Hakim-hakim 13
13
At Simson ebe dagaga wene
1Aphwami Israel a’ge en Nenaik ’gain Onuk Logo a’ge iak sagalogo ukpoluk pobuk wiagat tigisa. Asogo tigisema, at en e,
“Aphwami Israel a’ge yu aphwami Filistin a’ge en ene’gik pam tenentarok 40 tahun welemak o,” oluk enebe ugenebesi.
2Eria hegit e, ap mesik onuk Manoah, a’gul onuk Dan a’ge, o kota Zora welaga. At ai ugwe ebe abeli welaga. 3Asogo oruakhwe, o agauwa mesik erlige re, Nenaik ’gain Onuk Logo a’ge malaikat a’ge mesik orogolema inlau wagarik e, disogo mo’gulesi,
“Hat naduk enat ’bekhit yogodak hwerli malik mesik dagonobu erlagat welegen o. Asogo welat e, agauwa wolom erlakma enat hemalik hogola emarik, abat dorogun ani o. 4Ai en e, hebabut heberlogo wolomup o. Ik anggur a’bosu emin, a’bosu enede ’baluagoluk no’gwi a’ge mesik emin, no’gulat, di a’ge yu a’ge no puk a’ge yogunat no’gulat, togulom modok mia o. 5#Bil. 6:1-5Hat hemalik ai hogola ema hwerli en e, at Allah u’gwarek ebaget welema a’ge, oluk u ’gela’ge, a’gul onuk Nazir a’ge welema ai en e, ebe dagago holuk e, asu modok ’balogulom mia o. Asogoatma re, his aphwami Israel a’ge is aphwami Filistin a’ge en tenhentarok oruakma, yabuk naduk tenhogwi ’gela’ge, at en delhenebigoluk naduk-naduk edip tenak pouwa o,” oluk mo’gulesi.
6Asogo mo’gulesimu, at Manoah ugwe ano togolik ogun e’bek lagarik e, disogo mo’gulesi,
“Hun yu, nonue ’gain Onuk Logo a’ge en yo’go peragonobou wago a’ge mesik an ne’bek wagarik o. At ai ebe Nenaik ’gain Onuk Logo a’ge malaikat a’ge ’gela’geat wagama re, an modok nogorlok aga o. An en e,
Hat hebe o ’geba en wegen, oluk hin wokho erlakma re, at en e,
An nonuk ai, oluk mo’gulnum erlagat o. 7Asogo a’geat de, at en e,
Hat hemalik hogola oroguntik, abat dorogun o, oluk mo’gulnesirik mesik disogo mo’gulnesi,
Hemalik ai hogola ema ai hwerli en e, ebe pobuk warema ai hwerli, ebe Allah u’gwarek ebaget a’gul onuk Nazir a’ge welema ai en e, hat ik anggur a’bosu emin, a’bosu enede ’balomogoluk no’gwi a’ge ai logon emin, di a’ge yu a’ge modok no puk a’ge logon emin, nasulom modok mia o, oluk mo’gulnesi o,” oluk mo’gulesi.
8Asogo mo’gulesimu, at ogun Manoah esa’go hwelegeirik e, se’ban Nenaik ’gain Onuk Logo a’ge disogo mo’gulesi,
“’Gain Honuk Logo a’ge naik o. Nis en malik ai dagotluk tagalom a’ge paget, wene se’geksogo mo’gulnontuagoluk, heragam a’ge ai pobuk yo’go poluk nenebaget perakpou manup o, naik,” oluk mo’gulesi.
9Asogo mo’gulesimu, Allah en e, at Manoah iak esa’go hwelegei. Asogo hwelegeirik e, at malaikat ano perakpou waga ’gal e, at Manoah ebe erlakma, ugwe nak yabukmu hweriogo oruakma, e’bek waga. 10Wagama re, hwe ano ogun e’bek pungtak wagarik, disogo mo’gulesi,
“Hun yu, yethemin! Ap naduk ne’bek waga a’ge ano yogodak ogo waga o,” oluk mo’gulesi.
11Asogo mo’gulesimu, at Manoah perleneat ugwe e’berlik laga. Lagarik, ap ano disogo mo’gulesi,
“An nugwe wene mo’gulosu e’gen ano hat en a?” oluk hin wokhesi. Asogo hin wokhesimu, at en e,
“Demat o. An enat mo’gulegis o,” oluk mo’gulesi.
12Asogo mo’gulesimu, at Manoah en e, disogo mo’gulesi,
“Pobuk hat en wene e’gen a’ge ai hegitsogo demat ago holuk, malik ai en no’gosogo tagalom no. Pobuk at ebe no’gosogo welema no,” oluk hin wesi.
