Hakim-hakim 15
15
1Asogo toluk agauwa mesik welegesarik en, gandum e’gen ’balu erlige, at Simson wam kambing emalik owan a’ge mesigat nak ugwe wogeigoluk woluk laga. Woluk lagarik, ugwe aik ano disogo mo’gulesi,
“An nugwe emin lo’bok ul en e’bek ’gwigoluk en mo’gulhegis o,” oluk mo’gulesi. Asogo mo’gulesimu, at ugwe aik ano en e,
“Op o. ’Gwin o,” oluk mo’gulum erlak. 2Asogo mo egeitik, at Simson disogo mo’gulesi,
“Hat en ebe modok hebit en taga legen hwi a, oluk, at ebe hat harilak ebano a’ge mesik wogegismu o. Asogo tegistikmu re, at orogole weiyat wiak a’geat de, ot nak e, orogole op modok o. Holuk e, ot on hat wemin o,” oluk mo’gulesi.
3Asogo mo’gulesimu, at Simson en disogo mo’gulesi,
“An en his aphwami Filistin a’ge henebaget pobuk tik ai edip an wiak pam tik puk. His wiak pam o,” oluk mo’gulentesi. 4Asogo mo’gulentesirik, mene orlomene ’gela’ge enebe esan 300 a’ge tenagenebei laga. Asogo tenak pesirik, ’biren lo’bokhegeik nak akhen agea’gum wik-wok akhen pam herle hettak pil laga. 5Asogo hetsogo-hetsogo pil-pil lagarik, esaga ebe heberlogo-heberlogo a’ge pam poluk pesirik, aphwami Filistin a’ge eniabuk o’gwe perakpesi. Asogo perakpesimu, aphwami Filistin a’ge onso’boru gandum e’gen ’belak a’ge ’berlegat odouk en nasulat, gandum emin, anggur emin, e zaitun emin, yabuk o’gwe yogo a’ge eminat odouk en ne’gei. 6Asogo ne’geimu, is aphwami Filistin a’ge en e,
“Ai sa en tegei,” oluk hin wil legesa. Asogo hin wil lagaimu, aphwami logon en e,
“Simson ugwe ano aik o Timna a’ge ano en at Simson arilak ebano a’ge mesik wogesimu re, ai paget Simson en tegei o,” oluk egesema wene edip lo’boligisarik e, is en e, Simson ugwe ano emin, aphwami aik owi pam welegesa a’ge ’berlek emin, enebe o emin witak pegesema enebe eminat perlengsogo e ne’gei.
7Asogo tigisema, at Simson en ap Filistin a’ge disogo mo’gulentesi,
“His henebabut asogo togu legep a’ge anoat tigep hegi. An en his en watnenebigep a’ge ai ena’gulmu wathonobu erlakma en, an no’borlogouk erlak wolom e, nebit o,” oluk ho’buk ’balogo mo’gulentesi. 8Asogo mo’gulentesirik, pobuk olot het pam is aphwami Filistin a’ge warenebigoluk lagarik enebe a’bigat warenebegei. Asogo waronoboluk, at ebe helep onuk Etam owikmu wagarik hisogo welaga.
