Hakim-hakim 14
14
At Simson emin, hwele owi Timna a’ge emin, e’birek en togu legesa wene
1Anni asogo wogosokhwe, at Simson agauwa mesik pam, o Timna lagarik, hwele Filistin a’ge eba oruakma il hesi. 2Asogo il holuk, togolik owi pam wagarik, at aik emin, ia emin, e’birek disogo mo’gulentesi,
“An hwele Filistin a’ge o Timna oruakma nil hegi o. Holuk e, an nugwe ai wai loluk woknorogup en mo’gulhentegis o,” oluk mo’gulentesi.
3Asogo mo’gulentesimu, is en e, disogo mo’guligisa,
“Hwami nis nonu’gwarek a’ge de a? Mesik aphwami nis Israel a’ge ’berlegat de a, elit wo a’ge erlak en, is aphwami Filistin a’ge enebe enagap ene’gerlimu a’ge ’balogwi erlak a’ge eba de, nis en, hwe is a’ge wai lo ebele e’gen ai nopaget,” oluk mo’guligisa.
Asogo mo’gulegisema, at Simson en e, aik disogo mo’gulesi,
“Asogo an nugwe hwe Filistin a’ge aiyat nagai en woknerinogoluk mo’gulhegis o,” oluk mo’gulesi.
4Asogo mo’gulesi eria hegit e, aphwami Filistin a’ge en Israel a’ge tenentarok welegesa ai en, at Nenaik ’gain Onuk Logo a’ge en e,
“Aphwami Filistin a’ge ai no pam en warenebeli e,” oluk epasulat,
“At Simson en asogo tuak,” oluk ede ’gagalisokhwe at Simson en egei a’geat de, at aik eperlagat welaga.
5Asogo tigisarik, at Simson aik ia emin o Timna legesa. Lagalat, yabuk anggur yabuk mesik oruakma eba laga ’gal, at Simson mene orlomene ’gela’ge onuk singa ano a’ge ebe owan a’ge mesik iak lurak wagoma e’birek sarlok tigisa. 6Asogo e’birek sarlok tigisarik, at Simson Nenaik ’gain Onuk Logo a’ge en anni erianoat wogesimu, wam kambing emalik a’ge woru ’gela’ge, singa ano e’gik en derlep-derlapsogo weregei. Asogo weregeitik, at en e,
“An asogo tegis o,” oluk aik ia mo’gulonto erlakma en mo egei.
7Asogo mo oluk, at Simson hwele ano e’bek lagarik emin weneane ogu legesarik, ebe agaiat epesi. Asogo tigisarik owi pam togolik waga. 8Wagarik, agauwa wei nak logon welagarik en hwele ano ebe waigoluk e, lagayat. Lasulat, mene singa weregei a’ge ano il haiogoluk ebela ’gwi-’gwani hai laga. Hai lagarik, ’gwelakhesi ’gal e, singa werak ano ogola ’gin ia a’bik welat, ’gin a’bosu oruakma il hesi. 9Asogo il hesirik, ’gin a’bosu e’gik en orlogom hesirik ebela ’bekhit lasulat logon nil-nil laga. Lasulat, ’gin a’bosu ado aik ia wogentai lagama ne’gesa. Asogo wogentesimu ne’gesa a’ge de,
“’Gin a’bosu yu mene singa werak a’ge ogola pesirikmu odoktegis a’ge o,” oluk mo’gulonto erlagat.
10Asogo mo egeimu, at Simson aik hwele ano owi pam lagama, is eba ap souwe a’ge en togu legesa a’ge hegitsogoat e, at Simson ugwe waigoluk seni seregei. 11Asogo tegeimu, is aphwami Filistin a’ge en ap souwe a’ge enebe 30 at Simson arilak emin welemagoluk pulogo enebegesa. 12Asogo enebegesema, at Simson en is disogo mo’gulentesi,
“An wene mesik o’go mo’gulnorogup en mo’gulhentaik. An en mo’gulhentasuam, his en o’go heratogup holuk, an en o’go henebe lo’bok sum kain asu erlebetak op onuk linen a’ge ’belak mesigat, ye, ’bogoyum op a’ge ebagase sum emin, a’ge sum emin, ’biren hegeik, wokhentaik o. Holuk e, seni yu sorogulat, agauwa hebarlik pam ogola o’go u a’ge heratogu loroguptik en, agauwa akhen sabit pam e, ebe mo’gulnorogup en henebam pegi o. 13Asogo a’geat de, his en wene ebe o’go mo’gulnorogup erlak holuk e, his henebe lo’bok en sum kain asu erlebetak a’ge op onuk linen ’belak a’ge mesigat, ye, ’bogoyum op a’ge en ebagase sum emin, a’ge sum emin, ’biren hegeik, woknorogup o,” oluk mo’gulentesi. Asogo mo’gulentesimu, is ap Filistin a’ge ebano en e, disogo mo’guligisa,
“Elit o. Holuk e, wene ai ebe mo’gulnentemin o,” oluk mo’guligisa.
