Yeremia 50
50
O Babel takpo wene
1 #
Yes. 13:1–14:23; 47:1-15 Is aphwami o Babel a’ge welagaimu eba takpo a’ge At ’gain Onuk Logo a’ge Allah en at mo’gulosokhwe mo’gulentasu a’ge Yeremia mo’gulesi ano re, yuat o. 2“Aphwami ena’gul onuk lo’bok ene’gerlakma en mo’gulentasulat, enesago opsogo holuagoluk wene mo’gulentil lasulat, enaluksogo sum ’gwia hasulat, hiak loksogo mo’gulentil lasulat, asogo tagalat, wene mesik hisakho po modok erlakma en ’berlegat mo’gulonto ano re, yuat o. O Babel ano arat sebelhwerla ’gogulat, asua Bel ano at modok e’gerli agalat, asua Merodakh ano ede erlak agalat, onodogwi asua ogut hele’gik a’ge ebano ene’gerli agalat, onodogwi asua arat harlok-herlak eselat, tua o.
3Aphwami logon o erabu akhit o’gwe en o Babel wale’gik pogulat, o’gwiang ano, lei ’bukmu ’gela’ge takpogulat, tua o. O eba aphwami emin, seiye hogobi emin, ’berlegat hweiye yarluk etil louwama re, aphwami mesigat nak ogo mesik o eba welema modok erlak o,” oluk, egei o.
4At ’gain Onuk Logo a’ge Allah en eselat, “Agauwa ai erlige en tik o, oluk, mo’gulentegis a’ge ai erlige emde is aphwami Israel a’ge emin, is Yehuda a’ge emin, mesik erligeat lo’gu mattil enaik ’gain Nonuk Logo a’ge Allah An pal nebil wagalat, 5Ebela o Sion lagai a’ge ano ge o? oluk aphwami enemdema wogwi a’ge ebano mo’gulontogwiam e, onolukhwe yu akhit pou wagalat, At ’gain Onuk Logo a’ge Allah nis nenakhit otluk togu lomok o, oluk, An ne’bek wemarik, wene eneperlak aga lema erlak a’ge modok-modok togulom a’ge a’bosu ’balogo daksogoat hwalogo pul ani o.
6Is An neiyagai ebano domba nal agai ’gela’ge denagalat, is degelonobogwi a’ge en silogo degel-degel ebela mu ’gwe paronobogulat, dom-dom petne eba e’gela hera-heranil no’gu lemagoluk, ugonobogulat, togwiam e, onowi nogogumu ebano wom a’ge nelakpoluk, dom akhenma en akhenma til denagalat til no’gumu re, 7aphwami mu a’ge logon enemin sarlok otluk enemdema yagat onobogulat, ye, is enemin selei a’ge en ogulat, is enagan e’gela op a’ge nil nogwi ’gela’ge re, At Allah atma re, nadugat ene’balak en Nenaik ’gain Onuk Logo a’ge Allah enede hwedik welegesa a’geat de, yogodak eneiyagai ’get dagagai a’ge en e, At ’gain Onuk Logo a’ge wiagapsogo pogulat, tegisa ano pam, warenebigema re, nis wiak tu erlak o, oluk, ogulat, tegisa o.
8-9 #
Wah. 18:4
Asogoatma re, is aphwami ena’gul onuk lok akhit o erabu akhit o’gwe en odoktak poluk, o Babel sebeluagoluk enede gagalak poluk demat perak Onobou weikmu re, is o Babel welagai a’ge ebano bogologulat, is o Babel welagaimu ebano ukpoluk, libagalat, kambing ierak a’ge naduk-otluk holou emalik emin wogonoboluk denago ’gela’ge, is nadugat hweiye bogologulat, tuak o. Is aphwami lok logolak ai, waga lemarik weim tu a’ge enalo’gwe hwelak poluk, o kota Babel sebelhwerla gogulat, ap weim enanni wiak a’ge nak en onogodok ’besing-besang hogwi a’ge ’gwiang pam dain u erlakma en ap enagap pam nak ago ’gela’ge asogoat ema o. 10O Babel ai, di a’ge yu a’ge ’berlegat hogulwouwama re, hogul wogo a’ge ano sobut horlogulat, enede modok enagai ema o,” oluk, At ’gain Onuk Logo a’ge Allah enat egei o.
