Yehezkiel 7
7
O Yerusalem erlagapsogo po a’ge arat horok lau waga wene
1At Allah en an mo’gulneselat,
2“Aphwami en dogo a’ge yu o. ’Gain Nonuk logo a’ge an Allah en is Israel ono’gwiang mo’gulonto ano yuat o. O ologun pam horok lauwaga o. Ono’gwiang edip le’gik ’belak etleba yema takpo a’ge ano arat horok lau waga o.
3Israel a’ge welagaimu nolot het enebam pasulat, enebabut wiak welagai a’ge ano hegitsogoat onuak lol enebiselat, wiak ogoiye togwi a’ge til lagai ano o’go hegitsogoat tagenebasulat, tu a’ge o yogodagat horok lau waga o. 4An en is nedeap enebiselat, nede o, oluk ugenebasulat, tu erlakma en is enebabut wiak welagai ai ’gela’geat o’go enebam pasulat, ene’gerlakma wiak ogoiye togwi a’ge til lagai ano o’go tagenebasulat, tago holuk is en ’Gain Nonuk Logo a’ge anat enaluk ema o, oluk, mo’gulnesimu en, mo’gulhentegis o.
5At Allah otok modok welago a’ge Allah en egei ano re yuat o. E’gin a’ge mesik enebam lau wagalat, mesik enebam lau wagalat, tagokhwe enil hogu lema ani o. 6Is tagonobo erlige o agauwa horok lau wagalat, is tagonobo a’ge arat horok lau wagokhwe, is sebelogo onobo a’ge arat enak agalat, arat wagalat tegei o. 7Is ’gwiang ai pam welagai a’ge ano e’gin-pe’gin enebam om a’ge lau wagalat, tagonobo erlige pulik a’ge ano lau wagalat, tagonobo a’ge agauwa ano arat welat, tegeimu re, is welagaimu dom-dom petne eba onogola enagai hogwi erlakma no oluk e enede yarluk ogulat, eniak eli orluk no’gwi o.
8An nolot het enebam pasulat, nolot het ’berlegat ’gollosogo enebam herlilogo pil lasulat, tik oluk, tagoma re, enebabut wiak welagai a’ge ano hegitsogoat at onuak lol enebiselat, wiak a’ge modok til lagai a’ge ano o’go tagenebasulat, tik o. 9An en enebe nedeap enebiselat, nede en ugenebasulat, tik erlak enebabut wiak welagai ai ’gela’geat o’go enebam pasulat, ene’gerlakma wiak enemelmel a’ge til lagai a’ge ano, o’go tagenebasulat, tago holuk e, is en ’Gain Nonuk Logo a’ge Allah an enat enebe erlagapsogo enebaikmu enaluk ema o.
10Asogo tagonobo a’ge o agauwa ano arat horok lau wagalat, e’gin-pe’gin enebam agalat, is aphwami enebabut en til lagai a’ge ano weiyal agalat, enede en logo pil lagai ai a’ge nak lis hogulat, togwi o. 11Enede il ’balogo welat il lagai ano pam ai a’ge nak weiyal agalat, isat enebe emin ena’ge-a’ge emin, ena’ge op a’ge oruak a’ge ano emin, mesik ukpo erlakma en ’berlegat erlagapsogo pogwi o.
12Ai tagonobo a’ge agauwa horok lau wagalat, tagonobo a’ge agauwa arat polik a’ge ano arat lau wagalat tago yo. Wiak o’go ’gain nonuk logo a’ge Allah nolot het aphwami ’berlegat enebam paik oluk tagoma re, is aphwami o’go bal horlogwi, a’ge ebano enagai a’bik hogulat, ye aphwami en o’go bal horlouwagoluk, ena’ge tenakho oruak a’ge en enede wathorlogulat, togumu no yo. 13Is aphwami ’berlegat tagonobo a’ge habi ’gela’ge pam mo’gulhegis a’ge ano re, dagan ua erlakma re, at o’gwiang o’go ’bal hwerlasu a’ge ano at pobuk eiyetak pagathorlo erlakma enat warema o. Is aphwami o’go ’balhorlogulat, aphwami en o’go ’bal horlouwagoluk ena’ge tenakho welat, togwi a’ge ebano en wiak til lagai ano pam enebe eneli horlo erlakma en ena’guluak erlagapsogo onobouwa o. 14Nolot het is ’berlegat enebam po a’ge polik ano arat horok lau wagama re, weim enemin tuogoluk iak lok oso a’ge trompet ano iak pu hogulat di a’ge yu a’ge weim togwi a’ge leik-louk takpogulat, togwi a’geat de, ap mesigat a’ge nak mesik weim til ’gwilouwa modok erlak at o, oluk, egeimu re, mo’gulentegis o.