13-14Asogo hin wesimu, at Nenaik ’gain Onuk Logo a’ge malaikat ano en e,
“Hat hugwe en e, ik anggur a’bosu emin, a’bosu enede ’balemagoluk no’gwi a’ge logon emin, di a’ge yu a’ge anggur e’gen a’ge de, togwi a’ge logon emin, di a’ge yu a’ge no mia a’ge emin, nasulom modok miayat o. An en,
Hat disogo taga lomup, asogo taga lomup, oluk mo’gulegis a’ge ebano ’berlegat hegitsogo nak taga lemak o. Ai mesik tu erlakma en ukpou wano oluk, ebabut heberlogo welemak o,” oluk mo’gulesi.
15Asogo mo’gulesimu, at Manoah en e, disogo mo’gulesi,
“Nis en hat hebaget wam kambing owan a’ge mesik wusogo sakho wokhosu mulmu re, hat ya yetnentarok wolorogun en mo’gulheige o, nue,” oluk mo’gulesi.
16-17Asogo mo’gulesimu, at Nenaik ’gain Onuk Logo a’ge at malaikat ano en e, disogo mo’gulesi,
“An yema his yethentarok weleik a’geat de, hat en an nebaget wam sorogun a’ge ai, naik erlagat o. Asogo a’geat de, hat en serik egentikmu re, ai Nenaik ’gain Onuk Logo a’ge paget narlogup a’ge paget soroguntik e, at obomup o,” oluk mo’gulesi.
Asogo mo’gulesimu, at Manoah en e,
“Ai Nenaik ’gain Onuk Logo a’ge malaikat en mo’gulnesi o,” oluk pobitu erlak ai en e, disogo mo’gulesi,
“Wene hat en mo’gulnentigen ai pobuk demat ago holuk e, nis en erliksogo hau wathobuogoluk, hat honuk mo’gulnomup o,” oluk mo’gulesi.
18Asogo mo’gulesimu, at Nenaik ’gain Onuk Logo a’ge malaikat ano en e, disogo mo’gulesi,
“An nonuk u mia o. Elalin a’ge tualnebigisarikmu re, nopaget haluk eigoluk en hin wokniegen no,” oluk mo’gulesi.
19Asogo mo’gulesimu, at Manoah wam kambing owan a’ge mesik emin, gandum e’gen wei logon emin, emin wai lotluk woluk wagarik helep o’borl pam pesirik e, nenaik ’gain Onuk Logo di a’ge yu a’ge elalin tago a’ge ano ebesirik wusogo narlesi.
20-21Asogo pesirik narlesimu, odouk magale eba en ligagokhwe, at Nenaik ’gain Onuk Logo a’ge malaikat ano odouk ano magale e’gerlakma en ’bogorl pam ligagokhwe, at Manoah ugwe emin en enil hegesa. Asogo hegesarik e, at Manoah en e,
“At ai re, Nenaik ’gain Onuk Logo a’ge malaikat a’geat hegi o,” oluk pobi tegeirik, ugwe emin ondogorlu pam en onorogole sogup ’gwiangma sakhunsogo ’bou tigisarik Allah erliktigisa. Asogo erliktigisarikmu en, malaikat ano pobuk enil ho erlakma en welegesa.
22Asogo tigisarik, at Manoah en ugwe disogo mo’gulesi,
“Nis Allah nenil hege ai en, nenebe demat waromul hegi o,” oluk mo’gulesi.
23Asogo mo’gulesimu, at ugwe en e,
“Allah en nis nenebe watnenebiogoluk wellepma re, nis en at ebaget pegerik narlige a’ge eba wellep erlagat o. Ye, nis nenil houwagoluk tegeimu hege a’ge ai ogo holo erlagat o. Ye, di wene yu wene mo’gulnentesi ai, mo’gulnentelep erlagat o,” oluk mo’gulesi.
24Asogo mo’gulesimu welegesarik en, at Manoah ugwe ano emalik logomalik dakhwerlesirik, onuk Simson tualegei. Asogo deregeimu, malik ano arlue agokhwe, Nenaik ’gain Onuk Logo a’ge en ebe op welemagoluk ’gwelakharok welaga. 25Asogo oruakhwe, at ebe aphwami ena’gul onuk Dan a’ge onowi sum owi o kota Zora ho’gorlak, Esytaol ho’gorlak, ’burl eba oruakma, yabuk naduk tenhogwi ’gela’ge, Nenaik ’gain Onuk Logo a’ge Arogun enanniap pasu leigoluk, naduk anniap pasu laga.
Currently Selected:
Hakim-hakim 13: Wul
Highlight
Share
Compare
Copy
Want to have your highlights saved across all your devices? Sign up or sign in