11“Is An negare-gare ’gela’ge nede hwedik a’ge ano wiagapsogo pogwiam enagai hogulat, enagai nak onogola ’bete eselat eniak orluk no’gulat, sapi emalik e’gela esei a’ge nil no’gulat, enagai en ’goleklek a’ge til no’gwi ai ’gela’ge, kuda ierak a’ge iak oso gela’ge til no’gumu re, 12enia ano e’gerli modok agalat, at dagenebiso a’ge ano onuk wiak agalat, tua o. At o Babel ano re, is onowi pam eba o leimu aphwami erlakma ’gwiang modok ’buk asu ’belak wiagat takpouwama re, di aphwami yu aphwami a’bigat ebelesogo oruakhweat de, o Babel nage modok sebel agalat onuk erlagat ema o. 13An ’gain Nonuk Logo a’ge Allah nolot het ebam paik ano pam o Babel ai, aphwami wolom erlakma en, o wogowi at oruakhwe, aphwami ebela ’gwe ai lagalat, o orogole modok wik-wiaktak yu, nogorlok e, oluk, onogorlok en onuak erlik ese lema o.
14Is ap ene’gik wele tak a’ge ’berlegat ai weim obu a’ge o Babel ebano orluk la ’gu egesarik dok ’besing hai lagalat, o Babel ai, An ’gain Onuk Logo a’ge Allah wik wiaktak nebasumu re, onogodok mesik ukpo erlakma en, ’berlegat ’besing-besangsogo lebikpogulat, tuak o. 15O Babel a’ge li-lagosogo inotluk, noweim o, oluk, ngai-wai ogulat, ’gogwiam, at esegen ogodok uak wokho poluk, weim wiak o, oluk, e’gik lagabak pasulat, weim enil welagai a’ge ’berla ano sonuk-senak eselat, helep pak wogo a’ge ano moluk-moluk biselat, tiso yo. An ’gain Nonuk Logo a’ge Allah wiagap nebasu ogo takpo a’ge ano yuatma re, taknebasu ogo takpogulat, at en aphwami tagenebasu laga ’gela’ge at ’gela’ge mesik takpoluk pogu lemak o. 16Is ap o Babel owi pelogwi a’ge emin, e’gen dagan u erlige lau wagoam e’gen daganogwi a’ge emin, erlagap pouwak o. Ap waronobogwi a’ge wa’gun onogorlok en hun-hundomok togolik onue enarilak oruak o’gwe ebano lagalat, hun-hundomok en onowi edip lobok hweiye bogolil lagalat, tuak o,” oluk, egeimu en mo’gulhentegis ai o.
Israel a’ge togolik wom wene
17 “Singa en domba mukho ’bullak enebasuam hundomok ’bulogo yarluk ogulat no’gwi ’gela’ge, Israel a’ge asogoat ’bullak onobogulat, nadugat is Asyur a’ge onue ’gain en emdema yagat enebiselat, toluk, yogodak ogo, is Babel a’ge onue ’gain Nebukadnezar en onuak derlelogo nasulat, tegisa o,” oluk, egei o. 18Asogoatma re, at anni modok welago a’ge Israel enaik At Allah ’gain Onuk Logo a’ge en egei e, yuat o. “Is Asyur a’ge onue ’gain en tagenebesi ano pam an en e’gin at ebam pegi ai ’gela’ge, Is o Babel a’ge onue ’gain emin asogoat wiak enebam pouwa a’geat de, 19Is Israel a’ge nak e, wogonoboluk togolik enagan e’gela nogu legesema ebano onobou weikmu o Basan eba emin, dom Karmel eba emin, enagan e’gela nil nogulat, dom-dom sebelak o’gwe Efraim eba emin, Gilead pam emin, nil no’gulat, onogum tagenebasuam, mo ogulat, togu lema o,” oluk, egei o. 20At ’gain Onuk Logo a’ge Allah en eselat, “Agauwa ai erlige tik o, oluk, mo’gulentegis ai erlige an en pema ’bulogo paik a’ge ebano onowiak erlagapsogo paikmu re, aphwami en, Israel a’ge wiak disogo tegisa o, oluk, palo tua a’geat de, tu erlakhwe nak ontogulat, ye, is Yehuda a’ge ogo, wiak disogo tegisa o, oluk, ua a’geat de, tu erlak nagat ontogulat, tua o,” oluk, egei o.
Is o Babel a’ge e’gin enebam po wene
21“O Merataim loluk weim til ’gogulat, aphwami o Pekod oruak a’ge ebano enebe wusogo onobogulat, tuak o. Wusogo onobogulat enebe erlagap onobogulat, mo’gulentegis a’geat hegitsogo togulat, togu lemak o,” oluk, At ’gain Onuk Logo a’ge Allah enat egeimu en mo’gulhentegis o.
22“O eba weim la’guk eselat, o wiagap pil lagalat, asogo togulat, eniak il lagai a’ge ano holil lagai o. 23At Babel ai re martelu ’gela’ge at welat, nadugat o’gwiang pam yema di aphwami yu aphwami ena’gul oluk lo’bok ’berlegat erlagapsogo enebesi ano ’gela’ge, yogodak ogo at Babel martelu o’gwi a’ge ano en, at u’gwearegat onuk erlagapsogo poluk oruak yu nogorlok o! oluk, ogu legesa.