Israel onowiak o’go tagonobo wene
15O kota o’borlma wa’gun ’gwi’gwiasogo welat, o kota ogola re, ou modok wiak a’ge welat, so’boru obouk agalat, tak oruakma re, is o kota o’borlma oruak a’ge holuk e, wa’gun pam wusogo waragalat, o kota ogola oruak a’ge ebano welagai a’ge ano so’boru obouk pam emin, ou edip wiak a’ge pam emin, enat waragalat, tugu lema o. 16Is ado ene’gerlakma en tak a’ge ’bogolil dom-dom petne louwarik welat, is onomuat onowiak pam tue eniak ogwi ai ’gela’ge enede wathorlogulat, eiga-ouga ogulat, 17Is ’berlegat ene’gik anni erlagap pasulat, is ’berlegat enemie salik-palik lis hogulat ’bogolua o. 18Asogo tugulat, onosum derleptak a’ge ’buktugulat, onogorlok nak enagap pam agalat, ene’gerli en onorogole hisakho nak agalat ena’gul ’bie nak agalat tua o. 19Is ono uang perak ebano, ebela ’gwe hwikhil lagalat nono uang besi emas ai op erlak wiagat o, oluk, ogulat, tugu lema, o. ’Gain Nonuk Logo a’ge Allah nolot het enebam po ai erlige ono uang perak emin, emas emin, en is enagap delenebiselat, tiso ai pam en is onogum ning tagenebasu, ai pam en e, onogum agalat, tua a’ge erlakhweat de, we nonoyuk a’gul dungsogo wiagapnonobo a’ge paget de, tenakho welegema hegi o, oluk, ogulema o.
20Is en perak a’ge pam, emas pam, enebetne modok ebil-ebeltak poluk, legi lago no’gu legesa a’ge ebano, no’gorlogo ai pam asua enemelmel tu puk a’ge enasua ano takpogulat, enasua ogut enemelmel a’ge heli’gogo pogulat, tugu legesema re, is ebenagaikmu en, enemelmel atma re, eige, uagoluk, tak paik o.
21Tak a’ge ano re, ’berlegat is ap mu a’ge en horloluk louwagoluk, ene’gikmu pasulat, is ap wiak togwi a’ge o ’gwiangma yema a’ge en hogul woluk louwagoluk wogentasulat, tago holuk e, ena’ge-a’ge tak a’ge ebano, wiagap pogulat togu lema o. 22Is welagaimu ebano en nolukhwe edenogo yethaik ’gal e, is ap yogot wogwi a’ge ’gumarik, an nowi werikmu di a’ge yu a’ge o’go a’bik a’ge ebano wiagap pogulat, nowi werik emin, ogorlok erlagapsogo pogulat, tua o.
23O eba aphwami a’bik enebe werak ’bete eselat, o kota eba, enede erlak en we yogunat til lagai a’ge ebano nak wigal agalat, tagoma re, besi herle leik-louksogo pagathorlogu lemak o. 24Di aphwami yu aphwami enanni a’bik a’ge wagalemarik, is aphwami Israel a’ge ai onowi eiyerak pagathorlouwagoluk, takpasulat, is enanni pam enede logo pil lagai a’ge ano sebelogo enebasulat, tagoam di owi yu owi asuama ebano ogorlok, erlagat ema o. 25Onogorlok hil lo a’ge enebam lau wago holuk e, enede en we yamuktak wollo e, eige, oluk, opogulema a’geat de, erlagat houwa o. 26E’gin pe’gin tagonobou wago nak welat, disogo takhonobouma ani o, oluk, mo’gulentauwago nak welat, togwi holuk e, Allah en mo’gulentasukhwe mo’gulentasu a’ge en enabi pam mo’gulnentelep oluk opogulat, Allah eiye a’ge en tugulom wene mo’gulnontouwak o, oluk, ogulat, ye, nonuelak en wene hwalogo nonobouwak o, oluk ogulat, togulema a’geat de, erlagat houwa o. 27Ap ’gain mesik en nge tagalat osilak ’gain-’gain ebano en, nis en mesik tu a’ge erlagat hege o, oluk, enede erlak agalat, aphwami o eba welagai a’ge ’berlegat en alik wetil lagalat, tua o. Is tugu legesa o’go hegit hegirat tagenebasulat, is aphwami wiak togwi holuk e, wene enebam erlagap pasu a’ge motlugat erlagap pasulat tago holuk e, ’Gain Nonuk Logo a’ge Allah Anat enaluk ema o,” oluk, egeimu re, mo’gulhentegis o, oluk mo’gulentegis o.
Currently Selected:
Yehezkiel 7: Wul
Highlight
Copy
Compare
Share
Want to have your highlights saved across all your devices? Sign up or sign in
