Yehezkiel 5
5
Yehezkiel asu ’balegei wene
1At ’gain onuk logo a’ge en an mo’gulneselat, aphwami en dogo a’ge yu o. ’Garok e’gat a’bik a’ge mesik waguntik enemde asu ’balogwi a’ge ’gela’ge, takpoluk hasu ’baliselat, hemde asu ’baliselat taga loroguntik, e’gin walholuk e, henagan me’gisogo pomup o. 2Me’gisogo poluk, o kota sebeli’gwilo a’ge walhegeik tagalat, nogo disogo u o, oluk wene werak a’ge ano arat ago holuk, hasu ’belak a’ge mesik me’gerik a’ge ano, o kota ogut hele’gik eragam o’gwe odouk narliselat, mesik me’gerik a’ge ano o kota o’borl olukhwe ’garok ai pam ’balogo pil lasulat, ye, mesik me’gerik a’ge ano o yasobu wago a’ge ano pam punsogo nelak pasulat, tip o. Ye o, yasobu wago a’ge ano pam pusogo lasu a’ge ano, an en wa’gun pangsogo mugonoboluk lasu leik o. 3Ye, hasu mesigat nak ’gegilogo hosum ologun pam erlilogo po a’geat de, 4mesik ’gigik odouk orloukmu hwik hagunmu odouk at nouwak o, eba en odouk magale til wagalat, is Israel a’ge ’berlegat nil lasu lema ani o.
5’Gain Nonuk logo welegi a’ge An Allah en, di aphwami yu aphwami onowi edipmu, wale’gik oruak a’ge, kota ede ’burlmu modok pegi a’ge ai kota Yerusalem yuat a’geat de, 6di aphwami yu aphwami emin, di owi yu owi welagai a’ge emin, at eragam ’gwigisarik a’ge ai re, an niak wene werak a’ge holuk ogo, wene le’gelak mo’gulentasu legi a’ge ogo tugulom nenebit o, oluk, ukpegesa ano re, elalinat a’geat de, at Yerusalem ai wiak til lasulat, ukpesi ai nak e, modok elalinat o. Niak wene werak a’ge ano ukpasulat, wene le’gelogo mo’gulentasu legi a’ge ano motluk lo erlakma en sagalogo ukpogulat, tigisa o, oluk, an mo’gulnosoma hegi o.
7Asogoatma re, at ’Gain Onuk logo welago a’ge en egei ano yuat o. Di aphwami yu aphwami o’borl-o’borl, oruak a’ge eba, enebabut wiak ’gela’ge oruakhweat de, at Yerusalem ai nage ebabut modok wiak welat, an niak le’gelak mo’guloso a’ge ano motluk lo erlakma en ukpasulat, tugulom wene ano tu erlakma en sagalogo pasulat, is di aphwami yu aphwami o’borl-o’borl oruak a’ge ebano en tugulom wene le’gelak a’ge ano ogo tu erlakma en ukpogulat tago, egeimu re, hat o Yerusalem yu mo’gulhegis o.
8At Allah otok modok welago a’ge ano en eselat, “Asogoatma re, at Yerusalem ai re, ne’birek il’balagalat, di aphwami yu aphwami enil oruakhwe wiak o’go e’gin a’ge ebam pasulat, tik o. 9At en enemelmel a’ge onuk logo pasulat, erliktil lasu ano an nebit modok epasumu re, an en takpasu erlak a’ge at en takpasulat, pobuk at takpo puk a’ge takpasulat, tuama re, 10#Rat. 4:10At e’gerlakma eba en is enaiklak en eneiyagai lo’bok enebe wusogo no’gulat, ye, is eneiyagai en enaiklak enebe wusogo no’gulat, tugulema o, wiak o’go e’gin ebam pasulat, is ado ’bullak a’ge ebano o yasobu ’gela’ge, peragonoboua o.
11At en onogorlok a’ge ogut heli’gik ano an nowi arat omu degelak a’ge werikmu ebano ’gwelebak pasulat, wiagapsogo pasulat, enemelmel a’ge til lagalemagoluk, ukpasulat, taga laga ano pam an en obap pasulat, nedeap pasulat, ebe nede en tago ano, logon emin, takpasu leik erlak o, oluk, nelaluk ’gain nonuk logo welago a’ge notok welegi a’ge An Allah Nonuk ho’buk ’balholuk egi ai o. 12O kota Yerusalem ogola eba at emalik ado me’girik ou pam en de a, so’boru obouk pam en a, waragalat, kota pak wogo a’ge o’borlma ado me’gisogo wa’gun pam werak a’ge waragalat, ye, pema me’girik o yasobu edip-edip wetil lasu ’gela’ge perakpasu iktik, nua’gun enebam ’bilogo mugonoboluk lasuam, waragalat, tua o.
13Asogo togwiam, nolot het ago a’ge ano erlak agalat, nolot het en tagenebaik epasu a’ge ano siok eselat, modok hegitsogoat takpegi o, oluk nede yamuk eselat tik o. Oluk nolot het epasu a’ge ano ’berlegat takpo a’ge erlak ago holuk, at Allah modok olot het pam mo’gulnentesimu hege o, oluk, enaluk ema o. 14O kota Yerusalem ai, moluk-melaksogo wiagap pasulat, di aphwami yu aphwami at wali’gogo o’borl-o’borl egesarik oruak a’ge ebano ebela ’gwe ai lagalat, tak paik a’ge ebano enil holuk e, disogo tu a’ge de welaga yu yet o! aha oluk, ogulemagoluk takpasulat, tik o.
15An nolot het agalat, nebam haro en niak ’beraksogo wene yagentasulat, asogo tagalat, wiak o’go takpasuam, is di aphwami yu aphwami ono’borl o’gwe welagai a’ge ebano en at mi-miarak pogulat, opsogo takpegi oluk, hweinat! ogulat, yetholuk onogorlok hogulat, at ebe nogorlok e, oluk ogulat tua o, oluk, ’Gain Nonuk logo a’ge an Allah enat egi o.
16Dok ’besing hailagai ai ’gela’ge, is waremagoluk, so’boru obouk modok mia a’ge enebam perakpou wagalat, so’boru nele en enebe ninonouksogo yel worogulemagoluk, onso’boru erlagap pasulat, tik o. 17#Wah. 6:8So’boru obouk enebam perakpou wagalat, enanni a’bik a’ge parema oruak a’ge ene’bek perak onobou wagalat, tagoam e, ’guagalemarik enemalik enebe dengsogo nouwa o. Ou edip wiak a’ge enebam pasulat, enemep yat wiak louwagoluk takpasulat, wa’gun pam waronobuagoluk perak onobou wagalat, tik, o oluk, An Allah enat egi o,” oluk, egeimu en, mo’gulhentegis o, oluk, mo’gulentesi.
Currently Selected:
Yehezkiel 5: Wul
Highlight
Copy
Compare
Share
Want to have your highlights saved across all your devices? Sign up or sign in