24At Babel ai, An ’gain Onuk Logo a’ge Allah sebelak nebasulat tegei ai pam baik ogorlop ’gotnoksogo wathouwagoluk herle pogwi ai ’gela’ge An en at takpo a’ge herle pegimuat de at eperlagat lasumu, ogorlop pam ’gotnok egeitik oruakma, tenak pegi o. 25An ’gain Nonuk Logo nanni modok welago a’ge Allah en aphwami o Babel a’ge welagaimu eba mesik tu a’ge agama re, An nogodok nesegen pasumu ’goduk hwerik poluk, nolot het en o Babel mesik takpo a’ge paget, segen wokho lebikpou wagama re, 26Erabu akhit en orogobu akhit en wali’gogo, o Babel sebelil ’guagalat, at gandum pasu akhit ’goduk husogo pei lagalat, gandum e’gen daganak odoksogo lagabak pogwi ’gela’ge, is enebe wusogo lagabak onobogulat, pema ’bulogo ugonobo erlakma en ’berlegat erlagap onobogulat, tua o. 27Ye, sapi ierak a’ge erlele wo erlakma en ono’gorlop baluogoluk woluk lagai ’gela’ge, enarilak enesegen oruak enanni wiak a’ge ebano ugonobo erlakma en ’berleksogoat wusogo onobogulat, tuak o. Is aphwami o Babel a’ge tagonobo erlige agauwa lau wagalat, tegisa a’ge ogo enebam po erlige arat horok lau wagalat, tegeimu re, enebe nede o!
28Is aphwami pema o Babel en arat enagap delhorloluk hweiye o Sion wegesarik enelaluk oruak a’ge ebano en disogo egesa, At Nenaik ’gain Onuk Logo a’ge Allah en is Babel a’ge tegisa ano ogo tagenebasulat, at owi werik wiagapsogo pegesa a’ge ogo takpasulat, tegei, a’ge, belo’gogwi ano enesago holuak o.
29 #
Wah. 18:6
O Babel ai, ede en logo pasulat, An mu ago erlak nomu degelak a’ge Israel enaik an Allah ano mi-maben taknebegesema re, is ap weim enanni a’ge emin, enesegen oruak a’ge emin, en o Babel sebelumagoluk, yogo onobou wak o. Asogo waga lemarik, mesigat nak ogo mesik enagap delak ’bogologumu no, oluk, o Babel onowi sabo lik-loksogo at ut horlogulat, at en tago a’ge ogo hegitsogo takpogulat, at en tagenebil lasu laga ’gela’ge, at asogoat takpogulat, tuak o. 30Asogo togwiam, is eneiyagai logomalik souwe waronobogwi a’ge e’bela ’gwe en waretil lagalat, agauwa ai erlige at osi enesegen oruak a’ge ’berlegat waronobogwiam eniak dageselat, tua o,” oluk, At ’gain Onuk Logo a’ge Allah enat egei o.
31At Nenaik ’gain Onuk Logo anni modok welago a’ge Allah en eselat, “At ede en logo pasu a’ge ai, demat nemin selei a’ge emin hwerlirakma re, at takpo a’ge agauwa horok etil wagalat, tegei ogo e’gin a’ge ebam po erlige horok lau wagalat, tegeimu re, 32At ede en an elit oluk logo pasu a’ge ai, oyuk a’gul dungsogo wathorlouwama re, is logon en at ha’boksogo edikpouwa modok erlagat o. At owi kota-kota odouk ’gwelabil laikmu re is o’borl-o’borl welema a’ge ebano ’berlegat perlengsogo nil louwa o,” oluk, egei o.
33At ’gain Onuk Logo anni modok welago a’ge Allah en eselat, “Is aphwami Israel a’ge emin, Yehuda a’ge emin, sebelak onoboluk, oruak o. Is wogonoboluk enebeil legesa a’ge en ugonobo a’ge enebirap poluk, sebelak onoboluk modok oruak o. 34Asogo takpoluk oruak a’geat de, An delogo lielak enebasu legi a’ge, nanni oruak a’ge, nonuk e, ’gain Onuk Logo nanni modok welago a’ge an Allah at o. An enat is Israel a’ge ono’gwiang pam welat, ono’borlogouk erlak wolom a’ge tagenebasulat, ye, is o Babel oruak a’ge nak e, ono’borlogouk oruak a’ge tagenebasulat, tuagoluk, Israel a’ge onowene opsogo a’bosu ’balogo pasu leik o,” oluk egei o.