Simson en aphwami Filistin a’ge mabenap onoboluk warenebise laga wene
9At Simson asogo hisaklau wagarik oruakhwe, ap Filistin a’ge aphwami Yehuda a’ge onowi pam wegesarik e, onowi sum owi eba werigisa. Asogo werigisarik, o kota Lehi larigisa. 10Asogo o larigisema, aphwami Yehuda a’ge en e,
“His en nis watnonobuogoluk o latnenebigep ai, nopaget,” oluk hin wogentigisema, is en e,
“Nis e, at Simson en taknenebasu ai ’gela’ge tul en, ebe tenak pouwogoluk wege o,” oluk mo’gulentigisa. 11Asogo mo’gulentigisema, aphwami Yehuda a’ge enesa’go hweligisarik e, ap enebe 3.000 pam esan logolholuk helep onuk Etam eba at Simson ebe owikmu oruakma e’bek legesarik e, disogo mo’guligisa,
“Aphwami Filistin a’ge en nis sennentarok oruak ano heperlak agalat yema welegen a? Hat en nis no oluk asogo taknenebasu legen,” oluk mo’guligisa. Asogo mo’gulegisema, at Simson en e,
“An e, we, is aphwami Filistin a’ge en an lalnebigisa ai en o’go paigoluk taga legi o,” oluk mo’gulentesi. 12Asogo mo’gulentesimu, is ap ebano en e,
His en e,
“Nis e, hat he’gik herle wusogo aphwami Filistin a’ge wogentai louwogoluk wege o,” oluk mo’guligisa. Asogo mo’gulegisema, at Simson en e,
“His en e,
Nis e, hat wathobul modok erlak, oluk ho’buk ’balit da,” oluk mo’gulentesimu is en e,
13“Op o. Nis en hat hebe wathobul modok erlak o. We, he’gik herle nak wusogo hebe aphwami Filistin a’ge wogontouwogoluk wege o,” oluk mo’guligisa. Asogo mo’guligisarik, Simson ebe herle ’get erik a’ge pam e’gik herle werigisarik, owikmu ebano en woluk legesa.
14At Simson ebe asogo herle wusogo woluk o Lehi wegesema, aphwami Filistin a’ge at e’bek ’gogulat, eniak amitmit sup oluk ’gwigisa. Asogo ’gwigisema, erianoat Nenaik ’gain Onuk Logo a’ge anniat Simson wogesimu anni agarik, e’gik herle werigisa a’ge ano herle, we, e narlik a’ge ’gela’ge daksogo ’belebak pesi. 15Asogo ’balogo ’belebak pesirik, wam keledai mesigat a’ge ’gerat waraga a’ge agaukhwak uak pi-palo wesirik e, ano pam aphwami enebe 1.000 a’ge ’be’gi warenebegei. 16Asogo warenebegeitik e, weni disogo weregei,
“Wam keledai agaukhwak uak pam o,
ap enebe 1.000 a’ge o,
modok ’be’gi warenebegis o,
Wam keledai agaukhwak uak pam o,
enebe warenebegistik o,
enebe werak odoksogo enebegi o,”
oluk weni weregei. 17Weni asogo weregeitik, wam keledai agaukhwak uak ano woroksogo hwikhai laga. Asogo hwikhesi ano en o eba onuk Ramat-Lehi, oluk tualigisa.
18Pobuk at Simson ik nele a’bik agama, iak loksogoat Nenaik ’gain Onuk Logo a’ge disogo mo’gulesi,
“Naik o. An heragam a’ge nanni emagaluk yogodak yayat taknebegenma, aphwami enebe modok a’bik mabenap enebegirik warenebegistik e, yogodak an ik nele en waromma aphwami Filistin a’ge hat eneperlak a’ge yema en an nebe werak tennio nebit o, naik,” oluk mo’gulesi. 19Asogo mo’gulesimu, at Allah en e, helep dom o Lehi eba a’ge ele pollak pesimu, ik elaruk liplau wagama re, at Simson ne’geitik, naduk ebam yamuktak welaga ’gela’geat yamuk egei. Asogo tegei ai en ik elaruk ai onuk,
“Ik Hakor elaruk liplau wagoma o,” oluk tualigisa. Ik elaruk ai yogodak ogo o Lehi eba liplau wagoat oruak.
20Aphwami Israel a’ge is aphwami Filistin a’ge en tenentarok oruakhwe, at Simson aphwami Israel a’ge onue ’gain 20 tahun tenentarok modok welaga.
Currently Selected:
Hakim-hakim 15: Wul
Highlight
Share
Compare
Copy
Want to have your highlights saved across all your devices? Sign up or sign in