14Asogo mo’gulegisema, at Simson en e,
“Di a’ge yu a’ge nasu a’ge ai ogola en, no’gwi a’geat libago yo. Ye, anni a’bik a’ge ogola en e, oduk op a’ge libago ai, ebe no a’ge no?” oluk mo’gulentesi.
Asogo mo’gulentesimu re, is ap ebano wene ai o’go agauwa henagan heratigisa a’geat de,
“Ebe asogo a’ge paget egei yo,” oluk heratigisa a’ge re, modok hwiaru erlak.
15Holuk e, agauwa akhen ugan a’ge pam en e, Simson ugwe ano disogo mo’guligisa,
“Hat hogun en wene ai o’go ebe mo’gulnontuagoluk, ede ’gagalin o. Hat en mo’gulum erlak mo ogun holuk e, hat hebe emin, aphwami haik owi pam welagai a’ge ’berlegat emin, owi hisarogulat wathonobul o. Nis nena’ge di a’ge yu a’ge ’berlegat erlak emagoluk yo’go nenebegen de a?” oluk mo’guligisa. 16Asogo mo’guligisa ai en, at Simson ugwe ano ogun e’bek nge til-til lagarik e, disogo mo’gulesi,
“Hat en an nebe hede erlak hebit ai an naluk o. Hat en wene ai an norokhwi en ebe heratuagoluk mo’gulentigen a’ge de,
Ebe disogo a’ge paget egi, oluk an mo’gulnorogun erlak holuk e, hat en an nebe hebit modok taknebagun hegi o,” oluk mo’gulesi. Asogo mo’gulesimu, at Simson en e,
“Mo in. An naik nia a’ge ogo re, e’birek mo’gulonto erlagat welegi a’geat de, hat nak e, nopaget mo’gulhemagoluk mo’gulnigen,” oluk mo’gulesi. 17Asogo mo’gulesimu, seni ano sorogulat agauwa sabit a’ge pam welat, at Simson ugwe ano nge tago modok welaga. Asogo welat, ogun ’gonu mo’guleselat orlumamit ’balogo,
“Mo’gulnemin o,” oluk ningsogo mo’guloso modok welagama agauwa mesik sabit ai pam en e,
“Wene ai ebe asogo a’ge paget mo’gulentegis o,” oluk ’baksogo mo’gulesimu, pobuk is ap Filistin a’ge ebano mo’gulentesi. 18Asogo mo’gulentesimu, is ap o kota ano a’ge ebano en, o mo owan ’goboksogo ’gu erlak oruakhwe Simson disogo mo’guligisa,
“’Gin a’bosu oduk weisogo mia ’gela’ge a’geat de, oduk modok ebe op a’ge mesik welago no? Ye, mene singa wei anni erlak ’gela’ge a’geat de, anni modok a’bik a’ge mesik welago no?” oluk mo’guligisa.
Asogo mo’gulegisema, at Simson en e,
“His en an nugwe ede ’gagalu erlakhwe, wene an mo’gulhentegis a’ge ai ebe,
Disogo a’ge paget egen, oluk mo’gulnetlip ogo erlagat o,” oluk mo’gulentesi.
19Asogo mo’gulentasukhwe erianoat, at Simson Nenaik ’gain Onuk Logo a’ge en anni wogesimu anni agarik e, o Askelon laga. Lagarik, ap enebe 30 en ono’bogoyum op ’buktak a’ge warenebegei. Asogo warenebegeitik, ono’bogoyum ebano ap enebe 30 enat wene o’go heratigisa a’ge ebano wogentau waga. Asogo toluk, at Simson olot het modok welat owi pam waga. 20Asogo wagama, at Simson ugwe ano aik en ap mu a’ge Simson emin hwe ebe wogogulat welegesa a’ge ebano mesik wogesi.
Currently Selected:
Hakim-hakim 14: Wul
Highlight
Share
Compare
Copy
Want to have your highlights saved across all your devices? Sign up or sign in