35Asogoatma re, At ’gain Onuk Logo a’ge Allah en eselat, “Wa’gun en is Babel a’ge nasulat, is aphwami o Babel oruak a’ge emin, o kota Babel welagai a’ge emin, onuelak onu’gwarek a’ge emin, enaiklak enede oruak a’ge emin, wa’gun en, nasulat, 36Wagun en ap ene’ben ’gela’ge tago a’ge ebano uo-’buo tak enebasulat, wa’gun en is ap weim togwi enanni a’bik a’ge ebano enede nelak pasulat, 37wa’gun en is ono kuda emin, ono’gwiang so emin, moluk-melaktak pasulat, wa’gun en is ap at osi enesegen oruak a’ge ene’gerlakma negarlok-hegarlok oruak a’ge ebano hwami ’gela’ge tagenebasulat, wa’gun en ena’ge-a’ge ogo lok odoksogo oruak a’ge ebano, hogul woluk lebemagoluk, takpasulat, 38O Babel ai, dogwi asua ogut hele’gik a’ge a’bigat oruak a’ge ebano, onogorlok en onuak lup bo pogulat, enede balagalat, togumu re, wa’gun en enegeik lasu a’ge ebano deng uagoluk, takpasulat, tuak o.
39 #
Wah. 18:2
Asogoat tuama re, seiye hogobi o leimu a’ge emin, orlomene parema a’ge emin, sue ’guga emin, o eba onowi bal hwerla ’guama re, aphwami o eba mesik wolom erlakma en modok o wogoat oruakma en modok, aphwami dagetil waga lema o. 40#Kej. 19:24,25O nadugat at Allah en o Sodom emin, Gomora emin, o kota o’borl-o’borl welagai a’ge ebano emin, ’berlegat erlagapsogo pesi ai ’gela’ge, o Babel ai, erlagap pou wama re, o eba is aphwami mesigat nak ogo mesik welema erlak o wogoat welema o,” oluk, at ’gain Onuk Logo a’ge Allah enat egei o.
41“Is ap weim togwi a’ge a’bik logolak o abel erabu akhit o’gwe en wagalat, aphwami ena’gul onuk lok modok a’ge wagalat, ap ’gain-’gain lo’bok o esago-esago eba in et til lagalat, asogo tua o.
42Enesegen onogodok emin, onuwa’gun pit emin, leik-louktak poluk wagalat aphwami enedeap onobo erlakma en ebakhenneat wagalat, ik yegelak a’ge laut o’borlogouk orlu oso ’gela’ge, ono kuda pam hurotluk wagalat onoyuk o’borloguk ’golok-golok osokhwe wagalat, o Babel emalik agalogo ’gela’ge is Babel a’ge ai waronobuogoluk pobuk naduk ma takpoluk wagalat, togwi ai o.
43At ap is Babel a’ge onue ’gain ano, is wagai a’ge esa’go holholuk, alo’gwe selang eselat, ede modok erlak agalat, at de malik doru a’ge horok agoam nonouk wiaksogo togwi ai ’gela’ge, nonouk tagalat, tago yo.
44 Singa ik Yordan olomu ik e’gen o’gwe en liplau wotluk, domba emalik annisogo oruakma ebam ligago ’gela’ge, An inagalat, is o Babel oruak a’ge ebano e'girl-pa'girl sogo lebik enebaik o. Lebik onoboluk, ap mesik pulogo edikpaikmu wene mo’gulentasulemma re sa en An nemin hegitmu re nemin walhasulat, hat ai, no paget tigen o? oluk, sa en An mo’gulneselat, ye, is domba degelonobogwi a’ge mesik sa en An en tik epasu a’ge ano ’gwe ’belakpasulat, tua epegep? Modok erlak at o,” oluk egei o. 45Asogoatma re. At ’gain Onuk Logo a’ge Allah en o Babel takpo a’ge ano hwalogo pasulat, ye, is o Babel oruak a’ge tagonobo a’ge hwalogo pasulat, tegei a’ge yu, hologu lemis o. Domba emalik ’gela’ge, enemalik logomalik hwelani ebano lisogo lebik enebasulat, ye, domba enagan e’gela nil no’gwi ’gwe ’gela’ge is welagaimu eba modok wiagapsogo pasulat, tik o. 46O Babel sebelhwerla ’gu aga o, oluk, ngai wai ogulat togwi ano pam ’gwiang erlik eselat, lo’gu ye-wo ogwi ano, di aphwami yu aphwami oruakma en il lasulat, tua o.
Currently Selected:
Yeremia 50: Wul
Highlight
Copy
Compare
Share
Want to have your highlights saved across all your devices? Sign up or sign in
