwe ’bi lagalat, e’gin enebam aga ano pam, lo’gu maro’gwi a’ge enesa’go hol-hol ’bigisa. 6His ogo henagap delogo etleba hweiye lit o, eba loluk e, o leimu wam keledai ematekma welago ’gela’ge eba at henematekma wolorogup ani o!
7Enegelep pak wogo a’ge pam, ena’ge-a’ge a’bik odoktak oruak a’ge ebano paget, enede hwediktak pogwi a’geat de, is ogo sebelogo onobogulat, onodogwi asua Kamos hogul woluk libagalat is ap asua Kamos eiye a’ge emin, ebaget togwi a’ge emin, wogonoboluk lebik onobogulat, tua ani o. 8An Henaik ’gain Nonuk Logo a’ge Allah en egi a’ge hegitsogo is erlagapsogo onobo a’ge o kota lo’bok en guagalat, mesigat nak ogo mesik ukpo erlakma en ’berlegat erlagapsogo onobogulat, o dogo opma welagai a’ge ebano wiagap pil lagalat, dom yat a’ge pam o seli o’gwe ebano wiagap pil lagalat, tua o. 9O Moab wiagat agalat, is onowi kota-kota ebano aphwami erlakma en o wogogwi agalat, tuama re, enagap delhorloluk ’bogolu a’ge paget enagapsaburl heling horlouwak oluk, mo’gulontomup o.
10Ap mesik An Henaik ’gain Nonuk Logo a’ge Allah en iabuk eiyetak paik a’ge de tu erlakma en ukpasu holuk e, at ai hweim yaro’gwigat welemak o. Ap mesik ua’gun pit pam aphwami enemep egelik erlak holuk, at ai hweim yaro’gwigat welemak o.
11Anggur a’bosu ik e’be pam ne’gak a’ge ano lu’gasogo ik e’be agaikhen pam ne’gak erlak holuk, oduk op wolom ’gelage, at Moab ai souwe pam en hogul woluk momu pei lo erlakma en owi pam welat agaisogo nak welemak holuk e, wiak om erlakma en op nagat welema a’geat de,
12Ap a’bosu ik e’be pam ne’gak a’ge herlelil lo a’ge ano perakpouwom erlige arat horok etil wago ai o. Horok etil wagoma re, is waga lemarik, a’bosu ne’gak a’ge herlelik pogwi ai ’gela’ge, is o Moab asogoat takpogulat, egeige’be ’berlegat taptak pil lagalat, tua o. 13Asogo togwiam e, is Israel a’ge enasua o Betel edikpegesa a’ge ano pam enede eberak welegesa a’geat de, ene’gerli egesa ’gela’ge, is Moab a’ge enasua Kamos en lerentasu erlak ai en e, ene’gerliat ema o, oluk, At Allah enat egei o. 14“Is en ogulat, nis ap ware weim edip tenak a’ge nagatma re, weim obu ai re, elit o, oluk, ogwi ai, nogosogo ogwi o? 15O Moab moluk-melaktak pil gogulat, o Moab kota-kota o wale’gik poluk ’gogulat, at emalik ap souwe modok polik a’ge nak weim enanni a’ge wusogo onobogulat, tua o,” oluk, at ’gain Onuk Logo a’ge onuk anni modok welago a’ge At Allah enat egei o. 16“O Moab wiagap po erlige arat horok lau wagarik oruakma re, at e’gin ebam po a’ge hwelak oruak ano re, mimia sogoat ebam pouwa o.
17Asogoatma re, is aphwami at o’borl o’gwe welagai a’ge ’berlegat emin, at onuk modok logo enaluk a’ge emin, en ogulat, onogorlok en alik worogwi a’ge modok mia a’ge ano harlok eselat, esegen uagun modok op a’ge woluk noso a’ge ebano porlok eselat, tegei o, oluk, ebaget nge togu lemak o. 18At Moab sebeliso a’ge en o Dibon sebeliselat, egelep pakleget wogo a’ge ano moluktak pasulat, tigoluk wagoma re, o Dibon emalik ’gelage, is o Dibon welagai a’ge, enebe ononuk logo welagaimu eba en ollong pam eba hut la'bumak o. 19Is o Aroer welagaimu, ebela esa’goma in lail lotluk il oruakma, ap mesik hweiye wagalat, hwe ano ’gela’ge mesik pungtak wagalat, togwi en, o eba no’gosogo aga o? oluk, hin wouwak o.
