Yehezkiel 6
6
O Israel dom-dom takpouwa wene
1At Allah en an mo’gulnesi ano re, yuat o.
2“Aphwami en dogo a’ge yu o. Is Israel a’ge welagaimu dom-dom ebano edipmu hil yethasulat, tagonobo a’ge mo’gulentasu lomup o. 3Asogo mo’gulentasulat, his dom-dom o Israel welegep a’ge yu logwe!, At ’Gain Onuk logo otok modok welago a’ge en wene mo’gulhentasu a’ge yu, henesa’go opsogo hologu lemis o. His dom-dom emin, duk-duk emin, dom edipmu welegep a’ge emin, o do’go-do’go emin, his yu logwe, At otok modok welago a’ge Allah en eselat, is pam en welagai a’ge ai wa’gun pam wusogo enebasulat, is pam en wusogo wogogwi a’ge ebano erlagapsogo pasulat, tigoluk tagoma re, 4Is pam enasua ebaget wusogo wogogumu ebale hele’gik a’ge ano moluksogo pasulat, is pam en e’ben op ago a’ge odouk narlogumu hele’gik a’ge ebano ’goluk-’gelaksogo pasulat, is pam enasua ogut hele’gik a’ge onowi ebano, is enemalik wusogo enebi lagalat, tua o.
5Is Israel enebe werak a’ge ebano, enasua ogut hele’gik a’ge is enebam oruakma eriano enat hwik-hwak entil lasulat, onuak ’gellik oruak a’ge ebano enasua ebaget wusogo wogogumu ebano is enebamat hele’gik oruakma re, o o’borl-o’borl ebano ’bullogo yarluk tagenebil lasulat, tik o. 6Dom-dom petne ebano, o kota-kota werik oruak a’ge ebano moluk-melaksogo pasulat, wusogo wogogumu wetil ligegesa a’ge ebano moluksogo pasulat, tuama re, enasua paget wusogo wogogumu is enebam en hele’gik a’ge ebano moluk-melak eselat, di iak yu iak dengsogo erlak agalat, is enebam en enasua ogut hele’gik oruak a’ge ebano, ’bullogo lasulat, wiagat agalat, is pam en e’ben op-op a’ge odouk narlogumu hele’gik a’ge ebano moluksogo ’biselat, is pam en takpil legesa a’ge ebano ’berlegat erlak pasulat tik o. 7Ye, eneiyagai enebe werak is pam en ’gelil etil lagai holuk, Allah Anat enaluk ema o.
8Asogoat takpo a’geat de, is ado wa’gun e’gat pam en mesik ’gigik ’bogolua a’ge ebano di aphwami yu aphwami ene’gerlakma enelaluk welemagoluk, tagenebasuam, is di owi yu owi ebayat yarluk etil louwa o. 9Is yarluk etil louwa a’ge di aphwami yu aphwami hogul wogonoboluk enebei loma ene’gerlakma eba welat, hwe ogun ukpoluk, ap mu a’ge wasu ai ’gela’ge, An uknoboluk aphwami enasua ogut hele’gik a’ge enil hogulat, nis aiat motluk lolo a’ge logwe, oluk enede epegesa ano pam nenede wusogo nenebegesa a’ge ano, enede ebetholuk wiak til lagalat, onogorlok en ogoiye togwi a’ge ano til lagalat, tigisa a’ge ano pobirak poluk, nis wiak eme lukho pegesa a’geat de, tigema hege o, oluk, opouwa ani o. 10Is en An Allah at enaluk agalat, ye, e’gin enebam pegi a’ge yu ano re, weat tagonobo erlak is tigisa ano pam enat takpesi oluk enaluk agalat, tua o,” oluk, mo’gulnesimu re, mo’gulhentegis o.
11At otok modok welago a’ge Allah en egei ano re, yuat o. Is Israel a’ge en wiak onogorlok modok a’ge nak a’bik til lagai ano pam wa’gun pam enebe werak ’gelil agalat, so’boru obouk pam en waragalat, ou edip wiak a’ge enebam otluk waragalat, tuama re, ene’gik yabo, onoyuk yabo hogulat, eniak loksogo eiga-ouga oluk ogu lemak o. 12Is o walekma oruak a’ge ebano ou edip wiak a’ge en waragalat, is horokho welagai a’ge ebano wa’gun pam werak ’gwiang pam ’gelil agalat, ye, ’gelilogo ugonobogwi a’ge ano so’boru obouk en waretil lagalat, tua o. Asogo takpil lasuam, nolot het epasu a’ge ano nolot het ano yamuk ua o.
13Di dom yu dom logo a’ge pam emin, dom-dom yat a’ge a’gul pam emin, di agan yu agan e’gela duelak edipmu emin, e lok a’ge esemis daintak a’ge edipmu emin, is e’ben op ago a’ge enasua paget odouk narlogumu ’berlegat eneiyagai enebe werak enasua ebaget wusogo wogogumu o’borl-o’borl ’gelil etil legenak oruak holuk e, Allah Anat enaluk ema o. 14An ne’gik anni pam is sebelak enebasulat, ye, is welagaimu ’berlegat ono’gwiang o lei horogap poluk ’bekhit, o Ribla hwerli ’bekhit, o. Ribla hwerli di iak yu iak erlagapsogo pasulat, tik, o. Asogo tagoam, Allah anat enaluk ema o, oluk, an mo’gulnesimu re, mo’gulhentegis o, oluk mo’gulentegis ai o.
Currently Selected:
Yehezkiel 6: Wul
Highlight
Copy
Compare
Share
Want to have your highlights saved across all your devices? Sign up or sign in