20-25Wogwiam e, erlak o. Dom yat a’ge oruakhweat de neneperlagap pasuam? O kota-kota Holon emin Yahas emin, Mefaat emin, Dibon emin, Nebo emin, Bet-Diblataim emin, Kiryataim emin, Bet-Gamul emin, Bet-Meon emin, Keriot emin, Bozra emin, o kota Moab walek o’gwe oruak a’ge emin, horok o’gwe a’ge emin, ’berlegat tegisa a’ge ogo e’gin a’ge enebam la’bu agama re, o Moab anni ano erlagap tagalat, di owi yu owi e’gik en modok tenakho welago a’ge ano delogo wasulat, tegei ano pam o Moab arat moluk-melaksogo pil lagama onuk erlagat agama, lo’gu marogulat, heniak loksogo ogulat, o Moab erlagap pegesa o, oluk ik Arnon iak pam welat, hum ogulat, togu lemis o, oluk mo’gulentil nogu lemak o,” oluk, at Nenaik ’gain Onuk Logo a’ge Allah en egei o.
O Moab sebelu wene
26“At Moab ai re, An ’gain Nonuk Logo a’ge Allah mi-miarak nebasulat, ede en logo pesimu re, ik enede ’belak enebasu a’ge noluk eme lukho pogwi ai ’gela’ge, at ede ’belak a’ge ’gelage emagoluk, takpouwak o. Asogo tak welat, eme lukho pouwa a’ge ano petne erlebik tisoam, aphwami en at eidarak obogu lemak o. 27At en is Israel a’ge eidarak enebasulat, is Israel a’ge ene’gerlakma ap yogot wogwi a’ge logon oruak holuk, belebak? Pasulat, a’gul morlil-morlil nak hasulat, taga lema erlak no?
28Asogo taga laga atma re, is o Moab oruak a’ge ai, onowi kota-kota ukpoluk, helep lolu-lolu eba louwarik welemak o. Sue hwerlalim en helep iak pam onowi werik poluk welago, ’gela’ge, is asogoat welemak o. 29At Moab ede en logo pil noso ai, modok nogorlok a’geat logo pasulat, ede en logo pasulat, an nak elit epasulat, erliknobuak til neselat, ede en logo pil denagalat, tiso a’ge ai nenesago holige o. 30An nak naluk, opoluk til denagalat tiso ai, we almasogoat til denagalat, ye, an nage op epasulat til denago ai, ebabut wiak hweat detil denagalat tago ai, pobi taga legi o,” oluk, At ’gain Onuk Logo a’ge Allah enat egei o. 31“Asogoatma re, an en o Moab holuk e ebaget nge tagalat, is aphwami Moab a’ge ’berlegat ontoluk enebaget lo’gu mariselat, is ap Kir-Heres a’ge ontoluk, nede wathwerlasulat, taga legi o. 32At o Sibma ai re e anggur ’gela’ge o e’gik dal luk ik laut hwerli lail lasulat, ’bekhit ik laut Yaezer eba lail lasulat, tegeimuat de at wiagapsogo pogwi a’ge en at ebam, iabuk wogoma e’gen hurle aga a’ge ebano ’baliselat, anggur e’gen ’balil lasulat, tegei ano pam at Yaezer en ebaget nge tago ai, weisogo ’gelage tisokhweat de, an nak e, at ebaget nge modok logat taga legi o. 33O Moab a’ge eniabukmu emin, e’gen egesiso a’ge yorogumu emin, ebano til lagalat, enagai en, ngai-wai ogulat, togwi a’ge ano erlak agalat, e’gen daganak a’ge agap e’gen wogulat togukhwe a’bosu ’biso a’ge ebano, a’bosu dengtak pegimu re, is ap ngai-wai ogulat, e’gen wogwi a’ge ebano erlak nak agalat, tegei o. Eniak lok ogukhwe, hologwi a’geat de, enagaisogo ogwi a’ge ano erlak ago yo.
34Is eniak ogwi a’ge hologwi ai re, ik Nimrim lasu a’ge ano deng egei holuk e, aphwami Hesybon emin, Eleale emin, lo’gu ye-wo ogwi a’ge ano aphwami Yahas en enesa’go hologulat, aphwami Zoar en ’bekhit, Horonaim emin, Eglat-Selisia emin, enesa’go holil lagalat, togwi ai o. 35O Moab dom pam eba is enasua paget wusogo odouk narlogulat, e’ben op-op a’ge enasua paget odouk narlogulat, togwi a’ge ano re tu erlakma en mo uagoluk, tak paik o,” oluk at Nenaik ’gain Onuk Logo a’ge At Allah enat egei o.
36“Asogoatma re, enede wik-wiaksogo welat, me’gin uak ’belak a’ge pam iak inghogwi ’gelage, o Moab wiak en, nede wiak otluk nge tagalat, enede wik wiaksogo welat, me’gin uak ’belak a’ge pam iak inghogwi ’gelage, is ap ena’gea’ge odoktak a’ge ano erlak ago holuk, nenede wiak agalat nge togulat, togu lege o. 37Enebe hundomok enasu ena’gul agap hwasogo pil lagalat, enebe hun domogat enemde asu ’balogo pil lagalat, hundomok enat helep pam ene’gik sagalogulat, hundomok enat sum derlelak wiak a’ge enebagase ’gwe ’buktogulat, togwi ai o. 38Ik e’be wiak a’ge enebit en sapsogo hwikhogwi ai ’gelage, o Moab asogoat takpegi ano pam onowi o’borl duelak a’ge ano pam ligagalat, onowi edip lobok lagalat, tegisarik lo’gu nak mattil lagaimu entegis o. 39Ik e’be tap-’baptak ai ’gela’ge o Moab modok mu ebelesogo moluk-melak takma re nogorlok o! Is lo’gu marogwi ai modok mia! Is Moab a’ge ene’gerli en onorogole hisogo pagathorloluk oruakma re nogorlok o! Aphwami en is o Moab a’ge eidarak onobogulat, o esago-esago ono’borl o’gwe oruak a’ge ebano, enebaget nonuak lup bo pogulat nene mi ago yuat o, oluk, ogulat, togwi o,” oluk, At ’gain Onuk Logo a’ge Allah enat egei o.
At Moab agap delhorloluk libom mia egei wene
40At Allah en egei ano re, yuat o. “At sue pen ’gela’ge, at agapsaburl darak o Moab a’gul o’gwe eria denago ai, houwak o. 41O kota-kota eba sebelhwerlasulat, kota-kota helep pak wogo ebano eiyetak pagathwerlasulat, tik o, tik ai erlige is Moab a’ge en osilak enesegen oruak a’ge ebano re, hwe, malik dak om a’ge nonouk tagalat, ede erlak ago ’gelage, enede asogoat erlak ema o. 42An Henaik ’gain Onuk Logo a’ge Allah mi-miarak nebasulat, ede logo pagathwerlesi ai pam is aphwami Moab a’ge erlagapsogo enebaik o. 43Asogoatma re, is aphwami o Moab ai, onuak lup bo po a’ge enebam emagoluk, enebaget polik welat, ’gotnoksogo yabuk tuagoluk ’gwiang ele delak welat, ’gotnoksogo yabuk taknonobouwagoluk, herle hol lagabak at oruak o,” oluk, At Nenaik ’gain Onuk Logo a’ge Allah enat egeimu en mo’gulhentegis o. 44“O Moab wiak togwi ogo tagonobo a’ge tahun polik a’ge ano woluk horoksogo pou weikmu re, enebam agokhwe is logon enemi erlip hogulat onuak lup 'bo po a’ge agoam, hweiye bogologwi a’ge ebano ’gwiang ele delogo molugo takma ano ’gotnoksogo ya’buk ogulat, ye, molugo ’gwiang ele delakma en orlu otluk, louwok, oluk togumu, herle gagalak a’ge ano pam ’gotnok tagenebasulat, tua o,” oluk Nenaik ’gain Onuk Logo a’ge At Allah enat egei o. 45“O Hesybon en odouk dainsogo lip lail lasulat, o Sihon en odouk magale dainsogo lasulat, is Moab a’ge onuelak onu’gwarek a’ge odouk en erlagapsogo nil lasulat, is ena’gul helep ’gela’ge welat weim tu a’ge nak enagai hogwi a’ge ano enebe erlagapsogo nasulat, tagoam, enebe op wolomma is enebe asogo o Hesybon eba loluk, enanni erlak agama ebayat mo egesarik oruak o. 46Is Moab a’ge en enasua Kamos erliktogwi a’ge ano enebe erlagapsogo onobogulat, is enemalik logomalik ebano re, wogonoboluk hwik entail lagalat, is enemalik hwelani ebano ogo, herle warenebil lagalat, tuama re, o Moab ai, nede o! 47Asogoat tua a’geat de, pobuk en o Moab naduk welegesa ’gelage takpouwa o,” oluk. At ’gain Onuk Logo a’ge Allah enat egeimu en, mo’gulhentegis o. O Moab e’gin enebam po a’ge odo ’belak hwerli aiat o.
Currently Selected:
Yeremia 48: Wul
Highlight
Copy
Compare
Share
Want to have your highlights saved across all your devices? Sign up or sign in
